ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ວັນທີ 13 ກຸມພາ ວັນວິທະຍຸໂລກ

<<< ຟັງສຽງ >>>

ອົງການການສຶກສາ, ວິທະຍາສາດ ແລະ ວັດທະນະທຳຂອງສະຫະປະ ຊາຊາດ ຫຼື UNESCO ໄດ້ກໍານົດເອົາວັນທີ 13 ກຸມພາຂອງທຸກໆປີເປັນວັນວິທະຍຸໂລກ ໂດຍໄດ້ ຮັບຮອງຈາກສະມັດຊາໃຫຍ່ອົງການສະຫະປະຊາຊາດຮຽບຮ້ອຍແລ້ວ ຍ້ອນເຫັນວ່າ ວິທະຍຸກະຈາຍ ສຽງເປັນຊ່ອງທາງສໍາຄັນໃນການເຂົ້າເຖີງປະຊາຊົນໄດ້ຢ່າງກ້ວາງຂວາງ, ເປັນສື່ມີປະສິດທິພາບທີ່ໃຫ້ຂໍ້ມູນຂ່າວສານ, ຄວາມບັນເທີງ, ການສຶກສາຮຽນຮູ້ ແລະ ເປັນເຄື່ອງມືທີ່ມີປະສິດທິພາບໃນການພັດທະນາສັງຄົມ ໂດຍໄດ້ເລີ່ມຈັດກິດຈະກໍາເພື່ອສະເຫລີມສະຫລອງວັນວິທະຍຸໂລກຢ່າງເປັນທາງການໃນປີ 2012 ເປັນຕົ້ນມາ ແລະ ມີຫົວຂໍ້ການສະເຫລີມສະຫລອງແຕກຕ່າງກັນໃນແຕ່ລະປີ. ສໍາລັບການສະເຫລີມສະຫລອງວັນວິທະຍຸໂລກປີນີ້ ເປັນຄັ້ງທີ 8 ແລ້ວ ພາຍໃຕ້ຫົວຂໍ້ “ ການພົບປະສົນທະນາ, ຄວາມໃຈກ້ວາງ ແລະ ສັນຕິພາບ ”. ວິທະຍຸກະຈາຍສຽງ ຖືເປັນສື່ທີ່ເກົ່າແກ່ຂອງໂລກທີ່ມີປະຫວັດຄວາມເປັນມາຫລາຍກ່ວາ 150 ປີ ມາຮອດປັດຈຸບັນ ວິທະຍຸກະຈາຍສຽງຍັງມີບົດບາດສຳຄັນຢູ່ຫລາຍປະເທດໃນໂລກ ເພາະເປັນສື່ທີ່ມີຄຸນລັກສະນະພິເສດ ແລະ ມີຄຸນລັກສະນະສະເພາະໂຕທີ່ໂດດເດັ່ນບໍ່ຄືສື່ປະເພດອື່ນ ເປັນ ຕົ້ນ: ລາຄາຖືກ, ພົກພາງ່າຍ, ກະຈາຍຂໍ້ມູນຂ່າວສານໄດ້ຢ່າງວ່ອງໄວທັນການ, ກ້ວາງຂວາງ ແລະ ອື່ນໆ. ສຳລັບວິທະຍຸກະຈາຍສຽງຢູ່ສປປ ລາວ ສະຖານີທີ່ເກີດຂຶ້ນກ່ອນໝູ່ ກໍ່ແມ່ນວິທະຍຸກະຈາຍສຽງຝ່າຍປະເທດລາວ ຫລື ວິທະຍຸກະຈາຍສຽງແຫ່ງຊາດລາວໃນປັດຈຸບັນ, ຖືເປັນສື່ເກົ່າແກ່ ແລະ ເປັນສື່ທຳອິດຂອງລາວທີ່ໄດ້ຮັບການສ້າງຕັ້ງຂຶ້ນໃນວັນທີ13 ສິງຫາ 1960 ຢູ່ຖານທີ່ໝັ້ນຂອງການປະຕິວັດ, ເມືອງ ວຽງໄຊ, ແຂວງ ຫົວພັນ. ຕະຫລອດໄລຍະເກືອບ 6 ທົດສະວັດຜ່ານມາ ໄດ້ພິສູດໃຫ້ເຫັນແລ້ວວ່າ: ວິທະຍຸກະຈາຍສຽງແຫ່ງຊາດລາວ ຍາມໃດກໍ່ເປັນກະບອກສຽງອັນແຫລມຄົມ ແລະ ເຊື່ອໃຈໄດ້ຂອງພັກ ແລະ ລັດຖະບານ ກໍ່ຄື ຂອງປະຊາຊົນລາວບັນດາເຜົ່າ, ໂດຍສະເພາະໄລຍະທີ່ປະຊາຊົນລາວບັນດາເຜົ່າໃນທົ່ວປະເທດຕໍ່ສູ້ຢ່າງດຸເດືອດ, ຂ້ຽວຂາດໃນແປວໄຟແຫ່ງສົງຄາມຕ້ານຈັກກະພັດຜູ້ຮຸກຮານ. ວິທະຍຸກະຈາຍສຽງແຫ່ງຊາດລາວ ໄດ້ເປັນກະບອກສຽງທີ່ສຳຄັນທີ່ສຸດປະກອບສ່ວນເຂົ້າໃນການໂຄສະນາຂົົນຂວາຍ ແລະ ປຸກລະດົມເຕົ້າໂຮມຄວາມສາມັກຄີປະຊາຊົນລາວບັນດາເຜົ່າຕໍ່ສູ້ກູ້ຊາດ ຈົນສາມາດຍາດໄດ້ໄຊຊະນະຢ່າງສົມບູນ ແລະ ສະຖາປະນາເປັນ ສປປ ລາວ ຂຶ້ນໃນວັນທີ 2 ທັນວາປີ 1975 ຢ່າງສະຫງ່າຜ່າເຜີຍ. ຫລັງຈາກປະເທດຊາດໄດ້ຮັບການປົດປ່ອຍ ວິທະຍຸກະຈາຍສຽງແຫ່ງຊາດລາວ ຍັງສືບຕໍ່ເປັນສືທີ່ມີບົດບາດສຳຄັນໃນການໂຄສະນາແນວທາງນະໂຍບາຍ, ມະຕິ, ຄຳສັ່ງຂອງພັກ, ກົດໝາຍ ແລະ ນິຕິກຳຕ່າງໆ ຂອງລັດຖະບານຢ່າງຂາດບໍ່ໄດ້ ເພາະເປັນສື່ທີ່ສາມາດເຂົ້າເຖີງປະຊາຊົນຜູ້ທຸກຍາກໃນເຂດຊົນນະບົດຫ່າງໃກສອກຫລີກໄດ້ດີກ່ວາສື່ອື່ນໆ. ພ້ອມນີ້, ພັກ ແລະ ລັດຖະບານລາວ ຍັງໄດ້ສະໜັບ ສະໜູນດ້ານວັດຖຸ-ອຸປະກອນດ້ານເຕັກນິກ ແລະ ອື່ນໆ ໃຫ້ຂົງເຂດວິທະຍຸກະຈາຍສຽງ, ພ້ອມທັງໄດ້ອະນຸຍາດສ້າງຕັ້ງສະຖານີວິທະຍຸກະຈາຍສຽງທັງຢູ່ສູນກາງ ແລະ ທ້ອງຖິ່ນຂຶ້ນຫລາຍແຫ່ງ. ປັດຈຸບັນ ທົ່ວປະເທດມີວິທະຍຸກະຈາຍສຽງ 76 ແຫ່ງ, ໃນນີ້ຢູ່ສູນກາງ 3 ແຫ່ງ ແລະ ທ້ອງຖິ່ນ 73 ແຫ່ງ. ນອກນີ້ ຍັງໄດ້ຕິດຕັ້ງລະບົບໂທລະໂຄ່ງຢູ່ 5.747 ບ້ານໃນຈໍານວນ 8.495 ບ້ານໃນທົ່ວປະເທດ. ຂະນະທີ່ສັນຍານວິທະຍຸກະຈາຍສຽງສາມາດກວມເອົາຫລາຍກ່ວາ 90 ສ່ວນຮ້ອຍຂອງພື້ນທີ່ທົ່ວປະເທດ ເຮັດໃຫ້ການໂຄສະນາແນວທາງນະໂຍ ບາຍຂອງພັກ, ລະບຽບກົດໝາຍຂອງລັດ, ລວມທັງການນຳສະເໜີຂໍ້ມູນຂ່າວສານຕ່າງໆ ເຂົ້າເຖີງປະຊາຊົນທັງໃນຕົວເມືອງ ແລະ ປະຊາຊົນຜູ້ທຸກຍາກໃນຊົນນະບົດເຂດຫ່າງໄກສອກ ຫລີກນັບມື້ທົ່ວເຖີງໃນທົ່ວປະເທດ. ທ່ານ ປິ່ນປາດຖະໜາ ພັນທະມາລີ, ຫົວໜ້າກົມສື່ມວນຊົນ, ກະຊວງຖະແຫລງຂ່າວ, ວັດທະ ນະທໍາ ແລະ ທ່ອງທ່ຽວ ມີຄຳເຫັນວ່າ: “ບໍ່ວ່າໃນອະດີດ ກໍ່ຄື ປັດຈຸບັນ ລັດຖະບານໄດ້ໃຫ້ຄວາມສໍາຄັນຕໍ່ວິທະຍຸກະຈາຍສຽງ ຍັງເປັນສື່ທີ່ມີບົດບາດສໍາຄັນໃນສັງຄົມລາວ ເພາະເປັນສື່ທີ່ສາມາດນໍາສະເໜີຂໍ້ມູນຂ່າວສານຕ່າງໆ ໄດ້ຢ່າງວ່ອງໄວທັນເຫດການ ແລະ ມີເນື້ອຫາສາລະທີ່ຫລາກຫລາຍ. ນອກຈາກນີ້ ຍັງເປັນສື່ທີ່ສາມາດເຂົ້າເຖີງປະຊາຊົນໃນເຂດຫ່າງໃກສອກຫລີກໄດ້ດີກ່ວາສືປະເພດອື່ນຂອງລາວທີ່ມີຢູ່ໃນປັດຈຸບັນນີ້”. ສປປ ລາວ ເປັນປະເທດທີ່ຍັງທຸກຍາກ, ພູມສັນຖານຂອງປະເທດເປັນພູດອຍກວມເອົາປະມານ 3 ສ່ວນ 4 ຂອງເນື້ອທີ່ທົ່ວປະເທດ ມີພຽງສື່ອີເລັກໂຕຼນິກຄືວິທະຍຸກະຈາຍສຽງທີ່ສາມາດເຂົ້າເຖີງປະຊາ ຊົນໃນເຂດຊົນນະບົົດຫ່າງໄກສອກຫລີກໄດ້ດີກ່ວາສື່ອື່ນ ເຮັດໃຫ້ເຂົາເຈົ້າຮັບຂໍ້ມູນຂ່າວສານຕ່າງໆ ຜ່ານວິທະຍຸກະຈາຍສຽງເປັນສ່ວນໃຫຍ່. ທ່ານ ສົມລົດ ສຸລິຍົງ, ປະຊາຊົນບ້ານ ຫ້ວຍມອນ ຊຶ່ງເປັນບ້ານທີ່ຫ່າງໄກສອກຫລີກຂອງ ເມືອງ ວຽງຄໍາ, ແຂວງ ຫລວງພະບາງ ໃຫ້ສຳພາດວ່າ: “ຮັບຟັງວິທະຍຸເປັນປະຈໍາ ເພາະເປັນສື່ທີ່ຕົນ ເອງສາມາດເຂົ້າເຖີງໄດ້ດີກ່ວາສື່ປະເພດອື່ນ, ເປັນສື່ທີ່ໃຫ້ທັງຄວາມບັນເທີງ ແລະ ເນື້ອຫາສາລະຄວາມຮູ້ຕ່າງໆ ໄດ້ຫລາກຫລາຍ ໂດຍຟັງເປັນປະຈໍາທຸກວັນ” ປັດຈຸບັນ, ໂລກຂອງພວກເຮົາພວມຢູ່ໃນຍຸກແຫ່ງວິທະຍາສາດເຕັກໂນໂລຊີທີ່ທັນສະໄໝ ແລະ ຍຸກຂອງສື່ສັງຄົມອອນລາຍທີ່ວ່ອງໄວທັນເຫດການ. ສະນັ້ນ ເຖີງແມ່ນວ່າວິທະຍຸກະຈາຍສຽງ ຈະມີບົດບາດສຳຄັນ ແລະ ເປັນກະບອກສຽງທີ່ໄວ້ໃຈໄດ້ຂອງພັກ ແລະ ລັດຖະບານ, ກໍ່ຄື ຂອງປະຊາຊົນບັນດາເຜົ່າ, ແຕ່ວິທະຍຸກະຈາຍສຽງ ກໍ່ຄື ສື່ປະເພດອື່ນຂອງລາວທີ່ເປັນສື່ເກົ່າ ແມ່ນປາດສະຈາກບໍ່ໄດ້ຜົນກະທົບທີ່ໄດ້ຮັບຈາກການເຂົ້າມາຂອງສື່ໃໝ່ ເພາະມັນສົ່ງຜົນກະທົບໂດຍກົງຕໍ່ຈຳນວນຜູ້ຟັງ ແລະ ການເຂົ້າມາໂຄສະນາສິນຄ້າຂອງຜູ້ປະກອບການທີ່ມີທ່າອ່ຽງນັບມື້ຫລຸດລົງ ເນື່ອງຈາກຜູ້ຟັງຫັນໄປບໍລິໂພກຂໍ້ມູນຂ່າວສານ ແລະ ໂຄສະນາສິນຄ້າຕ່າງໆ ຜ່ານສື່ໃໝ່ນັບມື້ເພີ່ມຂຶ້ນ. ທ່ານ ໂພສີ ແກ້ວມະນີວົງ, ຜູ້ອຳນວຍການວິທະຍຸກະຈາຍສຽງແຫ່ງຊາດ ໃຫ້ສໍພາດວ່າ: “ສະເພາະວິທະຍຸກະຈາຍສຽງແຫ່ງຊາດ ໄດ້ປັບປຸງຕົນເອງຫລາຍຢ່າງເພື່ອຮັບມືກັບການເຂົ້າມາຂອງສື່ ໃໝ່ ເປັນຕົ້ນ ໄດ້ປັບປຸງດ້ານເນື້ອໃນໃຫ້ເນື້ອຫາສາລະທີ່ຫລາກຫລາຍ ແລະ ໜ້າສົນໃຈກ່ວາເກົ່າ, ເພີ່ມທະວີການພົວພັນຮ່ວມມືກັບວິທະຍຸຂອງສາກົນດ້ວຍການແລກປ່ຽນຂໍ້ມູນຂ່າວສານ ແລະ ເຕັກນິກຮ່ວມກັນ. ນອກນີ້ ໄດ້ນຳໃຊ້ສື່ໃໝ່ ຄື: ເວັບໄຊ, ເຟສບຸກ ແລະ ຢູທູບໃນການນຳສະເໜີລາຍການຕ່າງຯ ຂອງວິທະຍຸກະຈາຍສຽງແຫ່ງຊາດທີ່ມີທັງຄລິປວິດີໂອ, ພາບນິ້ງ ແລະ ອື່ນໆ ເຮັດໃຫ້ຂໍ້ມູນຂ່າວສານວ່ອງໄວ ແລະ ກ້ວາງໄກຂຶ້ນກ່ວາເກົ່າ”. ໃນຍຸກປັດຈຸບັນທີ່ເຕັກໂນໂລຊີຂໍ້ມູນຂ່າວສານ ແລະ ເຄືອຂ່າຍສັງຄົມອອນລາຍພັດທະນາຢ່າງວ່ອງໄວແບບກ້າວກະໂດດ ເຮັດໃຫ້ວົງການສື່ມວນຊົນໃນທົ່ວໂລກມີການປ່ຽນແປງຢ່າງວ່ອງໄວ, ໃນນີ້ ລວມທັງສື່ວິທະຍຸກະຈາຍສຽງຂອງລາວ ແຕ່ສື່ວິທະຍຸກະຈາຍສຽງ ນັບທັງວິທະຍຸກະຈາຍສຽງແຫ່ງຊາດລາວ ແລະ ວິທະຍຸກະຈາຍສຽງແຫ່ງອື່ນໆ ທັງຢູ່ສູນກາງ ແລະ ທ້ອງຖິ່ນຂອງລາວ ໄດ້ປັບປຸງຕົນເອງຢ່າງຕໍ່ເນື່ອງ. ນອກຈາກນຳສະເໜີຜ່ານຄື້ນວິທະຍຸແລ້ວ ຍັງໄດ້ກະຈາຍຜ່ານເວັບໄຊ, ເຟສບຸກ, ຢູທູບ ແລະ ແອັບພີເຄເຊິ່ນອື່ນໆ ເຮັດໃຫ້ສື່ວິທະຍຸກະຈາຍສຽງຢູ່ໃນລາວຍັງມີບົດບາດສຳຄັນຕໍ່ສັງຄົມ ກາຍເປັນກະບອກສຽງອັນແຫລມຄົມຂອງພັກ ແລະ ລັດຖະບານຕະຫລອດມາ. ໃນໂອກາດວັນວິທະຍຸໂລກ ວັນທີ 13 ກຸມພາປີນີ້ ຮຽກຮ້ອງມາຍັງວິທະຍຸກະຈາຍສຽງຂອງລາວແຕ່ລະແຫ່ງ ທັງຢູ່ສູນກາງ ແລະ ທ້ອງຖິ່ນ ຈົ່ງສືບຕໍ່ພັດທະນາ ແລະ ປັບປຸງຕົນເອງໃຫ້ຫລາຍຂຶ້ນ ກ່ວາເກົ່າທັງທາງດ້ານເນື້ອໃນ, ເຕັກນິກ ແລະ ອື່ນໆ ລວມເຖີງການຫັນມານຳໃຊ້ສື່ໃໝ່ເຂົ້າໃນການນຳສະເໜີຂໍ້ມູນຂ່າວສານເນື້ອຫາສາລະຕ່າງໆ ໃຫ້ມີຄວາມຫລາກຫລາຍກ່ວາເກົ່າ ເພື່ອປະກອບສ່ວນໂຄສະນາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມຂອງລັດຖະບານ ກໍ່ຄື ການແກ້ໄຂຄວາມທຸກຍາກຂອງປະຊາຊົນລາວບັນດາເຜົ່າໃຫ້ນັບມື້ຫລຸດລົງ ເພື່ອນຳເອົາປະເທດຊາດຫລຸດພົ້ນອອກຈາກປະເທດດ້ອຍພັດທະນາໃນປີ 2024 ຕາມທີ່ພັກ ແລະ ລັດຖະບານໄດ້ວາງຄາດ ໝາຍເອົາໄວ້ ແລະ ເຮັດໃຫ້ວິທະຍຸກະຈາຍສຽງຂອງລາວ ສືບຕໍ່ຍືນຍົງຄົງຢູ່ຕໍ່ໄປຄືວິທະຍຸກະຈາຍສຽງທີ່ກ້າວໜ້າທຸກໆແຫ່ງໃນທົ່ວໂລກ.