ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ລົດໂດຍສານທີ່ນໍາໃຊ້ພະລັງງານໄຟຟ້າຢູ່ອຸດົມໄຊ ໄດ້ຮັບການຕອບຮັບດີຈາກສັງຄົມ
ປັດຈຸບັນນີ້ລົດໂດຍສານທີ່ນໍາໃຊ້ພະລັງງານໄຟຟ້າໄດ້ຮັບການຕອບຮັບຈາກມວນຊົນກໍ່ຄືນັກທ່ອງທ່ຽວທີ່ເດີນທາງໄປທ່ຽວເມືອງໄຊ ແຂວງອຸດົມໄຊໄດ້ເປັນຢ່າງດີ ເນື່ອງຈາກມີລາຄາປະຢັດ, ຊ່ວຍຫລຸດຜ່ອນມົນລະພິດທາງອາກາດ ແລະເປັນມິດຕໍ່ສີ່ງແວດລ້ອມ.
ທ່ານ ດາວວຽງ ກິຕະດາວັນ ປະທານບໍລິສັດ ຈະເລີນຊັບ ຂົນສົ່ງໂດຍສານ ຈໍາກັດຜູ້ດຽວ ໃຫ້ສໍາພາດວ່າ: ບໍລິສັດໄດ້ເລີ່ມນໍາລົດໄຟຟ້າມາບໍລິການຮັບໃຊ້ສັງຄົມໃນປີ 2018 ຕາມນະໂຍບາຍຂອງລັດ ຖະບານໃນການສົ່ງເສີມໃຫ້ສັງຄົມນໍາໃຊ້ພະລັງງານທີ່ສະອາດ ເນື່ອງຈາກຄອບຄົວມີພື້ນຖານດ້ານການຂົນສົ່ງໂດຍສານລົດເມມາກ່ອນ ໂດຍໄດ້ເລີ່ມສຶກສາລົດໄຟຟ້າທີ່ໄດ້ຮັບຄວາມນິຍົມ ແລະ ນໍາໃຊ້ຫລາຍຢູ່ປະເທດຈີນ. ໃນເບື້ອງຕົ້ນໄດ້ນໍາເຂົ້າມາທົດລອງໃຊ້ 3 ຄັນໄລຍະ 3 ເດືອນ ເຫັນວ່າໄດ້ຮັບການຕອບຮັບຈາກສັງຄົມດີສົມຄວນ ເນື່ອງຈາກມີລາຄາປະຢັດ ແລະ ການບໍລິການສະ ດວກສະບາຍ ໂດຍແບ່ງ ເປັນ 3 ເຂດ ແຕ່ລະເຂດລາຄາເລີ່ມຕົ້ນແມ່ນ 10.000 ກີບ.
ມາຮອດປັດຈຸບັນນີ້ບໍລິສັດມີລົດໄຟຟ້າໃຫ້ບໍລິການທັງໝົດ 20 ຄັນ ຊື່ງໄດ້ປະກອບສ່ວນສ້າງວຽກເຮັດງານທໍາ ໃຫ້ປະຊາຊົນພາຍໃນເມືອງໄດ້ເປັັນຢ່າງດີ ສະເລ່ຍລາຍຮັບແມ່ນປະມານ 300.000 ຫາ 400.000 ກີບຕໍ່ຄັນໃນແຕ່ລະວັນ.
ທ່ານ ດາວວຽງ ກິຕະດາວັນ ໃຫ້ຮູ້ຕື່ມວ່າ: ລົດໂດຍສານໄຟຟ້າທັງໝົດຈະໃຫ້ການບໍລິການສະເພາະຢູ່ພາຍໃນເມືອງໄຊ ແລະປະຈໍາຢູ່ເປັນຈຸດ ເປັນຕົ້ນສະຖານີລົດໄຟ, ຄິວລົດສາທາລະນະ, ເຂດໂຮງໝໍ, ຕະຫຼາດ ແລະເຂດອື່ນໆ. ໃນຕໍ່ໜ້າບໍລິສັດຈະຂະຫຍາຍສາຂາໄປແຂວງ ຫຼວງພະບາງ ແລະ ຫຼວງນໍ້າທາ ປັດຈຸບັນກໍາລັງສຶກສາຂໍ້ ມູນຕົວຈິງໃນ 2 ແຂວງເປົ້າໝາຍ.
Cr: ຈັນທະສອນ ສີຫານາດ