ຕອນເຊົ້າວັນທີ 30 ສິງຫາ 2023. ທີ່ຫ້ອງປະຊຸມ ວິທະຍຸກະຈາຍສຽງແຫ່ງຊາດລາວ ໄດ້ຈັດຊຸດຝຶກອົບຮົມພື້ນຖານການຈັດລາຍການວິທະຍຸຂຶ້ນ, ໂດຍພາຍໃຕ້ການເປັນປະທານຂອງທ່ານ ສຸວັນ ວິໄລແສງ ຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດລາວ, ມີທ່ານ ຄຳຜ່ອນ ໄຊອຸດົມ ຫົວໜ້າພະແນກລາຍການ ພ້ອມດ້ວຍນັກວິທະຍາກອນ ມາຈາກ ວສລ ແລະ ມີບັນດານັກສຳມະນາກອນຈາກ 10 ກວ່າພາກສ່ວນ ມີ 21 ຄົນເຂົ້າຮ່ວມ.
ທ່ານ ສຸວັນ ວິໄລແສງ ຜູ້ອຳນວຍການໃຫຍ່ ວິທະຍຸກະຈາຍສຽງແຫ່ງຊາດລາວ ກ່າວວ່າ : ຊຸດຝຶກອົບຮົມຄັ້ງນີ້ມີຄວາມສຳຄັນຫຼາຍຕໍ່ນັກຈັດລາຍການວິທະຍຸ ໂດຍສະເພາະນັກຈັດລາຍການວິທະຍຸຈາກພາກສ່ວນຕ່າງໆ ເພາະຈະໄດ້ພ້ອມກັນຮຽນຮູ້ພື້ນຖານ, ການກະກຽມ, ການວາງແຜນ, ຫຼັກການ, ຂະບວນການຜະລິດ, ການສ້າງບົດ ແລະ ການກຳນົດເປົ້າໝາຍ ລວມທັງລັກສະນະຕ່າງໆໃນການເວົ້າ ເພື່ອຖ່າຍທອດເຖິງກຸ່ມຜູ້ຟັງໄດ້ຢ່າງຊັດເຈນ ແລະ ມີເນື້ອໃນຄົບຖ້ວນ.
ຊຸດຝຶກອົບຮົມຄັ້ງນີ້ ດຳເນີນໄປເປັນເວລາ 1 ວັນເຕັມ, ທີ່ຫ້ອງປະຊຸມ ວິທະຍຸກະຈາຍສຽງແຫ່ງຊາດລາວ.
