ໃນວັນທີ 7 ພຶດສະພາ 2021, ດຣ. ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງ ກະຊວງສາທາລະນະສຸກ, ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19, ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບສະພາບການລະບາດຂອງພະຍາດໂຄວິດ-19 ຢູ່ ສປປລາວ:
ສປປ ລາວ ມາຮອດປະຈຸບັນ ມີ ລາຍງານຜູ້ຕິດເຊື້ອທັງໝົດ 1,205 ຄົນ (ໃໝ່ 28)
ບໍ່ມີຜູ້ເສຍຊີວີດ, ໃນຈຳນວນຜູ້ຕິດເຊື້ອທັງໝົດ ແມ່ນໄດ້ຮັບການ ປິ່ນປົວຫາຍດີ 122 ຄົນ, ຍັງນອນຕິດຕາມປິ່ນປົວຢູ່ສະຖານທີ່ຄະນະສະເພາະກິດກຳນົດໄວ້ ໃນຕ່ລະແຂວງ ຈຳນວນ 1,083 ຄົນ ເຊັ່ນ:
ຄົນເຈັບທຸກຄົນ ແມ່ນມີສຸຂະພາບຮ່າງກາຍ ແລະ ສຸຂະພາບຈິດ ສົມບຸນ ປົກກະຕິ ແລະ ທຸກຄົນແຂງແຮງດີ.
1. ວຽກງານວີເຄາະ ກວດຊອກຫາເຊື້ອພະຍາດ ໂຄວີດ 19
• ໃນວັນທີ 06 ພຶດສະພາ 2021 ໄດ້ເກັບຕົວຢ່າງມາກວດວິເຄາະ ທັງໝົດ 1,688 ຕົວຢ່າງ, ຜົນກວດວິເຄາະ ແມ່ນພົບຜູ້ຕິດເຊື້ອໃໝ່ 28 ຄົນ, ໃນນັ້ນ ນະຄອນຫຼວງ 10 ຄົນ, ຈໍາປາສັກ 4 ຄົນ, ບໍ່ແກ້ວ 8 ຄົນ, ສາລະວັນ 5 ຄົນ ແລະ ແຂວງວຽງຈັນ 1 ຄົນ.
2. ການຕິດຕາມ ຜູ້ເດີນທາງເຂົ້າມາ ສປປ ລາວ
ວັນທີ 6 ພຶດສະພາ 2021 ທົ່ວປະເທດມີຜູ້ເດີນທາງເຂົ້າມາ ທັງໝົດ 2,254 ຄົນ:
– ຈຸດຜ່ານດ່ານ ລາວ – ໄທ ທັງໝົດ 1,267 ຄົນ;
– ຈຸດຜ່ານດ່ານ ລາວ-ຈີນ ທັງໝົດ 84 ຄົນ;
– ຈຸດຜ່ານດ່ານ ລາວ-ຫວຽດນາມ ທັງໝົດ 851 ຄົນ;
– ຈຸດຜ່ານດ່ານສະໜາມບິນສາກົນວັດໄຕ ທັງໝົດ 52 ຄົນ;
• ທຸກຄົນທີ່ເຂົ້າມາທາງຈຸດຜ່ານແດນ ໃນມື້ວານນີ້ ແມ່ນ
o ໄດ້ຜ່ານການວັດແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້
o ໄດ້ເກັບຕົວຢ່າງທຸກໆຄົນມາກວດຫາເຊື້ອ COVID-19;
o ນຳສົ່ງໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້
3. ວຽກງານການຈຳກັດບໍລິເວນ ຢູ່ສູນຈຳກັດບໍລິເວນ
ປະຈຸບັນ ທົ່ວປະເທດ ມີສູນຈໍາກັດບໍລິເວນທີ່ເປີດນຳໃຊ້ຢູ່ ທັງໝົດ 50 ສູນ, ມີຜູ້ຈຳກັດບໍລິເວນທັງໝົດ 3,416 ຄົນ, ທຸກຄົນແມ່ນໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19.
 ລາຍລະອຽດຂອງຜູ້ຕິດເຊື້ອໃໝ່ 28 ຄົນ (ກໍລະນີຢັ້ງຢືນທີ 1,177-1,205)
– ສຳລັບຄົນເຈັບກໍລະນີໃໝ່ ທີ່ພົບຢູ່ນະຄອນຫຼວງວຽງຈັນ ກໍ່ລ້ວນແລ້ວແຕ່ ເປັນຜູ້ສຳຜັດໃກ້ຊິດ ກັບຜູ້ຕິດເຊື້ອ ທີ່ກ່ຽວພັນກັບກໍລະນີທີ 59 ເຊັ່ນກັນ.
– ສ່ວນກໍໍລະນີຕິດເຊື້ອໃໝ່ ຢູ່ແຂວງຈຳປາສັກ, ບໍ່ແກ້ວ, ສາລະວັນ ແລະ ວຽງຈັນ ນັ້ນ ລ້ວນແລ້ວແຕ່ມີປະຫວັດສຳຜັດກັບກໍລະນີຕິດເຊື້ອເກົ່າ ຢູ່ໃນແຂວງຂອງເຂົ້າເຈົ້າ ຄືກັນ.
– ພາຍຫຼັງ ພວກເຮົາກວດພົບຜູ້ຕິດເຊື້ອໃໝ່, ພວກເຮົາໄດ້ລົງສອບສວນ, ສອບຖາມປະຫວັດ, ຕິດຕາມຜູ້ສຳຜັດໃກ້ຊິດ ແລະ ປະຫວັດການເຄື່ອນໄຫວຂອງພວກກ່ຽວ, ພາຍຫຼັງໄດ້ຂໍ້ມູນລະອຽດ ຈະແຈ້ງທາມລາຍໃຫ້ບັນດາທ່ານຮັບຊາບຕື່ມ.
 ນອກຈາກນີ້ ຂໍຮຽກຮ້ອງມາຍັງບັນດາທ່ານທີ່ມີລາຍຊື່ຂ້າງລຸ່ມທີ່ໄດ້ໄປເກັບຕົວຢ່າງກວດວິເຄາະຫາເຊື້ອພະຍາດ COVID-19 ໃນນະຄອນຫຼວງວຽງຈັນທີ່ໃຫ້ຂໍ້ມູນບໍ່ລະອຽດແມ່ນໃຫ້ຮີບຮ້ອນໂທປະສານຫາ ທ່ານ ດຣ. ນາງ ວຽງສາຄອນ ຫຼວງປະດິດ ເບີໂທ 020 94095533 ແລະ ເບີ 020 55663579 ລາຍຊື່ລະອຽດຄື:
1. ທ້າວ ມິນຕາ ອາຍຸ 23 ປີ
2. ທ້າວ ສຸພາລີ ອາຍຸ 23 ປີ
3. ນາງ ມະນີວັນ 40 ປີ
4. ທ້າວ ວິຊຽນ 38 ປີ, ນັກສຶກສາວິທະຍາໄລ ໄກສອນນະຄອນຫຼວງ, ບ້ານວັງຫຼວງ, ເມືອງລອງຊານ, ແຂວງໄຊສົມບູນ
– ໃຫ້ບຸກຄົນດັ່ງກ່າວຈົ່ງຮີບຮ້ອນໂຕໂທກັບເບີດັ່ງກ່າວ ຫຼື ແຈ້ງຕໍ່ອຳນາດການປົກຄອງບ້ານຂອງທ່ານເພື່ອຕິດຕໍ່ຫາພະນັກງານແພດໝໍດ່ວນ, ຖ້າຫາກທ່ານໃດຮັບຮູ້ແລ້ວບໍ່ຮີບຮ້ອນມາສະເໜີໂຕ ຫຼື ຈົງໃຈລົບຫຼີກແມ່ນຈະຖືກປະຕິບັດລະບຽບວິໄນຕາມກົດໝາຍບ້ານເມືອງ.
ຂໍ້ແນະນຳ
• ຕໍ່ກັບສະພາບການລະບາດຂອງພະຍາດໃນປະຈຸບັນ ລັດຖະບານ ໄດ້ຂະຫຍາຍການປະຕິບັດຄຳສັ່ງ ສະບັບເລກທີ 15/ນຍ ໄປຮອດວັນທີ 20 ພຶດສະພາ 2021 ກໍ່ຂໍໃຫ້ບັນດາທ່ານສືບຕໍ່ປະຕິບັດຕາມມາດຕະການສະບັບດັ່ງກ່າວ ຢ່າງເຂັ້ມງວດ ເປັນຕົ້ນ ຫ້າມບໍ່ໃຫ້ຄົນຢູ່ນະຄອນຫຼວງວຽງຈັນ ເດີນທາງໄປຕ່າງແຂວງ ແລະ ຫ້າມຄົນຢູ່ຕ່າງແຂວງ ເດີນທາງເຂົ້າມາໃນນະຄອນຫຼວງ, ຍົກເວັ້ນ:
– ຜູ້ທີ່ມີພູມລຳເນົາ, ຜູ້ທີ່ເຮັດວຽກປະຈຳ ຢູ່ນະຄອນຫຼວງ
– ຜູ້ທີ່ໄດ້ຮັບອະນຸຍາດຈາກຄະນະສະເພາະກິດ ນະຄອນຫຼວງວຽງຈັນ ຫຼື ຄະນະ
ສະເພາະກິດຂັ້ນສູນກາງ
– ການຂົນສົ່ງສິນຄ້າ
ພ້ອມດຽວກັນນັ້ນ ຍັງສືບຕໍ່ໂຈະການບໍລິການຂົນສົ່ງໂດຍສານ ຈາກນະຄອນຫຼວງໄປຕ່າງແຂວງ ແລະ ຈາກຕ່າງແຂວງມານະຄອນຫຼວງ;
• ເພື່ອຮັກສາໄລຍະຫ່າງທາງສັງຄົມ ບັນດາກະຊວງ, ອົງການທຽບເທົ່າ, ນະຄອນຫຼວງວຽງຈັນ, ວິສາຫະກິດ ທົ່ວນະຄອນຫຼວງວຽງຈັນ ຫຼຸດຈຳນວນ ແລະ ຈັດຕັ້ງຜຽນ ພະນັກງານ, ລັດຖະກອນ, ກຳມະກອນ ມາປະຈຳການໃນແຕ່ລະວັນ ຕາມຄວາມເໝາະສົມ, ຍົກເວັ້ນ:
– ທະຫານ, ຕຳຫຼວດ, ເຈົ້າໜ້າທີ່ດັບເພິງ, ພະນັກງານຮັບຜິດຊອບລະບົບການບໍລິການໄຟຟ້າ, ນ້ຳປະປາ, ໂທລະຄົມມະນາຄົມ, ການສື່ສານ, ຂົນສົ່ງ, ສາທາລະນະສຸກ, ອາສາສະໝັກ ຜູ້ທີ່ຖືກມອບໝາຍໃຫ້ເຮັດວຽກສະກັດກັ້ນ, ຄວບຄຸມ ແລະ ປິ່ນປົວ ຜູ້ຕິດເຊື້ອພະຍາດ;
• ຫ້າມປະຊາຊົນ, ພະນັກງານ, ລັດຖະກອນ, ທະຫານ, ຕຳຫຼວດ, ກຳມະກອນ, ນັກຮຽນ, ນັກສຶກສາ, ຜູ້ປະກອບການ, ນັກບວດ, ຊາວຕ່າງດ້າວ, ຜູ້ບໍ່ມີສັນຊາດ ແລະ ຊາວຕ່າງປະເທດ ທີ່ຢູ່ນະຄອນຫຼວງວຽງຈັນ ອອກຈາກເຮືອນ ຫຼື ທີ່ພັກອາໄສຂອງຕົນ, ຍົກເວັ້ນກໍລະນີທີ່ຈຳເປັນ:
– ໄປຊື້ເຄື່ອງອຸປະໂພກ-ບໍລິໂພກ
– ໄປໂຮງໝໍ
– ໄປປະຕິບັດໜ້າທີ່ໃນກິດຈະການທີ່ລະບຸໄວ້ໃນຂໍ້ 3 ແລະ 11 ຂອງຄຳສັ່ງສະບັບເລກທີ 15/ນຍ
• ອະນຸຍາດໃຫ້ສືບຕໍ່ດຳເນີນກິດຈະການທີ່ມີຄວາມຈຳເປັນ ເປັນຕົ້ນ:
– ບັນດາໂຄງການໃຫຍ່, ໂຮງຊ່າງ-ໂຮງງານ, ທະນາຄານ, ສະຖາບັນການເງິນ ທີ່ບໍ່ແມ່ນທະນາຄານ, ຕະຫຼາດຫຼັກຊັບ, ບໍລິສັດຫຼັກຊັບ, ໂຮງໝໍ, ສູນການແພດ, ຮ້ານຂາຍຢາ, ໜ່ວຍກູ້ໄພ, ກິດຈະການໄປສະນີ, ໂທລະຄົມມະນາຄົມ, ໄຟຟ້າ, ນ້ຳປະປາ, ການບໍລິການເກັບ ແລະ ຖິ້ມຂີ້ເຫຍື້ອ, ຕະຫຼາດກະສິກຳ, ຮ້ານຂາຍເຄື່ອງຍ່ອຍ, ຮ້ານຄ້າ (ຊຸບເປີ້ມາເກັດ), ປ້ຳນ້ຳມັນ, ຮ້ານອາຫານ ແລະ ຮ້ານກາເຟ. ສຳລັບໂຮງແຮມ, ຣີສອດ ໃຫ້ເປີດສະເພາະການໃຫ້ບໍລິການທີ່ພັກ ແລະ ຮ້ານອາຫານ.
• ແຕ່ສຳລັບ ຜູ້ໄປຮັບວັກຊີນ ກໍ່ຍັງສາມາດສືບຕໍ່ໄປຮັບໄດ້ຕາມຈຸດບໍລິການທີ່ໄດ້ກຳນົດໄວ້ ແລະ ຜູ້ທີ່ເປັນຜູ້ສຳຜັດໃກ້ຊິດ ນຳຜູ້ຕິດເຊື້ອ ແລະ ເປັນກຸ່ມສ່ຽງ ກໍ່ຂໍໃຫ້ຮີບຮ້ອນໄປສະເໜີໂຕ ເພື່ອເກັບຕົວຢ່າງຊອກຫາເຊື້ອໂຄວິດ-19 ຕາມຈຸດບໍລິການທີ່ກຳນົດໄວ້ ເຊັ່ນດຽວກັນ;
• ແລະ ການໄປໃຊ້ບໍລິການ ສັກຢາ ແລະ ເກັບຕົວຢ່າງ ນັ້ນ ຂໍໃຫ້ບັນດາທ່ານປະຕິບັດມາດຕະການຮັກສາໄລຍະຫ່າງ ແລະ ໃສ່ຜ້າປິດປາກ-ດັງຕະຫຼອດເວລາ ເພື່ອປ້ອງກັນໂຕທ່ານເອງ ແລະ ທຸກຄົນອ້ອມຂ້າງ;
• ທ້າຍສຸດນີ້ ຂໍແຈ້ງໃຫ້ທ່ານຊາບວ່າ ທ່ານສາມາດຮັບຂໍ້ມູນຂ່າວສານທີ່ຖືກຕ້ອງ ແລະ ເປັນທາງການ ໄດ້ຈາກ ໂທລະພາບ, ວິທະຍຸ ແລະ ໜັງສືພິມ ພ້ອມດ້ວຍ:
– ເວັບໄຊ້ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂ ການລະບາດ ພະຍາດໂຄວິດ-19 covid19.gov.la
– ເຟດບຸກຂອງສູນຂ່າວສານການແພດ ແລະ ສຸຂະສຶກສາ, ກະຊວງສາທາລະນະສຸກ
– ເວັບໄຊ້ຂອງກົມຄວບຄຸມພະຍາດຕິດຕໍ່, ກະຊວງສາທາລະນະສຸກ cdc.gov.la
– ແລະ ສາມາດໂທສອບຖາມ ສາຍດ່ວນ 165 ຫຼື 166 ສຳລັບສູນກາງ ແລະ ສາຍດ່ວນຂອງບັນດາແຂວງ ແມ່ນຕາມດ້ວຍລະຫັດຂອງແຕ່ລະແຂວງ 165 ຫຼື 166.
Loading...