ກອງປະຊຸມວິຊາການກ່ຽວກັບການເເພດພື້ນເມືອງໃນປະເທດພາກພື້ນລຸ່ມແມ່ນໍ້າຂອງຄັ້ງທີ 11 ມີ ລາວ, ຫວຽດນາມ ກໍາປູເຈຍ, ໄທ,ມຽນມາ ແລະ ຈີນ ທີ່ໄທ ແລະ ລາວຮ່ວມກັນເປັນເຈົ້າພາບຈັດຂຶ້ນລະຫວ່າງວັນທີ 12 ຫາ 14 ມິຖຸນານີ້ ທີ່ສວນພຶດສາ ເມືອງນາຊາຍທອງ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ໂກສິດ ສຸວີດນິດຈິດ ຜູ້ຊ່ວຍ ທັງເປັນທີ່ປຶກສາລັດຖະມົນຕີກະຊວງສາທາລະນະສຸກຣາຊະອານາຈັກໄທ ແລະ ທີ່ປຶກສາການແພດພື້ນເມືອງໄທ ແລະ ການແພດທາງເລືອກ, ດຣ ບຸນເລື່ອນ ດວງເດືອນ ຫົວໜ້າສະຖາບັນ ການເເພດການພື້ນ ເມືອງລາວ, ມີທ່ານ ພູວົງ ພະມີສິດ ຮອງປະທານສະມາ ຄົມອານຸລັກຢາພື້ນເມືອງລາວ, ທັງເປັນເຈົ້າຂອງສວນພຶດສາ, ພ້ອມດ້ວຍຫົວໜ້າຄະນະຜູ້ແທນຈາກບັນດາປະເທດພາກພື້ນແມ່ນໍ້າຂອງແລະ ເເຂກຮັບເຊີນເຂົ້າຮ່ວມ
ໃນພິທີ ດຣ ບຸນເລື່ອນ ດວງເດືອນ ຫົວໜ້າສະຖາບັນການເເພດພື້ນເມືອງລາວມີຄໍາເຫັນວ່າ: ອີງຕາມການຕົກລົງຂອງກອງປະຊຸມກ່ຽວກັບແຜນການເເພດໃນພາກພື້ນແມ່ນໍ້າຂອງຄັ້ງທີ 10 ທີ່ຫວຽດນາມເປັນເຈົ້າພາບຈັດຂຶ້ນໃນໄລຍະຜ່ານມາ ແລະ ເພື່ອເປັນການສືບຕໍ່ຜົນຂອງກອງປະຊຸມດັ່ງກ່າວ ຈຶ່ງເຫັນດີໃຫ້ໄທ ແລະ ລາວ ຈັດກອງປະຊຸມຄັ້ງທີ 11 ນີ້ຮ່ວມກັນ, ສະນັ້ນ ສອງຝ່າຍໄດ້ຮ່ວມກັນໃນການປຶກສາຫາລື ເພື່ອພ້ອມກັນກະກຽມຈັດກອງປະຊຸມຄັ້ງນີ້ຂຶ້ນ ເຊຶ່ງເປັນໜຶ່ງໃນວຽກງານການແພດໃນພາກພື້ນແມ່ນໍ້າຂອງ 6 ປະເທດ ໂດຍສະເພາະການແລກປ່ຽນວັດທະນະທໍາ ສັງຄົມ ແລະ ຊົນເຜົ່າທີ່ໃຊ້ໃນການປິ່ນດ້ວຍຢາພື້ນເມືອງ, ໃນ 2 ເສົາຄໍ້າຂອງອາຊຽນໄດ້ຍົກໃຫ້ເຫັນວ່າ ຢູ່ໃນວຽກງານການເເພດຢາພື້ນເມືອງແມ່ນຂຶ້ນກັບ 2 ເສົາຄໍ້າ ຄື: ວັດທະນະທໍາສັງຄົມ ແລະ ເສດຖະກິດ, ສະນັ້ນ ກອງປະຊຸມຄັ້ງນີ້ ຈຶ່ງໄດ້ພ້ອມກັນຄົ້ນຄ້ວາປຶກສາຫາລືກັນ ເຮັດແນວໃດໃຫ້ຢາພື້ນເມືອງພວກເຮົາໃຫ້ການເປັນຜະລິດຕະພັນທີ່ເປັນເສດຖະກິດ ແລະ ມີຄຸນນະພາບຮ່ວມກັນ, ສາມາດໃຊ້ຢາດັ່ງກ່າວນີ້ເຂົ້າໃນການສົມທົບຢູ່ໃນຕາໜ່າງສາທາລະນະສຸກ, ເຊຶ່ງໃນກອງປະຊຸມຄັ້ງນີ້ເເນໃສ່ສ້າງໃຫ້ຄົນຮຸ້ນ ໃໝ່ໃນການຮັກມັກດ້ານການປິ່ນປົວດ້ວຍຢາພື້ນເມືອງເປັນຜູສືບທອດທີ່ດີໃນອະນາຄົດ ແລະ ປະສົມປະສານກັບເຕັກໂນໂລຊີທີ່ທັນສະໄໝເຂົ້າໃນການປິ່ນປົວ.
ໃນໂອກາດນີ້ ທ່ານ ພູວົງ ພະມີສິດ ຮອງປະທານສະມາຄົມອານຸລັກຢາພື້ນເມືອງລາວ, ທັງເປັນປະທານສວນພຶດສາມີຄໍາເຫັນວ່າ: ສວນພຶດສາໄດ້ສ້າງຕັ້ນຂຶ້ນໃນປີ 2016 ເປັນຕົ້ນມາ, ເຊຶ່ງພາຍໃນສວນຈະມີຫລາຍກິດຈະກໍາ ເຊັ່ນ: ດ້ານການທ່ອງທ່ຽວທາງທໍາມະຊາດ ວັດທະນະທໍາ ກະສິກໍາ ແລະ ການຮັກສາສຸຂະພາບ, ມາຮອດປັດຈຸບັນທາງສວນພຶດສາຍັງໄດ້ສ້າງຫໍວາງສະແດງ 50 ຊົນເຜົ່າ ພ້ອມທັງສ້າງບ້ານຊົນເຜົ່າຈໍານວນໜຶ່ງ ເພື່ອແນໃສ່ການທ່ອງືທ່ຽວອານຸລັກຮັກສາດ້ານວັດທະນະທໍາຂອງບັນດາເຜົ່າ, ສ້າງໃຫ້ນັກຮຽນນັກສຶກສາລວມທັງນັກທ່ອງທ່ຽວທັງພາຍໃນ ແລະ ຕ່າງປະເທດມາທັດສະນະສຶກສາຮຽນຮູ້ກ່ຽວກັບການດໍາລົງ ຊີ ວິດ, ຮີດຄອງປະເພນີຂອງແຕ່ລະຊົນເຜົ່າຢູ່ໃນລາວ. ນອກນີ້ ຍັງເປັນການເຮັດໃຫ້ປະຊາຊົນທີ່ມາອາໄສຢູ່ສວນພຶດສາ ພ້ອມທັງປະຊາຊົນອ້ອມຂ້າງສວນພຶດສາໄດ້ມີວຽກເຮັດງານທໍາ, ເຊິ່ງໃນ ນາມຄະນະປະທານສະມາຄົມອານຸລັກຢາ ພື້ນເມືອງລາວ ໃນໄລຍະຜ່ານມາໄດ້ມີຄວາມພະຍາຍາມຊຸກຍູ້ສົ່ງເສີມໃນການອະນຸລັກຮັກສາຢາພື້ນ ເມືອງລາວທີ່ຄຽງຄູ່ກັບພໍ່ແມ່ຄູບາອາຈານມາແຕ່ບູຮານນະການ ໂດຍສະເພາະການອານຸລັກຮັກສາພືດທີ່ເປັນຢາ ຫລື ຕົ້ນໄມ້ທີ່ເປັນຢາ, ຕໍາລາການປິ່ນປົວດ້ວຍຢາພື້ນເມືອງລາວ, ລວມທັງແພດໝໍຢາພື້ນເມືອງໃຫ້ນັບມື້ຂະຫຍາຍຕົວ ແລະ ຍືນຍົງຄຽງຄູ່ກັບຄົນລາວຕະຫລອດໄປ,
ນອກນີ້ ຍັງສືບຕໍ່ປຶກສາຫາລືຫລາຍພາກສ່ວນມີຄວາມເປັນໄປໄດ້ທີ່ຈະສະເໜີຢາພື້ນເມືອງລາວຂຶ້ນຈົດທະບຽນ ຫລື ຂຶ້ນ ອຢ ຈາກກະຊວງສາທາລະນະສຸກ ເພື່ອໃຫ້ຖືກຕ້ອງ, ພ້ອມທັງຈະໄດ້ບໍາລຸງຍົກລະດັບບັນດາໝໍຢາພື້ນເມືອງລາວໃຫ້ໄດ້ໃບຮັບຮອງຈາກຂະແໜງການຢາ, ເນື່ອງຈາກຜ່ານມາໝໍຢາພື້ນເມືອງລາວສ່ວນຫລາຍອາໄສການປິ່ນປົວແບບທໍາມະຊາດ, ຄວາມສໍານານ, ລື້ງເຄີຍແຕ່ບໍ່ມີການຮັບຮອງຈາກພາກສ່ວນກ່ຽວຂ້ອງ ແລະ ມີແຕ່ບໍ່ຫລາຍ,ສໍາລັບ ສວນພຶດສາມາຮອດປັດຈຸບັນມີເນື້ອທີ່ປູກ ຫລື ປ່າທໍາມະຊາດທີ່ມີພືດເປັນຢາພືນເມືອງທັງໝົດປະມານ 20 ເຮັກຕາ, ໃນນີ້ ມີພືດທີ່ເປັນຢາຫລາຍກວ່າ 200 ຊະນິດ, ມາຮອດປັດຈຸບັນ ມີສະມາຊິກ 100 ກວ່າຄົນຂອງສະມາຄົມອານຸລັກຢາພື້ນເມືອງລາວທົ່ວນະຄອນຫຼວງວຽງຈັນ, ຮອງປະທານສະມາຄົມອານຸລັກຢາພື້ນເມືອງລາວ, ທັງເປັນປະທານສວນພຶດສາມີຄໍາເຫັນຕື່ມວ່າ: ໃນນາມເຈົ້າຂອງສວນພຶດສາກໍ່ຄືໃນນາມຄະນະປະທານສະມາຄົມອານຸລັກຢາພື້ນເມືອງລາວມີຄວາມພາກພູມໃຈທີ່ໄດ້ໃຫ້ການຕ້ອນຮັບຄະນະຜູ້ແທນຈາກບັນດາປະເທດໃນພາກພື້ນລຸ່ມແມ່ນໍ້າຂອງທັງ 6 ປະເທດທີ່ໃຊ້ຢາພື້ນເມືອງ ແລະ ເປັນກຽດຢ່າງຍິ່ງທີ່ໄດ້ເປັນສ່ວນໜຶ່ງໃນການປະກອບສ່ວນຈັດງານໃນຄັ້ງນີ້, ເຊຶ່ງພາຍໃນງານໄດ້ມີຫລາຍກິດຈະກໍາ ເປັນຕົ້ນ: ການສາທິດການປິ່ນປົວຄົນເຈັບຈາກໝໍພື້ນເມືອງລາວ ແລະ ໄທ, ການຊົມພາບວິດີໂອກ່ຽວກັບການເຄື່ອນໄຫວຂອງສະມາຄົມ, ການທ່ຽວຊົມຫໍວາງສະແດງ 50 ຊົນເຜົ່າໃນລາວ ພ້ອມທັງ ພິທີບາສີສູ່ຂວັນ ແລະ ມ່ວນຊື່ນ ເພື່ອສ້າງຄວາມສາມັກຄີຮັກແພງລະຫວ່າງຜູ້ເຂົ້າຮ່ວມກອງປະຊຸມວິຊາການກ່ຽວກັບການເເພດພື້ນເມືອງໃນປະເທດພາກພື້ນລຸ່ມແມ່ນໍ້າຂອງ 6 ປະເທດໃຫ້ນັບມື້ຂະຫຍາຍຕົວຂຶ້ນເລື່ອຍໆ.
ຂຽນໂດຍ: ບຸນຍັງ ພຸດສະຫວັດ
ພາບ: ທະນົງສິນ
