ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມເຮັດວຽກ ທີ່ ຣາຊະອານາຈັກໄທ, ເຂົ້າຮ່ວມງານບຸນປີໃໝ່ລາວທີ່ ສະຖານທູດລາວ ປະຈໍາຣາຊະອານາຈັກໄທ ທີ່ ບາງກອກ ແລະ ເຂົ້າຮ່ວມພິທີເປີດຫໍວັດທະນະທໍາຄົນໄທເຊື້ອສາຍລາວຄັ່ງ ທີ່ ວັດພຸນໍ້າຮ້ອນ, ອໍາເພີດ່ານຊ້າງ, ຈັງຫວັດສຸພັນບູຣີ,ໃນວັນທີ 22-25 ເມສາ 2024.
ໃນວັນທີ 24 ເມສາ 2024, ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ຢ້ຽມຢາມເຮັດວຽກທີ່ ຣາຊະອານາຈັກໄທ ແລະ ພົບປະສອງຝ່າຍ ກັບ ພະນະທ່ານ ປານປຣີ ພະຫິດທານຸກອນ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ. ການພົບປະຄັ້ງນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ຄວາມເຂົ້າອົກເຂົ້າໃຈກັນ, ເຊິ່ງ ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການພົບປະກັນອີກຄັ້ງໜຶ່ງ, ເຊິ່ງສະແດງໃຫ້ເຫັນເຖິງການພົວພັນທີ່ໃກ້ຊິດສະໜິດສະໜົມ ແລະ ເປັນການປະກອບສ່ວນອັນສຳຄັນ ໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີທີ່ມີມາແຕ່ດົນນານຂອງສອງປະເທດກໍ່ຄືຊຸກຍູ້ ແລະ ຜັນຂະຫຍາຍແຜນປະຕິບັດງານ ວ່າດ້ວຍການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ 2022-2026 ໃຫ້ໄດ້ຮັບການຈັດຕັ້ງປິບັດຢ່າງເປັນຮູບປະທໍາ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດລາວ ແລະ ໄທ.
ໃນໂອກາດນີ້, ສອງຝ່າຍ ໄດ້ປຶກສາຫາລື ແລະ ທົບທວນຄືນການພົວພັນຮ່ວມມືສອງຝ່າຍໃນດ້ານຕ່າງໆພ້ອມທັງກໍານົດແຜນການຮ່ວມມືໃນຕໍ່ໜ້າ ເປັນຕົ້ນແມ່ນການຮ່ວມມືທາງດ້ານເສດຖະກິດ, ການຄ້າ-ການລົງທຶນ, ການເຊື່ອມໂຍງ-ເຊື່ອມຈອດ,ສອງຝ່າຍຈະສືບຕໍ່ປຶກສາຫາລືກັນ ເພື່ອເພີ່ມບໍລິມາດທາງດ້ານການຄ້າສອງຝ່າຍໃຫ້ຫຼາຍຂຶ້ນຕື່ມ, ການເຊື່ອມຈອດຂົວ-ທາງ ແລະ ທາງລົດໄຟ ກໍ່ຄື ການສ້າງຂົວລົດໄຟສະເພາະ, ການທ່ອງທ່ຽວ ລວມທັງການທ່ອງທ່ຽວຕາມເມືອງຮອງ ແລະ ບັນດາແຂວງຕາມຊາຍແດນ ລາວ-ໄທ, ການຮ່ວມມືເພື່ອການພັດທະນາ, ສາທາລະນະສຸກ, ກະສິກໍາ ແລະ ປ່າໄມ້, ແຮງງານ, ຊັບພະຍາກອນທໍາມະຊາດ ແລະ ສິ່ງແວດລ້ອມ, ລວມທັງການຮ່ວມມືກັນໃນການຄຸ້ມຄອງບັນຫາໝອກຄວັນຂ້າມແດນຮ່ວມກັນ. ສອງຝ່າຍ ໄດ້ເຫັນດີຊຸກຍູ້ກົນໄກການຮ່ວມມືສອງຝ່າຍ ລາວ-ໄທ-ລາວ ທີ່ມີຢູ່ ເພື່ອສ້າງເງື່ອນໄຂອຳນວຍຄວາມສະດວກໃຫ້ແກ່ການສົ່ງເສີມການພົວພັນຮ່ວມມືໃຫ້ກ້າວສູ່ລວງເລິກ ໂດຍສອງຝ່າຍ ເຫັນດີຈະສືບຕໍ່ໃຫ້ການສະໜັບສະຫນູນຊ່ວຍເຫຼືອເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ ໂດຍສະເພາະການເປັນປະທານອາຊຽນຂອງສປປ ລາວ ໃນປີ 2024.
ໃນຂະນະດຽວກັນ, ພະນະທ່ານ ປານປຣີ ພະຫິດທານຸກອນ, ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ ໄດ້ສະແດງຄວາມຍິນດີຕ້ອນຮັບຕໍ່ການເດີນທາງມາຢ້ຽມຢາມເຮັດວຽກ ແລະ ຊົມເຊີຍຕໍ່ຜົນສຳເລັດຂອງການພົບປະສອງຝ່າຍ ລາວ-ໄທ ຄັ້ງນີ້ພ້ອມທັງຈະສືບຕໍ່ຊຸກຍູ້ໃຫ້ບັນດາຂະແໜງການກ່ຽວຂ້ອງຂອງຝ່າຍໄທ ນຳເອົາຜົນຂອງການພົບປະຄັ້ງນີ້ ໄປຜັນຂະຫຍາຍ ແລະຈັດຕັ້ງປະຕິບັດໃຫ້ເປັນຮູບປະທຳຍິ່ງໆຂຶ້ນ ແນໃສ່ເສີມຂະຫຍາຍການພົວພັນຮ່ວມມື ລະຫວ່າງ ສປປ ລາວ ແລະ ຣາຊະອານາຈັກໄທ ໃຫ້ກ້າວເຂົ້າສູ່ລວງເລິກ ແລະ ກວ້າງຂວາງກວ່າເກົ່າ.
ພາຍຫລັງສຳເລັດການພົບປະ, ໃນຕອນຄໍ່າຂອງວັນດຽວກັນ ພະນະທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ສະເຫຼີມໄຊ ກົມມະສິດ ພ້ອມດ້ວຍພັນລະຍາ ແລະ ຄະນະ ໄດ້ສືບຕໍ່ເຂົ້າຮ່ວມບຸນປີໃໝ່ລາວ ທີ່ ສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ຣາຊະອານາຈັກໄທ ປະຈໍາປີ 2024, ເຊິ່ງປີນີ້ ໄດ້ຮັບພະມະຫາກະລຸນາທິຄຸນ ຈາກ ສົມເດັດພະກະນິດຖາທິຣາດເຈົ້າ ກົມສົມເດັດພະເທບຣັດຣາຊະສຸດາ ສະຫຍາມບໍຣົມຣາຊະກຸມາລີ ສະເດັດເປັນອົງປະທານ ໃນພິທີພາສີສູ່ຂວັນປີໃໝ່ ອັນມີຄວາມໝາຍຄວາມສໍາຄັນ, ເປັນຮິດສິບສອງຄອງສິບສີ່ ແລະ ເປັນປະເພນີອັນດີງາມທີ່ປະຕິບັດສືບທອດມາແຕ່ບູຮານນະການໂດຍຕາງໜ້າໃຫ້ສະຖານທູດລາວ ປະຈໍາ ຣາຊະອານາຈັກໄທ ແລະ ບັນດາແຂກທີ່ເຂົ້າຮ່ວມງານບຸນ, ພະນະທ່ານ ຮອງນາຍົກລັດຖະມົນຕີ ສະເຫຼີມໄຊ ກົມມະສິດ ໄດ້ກ່າວຖວາຍພະພອນໄຊຍະມຸງຄຸນອັນປະເສີດເນື່ອງໃນໂອກາດປີໃໝ່ ແລະວັນຄ້າຍວັນພຣະຣາຊະສົມພົບ ຄົບຮອບ 69 ພັນສາ ແດ່ ກົມສົມເດັດພະເທບ ຈົ່ງມີພະກະເສມສໍາລານຍິ່ງຍືນນານ ແລະ ສືບຕໍ່ເປັນຮົ່ມໂພຮົ່ມໄຊ ໃຫ້ແກ່ການເສີມສ້າງສາຍພົວພັນມິດຕະພາບ ແລະ ການຮ່ວມມືທີ່ດີງາມ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ ແລະ ໄທ ໃຫ້ຫມັ້ນຄົງທະນົງແກ່ນໄປຊົ່ວການລະນານ.
ໃນວັນທີ 25 ເມສາ 2024, ພະນະທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ພ້ອມດ້ວຍພັນລະຍາ ແລະ ຄະນະ ໄດ້ສືບຕໍ່ເດີນທາງ ໄປຈັງຫວັດສຸພັນບູລີ ເພື່ອເປັນປະທານໃນພິທີເປີດນໍາໃຊ້ ຫໍວັດທະນະທໍາພີ່ນ້ອງໄທເຊື້ອສາຍລາວຄັ່ງ ທີ່ ວັດພຸນໍ້າຮ້ອນ, ອໍາເພີດ່ານຊ້າງ, ຈັງຫວັດສຸພັນບູລີ, ຣາຊະອານາຈັກໄທ. ຫໍວັດທະນະທໍາ ແຫ່ງນີ້ ແມ່ນເລີ່ມມາຈາກການທອດຜ້າປ່າສາມັກຄີ ຂອງສະມາຄົມ ລາວ-ໄທ, ໄທ-ລາວ ເພື່ອມິດຕະພາບ ທີ່ ນະຄອນຫຼວງວຽງຈັນ ໃນປີ 2019 ໂດຍແມ່ນທ່ານ ນາງ ນາລີ ສີສຸລິດ, ພັນລະຍາທ່ານປະທານປະເທດ ເປັນເຈົ້າສັດທາລະດົມຈະຕຸປັດໃຈ ເພື່ອຮ່ວມສົມທົບທຶນຮອນທອດຜ້າປ່າສາມັກຄິ ຮ່ວມກັບ ສະມາຄົມ ລາວ-ໄທ, ໄທ-ລາວ ເພື່ອມິດຕະພາບ. ພາຍຫຼັງກໍ່ສ້າງສໍາເລັດ, ຫໍວັດທະນະທໍາ ແຫ່ງນີ້ ຈະເປັນສູນລວມອະນຸລັກປົກປັກຮັກສາ ແລະ ເປັນສູນຮຽນຮູ້ດ້ານສິລະປະວັດທະນະທໍາອັນດີງາມທີ່ເປັນເອກະລັກສະເພາະລາວຄັ່ງ, ເປັນບ່ອນເຕົ້າຮ່ວມຄວາມສາມັກຄີແລະ ເປັນມູນມໍລະດົກໃຫ້ລູກຫຼານຂອງພີ່ນ້ອງຊາວໄທເຊື້ອສາຍລາວ. ພ້ອມທັງເປັນສັນຍາລັກ ແຫ່ງການເສີມຂະຫຍາຍການພົວພັນ ແລະ ຮ່ວມມື ລະຫວ່າງ ປະຊາຊົນສອງຊາດລາວ ແລະ ໄທ ຖານບ້ານໃກ້ເຮືອນຄຽງທີ່ດີທີ່ມີວັດທະນະທໍາ, ຮີດຄອງປະເພນີ, ພາສາປາກເວົ້າເຂົ້າໃຈກັນ ໃນຖານະຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຍືນຍົງ.
ໂດຍ: ກົມຂ່າວ ກະຊວງການຕ່າງປະເທດ
