ໃນລະຫວ່າງວັນທີ 7-19 ກໍລະກົດ 2024 ນີ້ ນັກຮຽນຄົນເຊື້ອຊາດລາວ ພ້ອມດ້ວຍຄູນໍາພາ ຂອງມູນນິທິປ້ອມ ທີ່ຕັ້ງລັດວໍຊິງຕັນ ສະຫະລັດອາເມລິກາ ໄດ້ເດີນທາງມາຮຽນຮູ້ ແລະ ແລກປ່ຽນວັດທະນະທຳ ຢູ່ ສປປ ລາວ, ເຊິ່ງນໍາພາໂດຍທ່ານ ນາງ ສິຣິ ມາຕິເນ, ຕາງໜ້າມູນນິທິປ້ອມ ໄດ້ນຳພານັກຮຽນ ທີ່ເປັນລູກຫຼານຄົນເຊື້ອຊາດລາວຢູ່ຕ່າງປະເທດ ຈຳນວນ 6 ຄົນ, ຄູຜູ້ນຳພາ 4 ຄົນ ທີ່ຫຼວງພະບາງ ແລະ ໂຮງຮຽນ ສິລະປະດົນຕີແຫ່ງຊາດ ນະຄອນຫຼວງວຽງຈັນ.
POM Foudation ເປັນມູນນິທິ ທີ່ສົ່ງເສີມ ປົກປັກຮັກສາ ແລະ ເຜີຍແຜ່ສິລະປະ ວັດທະນະທຳອັນດີງາມຂອງລາວເຮົາ ໂດຍຜ່ານໂຄງການແລກປ່ຽນວັດທະນະທຳລະດູຮ້ອນ, ໂດຍມີຄູອາຈານຢູ່ໂຮງຮຽນເປັນຄົນສິດສອນໃຫ້.
ເຊິ່ງທາງນ້ອງນັກຮຽນ ແລະ ຄູອາຈານ ຂອງມູນີທິເຂົ້າຮ່ວມກິດຈະກຳ ແລະ ສະແດງດົນຕີພື້ນເມືອງໃນງານ Lao Fashion Week ແລະ ກິດຈະກຳອື່ນໆ ທີ່ສະແດງເຖິງຊີວິດການເປັນຢູ່, ວັດທະນະທຳ ແລະ ຮີດຄອງປະເພນີ ຂອງລາວ ຢູ່ ນະຄອນຫຼວງວຽງຈັນ. ຄະນະດັ່ງກ່າວ ພ້ອມນີ້ກໍຍັງໄດ້ເດີນທາງໄປນະຄອນຫຼວງພະບາງ ເພື່ອຮຽນຮູ້ວັດທະນະທຳ, ຊີວິດການເປັນຢູ່, ກິນອາຫານລາວ, ຮຽນເຮັດໝາກເບັ່ງ, ຮຽນຮູ້ການບູລະນະວັດວາອາຮາມ, ໃສ່ບາດຕອນເຊົ້າ ແລະ ພິທີທາງສາສະໜາອື່ນໆ, ແລະ ຮຽນດົນຕີພື້ນເມືອງລາວປະເພດແຄນ, ລະນາດ, ບົດຟ້ອນ ຢູ່ໂຮງຮຽນສິລະປະດົນຕີແຫ່ງຊາດ.
ໃນໄລຍະຜ່ານມາ ມູນນິທິປ້ອມເຄີຍນຳພານັກຮຽນ ທີ່ເປັນລູກຫຼານຄົນເຊື້ອຊາດລາວຢູ່ຕ່າງປະເທດ ມາເຝິກຊ້ອມສິລະປະ ຢູ່ ສປປ ລາວ ໂດຍຜ່ານການຈັດຕັ້ງໂຄງການແລກປ່ຽນວັດທະນະທຳລະດູຮ້ອນ ແລະ ໃນປີ 2019 ມູນນິທິດັ່ງກ່າວ ໄດ້ຈັດຕັ້ງໂຄງການແລກປ່ຽນວັດທະນະທຳດັ່ງກ່າວຂຶ້ນຢູ່ເມືອງ Seattle, ລັດ Washington State, ຊຶ່ງໄດ້ເຊື້ອເຊີນອາຈານສອນຟ້ອນ 2 ທ່ານ ແລະ ອາຈານສອນດົນຕີພື້ນເມືອງລາວ 2 ທ່ານ ເດີນທາງໄປສິດສອນ ຢູ່ ສ. ອາເມຣິກາ.
