ຕອນເຊົ້າ ວັນພະຫັດ ວັນທີ 15 ກໍລະກົດ 2021, ດຣ. ຣັດຕະນະໄຊ ເພັດສຸວັນ ຫົວໜ້າກົມ ຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວສະພາບການລະບາດພະຍາດ COVID-19 ປະຈຳວັນທີ 15 ກໍລະກົດ 2021.
ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດວັນທີ 14 ກໍລະກົດ 2021 :
• ໄດ້ກວດວິເຄາະທັງໝົດ 1,451 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 116 ຄົນ, ຈາກ ນະຄອນຫຼວງ 01 ກໍລະນີ, ຈໍາປາສັກ 41 ກໍລະນີ, ສະຫວັນນະເຂດ 67 ກໍລະນີ, ຄໍາມ່ວນ 02 ກໍລະນີ, ສາລະວັນ 04 ກໍລະນີ ແລະ ອຸດົມໄຊ 01 ກໍລະນີ.
• ໃນນັ້ນ ມີກໍລະນີນຳເຂົ້າ 114 ຄົນ ມາຈາກ ແຂວງຈໍາປາສັກ 41 ກໍລະນີ, ສະຫວັນນະເຂດ 67 ກໍລະນີ, ຄໍາມ່ວນ 02 ກໍລະນີ ແລະ ສາລະວັນ 04 ກໍລະນີ ເຊິ່ງກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ໂດຍຖືກຕ້ອງຕາມກົດໝາຍ.
• ສ່ວນຕິດເຊື້ອໃນຊຸມຊົນ 2 ຄົນ ມາຈາກນະຄອນຫຼວງ 1 ຄົນ ແລະ ອຸດົມໄຊ 1 ຄົນ ເຊິ່ງມີປະຫວັດສຳຜັດໃກ້ຊິດ ນຳຜູ້ຕິດເຊື້ອເກົ່າທີ່ຜ່ານມາ.
– ສຳລັບ ກໍລະນີໃໝ່ ໃນນະຄອນຫຼວງວຽງຈັນ ແມ່ນເປັນພະຍາບານ ເຊິ່ງຕິດເຊື້ອຈາກການດູແລປິ່ນປົວຄົນເຈັບໂຄວິດ-19 ເຊິ່ງມີຜູ້ສຳຜັດໃກ້ຊິດ 6 ຄົນ, ຜູ້ກ່ຽວແມ່ນບໍ່ໄດ້ໄປໃສ, ສຳລັບ ຜູ້ໃກ້ຊິດ ແມ່ນຖືກເກັບຕົວຢ່າງ ຜົນກວດໃຫ້ຜົນລົບ ແລະ ຖືກສົ່ງເຂົ້າຈຳກັດບໍລິເວນ ຢູ່ສະຖານທີ່ກຳນົດໄວ້.
 ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 3,092 ຄົນ, ເສຍຊີວິດສະສົມ 4 ຄົນ ( ເສຍຊີວິດໃໝ່ 1 ເປັນເພດຊາຍ, ອາຍຸ 67 ປີ) ແລະ ກໍາລັງປິ່ນປົວ ທັງໝົດ 708 ຄົນ.
 ການເຝົ້າລະວັງຢູ່ຕາມຈຸດຜ່ານແດນ ໃນຂອບເຂດທົ່ວປະເທດ
• ວັນທີ 14 ກໍລະກົດ ມີຜູ້ເດີນທາງເຂົ້າມາ ຕາມຈຸດຜ່ານດ່ານຕ່າງໆ ໃນສປປ ລາວ ທັງໝົດ 2,365 ຄົນ ເຊິ່ງທັງໝົດ ແມ່ນຖືກເກັບຕົວຢ່າງກວດຊອກຫາເຊື້ອ ແລະ ເຂ້ົ້າໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ 14 ວັນ;
• ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 48 ສູນ ແລະ ມີຜູ້ຈຳກັດບໍລິເວນ 5,869 ຄົນ.
• ປະຈຸບັນ ຈຳນວນບ້ານແດງ ແລະ ບ້ານເຫຼືອງ ໃນນະຄອນຫຼວງວຽງຈັນ ແມ່ນບໍ່ມີ.
• ມື້ນີ້ ມີຂ່າວດີ ພວກເຮົາຈະໄດ້ຮັບວັກຊີນຊ່ວຍເຫຼືອ ຈາກການໂຄງການ COVAX Facility ກໍ່ຄື Johnson & Johnson/Janssen (J&J/Janssen) ຈຳນວນ 1,008,000 ໂດສ ເຊິ່ງຈະໄດ້ແຈກຢາຍໃຫ້ແກ່ກຸ່ມເປົ້າໝາຍ ໃນຂອບເຂດທົ່ວປະເທດ. ພວກເຮົາ ຈະໄດຮັບວັກຊີນ Astra Zeneca ຕື່ມອີກ ໃນໄວໆນີ້ ຈຳນວນ 415,000 ໂດສ ເຊິ່ງລາຍລະອຽດ ພວກເຮົາຈະໄດ້ຖະແຫຼງຕື່ມ;
• ວັກຊີນ Johnson & Johnson/Janssen (J&J/Janssen) ເປັນວັກຊີນປ້ອງກັນໂຄວິດ-19 ເຊິ່ງສັກພຽງແຕ່ 1 ເຂັມ, ຖືກຮັບຮອງຈາກອົງການອະນາໄມໂລກ ແລະ ຖືກນຳໃຊ້ໃນຫຼາຍປະເທດ ໃນທົ່ວໂລກ ພ້ອມດຽວກັນນັ້ນ ຍັງເປັນວັກຊີນ ຊະນິດທີ 5 ທີ່ ສປປ ລາວຈະໄດ້ນຳໃຊ້ ໃນໄວໆນີ້. ດັ່ງນັ້ນ, ສປປ ລາວ ກໍ່ຈະເພິ່ມອັດຕາການປົກຄຸມດ້ວຍວັກຊີນຂຶ້ນ ເປັນ 2 ລ້ານກວ່າຄົນ ໃນມໍ່ໆນີ້;
• ມາຮອດມື້ນີ້ ໂລກເຮົາກໍ່ຍັງພະເຊີນໜ້າກັບການລະບາດ ຂອງພະຍາດໂຄວິດ-19 ຢູ່ ຄຽງຄູ່ກັນນັ້ນ ກໍ່ມີການພົບເຫັນສາຍພັນເດວຕ້າລະບາດໃນຫຼາຍປະເທດ ໃນໂລກ ລວມທັງ ບັນດາປະເທດທີ່ມີຊາຍແດນຮ່ວມກັບ ສປປ ລາວ. ສຳລັບ ປະເທດຂອງພວກເຮົາ ກໍ່ມີການກວດພົບສາຍພັນເດວຕ້າ ຈາກແຮງງານລາວ ຫຼື ຜູ້ທີ່ເດີນທາງເຂົ້າປະເທດ ໂດຍຖືກກົດໝາຍ. ມີການກວດພົບກໍລະນີໃໝ່ ໃນແຮງງານລາວ ທີ່ເດີນທາງເຂົ້າແຂວງຈຳປາສັກ ກໍ່ຄື ແຂວງສະຫວັນນະເຂດ ໃນແຕ່ລະວັນ ເຊິ່ງທາງຄະນະສະເພາະກິດ ຂັ້ນສູນກາງ ໄດ້ລົງສົມທົບກັບຄະນະສະເພາະກິດຂັ້ນແຂວງ ຕິດຕາມຢ່າງໃກ້ຊິດ ສະພາບການດັ່ງກ່າວ ແລະ ມີການປະເມີນຄວາມສ່ຽງຂອງການລະບາດ ເຊິ່ງຈາກການປະເມີນໃນຄັ້ງນີ້ ເຫັນວ່າ ແຂວງຈຳປາສັກ ແລະ ສະຫວັນນະເຂດ ແມ່ນຢູ່ໃນໄລຍະ 1 ຕາມການຈັດຂັ້ນການລະບາດພະຍາດໂຄວິດ-19 ຈາກອົງການອະນາໄມໂລກ ເຊິ່ງ ການຕິດເຊື້ອທັງໝົດ ແມ່ນມາຈາກການນຳເຂົ້າ, ເຖິງຈະພົບວ່າມີການຕິດເຊື້ອ ໃນຄົນໃນຄອບຄົວ ຫຼື ຄົນໃກ້ຊິດ ກໍ່ຕາມ ກໍ່ຍັງຖືວ່າ ແມ່ນການຕິດເຊື້ອຈາກການນຳເຂົ້າຢູ່ ແລະ ມາຮອດປັດຈຸບັນ ກໍ່ຍັງບໍ່ພົບເຫັນການຕິດເຊື້ອໃນຊຸມຊົນ ແບບບໍ່ຮູ້ແຫຼ່ງທີ່ມາຂອງການຕິດເຊື້ອ ຫຼື ເອີ້ນວ່າ ການແຜ່ລະບາດໃນວົງກວ້າງໃນຊຸມຊົນ. ເຖິງຢ່າງໃດກໍ່ຕາມ ຄະນະສະເພາະກິດຂັ້ນສູນກາງ ແລະ ຂັ້ນແຂວງ ແມ່ນໄດ້ຂະຫຍາຍສູນຈຳກັດບໍລິເວນ, ສູນບໍລິການປິ່ນປົວຜູ້ຕິດເຊື້ອທີ່ມີອາການເບົາບາງເພິ່ມຂຶ້ນ, ມີການລະດົມພະນັກງານແພດໝໍ, ພະຍາບານ ພາຍໃນແຂວງ ເພື່ອຮອງຮັບການເຂົ້າມາຂອງແຮງງານລາວຈຳນວນຫຼາຍໃນແຕ່ລະວັນ ;
• ເຖິງວ່າ ນະຄອນຫຼວງວຽງຈັນ ມີລາຍງານຜູ້ຕິດເຊື້ອໃໝ່ 1 ກໍລະນີ ເຊິ່ງພົບໃນພະນັກງານແພດ ທີ່ໃຫ້ການດູແລຮັກສາຄົນເຈັບໂຄວິດ-19 ກໍ່ຕາມ ແຕ່ນະຄອນຫຼວງວຽງຈັນ ຍັງສາມາດຄວບຄຸມການລະບາດໃນຊຸມຊົນ ໄດ້ໂດຍພື້ນຖານ. ອີກເທື່ອໜຶ່ງ ຂ້າພະເຈົ້າຂໍແຈ້ງໃຫ້ຊາບວ່າ ເນື່ອງຈາກ ສະພາບການລະບາດຢູ່ນະຄອນຫຼວງວຽງຈັນ ມີທ່າອ່ຽງຫຼຸດລົງ ດັ່ງນັ້ນ, ພວກເຮົາຈະໄດ້ປິດສະຖານທີ່ເກັບຕົວຢ່າງນອກສະຖານທີ່ ຢູ່ ມສ ສີໂຄດ ຊົ່ວຄາວ ແລະ ສະເໜີໃຫ້ ຜູ້ທີ່ຢາກກວດຊອກຫາເຊື້ອ ແມ່ນໃຫ້ໄປໃຊ້ບໍລິການຢູ່ ໂຮງໝໍມິດຕະພາບ ແລະ ໂຮງໝໍເສດຖາທິຣາດ ເພາະວ່າ ພວກເຮົາຈະໄດ້ນຳໃຊ້ພະນັກງານ ເຂົ້າໃນໜ່ວຍເກັບຕົວຢ່າງເຄື່ອນທີ່ ເຊັ່ນ ມື້ວານນີ້ ກໍ່ໄດ້ໄປເກັບຕົວຢ່າງ ຢູ່ຕະຫຼາດຕະຫຼາດປອດສານພິດລາວໄອເຕັກ (ຜົນກວດທັງໝົດ 63 ຄົນ ແມ່ນບໍ່ພົບເຊື້ອ) ແລະ ມື້ນີ້ຈະໄດ້ໄປເກັບຕົວຢ່າງຢູ່ຕະຫຼາດ ໂພນຕ້ອງຈອມມະນີ, ຕະຫຼາດຕານມີໄຊ ຕິດຕາມເຝົ້າລະວັງ ແລະ ຊອກຄົ້ນກໍລະນີແບບທ່າບຸກ ເພື່ອໝັ້ນໃຈວ່າ ນະຄອນຫຼວງວຽງຈັນ ບໍ່ມີການແຜ່ເຊື້ອໃນຊຸມຊົນ ຢ່າງແທ້ຈິງ;
• ທ່ານສາມາດໄປຮັບວັກຊີນຕາມຈຸດບໍລິການຕ່າງໆ ທີ່ທາງຄະນະສະເພາະກິດກຳນົດໄວ້ ແລະ ບໍ່ໃຫ້ຄິດວ່າ ຈະບໍ່ມີວັກຊີນພຽງພໍ ໃນການສັກ ແລະ ສຳລັບຜູ້ທີ່ໄດ້ສັກເຂັມທີ 1 ແລ້ວ ໃຫ້ໄປສັກຕາມກຳນົດຢູ່ໃນບັດສັກວັກຊີນຂອງທ່ານ ເພາະໄປກ່ອນກຳນົດ ຈະສ້າງຄວາມແອອັດ, ບໍ່ເປັນລະບຽບ ແລະ ເຮັດໃຫ້ການບໍລິການສັກວັກຊີນຊັກຊ້າ.
Loading...