ອາຫານປະເພດຊີ້ນງົວໄດ້ຮັບນິຍົມຫລາຍ ເນື່ອງຈາກວ່າມີລົດຊາດແຊບ ແລະ ປຸງແຕ່ງອາຫານໄດ້ຫລາຍເຍື່ອງ ຈຶ່ງເຮັດໃຫ້ຊີ້ນງົວເປັນທີ່ຕ້ອງການຂອງທ້ອງຕະຫລາດ ແລະ ອາຊີບລ້ຽງງົວເພື່ອເປັນສິນຄ້າກໍເປັນອີກອາຊີບໜຶ່ງ ທີ່ປະຊາຊົນຍຶດຖືເພື່ອສ້າງເສດຖະກິດເຂົ້າຄອບຄົວ. ເໝືອນດັ່ງ ທ່ານ ຍຸດທະສິນ ສີປະມວນ ພະນັກງານ-ລັດຖະກອນ ສະມາຊິກກໍາມະບານສັງກັດຢູ່ຫ້ອງການກະສິກໍາ ແລະ ປ່າໄມ້ເມືອງຊະນະຄາມ ແຂວງວຽງຈັນ ເປັນຄອບຄົວຕົວແບບໃນການຜະລິດກະສິກໍາເປັນສິນຄ້າ, ໄດ້ຕາງໜ້າໃຫ້ບັນດາຕົວແບບໃນການຜະລິດໃນທົ່ວເມືອງ ຂຶ້ນລາຍງານຕໍ່ກອງປະຊຸມໃຫຍ່ ຄັ້ງທີ VIII ຜູ້ແທນສະຫະພັນກໍາມະບານເມືອງຊະນະຄາມ ໃນຄັ້ງວັນທີ 3 ກໍລະກົດ 2024 ທີ່ຜ່ານມາ.
ທ່ານ ຍຸດທະສິນ ສີປະມວນ ກ່າວວ່າ: ນັບແຕ່ຕົ້ນປີ 2015 ຕົນເອງ ໄດ້ສົມທົບທຶນກັບພີ່ນ້ອງຊື້ດິນ 1 ຕອນ ມີເນື້ອທີ່ 22,18 ເຮັກຕາ (142 ໄລ່) ຢູ່ບ້ານປາກພາງ ເມືອງຊະນະຄາມ ແຂວງວຽງຈັນ, ພ້ອມທັງໄດ້ປັບປຸງ ພື້ນຖານໂຄງລ່າງເປັນຕົ້ນ: ການລ້ອມຮົ້ວອ້ອມສະຖານທີ່, ດຶງໄຟຟ້າເຂົ້າ, ເຈາະນໍ້າບາດານ, ກໍ່ສ້າງຄອກງົວ-ຄອກເຟືອງ ແລະ ສ້າງບ່ອນພັກເຊົາ, ພ້ອມທັງໄດ້ປູກຫຍ້າແນວພັນຕ່າງໆຄື: ຫຍ້າແນວພັນລູຊີ, ແນວພັນກິນນີສີມ່ວງ, ຖົ່ວສະຕາຍໂລ, ຫຍ້າແນວພັນປາກຊ່ອງ 1, ຫຍ້າມາລູໂຕ້ 2 ແລະ ຫຍ້າຫວານ, ເຊິ່ງໄດ້ແບ່ງເນື້ອທີ່ດິນອອກເປັນ 5 ຕອນ, ເມື່ອອາຍຸຫຍ້າທີ່ປູກໄດ້ 60-75 ວັນ, ຈຶ່ງໄດ້ຊື້ງົວແມ່ພັນ 50 ໂຕ ແລະ ງົວພໍ່ພັນຈໍານວນ 4 ໂຕ (ສ່ວນຫລາຍເປັນງົວລູກຊອດ) ນໍາມາລ້ຽງ ແລະ ຂະຫຍາຍແນວພັນ, ລັກສະນະການລ້ຽງແມ່ນປ່ອຍແບບໝູນວຽນຕາມຮອບອາຍຸຂອງສວນຫຍ້າໃນແຕ່ລະຕອນ ແລະ ໄດ້ຈໍາໜ່າຍຂາຍອອກ ແລະ ຊຶ້ເຂົ້າທົດແທນເພື່ອບໍາລຸງລ້ຽງໃນໄລຍະໜຶ່ງ, ພາຍຫລັງໄດ້ລາຄາຕາມທີ່ຕ້ອງການແລ້ວ ກໍຂາຍອອກໝູນວຽນສັບປ່ຽນໄປເລື້ອຍໆ, ມາຮອດປັດຈຸບັນ ຄອບຄົວຕົວເອງມີງົວທັງໝົດ 89 ໂຕ, ມີແຮງງານຫລັກກໍຄືສະມາຊິກພາຍໃນຄອບຄົວ ແລະ ຈ້າງແຮງງານລາຍວັນໃນບາງກໍລະນີທີ່ມີຄວາມຈໍາເປັນ ເຊິ່ງຕົນເອງໄດ້ໃຊ້ເວລາພັກການໃນແຕ່ລະວັນ ເພື່ອເຮັດການຜະລິດ ກໍຄືການປູກ-ການລ້ຽງ ແລະ ຈໍາໜ່າຍ, ພ້ອມທັງຕິດຕາມບົວລະບັດປິ່ນປົວສັດລ້ຽງ ໃນເວລາສັດເຈັບປ່ວຍໃນແຕ່ລະໄລຍະດູການ.
ມາຮອດປັດຈຸບັນ ສາມາດສ້າງລາຍຮັບໃຫ້ແກ່ຄອບຄົວ ຈາກການຂາຍງົວສະເລ່ຍ 300 ລ້ານກີບຕໍ່ປີ ເຊິ່ງເຫັນວ່າການລ້ຽງງົວຂາຍ ແມ່ນສາມາດສ້າງລາຍຮັບໃຫ້ແກ່ຄອບຄົວໄດ້ເປັນຢ່າງດີ ຖ້າທຽບໃສ່ໃນເມື່ອກ່ອນເຫັນວ່າ ຄອບຄົວມີຊີວິດການເປັນຢູ່ທີ່ດີຂຶ້ນ ຈົນມີເຮືອນຢູ່ຖາວອນ, ມີພະຫະນະຮັບໃຊ້ ແລະ ສາມາດສົ່ງເສີມລູກຫລານໄດ້ຮັບການສຶກສາໃນລະດັບທີ່ສູງຂຶ້ນ. ໃນຕໍ່ໜ້າແມ່ນຈະສືບຕໍ່ປັບປຸງການປູກ-ການລ້ຽງໃຫ້ມີຄຸນນະພາບສູງຂຶ້ນ ເປັນຕົ້ນການປັບປຸງໂຄງລ່າງພື້ນຖານໃນສະຖານທີ່ໃຫ້ດີຂຶ້ນ, ເອົາໃຈໃສ່ບົວລະບັດ ເບິ່ງແຍງຮັກສາສຸຂະພາບຂອງສັດລ້ຽງ, ການຂະຫຍາຍເນື້ອປູກຫຍ້າລ້ຽງສັດໃຫ້ພຽງພໍ ກັບຄວາມຕ້ອງການ, ພ້ອມທັງນໍາເອົາບົດຮຽນໃນການຕິດຕາມ-ຊຸກຍູ້ຈາກພາກສ່ວນທີ່ກ່ຽວຂ້ອງ ກໍຄືຫ້ອງການ ແລະ ພະແນກກະສິກໍາ ແລະ ປ່າໄມ້, ເພື່ອນໍາມາປັບປຸງ ແລະ ຍົກລະດັບການຜະລິດຂອງຕົນໃຫ້ມີປະສິດທິພາບສູງຂຶ້ນ.
ຂໍ້ມູນຈາກເມືອງຊະນະຄາມ:ໂດຍ: ມາລິດາ.