ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ລົງນາມບົດບັນທືກຄວາມເຂົ້າໃຈເພື່ອພັດທະນາ ໂຄງການ ຫຼຸດຜ່ອນການປ່ອຍທາດອາຍເຮືອນແກ້ວ ຈາກການທຳລາຍປ່າໄມ້ ແລະ ການເຮັດໃຫ້ປ່າໄມ້ຊຸດໂຊມ
ພິທີລົງນາມເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກະຊວງກະສິກຳ ແລະປ່າໄມ້ ຕ່າງໜ້າໂດຍກົມປ່າໄມ້ ຮ່ວມກັບບໍລິສັດ ເສສວນຫົວໂຖ ພັດທະນາເທັກໂນໂລຊີກາກບອນຈໍາກັດ ແລະບໍລິສັດ ຄັງຮົວລົງທຶນລາວຈຳກັດ ກ່ຽວກັບ “ໂຄງການຫຼຸດຜ່ອນການປ່ອຍອາຍພິດເຮືອນແກ້ວຈາກການທຳລາຍປ່າໄມ້ ແລະການຊຸດໂຊມຂອງປ່າໄມ້ ຈັດຂຶ້ນຕອນແລງວັນທີ 1 ທັນວາ 2023 ທີ່ໂຮງແຮມດອນຈັນພາເລດ ນະຄອນຫລວງວຽງຈັນ ໂດຍມີ ທອງເພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງ ໃນພິທີລົງນາມຄັ້ງນີ້ ແມ່ນເພື່ອຮ່ວມມືກັນລະຫວ່າງລັດຖະບານແຫ່ງ ສປປລາວ ແລະບໍລິສັດເສສວນຫົວໂຖພັດທະນາເທັກໂນໂລຊິກາກບອນ ຈໍາກັດກ່ຽວກັບການເຂົ້າຫາແຫຼ່ງທຶນແບບຍືນຍົງໃນການບໍລິຫານຄຸ້ມຄອງແລະປົກປັກຮັກສາຊັບພະຍາກອນປ່າໄມ້ເພື່ອເຮັດວຽກງານຮ່ວມກັນລະຫວ່າງລັດຖະບານແຫ່ງ ສປປລາວ (ຕາງໜ້າໂດຍກົມປ່າໄມ້) ແລະບໍລິສັດເສສວນຫົວໂຖພັດທະນາເທັກໂນໂລຊີກາກບອນຈໍາກັດ, ກ່ຽວກັບການເຂົ້າຫາຕະຫຼາດສິນເຊື່ອກາກບອນປ່າໄມ້ແບບຍືນຍົງ.ຊຶ່ງຄາດວ່າ ຜົນທີ່ຈະໄດ້ຮັບຈາກການຮ່ວມມືໃນຄັ້ງນີ້ ເພື່ອສ້າງເປັນໂຄງການຮ່ວມກັນແລະຕ່າງຝ່າຍຕ່າງມີຜົນປະໂຫຍດຮ່ວມກັນ, ຂຸດຄົ້ນຫາທ່າແຮງບົ່ມຊ້ອນທາງດ້ານທໍາມະຊາດກໍ່ຄືຊັບພະຍາກອນປ່າໄມ້ເພື່ອຫັນເຂົ້າສູ່ການສ້າງເສດຖະກິດສີຂຽວຫຼືການເຕີບໂຕສີຂຽວໃຫ້ປະກົດຜົນເປັນຈິງເທື່ອກ້າວ, ສ້າງລາຍຮັບຈາກການອະນຸລັກແລະການບໍລິຫານຄຸ້ມຄອງປ່າໄມ້ຮ່ວມກັນ; ຊຶ່ງຈະເປັນລາຍຮັບທາງດ້ານເສດຖະກິດຂອງຊາດແລະຂອງປະຊາຊົນທ້ອງຖິ່ນທີ່ຢູ່ໃນເຂດພື້ນທີ່ເປົ້າໝາຍຂອງໂຄງການ, ເປັນການປະຕິບັດພັນທະຕໍ່ສົນທິສັນຍາສາກົນວ່າດ້ວຍການປ່ຽນແປງດິນຟ້າອາກາດຮ່ວມກັນ ແລະສ້າງໂອກາດໃຫ້ປະຊາຊົນໄດ້ມີສ່ວນຮ່ວມໃນການຄຸ້ມຄອງຊັບພະຍາກອນປ່າໄມ້ ເພື່ອເປັນການພັດທະນາຊີວິດການເປັນຢູ່ຂອງປະຊາຊົນທີ່ຢູ່ໃນຂອບເຂດພື້ນທີ່ເປົ້າໝາຍຂອງໂຄງການ
ທ່ານ ຫວັງຈຽນ ຜູ້ອໍານວຍການບໍລິສັດ ເສສວນຫົວໂຖ ພັດທະນາເທັກໂນໂລຊີກາກບອນຈຳກັດ ກ່າວວ່າ: ທີມງານຂອງພວກເຮົາໄດ້ສ້າງຕັ້ງຂຶ້ນໃນປີ 2015 ສ່ວນໃຫຍ່ແມ່ນມີສ່ວນຮ່ວມໃນການຄຸ້ມຄອງສີນເຊື່ອກາກບອນປ່າໄມ້, (REDD+ )ແລະຊື້-ຂາຍສິນເຊື່ອກາກບອນປ່າໄມ້. ບໍລິສັດມີຄວາມຮູ້ ແລະ ປະສົບການ ໃນການຄຸ້ມຄອງລະບົບວຽກງານຢ່າງດີ ແລະມີທີມງານວິຊາການ ທີ່ມີປະສົບການ ແລະ ເປັນມືອາຊີບ,
ສະນັ້ນ, ເພື່ອເປັນການສະຫນອງຕະຫຼາດກາກບອນປ່າໄມ້ທີ່ຍືນຍົງໂດຍອີງໃສ່ສະພາບທໍາມະຊາດ.ເພື່ອພັດທະນາໃຫ້ມີຄວາມຍືນຍົງ ແລະຄວາມກ້າວຫນ້າຢ່າງຕໍ່ເນື່ອງຂອງການຮ່ວມມືລະຫວ່າງກະຊວງກະສິກໍາແລະປ່າໄມ້ແລະຈະນຳພາເຂົ້າສູ່ຕະຫຼາດສາກົນຂອງກາກບອນປ່າໄມ້ແບບຍືນຍົງໃນອານາຄົດ.
ບໍລິສັດ ເສສວນຫົວໂຖ ກາກບອນພັດທະນາເທັກໂນໂລຊີກາກບອນຈຳກັດໄດ້ມີຄວາມສົນໃຈຕໍ່ໂຄງການ ກາກບອນປ່າໄມ້ຂອງລາວໃນເດືອນມີນາ 2023 ເປັນຕົ້ນມາ ແລະໄດ້ຍືນໜັງສືເຈດຈໍນົງ ແລະ ສະເໜີແຜນພັດທະນາໂຄງການຕໍ່ກົມປ່າໄມ້, ກະຊວງກະສິກໍາແລະປ່າໄມ້ໃນເດືອນມິຖຸນາ,ໃນທີ່ສຸດກໍ່ປະສົມຜົນສໍາເລັດ ແລະ ໄດ້ຮັບອະນຸມັດ ໃນທ້າຍເດືອນກັນຍານີ້ . ທັງສອງຝ່າຍໄດ້ຕົກລົງເຫັນດີ ລົງນາມ ເຊັນ MOU ໃນມື້ກ່ອນວັນສ້າງຕັ້ງສາທາລະນະລັດປະຊາທິປະໄຕປະຊາຊົນລາວຄົບຮອບ 48 ປີ ເພື່ອເປັນຂອງຂວັນວັນຊາດລາວ.
ໂຄງການ“ຫຼຸດຜ່ອນການປ່ອຍອາຍເຮືອນແກ້ວຈາກການທຳລາຍປ່າ” ມີເປົ້າໝາຍຈັດຕັ້ງປະຕິບັດ ຢູໃນປ່າສະຫງວນແຫ່ງຊາດຍອດນ້ຳໂມ-ພູສາມສຸມແຂວງຊຽງຂວາງແລະປ່າປ້ອງກັນແຫ່ງຊາດ ແຫຼ່ງນໍ້າຊັນ-ນໍ້າເຜືອກແຂວງຊຽງຂວາງ ແລະ ແຂວງໄຊສົມບູນ, ທັງສອງພື້ນມີເນື້ອທີ່ທັງໝົດປະມານ 140,000 ເຮັກຕາ, ຄາດຄະເນວ່າ ການປ່ອຍທາດອາຍກາກໂບນີກ ຈະມີປະມານ 200,000 ໂຕນ/ປີ.
ໂຄງການນີ້ລວມມີຫຼາຍໆກິດຈະກໍາທີ່ສຳຄັນຄື: ການຄຸ້ມຄອງ ແລະ ປົກປັກຮັກສາປ່າໄມ້,ການສ້າງສູນຮຽນຮູ້ , ການສ້າງແລວກັນໄຟ, ການກວດກາລາດຕະເວນ , ການກໍານົດເຂດແດນ , ການປັບປຸງຊີວິດການເປັນຢູ່ຂອງປະຊາຊົນ, ວຽກງານກ່ຽວກັບຄວາມເຫັນດີເຫັນພ້ອມດ້ວຍຄວາມສະໝັກໃຈ ແລະ ໄດ້ຮັບຂໍ້ມູນລ່ວງໜ້າ ແລະ ອື່ນໆ;
ຮ່ວມລົງນາມ ເຊັນບົດບັນທຶກດັ່ງກ່າວ ໂດຍທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້ ກະຊວງກະສິກໍາແລະປ່າໄມ້, ທ່ານຫວັງຈຽນ ອໍານວຍການບໍລິສັດ ເສສວນຫົວໂຖ ພັດທະນາເທັກໂນໂລຊີກາກບອນຈຳກັດ ແລະທ່ານບຸນເຮືອງ ຊີນຈິຄັງ,ປະທານບໍລິສັດຄັງຮົວລົງທືນລາວຈຳກັດ.
ພາຍຫຼັງການລົງນາມເຊັນMOU ດັ່ງກ່າວ, ກະຊວງກະສິກຳແລະປ່າໄມ້ຂອງ ສປປ ລາວ ແລະບໍລິສັດ ເສວນຫົວໂຖກາກບອນ ພັດທະນາເທັກໂນໂລຊີກາກບອນຈຳກັດຈະນຳໃຊ້ປະໂຫຍດຂອງຕົນຢ່າງຄົບຖ້ວນເພື່ອພັດທະນາໂຄງການREDD+ໃນອານາຄົດ, ພ້ອມທັງຕົວຊີ້ບອກສີນເຊື່ອກາກບອນປ່າໄມ້ແລະການຫຼຸດຜ່ອນການປ່ອຍທາດອາຍເຮືອນແກ້ວ ແລະ ມີການຄຸ້ມຄອງປ່າໄມ້ແບບຍືນຍົງ. ໂດຍອີງຕາມການຊີ້ນຳຂອງກະຊວງກະສິກຳ ແລະປ່າໄມ້ຂອງສປປລາວ, ຊຶ່ງມີລະບົບການຄຸ້ມຄອງປ່າໄມ້ເພື່ອຊຸກຍູ້ໃຫ້ສອງຝ່າຍສືບຕໍ່ເພີ່ມທະວີການຮ່ວມມືຍຸດທະສາດໃນຂົງເຂດພັດທະນາເພື່ອກ້າວໄປສູ່ສາກົນ.
“REDD+”ໝາຍເຖິງ“ການຫຼຸດຜ່ອນການປ່ອຍອາຍເຮືອນແກ້ວຈາກການທຳລາຍປ່າແລະການເຮັດໃຫ້ປ່າໄມ້ຊຸດໂຊມ ຢູ່ໃນປະເທດກຳລັງພັດທະນາ,” ໃນນັ້ນລວມເຖິງການຄຸ້ມຄອງປ່າໄມ້ແບບຍືນຍົງແລະການປົກປັກຮັກສາປ່າໄມ້ເພືອເສີມຂະຫຍາຍ ແລະ ເພີ່ມ ພື້ນທີ່ຂອງແຫຼ່ງກາກບອນຂອງປ່າໄມ້.