ສະຖາບັນພັດທະນາສີມືແຮງງານ, ກະຊວງແຮງງານ ແລະ ສະຫວັດດີການສັງ ຄົມ (ຮສສ) ສປປ ລາວ ຮ່ວມມືກັບ ໜ່ວຍບໍລິຫານ ແລະ ຈັດການທຶນ ດ້ານການພັດທະນາກຳລັງຄົນ ແລະ ທຶນດ້ານການພັດທະນາສະຖາບັນອຸດົມສຶກສາການວິໄຈ ແລະ ການສ້າງນະວັດຕະກຳ ແຫ່ງຣາຊອານາຈັກໄທ ທາງດ້ານວິຊາການ ແລະ ການສຶກສາ ແລະ ການພັດທະນາເຄືອຂ່າຍການສ້າງ ແລະ ພັດທະນາກຳລັງຄົນຢ່າງປະສິດທິພາບສູງ, ມີທ່າແຮງ ຕາມຄວາມຕ້ອງການຂອງປະເທດ.
ພິທີເຊັນສັນຍາຮ່ວມມືດັ່ງກ່າວ ຈັດຂຶ້ນໃນວັນທີ 15 ກໍລະກົດ 2024, ທີ່ນະຄອນຫຼວງວຽງຈັນ ໂດຍການຮ່ວມລົງນາມ ລະຫວ່າງ ທ່ານ ບຸນມາ ສິດທິໂສມ ຫົວໜ້າສະຖາບັນພັດທະນາສີມືແຮງງານ ກະຊວງ ຮສສ ແລະ ທ່ານ ນາງ ສົມປອງ ຄລ້າຍໜອງສອນວົງ, ຜູ້ອຳນວຍການໜ່ວຍບໍລິຫານ ແລະ ຈັດການທຶນດ້ານການພັດທະນາກຳລັງຄົນ ແລະ ທຶນດ້ານການພັດທະນາສະຖາບັນອຸດົມສຶກສາ ການວິໄຈ ແລະ ການສ້າງນະວັດຕະກຳ ໂດຍມີ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງ ຮສສ, ທ່ານ ອາເນກ ເຫລົ່າທຳມະທັດ ອະດີດ ລັດຖະມົນຕີ ກະຊວງອຸດົມສຶກສາວິດທະຍາສາດ, ວິໄຈ ແລະ ການສ້າງນະວັດຕະກຳ ພ້ອມຄະນະ ແລະ ພາກສ່ວນກ່ຽວຂ້ອງສອງຝ່າຍເຂົ້າຮ່ວມ.
ບົດບັນທຶກຂໍ້ຕົກລົງການຮ່ວມມື ສະບັບດັ່ງກ່າວ, ສອງຝ່າຍແມ່ນໄດ້ມີການຄົ້ນຄວ້າ ແລະ ເອກະພາບກັນ ໂດຍໄດ້ແບ່ງຄວາມຮັບຜິດຊອບກັນຢ່າງສັດເຈນ ເຊິ່ງຈະໄດ້ຮ່ວມກັນ ປະຊາສຳພັນ ຫລື ເຜີຍແຜ່ການດຳ ເນີນງານຂອງໂຄງການ ແລະ ຜົນງານທີ່ໄດ້ຮັບຈາກການດຳເນີນໂຄງການ ພາຍໃຕ້ບົດບັນທຶກສະບັບນີ້, ພາກສ່ວນທີ່ດໍາເນີນການໂຄສະນາ ຫລື ເຜີຍແຜ່ຕ້ອງລະບຸຢ່າງຊັດເຈນ ວ່າທັງສອງຝ່າຍຮ່ວມກັນດໍາເນີນໂຄງການ ແລະ ຜົນງານໄດ້ຮັບທີ່ເກີດຈາກການດໍາເນີນໂຄງການຮ່ວມກັນຂອງທັງສອງຝ່າຍ, ເວັ້ນແຕ່ຈະມີຂໍ້ຕົກລົງເປັນລາຍລັກອັກສອນເປັນຢ່າງອື່ນ; ກຳມະສິດ ແລະ ຊັບສິນທາງປັນຍາ ຫລື ສິດອື່ນໆຂອງຜົນງານ, ເອກະສານ, ບົດລາຍງານ ຫລື ຂໍ້ມູນທີ່ຝ່າຍໃດຝ່າຍໜຶ່ງນຳມາໃຊ້ເຂົ້າໃນການດຳເນີນໂຄງການ ພາຍໃຕ້ບົດບັນທຶກຂໍ້ຕົກລົງຄວາມຮ່ວມມືສະບັບນີ້ ເທົ່ານັ້ນ ຈົນກວ່າບົດບັນທຶກຂໍ້ຕົກລົງຄວາມຮ່ວມມືສະບັບນີ້ຈະໝົດກຳນົດ ແລະ ມີການປຽ່ນແປງຂອງສອງຝ່າຍ.
ທີ່ມາ: ຂ່າວສານ ຮສສ
