ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ທ່ານ ວົງທອງ ສຸພັນທອງ ຮອງຫົວໜ້າວິສະວະກອນໃຫຍ່ ບໍລິສັດທາງລົດໄຟລາວ-ຈີນ ຈໍາກັດ ໄດ້ໃຫ້ສໍາພາດຕໍ່ CMG ປະຈໍາລາວໃນວັນທີ 22 ມີນາ 2023ນີ້, ທ່ານເວົ້າວ່າ, ບໍລິສັດທາງລົດໄຟລາວ-ຈີນ ຈະເປີດບໍລິການລະຫວ່າງປະເທດ ຈາກນະຄອນຫຼວງວຽງຈັນຫານະຄອນຄຸນໝິງ ສປ ຈີນ, ນະຄອນຄຸນໝິງ-ນະຄອນຫຼວງວຽງຈັນ ໃນກາງເດືອນເມສາ 2023 ນີ້.
ທ່ານ ວົງທອງ ສຸພັນທອງ ກ່າວວ່າ, ມາຮອດປະຈຸບັນແມ່ນຢູ່ໃນຂັ້ນຕອນການປະສານສົມທົບ ການກະກຽມຄວາມພ້ອມໃນດ້ານຕ່າງໆຂອງທັງສອງຝ່າຍລາວ-ຈີນ ເພື່ອເປີດບໍລິການໃນກາງເດືອນເມສານີ້. ສໍາລັບຮູບແບບການເດີນທາງດ້ວຍລົດໄຟລະຫວ່າງປະເທດນີ້, ລົດໄຟທີ່ອອກຈາກນະຄອນຫຼວງວຽງຈັນໄປຮອດສະຖານີຄຸນໜິງ ສປ ຈີນ ຕ້ອງໄດ້ລົງແຈ້ງເອກະສານເຂົ້າ-ອອກເມືອງຢູ່ສະຖານີບໍ່ເຕ່ນ(ສປປ ລາວ)ກ່ອນ,ຈາກນັ້ນ, ໄປແຈ້ງເຂົ້າເມືອງຢູ່ສະຖານີບໍ່ຫານ(ສປ ຈີນ) ເພື່ອເຂົ້າສປ ຈີນ ເຊິ່ງອີງໃສ່ລະບຽບການເຂົ້າ-ອອກຂອງແຕ່ລະປະເທດ. ອີງຕາມສະຖິຕິບໍລິສັດລົດໄຟລາວ-ຈີນໃຫ້ຮູ້ວ່າ, ຫຼັງຈາກສປປ ລາວ ແລະ ສປ ຈີນ ໄດ້ປະກາດເປີດປະເທດ, ປະຈຸບັນ ມີນັກທອ່ງທ່ຽວ, ນັກທຸລະກິດ ເດີນທາງໄປ-ມາຢ່າງຫຼວງຫຼາຍ ໂດຍຜ່ານທາງລົດໄຟລາວ-ຈີນ ເຂົ້າທາງສະຖານີບໍ່ເຕ່ນ ເພື່ອເຂົ້າມາສປປ ລາວ ແລະຈຸດຕ່າງໆຕາມແລວທາງລົດໄຟ ໂດຍສະເລ່ຍແລ້ວມີປະມານ 1.500-1.600 ຄົນຕໍ່ມື້.
ທ່ານກ່າວອີກວ່າ: ນັບແຕ່ບໍລິສັດທາງລົດໄຟລາວ-ຈີນ ຈໍາກັດ ໄດ້ເປີດນໍາໃຊ້ໃນວັນທີ 3 ທັນວາ 2021 ເປັນຕົ້ນມາ ບໍລິສັດໄດ້ຖືສໍາຄັນຂອດບໍລິການຜູ້ໂດຍສານ ແລະ ຄວາມປອດໄພເປັນບູລິມະສິດ ໂດຍມີການປັບປຸງດ້ານຕ່າງໆໃຫ້ດີຂຶ້ນເລື້ອຍໆ. ໃນວັນທີ 15 ມີນາປີນີ້, ບໍລິສັດລົດໄຟລາວ-ຈີນ ຈໍາກັດ ກໍໄດ້ເປີດຂາຍປີ້ທາງອອນລາຍ,ພຽງແຕ່ດາວໂຫຼດ App LCR Ticket ໃສ່ມືຖືກໍສາມາດຊື້ປີ້ໄດ້ ຜູ້ໂດຍສານສາມາດແຈ້ງເຂົ້າສະຖານີ ໂດຍໃຊ້ຄິວອາໂຄດຈາກການຊື້ປີ້ກໍເດີນທາງໄດ້ເລີຍ ສະດວກ ວ່ອງໄວ ແລະທັນສະໄໝ ເຊິ່ງປະຈຸບັນ, ມີຜູ້ລົງທະບຽນນໍາໃຊ້ App LCR Ticket ແລ້ວປະມານ 15.000 ກວ່າຄົນ.
ຍ້ອນລົດໄຟລາວ-ຈີນ ເຊື່ອມຕໍ່ຈາກສປປ ລາວ ໄປຍັງສປ ຈີນ ແລ້ວເຊື່ອມຕໍ່ກັບສາກົນ. ດັ່ງນັ້ນ, App LCR Ticket ຂາຍປີ້ອອນໄລນີ້ ແມ່ນບໍລິສັດດຽວກັນທີ່ຄົ້ນຄວ້າການຂາຍປີ້ທາງອອນລາຍຢູ່ສປ ຈີນ ສະນັ້ນ, ລະບົບຕ່າງໆໄດ້ຖືກນໍາມາພັດທະນາ ເພື່ອໃຫ້ສອດຄ່ອງໃນການຊື້ປີ້ທາງອອນໄລຂອງລົດໄຟລາວ-ຈີນ ຕອນຢູ່ລາວໄດ້ກ້າວຂຶ້ນສູ່ລະດັບໃໝ່ທີ່ທັນສະໄໝ.