ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ລາວ-ໄທ ປຶກສາຫາລືເພີ່ມທະວີການຮ່ວມມືດ້ານວຽກງານວັດທະນະທໍາ

ວັນທີ 16 ກັນຍາ 2020 ທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ໄດ້ພົບປະກັບທ່ານ ອິດທິພົນ ຄຸນປື້ມລັດຖະມົນຕີກະຊວງວັດທະນະທຳ ແຫ່ງຣາຊະອານາຈັກໄທ ຜ່ານລະບົບວີດີໂອ ເພື່ອພ້ອມກັນຕີລາຄາຄືນການຮ່ວມມືກັນໃນໄລຍະຜ່ານມາ ແລະ ປຶກສາຫາລືແຜນ ການຮ່ວມມືໃນຕໍ່ໜ້າ, ເພື່ອປະກອບສ່ວນໃຫ້ແກ່ການກະກຽມສະເຫລີມສະຫລອງ ວັນສ້າງຕັ້ງສາຍພົວພັນການທູດລາວ-ໄທ ຄົບຮອບ 70 ປີໃຫ້ເປັນຂະບວນການຟົດຟື້ນໃນປີ 2020 ນີ້.

ໃນການພົບປະຄັ້ງນີ້, ທ່ານ ກິແກ້ວ ໄຂຄໍາພິທູນ ໄດ້ລາຍ ງານສະພາບການລະ ບາດຂອງພະຍາດໂຄວິດ-19 ຢູ່ລາວ ທີ່ສາມາດເອົາຊະນະການລະບາດຂອງພະຍາດດັ່ງກ່າວໄດ້ໃນເບື້ອງຕົ້ນ. ທ່ານມີຄໍາເຫັນຕື່ມວ່າ: ລາວ ແລະ ໄທ ເປັນປະເທດບ້ານໃກ້ເຮືອນຄຽງທີ່ມີພູຜາປ່າໄມ້, ແມ່ນ້ຳລຳເຊ ແລະ ຊາຍແດນຕິດຈອດກັນ ມີວັດທະນະ ທຳ ແລະ ປະເພນີທີ່ຄ້າຍຄືກັນ, ປະຊາຊົນສອງຊາດມີມູນເຊື້ອແລກປ່ຽນການຢ້ຽມ ຢາມ ໄປມາຫາສູ່ ຊຶ່ງກັນ ແລະ ກັນ ຕະຫລອດມາ. ພິເສດໃນປີ 2020 ນີ້ ສອງປະເທດມີແຜນຈະຈັດຕັ້ງການສະເຫລີມສະຫລອງວັນສ້າງຕັ້ງສາຍພົວພັນການທູດນໍາກັນຄົບຮອບ 70 ປີ ຊຶ່ງຈະມີຫລາຍກິດຈະກໍາປິ່ນອ້ອມການສະຫລອງວັນສໍາຄັນດັ່ງກ່າວ, ແຕ່ເນື່ອງຈາກວ່າການລະບາດຂອງພະຍາດໂຄວິດ-19 ຈຶ່ງເຮັດໃຫ້ຫລາຍກິດຈະກໍາບໍ່ສາມາດຈັດຕັ້ງປະຕິບັດໄດ້.

ຢ່າງໃດກໍຕາມ, ໃນປີຜ່ານມາ, ສອງປະເທດໄດ້ປະຕິບັດການຮ່ວມມືໃນຂົງເຂດວັດທະນະ ທຳດ້ວຍຫລາຍຮູບ ແບບໃນຂອບການຮ່ວມມືສອງຝ່າຍ ແລະ ຫລາຍຝ່າຍ ທັງໃນພາກພື້ນ ແລະ ສາກົນຢ່າງຟົດຟື້ນ; ໃນນັ້ນ, ລວມມີກິດຈະກໍາສາຍຮູບເງົາແອນິແມຊັນເລື່ອງ “ພະລັກ-ພະລາມ ຫລື ບົດກະວີ ຣາມາຍານະ”, ການແລກ ປ່ຽນສິລະປະການສະແດງຈັດສຳມະນາດ້ານວິຊາການ,ການວາງສະແດງຮູບພາບ ຊຶ່ງໄດ້ຈັດໃຫ້ມີການພົບປະແລກປ່ຽນຄຳຄິດຄຳເຫັນ ເພື່ອເຮັດໃຫ້ການຮ່ວມມືທາງດ້ານວັດທະນະທຳຂອງສອງປະເທດໄດ້ມີບາດກ້າວອັນໃໝ່, ເຮັດໃຫ້ປະຊາຊົນສອງຊາດມີຄວາມເຂົ້າອົກເຂົ້າໃຈກັນ ແລະ ຮັບຮູ້ຢ່າງກວ້າງຂວາງ ກ່ຽວກັບໄມຕຣີຈິດມິດຕະ ພາບ ແລະ ສາຍພົວພັນອັນດີງາມລະຫວ່າງລາວ-ໄທ, ໄທ- ລາວ ທີ່ມີມາແຕ່ ດົນນານ; ນອກນີ້ ສອງປະເທດຍັງໄດ້ຮ່ວມມືກັນໃນຂອບຫລາຍຝ່າຍ, ພ້ອມທັງສະໜັບ ສະໜູນ ຊຶ່ງກັນ ແລະ ກັນ ໃນເວທີສາກົນ ເຊັ່ນໃນຂົງເຂດພາກພື້ນແມ່ນ້ຳຂອງອາຊຽນ ແລະ ເວທີສາກົນຕ່າງໆ.

 

 

 

 

 

ທ່ານ ກິແກ້ວ ໄຂຄໍາພິທູນ ຍັງໄດ້ສະແດງຄວາມເຫັນດີເປັນເອກະພາບແລະ ຂອບ ໃຈມາຍັງ ທ່ານ ລັດຖະມົນຕີວັດທະນະທໍາແຫ່ງ ຣາຊະອານາຈັກໄທ ທີ່ໄດ້ມີຂໍ້ລິເລີ່ມຈັດຕັ້ງການສະແດງດົນຕີ ແລະ ສິລະປະວັດທະນະທໍາພື້ນບ້ານ ພາຍໃຕ້ຫົວຂໍ້: “ນໍ້າຂອງບໍ່ກັ້ນໂຄວິດບໍ່ໃກ້ ຮັກແພງແບ່ງປັນ ແລະ ໝັ້ນຄົງ 70 ປີ” ເຊິ່ງຈະຈັດຂຶ້ນທີ່ໂຮງລະ ຄອນແຫ່ງຊາດ, ໃນວັນທີ 28 ກັນຍາ ທີ່ຈະມາເຖີງນີ້ທີ່ນະຄອນຫລວງບາງກອກ, ປະເທດໄທ. ການສະແດງດັ່ງກ່າວ, ຖືເປັນກິດຈະກຳທີ່ມີຄວາມໝາຍສຳຄັນປະກອບສ່ວນສະເຫລີມສະຫລອງວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະ ຣາຊະອານາຈັກໄທ ຄົບຮອບ 70 ປີ, ໃນງານດັ່ງກ່າວ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວແຫ່ງ ສປປ ລາວ ຈະໄດ້ກ່າວຄຳປາໄສ ລວມທັງນຳເອົາລາຍການສິລະປະວັດທະ ນະທຳ ທີ່ມີເອກະລັກອັນໂດດເດັ່ນ ແລະ ສາລະຄະດີ ການທ່ອງທ່ຽວຂອງລາວຫລາຍລາຍການມາສະເໜີຜ່ານລະບົບວີດີໂອນໍາດ້ວຍ.

ສໍາລັບທິດທາງການຮ່ວມມືໃນຕໍ່ໜ້ານີ້, ສອງຝ່າຍໄດ້ເຫັນດີ ສືບຕໍ່ຈັດຕັ້ງປະຕິບັດວຽກງານທີ່ໄດ້ຕົກລົງຮ່ວມກັນໃຫ້ເປັນຮູບປະທໍາ ແລະ ມີປະສິດທິຜົນ, ພ້ອມທັງເອົາ ໃຈໃສ່ຈໍາກັດ, ແກ້ໄຂຂໍ້ຫຍຸ້ງຍາກທີ່ເປັນຜົນມາຈາກພະຍາດ COVID-19 ໃນດ້ານການບໍລິການ, ທ່ອງທ່ຽວ ແລະ ສືບຕໍ່ຮ່ວມມືປະຕິບັດແຜນການຟື້ນຟູຫລັງການລະບາດຂອງພະຍາດ ເພື່ອຫລຸດຜ່ອນຜົນກະທົບຂອງພະຍາດ Covid- ທີ່ມີຕໍ່ຊີວິດການເປັນຢູ່ຂອງປະຊາຊົນ ແລະ ເສດຖະກິດຂອງສອງປະເທດ.