ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ໄດ້ພົບປະຫາລືເພີ່ມທະວີວຽກງານການທ່ອງທ່ຽວ ກັບທ່ານ ນາງ ສຸດາວັນ ວັງສຸພາກິດໂກສົນ ລັດຖະມົນຕີ ກະຊວງທ່ອງທ່ຽວ ແລະ ກິລາ ແຫ່ງ ຣາຊະອານາຈັກໄທ ໃນວັນທີ 25 ມັງກອນ 2024 ທີ່ນະຄອນຫລວງວຽງຈັນ ໃນໂອກາດເຂົ້າຮ່ວມກອງປະຊຸມ ລັດຖະ ມົນຕີທ່ອງທ່ຽວອາຊຽນ 2024 ທີ່ ສປປ ລາວ ໄດ້ຮັບກຽດເປັນເຈົ້າພາບ.
ທ່ານ ນາງ ສວນສະຫວັນ ວິຍະເກດ ໄດ້ຕາງໜ້າ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ສະແດງຄວາມຍິນດີຕ້ອນຮັບ ທ່ານ ນາງ ສຸດາວັນ ວັງສຸພາກິດໂກສົນ ລັດຖະມົນຕີ ກະຊວງທ່ອງທ່ຽວ ແລະ ກິລາ ແຫ່ງ ຣາຊະອາ ນາຈັກໄທ ພ້ອມດ້ວຍຄະນະ ທີ່ເດີນທາງ ເຂົ້າຮ່ວມກອງປະຊຸມ ລັດຖະມົນຕີທ່ອງທ່ຽວອາຊຽນ ແລະ ບັນດາກອງປະຊຸມ ກິດຈະ ກຳປິ່ນອ້ອມ ທີ່ສປປ ລາວ ໃນຄັ້ງນີ້.
ສປປ ລາວ ແລະ ຣາຊະອານາຈັກໄທ ມີສາຍພົວພັນມິດຕະ ພາບ ແລະ ການຮ່ວມມືອັນດີງາມ ລະຫວ່າງສອງກະຊວງ ໃນຂະ ແໜງການທ່ອງທ່ຽວ ຂອງສອງປະເທດ ລາວ-ໄທ, ຖານບ້ານໃກ້ເຮືອນຄຽງ ທັງໃນຂອບສອງຝ່າຍ ແລະ ຫລາຍຝ່າຍ ເພື່ອຜົນ ປະໂຫຍດຂອງປະຊາຊົນສອງຊາດ ລາວ-ໄທ ກໍຄື ເພື່ອສັນຕິ ພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ທີ່ຍືນຍົງ ຢູ່ໃນພາກພື້ນ ແລະ ໃນໂລກ.
ການຮ່ວມມືສອງຝ່າຍໃນຂະແໜງທ່ອງທ່ຽວ ໃນໄລຍະຜ່ານມາ ໂດຍສະເພາະ ການລົງນາມ ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານການທ່ອງທ່ຽວ ຮ່ວມກັນ ໃນປີ 2016​ ຜ່ານມາ ເຖິງປັດຈຸບັນ ໄດ້ສິ້ນສຸດແລ້ວ, ແຕ່ໃນການສະໜັບສະ ໜູນ ໃນການພັດທະນາ ຊັບພະຍາກອນມະນຸດ ຈາກລັດຖະບານໄທ ຍັງສືບຕໍ່ຢ່າງບໍ່ຢຸດຢັ້ງ ໂດຍຜ່ານການຢ້ຽມຢາມ, ແລກປ່ຽນດ້ານວິຊາການ, ເຂົ້າຮ່ວມບັນດາກອງປະຊຸມ ແລະ ເທດສະການສາກົນ, ຝຶກອົບຮົມໄລຍະສັ້ນ, ທຶນການສຶກສາໄລຍະຍາວ ອັນໄດ້ປະກອບສ່ວນເຂົ້າ ໃນການເສີມຂະຫຍາຍ ສາຍພົວພັນການຮ່ວມມື, ທັງເປັນການສ້າງຄວາມເຂັ້ມແຂງ ໃນຂະແໜງການທ່ອງທ່ຽວ.​
ທ່ານ ນາງ ສຸດາວັນ ວັງສຸພາກິດໂກສົນ ໄດ້ກ່າວວ່າ: ການຮ່ວມມືລະຫວ່າງ ສອງກະຊວງຂອງພວກເຮົາ ໂດຍສະເພາະ ຂໍ້ລິເລີ່ມໃນການສ້າງບົດບັນທຶກ ເພື່ອຮ່ວມມືກັນໃນຂະແໜງການທ່ອງທ່ຽວ ເພື່ອເຮັດໃຫ້ວຽກງານຮ່ວມທີ່ກ່າວມານັ້ນ ໄດ້ມີ ຂໍ້ສະດວກ, ມີປະສິດທິຜົນຫລາຍກວ່າເກົ່ານັ້ນ ແມ່ນເຫັນດີ ຄື: ຂໍ້ລິເລີ່ມ ທີ່ຝ່າຍໄທໄດ້ສະເໜີ ຈັດໃຫ້ມີກອງປະຊຸມຫລາຍຝ່າຍ ຮ່ວມກັບ ກຳປູເຈຍ, ລາວ, ມາເລເຊຍ ແລະ ຫວຽດນາມ ແມ່ນເປັນໂອກາດໃນການໂຄສະນາສົ່ງເສີມ ການທ່ອງທ່ຽວ ແລະ ການ ແລກປ່ຽນ ໄປມາຫາສູ່ກັນຫລາຍຂື້ນກວ່າເກົ່າ.
ອີງຕາມສະຖິຕິ ນັກທ່ອງທ່ຽວໄທເຂົ້າມາທ່ອງທ່ຽວລາວ ໃນ 11 ເດືອນຂອງປີ 2023 ມີຈຳນວນ 1,2 ລ້ານເທື່ອຄົນ ຖືເປັນອັນດັບໜຶ່ງ ຈາກນັກທ່ອງທ່ຽວ ທັງໝົດ ທີ່ເຂົ້າມາທ່ຽວ ສປປ ລາວ ກ່ຽວກັບ ຂໍ້ລິເລີ່ມ ການສ້າງ MOU ດ້ານການທ່ອງທ່ຽວ ເຊິ່ງປັດຈຸບັນ ສອງຝ່າຍ ແມ່ນປະຕິບັດໄປຕາມຂອບການຮ່ວມມື ຂອງຄະນະກຳມະການຮ່ວມມື ລາວ-ໄທ (JC) ທີ່ມີກະຊວງການ ຕ່າງປະເທດ ເປັນກອງເລຂາ ໂດຍສະເພາະ ການສືບຕໍ່ລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ດ້ານການທ່ອງ ທ່ຽວ ເພື່ອສືບຕໍ່ວຽກງານການຮ່ວມມືດັ່ງກ່າວ ຄື: ສືບຕໍ່ມອບ ໃຫ້ວິຊາການຂອງສອງຝ່າຍໄດ້ມີການພົບປະແລກປ່ຽນ ດ້ານເນື້ອໃນ ເພື່ອໃຫ້ມີຄວາມເປັນເອກະພາບກັນ ແລະ ຜ່ານຂະບວນການອະນຸມັດພາຍໃນຂອງຕົນ ກ່ອນການລົງນາມຮ່ວມກັນ.
Cr: ຂປລ