ບໍລິສັດ ລາວ ໂທລະຄົມມະນາຄົມ ມະຫາຊົນ ຈັດພິທີເປີດນໍາໃຊ້ລະ ບົບ 5G ເຊິ່ງເປັນເຄືອຂ່າຍທໍາອິດໃນ ສປປ ລາວ ຢ່າງເປັນທາງການໃນວັນ ທີ 31 ສິງຫາ 2020 ທີ່ໂຮງແຮມ ລາວພລາຊາ, ນະຄອນຫຼວງວຽງຈັນ ໂດຍມີ ທ່ານ ທັນສະໄໝ ກົມມະສິດ, ລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ສານ, ພ້ອມດ້ວຍຄະນະນໍາກະຊວງ, ບັນດາຫົວໜ້າກົມ -ຮອງກົມອ້ອມຂ້າງກະຊວງ ປທສ, ຄະນະອໍານວຍການ, ຜູ້ບໍລິຫານ ແລະ ພະນັກງານ ລາວ ໂທລະຄົມ ເຂົ້າຮ່ວມ.

ໃນໂອກາດກ່າວເປີດພິທີ ທ່ານ ສຸພົນ ຈັນທະວີໄຊ ຜູ້ອໍານວຍການໃຫຍ່ ບໍລິສັດ ລາວ ໂທລະຄົມມະນາຄົມ ມະຫາຊົນ ໃຫ້ຮູ້ວ່າ: ເພື່ອຈັດຕັ້ງຜັນຂະຫຍາຍແນວທາງຂອງພັກ, ນະໂຍບາຍຂອງລັດ ກໍຄື ວຽກງານຂອງ ກະຊວງ ປທສ ໃນການຫັນການບໍລິການໂທລະຄົມເປັນທັນສະໄໝ ສາມາດເຊື່ອມໂຍງກັບພາກພື້ນ ແລະ ສາກົນ ໂດຍສະເພາະໃນຍຸກເສດຖະກິດ ດີຈີຕານ 4.0 (Digital Economy Era). ປັດຈຸບັນ ໄດ້ມີຫລາຍປະເທດໃນທົ່ວໂລກ ແລະ ຂົງເຂດອາຊີ ໄດ້ທົດລອງນຳໃຊ້ເຕັກໂນໂລຊີ 5G ເຂົ້າຮັບໃຊ້ສັງຄົມຢູ່ໃນຫລາຍຂົງເຂດວຽກງານ ເຊັ່ນ: ທາງດ້ານທຸລະ ກິດອອນລາຍ E commerce, ນໍາໃຊ້ປັນຍາປະດິດ ຫຼື Ai, IoT, Robotic ເຂົ້າຢູ່ໃນຂົງເຂດອຸດສາຫະກຳ, ກະສິກຳ ແລະ ການແພດເປັນຕົ້ນ ຊື່ງລ້ວນແລ້ວແຕ່ເປັນການສ້າງເງື່ອນໄຂໃຫ້ສັງຄົມ ຫລື ຜູ້ຊົມໃຊ້ມີວິຖີຊີວິດນັບມື້ນັບສະດວກ, ວ່ອງໄວ ແລະ ມີຄວາມປອດໄພສູງ.
ກ່ອນໜ້ານີ້ ຄືໃນວັນທີ 8 ຕຸລາ 2019 ລາວ ໂທລະຄົມ ໄດ້ເປີດທົດລອງນໍາໃຊ້ລະບົບ 5G ມາແລ້ວຄັ້ງໜຶ່ງ ເພື່ອເປັນການກຽມຄວາມພ້ອມດ້ານຕ່າງໆ ກ່ອນການເປີດໃຫ້ບໍລິການຢ່າງເປັນທາງການ. ສຳລັບໃນງານຄັ້ງນີ້ໄດ້ມີການສາທິດບັນດາ show case ຈຳນວນໜຶ່ງທີ່ທີມງານໄດ້ກະກຽມສະ ແດງໃຫ້ເຫັນວ່າ ລະບົບ 5G ມີສັກຂະຍະພາບທີ່ທັນສະໄໝ ແລະ ຄວາມໄວໃນການສົ່ງຂໍ້ມູນເທົ່າໃດ.
ສຳລັບພື້ນທີ່ໃຫ້ການບໍລິການລະບົບ 5G ໃນເບື້ອງຕົ້ນ ລລທ ຈະໃຫ້ບໍລິການຢູ່ໃນບາງພື້ນທີ່ຂອງນະຄອນຫລວງວຽງຈັນກ່ອນໂດຍສະເພາະຢູ່ບໍລິເວນຈຸດຊູມຊົນໃຈກາງເມືອງ ເຊັ່ນ: ເຂດສີຫອມ, ຕະຫລາດກາງຄືນແຄມຂອງ, ເຂດສາຍລົມ ແລະ ມະຫາວິທະຍາໄລແຫ່ງຊາດ (ວິທະຍາເຂດດົງໂດກ). ຫລັງຈາກນັ້ນ ໄລຍະສອງ ຈະຂະຫຍາຍໄປສູ່ບັນດາແຂວງໃຫ່ຍໃນປະເທດ.
ລະບົບ 5G ມີຄຸນສົມບັດພິເສດຫຼັກໆ ຢູ່ 3 ຢ່າງທີ່ແຕກ ຕ່າງກັບລະ ບົບ 4G ຄື: ຄວາມໄວ, ຄວາມສາມາດຮອງຮັບການເຊື່ອມຕໍ່ກັບອຸປະກອນ ແລະ ເວລາໃນການຕອບສະໜອງ:
 ຄວາມໄວ: ຄວາມໄວໃນການຮັບ-ສົ່ງຂໍ້ມູນທີ່ໄວກວ່າ 4G ເຖິງ 20 ເທົ່າ ຕົວຢ່າງ: ເມື່ອໂຫຼດໜັງທີ່ມີຄວາມຍາວ 2 ຊົ່ວ ໂມງ 4G ຈະໃຊ້ເວລາປະມານ 6-7 ນາທີ ໃນຄະນະທີ່ 5G ຈະໃຊ້ເວລາພຽງ 3-4 ວິນາທີ, ການເບິ່ງຮູບເງົາແບບ online ທີ່ມີຄວາມລະອຽດສູງລະດັບ HD 4K, 8K ຈະບໍ່ເປັນອຸປະສັກອີກຕໍ່ໄປ, ສາມາດປົດລ໋ອກຄຸນສົມບັດສູງສຸດຂອງ AR (Augmented Reality) ແລະ VR (Virtual Reality) ກັບປະສົບການທີ່ສົມຈິງທີ່ເກີດຈາກການໃຊ້ຂໍ້ມູນຈໍານວນຫຼາຍໃນການປະມວນຜົນ ເຊິ່ງ 5G ຈະຕອບໂຈດການສື່ສານຜ່ານ AR ແລະ VR ໄດ້ຢ່າງສົມບູນແບບ.
 ຄວາມສາມາດຮອງຮັບການເຊື່ອມຕໍ່: ຈໍານວນການເຊື່ອມຕໍ່ທີ່ສາ ມາດຮອງຮັບອຸປະກອນໄດ້ຫຼາຍກວ່າ 4G 10 ເທົ່າ ຫຼື ເທົ່າກັບ 1,000,000 ອຸປະກອນ/sq.km ດ້ວຍລະບົບ 5G ຈະເປີດໂລກ IOT (Internet of Things)ໄດ້ຢ່າງແທ້ຈິງ ແລະ ຈະເປັນພື້ນຖານເພື່ອຮອງຮັບການພັດທະນາເຕັກໂນໂລຊີ Smart Home, Smart City, Smart Transportation ,Smart life, Smart health ແລະ ອຶ່ນໆໂດຍສັ່ງການຜ່ານມືຖືຂອງຄົນເຮົາໄດ້ ຫຼື ອຸປະກອນແຕ່ລະຊະນິດສາມາດສື່ສານກັນເອງໄດ້, ຄວບຄຸມກັນໄດ້ ແລະ ເຮັດວຽກປະສານກັນໄດ້ຢ່າງອັດຕະໂນມັດ.
 ເວລາໃນການຕອບສະໜອງ/ໂຕ້ຕອບ: ສັ້ນລົງ ເຖິງ 1 ມິນລີວິນາທີ (1 ms) ດ້ວຍຄຸນສົມບັດພິເສດດັ່ງກ່າວ 5G ຈະສາມາດຕອບໂຈດ ໃນສ່ວນຂອງກຸ່ມຄົນທີ່ມັກຫຼີ້ນເກມເຊິ່ງຕ້ອງການຄວາມໄວໃນການໂຕ້ຕອບສູງ ຫຼື ເວົ້າອີກຢ່າງຄືຖ້າ Latency ຍິ່ງຕໍ່າແມ່ນຍີ່ງດີ, ຕອບໂຈດການຂັບຂີ່ແບບບໍ່ມີຄົນຂັບທີ່ມີຄວາມປອດໄພສູງ ແລະ ນໍາໃຊ້ໃນທາງການແພດເຊັ່ນ: ການຜ່າຕັດທາງໄກ ແລະ ອຶ່ນໆ.

Loading...