ໃນວັນທີ 11-12 ພຶດສະພາ 2024 ນີ້, ວັດປ່າພິລາວົງບຸດກັດສະກາຣາມ ບ້ານຈໍາປາ-ປັກແຮດ, ເມືອງສີໂຄດຕະບອງ-ນາຊາຍທອງ, ນະຄອນຫຼວງວຽງຈັນ ໄດ້ຕັ້ງກອງຜ້າປ່າມະຫາບຸນສ້າງທາງເຂົ້າວັດປ່າສ້າງມັກຄາສູ່ສະຫວັນ ຕາມຮອຍປະນິທານອົງພຣະຍອດແກ້ວມະຫາງອນດໍາຣົງບຸນ ເພື່ອສ້າງຫົນທາງເບຕົງເບຕົງ, ມີ ພະອາຈານໃຫຍ່ ບຸນມາ ສີມມາພົມປະທານສູນກາງ ອົງການພຸດທະສາດສະໜາແຫ່ງ ສປປ ລາວ, ທ່ານ ນາງ ປ້ານາລີ ສີສຸລິດ ພັນລະຍາຂອງທ່ານ ທອງລຸນ ສີສຸລິດ ປະທານປະເທດ ຕະຫລອດຮອດເຈົ້າສັດທາໃຫຍ່ ແລະ ປະຊາຊົນພາຍໃນນະຄອນຫຼວງ ເຂົ້າຮ່ວມຈໍານວນຫລາຍ.
ພະອາຈານ ດໍາລົງບຸນ ພິມມະຈັກ ຄະນະບໍລິຫານງານ ປະຈໍາການ ຫົວໜ້າກໍາມາທິການ ການຕ່າງປະເທດ ສູນກາງອົງການພຸດທະສາດສະໜາສໍາພັນລາວ ມີຄໍາເຫັນວ່າ: ວັດປ່າພິລາວົງກັດສະກາຣາມ ໄດ້ສ້າງຂື້ນດ້ວຍແຮງເຫຼື້ອມໃສສັດທາສູງສົ່ງ ຂອງທ່ານຜູ້ມີບຸນຕັ້ງແຕ່ປີ 2018 ເປັນຕົ້ນມາຄື ທ່ານຍາພໍ່ ສີພາ ແລະ ຍາແມ່ ອິນຊ້ອຍ ພິລາວົງ, ທ່ານ ສົມສະຫງວນ ແລະ ທ່ານນາງ ສົມພັນ ພິລາວົງ ໄດ້ຖວາຍດິນຈໍານວນ 10 ເຮັກຕາກວ່າໃຫ້ຍາທ່ານໃຫຍ່ ອົງພຣະຍອດແກ້ວ ມະຫາງອນດໍາຣົງບຸນ ສ້າງເປັນສັງຄາຣາມໃນພະພຸດທະສາສະໜາ, ຕໍ່ມາ ທ່ານ ກຽດຕິສັກ ບຸດກັກສະກາ ໄດ້ມອບຖວາຍດິນຈໍານວນ 8 ເຮັກຕາກວ່າແລະຄະນະພັກ-ຄະນະປົກຄອງນະຄອນຫຼວງວຽງຈັນ ໄດ້ມອບຖວາຍດິນດ່ານຈໍາປາ ຈໍານວນ 5 ເຮັກຕາໃຫ້ແກ່ວັດດັ່ງກ່າວ.
ປະຈຸບັນມີ ພຣະອາຈານ ບົວວອນ ແກ້ວບໍລິລັກ ເປັນເຈົ້າອະທິການວັດ. ພາຍຫຼັງວັດໄດ້ສ້າງຂື້ນກໍ່ໄດ້ມີການພັດທະນາມາເລື້ອຍໆ, ເຊີ່ງໃນນັ້ນການສ້າງຫົນທາງເຂົ້າວັດກໍ່ເປັນວຽກງານສໍາຄັນອີກອັນໜຶ່ງໃນການອໍານວຍຄວາມສະດວກ ໃຫ້ແກ່ບັນດາອອກຕົນຍາດໂຍມແລະພຣະສົງ. ສະນັ້ນ, ທາງເຈົ້າສັດທາ, ຄະນະອໍານາດການປົກຄອງບ້ານ ແລະປະຊາຊົນ ເຫັນໄດ້ຄວາມຈໍາເປັນໃນການສ້າງທາງເຂົ້າວັດ ເພື່ອໃຫ້ມີຄວາມສະດວກໃນການເຂົ້າ-ອອກ ຈຶ່ງເຫັນດີພ້ອມພຽງກັນລົງມືສ້າງຫົນທາງເປຕົງເບຕົງເຂົ້າວັດ ໄລຍະ 2.100 ແມັດ, ມີຄວາມກວ້າງ 8 ແມັດ, ຄວາມໜາ 20 ຊັງຕີແມັດສໍາລັບຫົນທາງຜ່ານບ້ານ, ສ່ວນໃນເຂດວັດສ້າງໜາ 15 ຊັງຕີແມັດ. ການສ້າງຫົນທາງເບຕົງໃນເບື້ອງຕົ້ນແມ່ນສ້າງໄປແລ້ວ 250 ແມັດ, ມູນຄ່າ 900 ລ້ານກີບ, ໂດຍເອົາປູນຈາກບໍລິສັດມາເທກ່ອນ ແລະ ຍັງຄ້າງບໍລິສັດຢູ່
ຄະນະບໍລິຫານງານ ປະຈໍາການ ຫົວໜ້າກໍາມາທິການ ການຕ່າງປະເທດ ສູນກາງອົງການພຸດທະສາດສະໜາສໍາພັນລາວ ມີຄໍາເຫັນວ່າ: ສໍາລັບການສ້າງເສັ້ນທາງເບື້ອງຕົ້ນໄດ້ຮັບປັດໄຈຖວາຍກຸຕິຂອງທ່ານທູດຂຽນ, ຍາແມ່ໄພຈິດ ພັນສຸຣິວົງ 117 ລ້ານກີບ ແລະ ທ່ານ ຄໍາໄຜ່ ສົມຊະນະ 50 ລ້ານກີບ ພ້ອມດ້ວຍບັນດາເຈົ້າສັດທາອື່ນໆ. ມາຮອດປະຈຸບັນຍັງຄ້າງຊໍາລະ 657 ລ້ານກີບ. ເຊີ່ງຈະນໍາປັດໄຈຈາກບັນດາອອກຕົນຍາດໂຍມທີ່ມາຮ່ວມອານຸໂມທະນາບຸນຄັ້ງນີ້ໄປຊໍາລະຄ່າປູນທີ່ຍັງຄ້າງທັງໝົດ, ສ່ວນທີ່ເຫຼືອກໍ່ໄດ້ສືບຕໍ່ນໍາໄປສ້າງຫົນທາງໃຫ້ສໍາເລັດກ່ອນເຂົ້າລະດູຝົນ.
ສໍາລັບການສ້າງຫົນທາງເຂົ້າວັດໄລຍະທາງ 2.100 ແມັດ, ລວມມູນຄ່າໃນການສ້າງທັງໝົດ 5 ຕື້ກວ່າກີບ. ສໍາລັບທ່ານໃດທີ່ມີຈິດໃຈສັດທາມີຄວາມເຫຼື້ອມໃສສັດທາປາສາທະໃນພຸດທະສາສະໜາ ຢາກປະກອບສ່ວນທາງດ້ານວັດຖຸ, ເງິນເຂົ້າໃນການສ້າງເສັ້ນທາງເຂົ້າວັດກໍ່ສາມາດປະກອບສ່ວນໄດ້ຕາມກໍາລັງສັດທາ.
ຂ່າວ: ບຸນຍັງ ພຸດສະຫວັດ ( ວສລ )
