ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ວັນທີ 5 ກໍລະກົດ 2020 ທົ່ວໂລກມີຜູ້ຕິດເຊືອໂຄວິດ-19 ທັງໝົດ 11,537,723 ຄົນ, ເສຍຊິວິດ 536,324 ຄົນ.

ຄະນະສະເພາະກິດເພື່ອຄວບຄຸມໂຄວິດ19 ເນັ້ນໃຫ້ປະຊາຊົນລາວບັນດາເຜົ່າ ສືບຕໍ່ປະຕິບັດ ໄລຍະຫ່າງ ລວມເຖິງມາດຕະການຕ່າງໆທີ່ຄະນະສະເພາະກິດວາງອອກຢ່າງເຂັ້ມງວດ ເພື່ອສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່, ໂດຍໃຫ້ປະບັດຢ່າງເຄັ່ງຄັດ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 697/ຫສນຍ, ລົງວັນທີ 30 ມິຖຸນາ 2020, ພ້ອມກັນນັ້ນກໍ່ໃຫ້ເອົາໃຈໃສ່ປະຕິບັດ ການດຳລົງຊີວິດປົກກະຕິແບບໃໝ່ ເປັນຕົ້ນ ແມ່ນ ອອກຈາກບ້ານເຮືອນເມືອຈຳເປັນ, ດ້ວຍການໃສ່ຜ້າປິດປາກ-ດັງ ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ, ລ້າງມືເລື້ອຍໆ ດ້ວຍນໍ້າສະອາດໃສ່ສະບູ ຫຼື ໃຊ້ເຈວລ້າງມື,  ກິນອາຫານທີ່ປຸງສຸກໃໝ່, ການແຍກຂອງໃຊ້ສ່ວນຕົວ ບໍ່ຄວນໃຊ້ຮ່ວມກັບຜູ້ອື່ນ, ເມື່ອກັບຮອດເຮືອນ ຄວນອາບນ້ຳ ແລະ ປ່ຽນເສື້ອຜ້າທັນທີ, ການປະຕິບັດທັງໝົດນີ້ ແມ່ນໃຫ້ກາຍເປັນຄວາມຊິນເຄີຍໃນວີຖີຊີວິດແບບໃໝ່.

ດຣ. ຣັດຕະນະໄຊ ເພັດສຸວັນ, ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດ

ຄວບຄຸມ COVID-19 ຖະແຫລງຕໍ່ສື່ມວນຊົນ ຕອນເຊົ້າວັນທີ 6 ກໍລະກົດນີ້ວ່າ: ປະຈຸບັນທົ່ວໂລກມີລາຍງານການລະບາດ ທັງໝົດ 213 ປະເທດ ມີຜູ້ຕິດເຊື້ອພະຍາດ COVID-19 ທັງໝົດ  11,537,723  ຄົນ, ເສຍຊິວິດ 536,324 ຄົນ ເຊິ່ງກວມເອົາ 4.64 % ຂອງຜູ້ຕິດເຊື້ອທັງໝົດ, ປີ່ນປົວດີ 6,526,387 ຄົນ.

ວຽກງານເຝົ້າລະວັງຮອດ 17 ໂມງວັນທີ 5 ກໍລະກົດ 2020 ການຕິດຕາມຜູ້ເດີນທາງຈາກຈຸດຜ່ານແດນຕ່າງໆ

ທົ່ວປະເທດມີຜູ້ເດີນທາງເຂົ້າມາລາວທັງໝົດ 1,756 ຄົນ, ໃນນັ້ນຜ່ານດ່ານລາວ-ໄທ 896 ຄົນ ມີແຮງງານລາວກັບມາແຕ່ໄທ 260 ຄົນ; ຜ່ານດ່ານລາວ – ຈີນ 111 ຄົນ ມີແຮງງານຈີນ 21 ຄົນ ແລະ ຄົນລາວ 84 ຄົນ ເຫຼືອນັ້ນ ແມ່ນຄົນຂັບລົດສົ່ງສິນຄ້າ, ຜ່ານດ່ານລາວ – ຫວຽດນາມ 694 ຄົນ ມີນັກສືກສາລາວ 33 ຄົນ, ເຫຼືອນັ້ນແມ່ນຄົນຂັບລົດສົ່ງສິນຄ້າ, ເດີນທາງຜ່ານສະໜາມບິນສາກົນວັດໄຕ 54 ຄົນ (ຄົນຈີນ 48 ຄົນ ແລະ ຄົນລາວ 6 ຄົນ);

ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະ ເກັບຕົວຢ່າງມາກວດ ແລ້ວນຳສົ່ງໄປ​ຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ວັນທີ 5 ກໍລະກົດ 2020, ໄດ້ເກັບຕົວຢ່າງມາກວດວິເຄາະທັງໝົດ 339 ຄົນ, ໃນນັ້ນ ມີ ແຮງງານລາວກັບມາແຕ່ໄທ 339 ຄົນ. ຜົນກວດທັງໝົດແມ່ນ ບໍ່ພົບເຊື້ອ ຄົບ 85 ມື້ແລ້ວທີ່ບໍ່ພົບຜູ້ຕິດເຊື້ອໃໝ່ ທົ່ວປະເທດ ມີສູນຈໍາກັດບໍລິເວນ ທັງໝົດ 88 ສູນ, ມີຜູ້ຖືກຈຳກັດບໍລິເວນຢູ່ສູນ 4,061 ຄົນ,

ດຣ. ຣັດຕະນະໄຊ ເພັດສຸວັນ ໃຫ້ຮູ້ອີກວ່າ ໄປຄຽງຄູ່ກັບການປ້ອງກັນໂຄວິດ19ແລ້ວ ປະຊາຊົນລາວບັນດາເຜົ່າຕ້ອງເອົາໃຈໃສ່ປ້ອງກັນພະຍາດໄຂ້ເລືອດອອກຕື່ມອີກ ເພາະປະຈຸບັນມີຜູ້ຕິດເຊື້ອພະຍາດໄຂ້ເລືອດອອກ ກໍລະນີສະສົມທັງໝົດ 2,484 ຄົນ, ວັນທີ 5 ກໍລະກົດ 2020 ມີຜູ້ຕິດເຊື້ອເພີ່ມອີກ 18 ກໍລະນີ .

ຕໍ່ສະພາບການດັ່ງກ່າວ ພວກເຮົາຕ້ອງພ້ອມກັນປະຕິບັດຄໍາຂັວນທີ່ວ່າ ບໍ່ມີໜອນນໍ້າຍຸງລາຍ ກໍ່ບໍ່ມີຍຸງລາຍ ແລະ ບໍ່ມີໄຂ້ເລືອດອອກ. ພ້ອມນັ້ນ ຕ້ອງປະຕິບັດ 5 ປ ຢ່າງເຄັ່ງຄັດ ໃຫ້ເປັນປະຈຳ ຈຶ່ງສາມາດທຳລາຍແຫຼ່ງເພາະພັນຂອງຍຸງລາຍໄດ້.