ການຖະແຫຼງຂ່າວຂອງຄະນະສະເພາະກິດ ປະຈຳວັນສຸກ ວັນທີ 30 ກໍລະກົດ 2021. ໃຫ້ຮູ້ວ່າ
-ວຽກງານການປີ່ນປົວຄຸ້ມຄອງກໍລະນີພະຍາດ COVID-19 ຢູ່ ສປປ ລາວ ປະຈຳວັນທີ 30 ກໍລະກົດ ປີ 2021.
ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດວັນທີ 30 ກໍລະກົດ 2021 :
ໄດ້ກວດວິເຄາະທັງໝົດ 2,379 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 244 ຄົນ (ຕິດເຊື້ອໃນຊຸມຊົນ 1 ກໍລະນີ ແລະ ກໍລະນີນຳເຂົ້າ 243 ກໍລະນີ ຈາກ ນະຄອນຫຼວງ: 31 , ສະຫວັນນະເຂດ: 118, ຈໍາປາສັກ: 38, ສາລະວັນ: 46, ຄໍາມ່ວນ: 10, ທັງໝົດແມ່ນ ກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ໂດຍຖືກຕ້ອງຕາມກົດໝາຍ. ສໍາລັບແຂວງສະຫວັນນະເຂດ ແມ່ນ ກວດພົບ 01​ ກໍລະນີ ທີ່ຕິດເຊື້ອຈາກຜູ້ສໍາຜັດໃກ້ຊິດ.
ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 5,919 ຄົນ, ເສຍຊີວິດສະສົມ 6 ຄົນ ແລະ ກໍາລັງປິ່ນປົວ ທັງໝົດ 2,774 ຄົນ.
ການເຝົ້າລະວັງຢູ່ຕາມຈຸດຜ່ານແດນ ໃນຂອບເຂດທົ່ວປະເທດ
ວັນທີ 29 ກໍລະກົດ 2021 ມີຜູ້ເດີນທາງເຂົ້າມາ ຕາມຈຸດຜ່ານດ່ານຕ່າງໆ ໃນສປປ ລາວ ທັງໝົດ 3,215 ຄົນ ເຊິ່ງທັງໝົດ ແມ່ນຖືກເກັບຕົວຢ່າງກວດຊອກຫາເຊື້ອ ແລະ ເຂ້ົ້າໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ 14 ​ວັນ;
ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 60 ສູນ ແລະ ມີຜູ້ຈຳກັດບໍລິເວນ 9,464 ຄົນ.
ມາຮອດປະຈຸບັນ ສະພາບການລະບາດພະຍາດ COVID-19 ໃນທົ່ວໂລກຍັງບໍ່ມີທ່າອຽງຫຼຸດລົງ, ຫຼາຍປະເທດມີການລະບາດຮອບໃໝ່ ຈາກສາຍພັນທີ່ມີການແຜ່ເຊື້ອຢ່າງໄວວາ, ໃນບັນດາປະເທດອ້ອມຂ້າງ ສປປ ລາວ ແມ່ນກຳລັງມີການລະບາດຮອບໃໝ່ຈາກສາຍພັນເດວຕາ ແລະ ມີຈຳນວນຜູ້ຕິດເຊື້ອໃໝ່ຫຼາຍສີບພັນຄົນໃນແຕ່ລະມື້ ເຮັດໃຫ້ມີການລັອກດາວຮອບໃໝ່ໃນຂົງເຂດນັ້ນ ແລະ ກິດຈະການຫຼາຍແຫ່ງປິດການໃຫ້ບໍລິການເປັນເວລາຍາວນານ ຈຶ່ງເປັນສາເຫດໃຫ້ມີແຮງງານລາວຈຳນວນຫຼວງຫຼາຍຫ່ວາງງານ ແລະ ກຳລັງ ກັບຄືນມາປະເທດຕາມຈຸດຜ່ານແດນຕ່າງໆ ໃນຂອບເຂດທົ່ວປະເທດ;
ສຳລັບ ປະເທດຂອງພວກເຮົາ ກໍ່ໄດ້ມີການຕິດຕາມເຝົ້າລະວັງ ສາຍພັນທີ່ຕິດເຊື້ອໃນ ສປປ ລາວ ເຫັນວ່າສ່ວນຫຼາຍພົບສາຍພັນ ອານຟາ 51 ຕົວຢ່າງ, ເດວຕາ 28 ຕົວຢ່າງ ເຊີ່ງພົບໃນແຮງງານລາວຕິດເຊື້ອນຳເຂົ້າມາ ຜູ້ທີ່ຕິດເຊື້ອ ທັງໝົດ ແມ່ນໄດ້ຮັບການປິ່ນປົວໃນໂຮງໝໍ ເຊິ່ງພາຍຫຼັງ ປິ່ນປົວຫາຍດີ 14 ວັນ ແມ່ນຈະຍັງສືບຕໍ່ຈຳກັດບໍລິເວນຕົນເອງຕື່ມອີກ 7​ ວັນ;
ສຳລັບ ແຮງງານທີ່ກັບມາແຕ່ປະເທດເພື່ອນບ້ານ ທີ່ກວດບໍ່ພົບເຊື້ອນັ້ນ ແມ່ນໄດ້ຖືກນຳສົ່ງຈຳກັດບໍລິເວນ ເປັນເວລາ 14​ ວັນ ນຳບັນດາສູນຕ່າງໆ ພາຍໃນແຂວງຂອງຕົນ ແລະ ຈະມີການກວດຫາເຊື້ອ 2 ຄັ້ງ ກ່ອນຈະໃຫ້ອອກຈາກສູນ ເພື່ອໃຫ້ພວກກ່ຽວໄປສືບຕໍ່ຈຳກັດບໍລິເວນຕື່ມອີກ 7 ວັນ ຢູ່​ເຮືອນຕົນເອງ (ສຳລັບຜູ້ມີເງື່ອນໄຂ) ແລະ ທີ່ສູນຈຳກັດບໍລິເວນຂອງເມືອງ ສຳລັບຜູ້ບໍ່ມີເງື່ອນໄຂ;
ຕໍ່ກັບສະພາບການດັ່ງກ່າວ, ເຫັນໄດ້ວ່າ ສ ປປ ລາວ ມີຄວາມສ່ຽງສູງທີ່ຈະມີການລະບາດໃນຊຸມຊົນຮອບໃໝ່ເນື່ອງຈາກບັນດາແຮງງານທີ່ກັບຄືນມາປະເທດມີອັດຕາພົບເຊື້ອສູງ ແລະ ຍັງພົບສາຍພັນເດວຕາທີ່ມີອັດຕາການແຜ່ເຊື້ອຢ່າງໄວວາ, ນອກຈາກນີ້ຍັງພົບການຕິດເຊື້ອໃນພະນັກງານດ່ານໜ້າທີ່ປະຕິບັດໜ້າທີ່ໃນການປ້ອງກັນ ແລະ ປີ່ນປົວຄົນເຈັບ ໃນບັນດາແຂວງສູງເຖີງ 50 ຄົນ , ເຊີ່ງແຂວງທີ່ຕິດເຊື້ອຫຼາຍກ່ວາໝູ່ແມ່ນ: ນະຄອນຫຼວງວຽງຈັນ (24 ຄົນ) , ຮອງລົງມາແມ່ນແຂວງຈຳປາສັກ (19 ຄົນ) ໃນຈຳນວນ 50 ຄົນທີ່ຕິດເຊື້ອ, 64% ແມ່ນມີອາການສະແດງອອກ ແລະ ສ່ວນຫຼາຍແມ່ນພະນັກງານແພດໝໍມີຈຳນວນ 39 ຄົນ, ພະນັກງານເຮັດວຽກຢູ່ສູນຈຳກັດບໍລິເວນ 6 ຄົນ ແລະ ພະນັກງານປະຈຳດ່ານ 5 ຄົນ.
ບັນດາທ່ານທີ່ນັບຖື ແລະ ຮັກແພງ, ເພື່ອປ້ອງກັນບໍ່ໃຫ້ມີການແຜ່ລະບາດໃນຊຸມຊົນ, ຈຶ່ງສະເໜີໃຫ້ ບັນດາແຮງງານທັງຫຼາຍ ຫຼື ຍາດຕິພີ່ນ້ອງ ທີ່ໄປເຮັດວຽກຢູ່ປະເທດເພື່ອນບ້ານ ຖ້າມີຈຸດປະສົງຢາກກັບຄືນມາປະເທດ ກໍ່ໃຫ້ກັບມາໂດຍຖືກຕາມລະບຽບກົດໝາຍ ທີ່ທາງຄະນະສະເພາະກິດໄດ້ມີແຈ້ງການອອກມາ ເພື່ອຈະໄດ້ມີການກັ່ນກອງ, ເກັບຕົວຢ່າງ ແລະ ນຳສົ່ງເຂົ້າສູນຈຳກັດບໍລິເວນ, ສ່ວນຜູ້ພົບເຊື້ອ ກໍ່ຈະໄດ້ຮັບການປິ່ນປົວແຕ່ຫົວທີ. ທັງໝົດທີ່ກ່າວມານັ້ນ ກໍ່ແມ່ນເພື່ອສະກັດກັ້ນ ບໍ່ໃຫ້ມີການແຜ່ເຊື້ອຈາກການນຳເຂົ້າ ລົງສູ່ຊຸມຊົນ;
ພ້ອມດຽວກັນນັ້ນ ກໍ່ຂໍຮຽກຮ້ອງມາຍັງ ອຳນາດການປົກຄອງທ້ອງຖິ່ນທຸກຂັ້ນ ກວດຂັນລາດຕະເວນ ຜູ້ທີ່ລັກເຂົ້າມາ ບໍ່ຖືກຕາມລະບຽບການ ຕາມຊ່ອງທາງທຳມະຊາດ ຫຼື ຖ້າຫາກທ່ານພົບເຫັນ ໃຫ້ລາຍງານຕໍ່ເຈົ້າໜ້າທີ່ກ່ຽວຂ້ອງທັນທີ ເພື່ອນຳສົ່ງພວກກ່ຽວເຂົ້າສູນຈຳກັດບໍລິເວນ ແລະ ເກັບຕົວຢ່າງກວດຫາເຊື້ອໂຄວິດ-19 ເພື່ອສະກັດກັ້ນບໍ່ໃຫ້ແຜ່ເຊື້ອ ໄປສູ່ຄອບຄົວ, ໝູ່ເພື່ອນ, ຄົນອ້ອມຂ້າງ ແລະ ສູ່ຊຸມຊົນ;
Loading...