ຕອນເຊົ້າ ວັນພຸດ ວັນທີ 14 ກໍລະກົດ 2021, ດຣ. ຣັດຕະນະໄຊ ເພັດສຸວັນ ຫົວໜ້າກົມ ຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຖະແຫຼງຂ່າວສະພາບການລະບາດພະຍາດ COVID-19 ປະຈຳວັນທີ 14 ກໍລະກົດ 2021.
 ສະພາບການລະບາດພະຍາດໂຄວິດ-19 ຢູ່ ສປປ ລາວ, ມາຮອດວັນທີ 13 ກໍລະກົດ 2021 :
• ໄດ້ກວດວິເຄາະທັງໝົດ 1,888 ຄົນ, ໃນນັ້ນ ກວດພົບຜູ້ຕິດເຊື້ອໃໝ່ ທັງໝົດ 75 ຄົນ, ຈາກ ຈາກ ນະຄອນຫຼວງ 06 ກໍລະນີ, ຈໍາປາສັກ 61 ກໍລະນີ, ສະຫວັນນະເຂດ 07 ກໍລະນີ ແລະ ຄໍາມ່ວນ 01 ກໍລະນີ ເຊິ່ງທັງໝົດ ແມ່ນກໍລະນີນຳເຂົ້າ ກວດພົບຈາກແຮງງານລາວ ທີ່ກັບມາແຕ່ປະເທດເພື່ອນບ້ານ ໂດຍຖືກຕ້ອງຕາມກົດໝາຍ.
 ມາຮອດມື້ນີ້ ພວກເຮົາມີຕົວເລກຜູ້ຕິດເຊື້ອສະສົມທັງໝົດ 2,976 ຄົນ, ເສຍຊີວິດສະສົມ 3 ຄົນ (ບໍ່ມີກໍລະນີເສຍຊີວິດໃໝ່) ແລະ ກໍາລັງປິ່ນປົວ ທັງໝົດ 726 ຄົນ.
 ການເຝົ້າລະວັງຢູ່ຕາມຈຸດຜ່ານແດນ ໃນຂອບເຂດທົ່ວປະເທດ
• ວັນທີ 13 ກໍລະກົດ ມີຜູ້ເດີນທາງເຂົ້າມາ ຕາມຈຸດຜ່ານດ່ານຕ່າງໆ ໃນສປປ ລາວ ທັງໝົດ 2,773 ຄົນ ເຊິ່ງທັງໝົດ ແມ່ນຖືກເກັບຕົວຢ່າງກວດຊອກຫາເຊື້ອ ແລະ ເຂ້ົ້າໄປຈຳກັດບໍລິເວນຢູ່ສູນທີ່ຄະນະສະເພາະກິດກຳນົດໄວ້ 14 ວັນ;
• ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 48 ສູນ ແລະ ມີຜູ້ຈຳກັດບໍລິເວນ 6,337 ຄົນ.
• ປະຈຸບັນ ຈຳນວນບ້ານແດງ ໃນນະຄອນຫຼວງວຽງຈັນ ແມ່ນບໍ່ມີ.
– ບໍ່ມີ ບ້ານໃໝ່ທີ່ຖືກກຳນົດເປັນເຂດແດງ
– ບໍ່ມີ ບ້ານທີ່ສິ້ນສຸດການເປັນເຂດແດງ ມາເປັນເຂດເຫຼືອງ
• ໂຄວິດ-19 ສາຍພັນເດວຕ້າ ມີຄວາມສາມາດຈັບຈຸລັງຂອງມະນຸດໄດ້ງ່າຍຂຶ້ນ, ຕິດເຊື້ອໄດ້ງ່າຍກວ່າເກົ່າ ແລະ ແຜ່ກະຈາຍເຊື້ອໄດ້ໄວກວ່າສາຍພັນອານຟ້າ ເຖິງ 1.4 ເທົ່າ ຫຼື 60% ເຮັດໃຫ້ເຊື້ອລົງໄປສູ່ປອດໄດ້ໄວ ແລະ ຢູ່ໃນຮ່າງກາຍຂອງຄົນເຮົາໄດ້ດົນກວ່າເກົ່າ. ພ້ອມດຽວກັນນັ້ນ ຍັງມີການກາຍພັນເປັນສາຍພັນເດວຕ້າພລັສ (Delta plus) ທີ່ສາມາດຫຼົບຫຼີກພູມຄຸ້ມກັນຂອງຮ່າງກາຍໄດ້ ແລະ ຕິດເຊື້ອໄດ້ໄວກວ່າເກົ່າ;
• ການລະບາດຂອງພະຍາດໂຄວິດ-19 ໃນຮອບໃໝ່ນີ້ ເຊິ່ງມີສາເຫດມາຈາກສາຍພັນໃໝ່ ສົ່ງຜົນສະທ້ອນໃຫ້ຫຼາຍປະເທດ ຕ້ອງກັບມາປະຕິບັດມາດຕະການລ໋ອກດາວຄືນ ມີການປິດເມືອງ, ປິດຮ້ານຄ້າທີ່ບໍ່ຈຳເປັນ, ປິດສຳນັກງານຕ່າງໆ, ບາງກິດຈະການຖືກປິດລົງຊົ່ວຄາວ
ເຮັດໃຫ້ ແຮງງານຈາກຫຼາຍປະເທດ ຕ້ອງເດີນທາງກັບຄືນປະເທດຂອງຕົນ ເຊິ່ງມີຄວາມສ່ຽງສູງ ທີ່ແຮງງານດັ່ງກ່າວ ຈະນຳເອົາເຊື້ອສາຍພັນໃໝ່ ເຂົ້າມາແຜ່ລະບາດໃນປະເທດຂອງຕົນ. ຕໍ່ສະພາບການດັ່ງກ່າວ ພວກເຮົາພົບເຫັນ ມີແຮງງານຕ່າງປະເທດ ຈຳນວນໜຶ່ງ ເດີນທາງຜ່ານ ສປປ ລາວ ເພື່ອເດີນທາງໄປປະເທດຂອງຕົນ ເຊິ່ງພົບວ່າ ມີຈຳນວນໜຶ່ງ ກວດພົບຕິດເຊື້ອໂຄວິດ-19. ດັ່ງນັ້ນ, ຈຶ່ງສະເໜີໃຫ້ສະຖານທີ່ບໍລິການສາທາລະນະສຸກ (ໂຮງໝໍ, ຄລີນິກ), ຮ້ານອາຫານ, ຮ້ານກາເຟ ເຊິ່ງຄົນຕ່າງປະເທດດັ່ງກ່າວ ມັກມາໃຊ້ການບໍລິການ, ຈຶ່ງສະເໜີ ຜູ້ປະກອບການສະຖານທີ່ດັ່ງກ່າວ ໃຫ້ມີສະຕິສູງ ແລະ ປະຕິບັດມາດຕະການຢ່າງເຂັ້ມງວດ, ຖ້າພົບເຫັນ ມີຄົນຕ່າງປະເທດ ທີ່ກັບມາຈາກປະເທດເພື່ອນບ້ານ ທີ່ກຳລັງລະບາດ ໂດຍບໍ່ຖືກກົດໝາຍ ໃຫ້ແຈ້ງຕໍ່ເຈົ້າໜ້າທີ່ ເພື່ອນຳສົ່ງເຂົ້າສູນຈຳກັດບໍລິເວນ, ເກັບຕົວຢ່າງກວດຫາເຊື້ອ. ຖ້າຫາກທ່ານ ບໍ່ໃຫ້ການຮ່ວມມື ຖືວ່າ ຜິດກົດໝາຍ ຂອງ ສປປ ລາວ, ທ່ານເອງອາດຈະສ່ຽງໃນການຕິດເຊື້ອ ແລະ ກິດຈະການຂອງທ່ານ ອາດຈະໄດ້ຮັບຜົນກະທົບ;
• ປະຈຸບັນ ສປປ ລາວ ໂດຍສະເພາະ ແມ່ນ ແຂວງຈຳປາສັກ ແລະ ແຂວງສະຫວັນນະເຂດ ມີລາຍງານຜູ້ຕິດເຊື້ອໃໝ່ ຫຼາຍກວ່າໝູ່ ເຊິ່ງກວດພົບຈາກແຮງງານລາວ ທີ່ເດີນທາງກັບມາຈາກປະເທດເພື່ອນບ້ານ, ໃນນັ້ນ ໄດ້ມີການສຸ່ມກວດຊອກຫາສາຍພັນ ແລະ ພົບເຫັນສາຍພັນເດວຕ້າ. ຕໍ່ກັບສະພາບການດັ່ງກ່າວ, ຈຶ່ງມີຄວາມຈຳເປັນຢ່າງຍິ່ງ ທີ່ຈະຕ້ອງໄດ້ປະຕິບັດຕາມແຈ້ງການຂອງຄະນະສະເພາະກິດຂັ້ນສູນກາງ ກໍ່ຄື ຂັ້ນແຂວງ ຢ່າງເຄັ່ງຄັດ ໂດຍສະເພາະ ການເດີນທາງເຂົ້າ-ອອກ ເຂດທີ່ຖືກກຳນົດເປັນສີແດງ ເຊິ່ງເປັນພື້ນທີ່ ທີ່ມີການແຜ່ເຊື້ອ. ດັ່ງນັ້ນ, ຈຶ່ງຮຽກຮ້ອງໃຫ້ປະຊາຊົນ ແລະ ທຸກພາກສ່ວນໃນສັງຄົມ ໃສ່ຜ້າປິດປາກ-ດັງ ເມື່ອອອກຈາກບ້ານ, ຫຼີກລ້ຽງການເດີນທາງໄປຍັງສະຖານທີ່ສ່ຽງ ຖ້າບໍ່ມີຄວາມຈຳເປັນ, ໝັ່ນລ້າງມືດ້ວຍນ້ຳສະອາດໃສ່ສະບູ ຫຼື ເຈວລ້າງມືຂ້າເຊື້ອ, ຮັກສາໄລຍະຫ່າງ, ງົດການຊຸມແຊວໃນຄອບຄົວ ຫຼື ໝູ່ເພື່ອນ ເພາະສ່ຽງຕໍ່ການຕິດເຊື້ອຈາກສາຍພັນເດວຕ້າ. ສຳລັບ ຜູ້ປະກອບການ ກໍ່ໃຫ້ມີມາດຕະການກັ່ນກອງ, ມີເຈວລ້າງມື ຢູ່ບໍລິເວນທາງເຂົ້າຮ້ານ, ຈັດສັນໄລຍະຫ່າງ, ມີສະບູລ້າງມືໃນຫ້ອງນ້ຳ ແລະ ອະນາໄມຂ້າເຊື້ອເລື້ອຍໆ ຫຼັງຈາກບໍລິການລູກຄ້າ. ສຳຄັນທີ່ສຸດ ແມ່ນຈະຕ້ອງໄດ້ປະຕິບັດວິຖີການດຳລົງຊີວິດປົກກະຕິແບບໃໝ່.
• ປະຈຸບັນ ນະຄອນຫຼວງວຽງຈັນ ພວກເຮົາສາມາດຄວບຄຸມການລະບາດໃນຊຸມຊົນ ໄດ້ໂດຍພື້ນຖານ ການພົບຜູ້ຕິດເຊື້ອໃໝ່ ແມ່ນມາຈາກການນຳເຂົ້າທັງໝົດ ແລະ ການຊົມໃຊ້ຈຸດເກັບຕົວຢ່າງນອກສະຖານທີ່ ຄື ມສ ສີໂຄດ ກໍ່ໜ້ອຍລົງ ໃນແຕ່ລະວັນ. ດັ່ງນັ້ນ, ທາງກະຊວງສາທາລະນະສຸກ ຈະໄດ້ໂຈະຊົ່ວຄາວ ຈຸດບໍລິການນອກສະຖານທີ່ ມສ ສີໂຄດ. ດັ່ງນັ້ນ ຈຶ່ງສະເໜີໃຫ້ ຜູ້ທີ່ຢາກກວດຊອກຫາເຊື້ອ ແມ່ນໃຫ້ໄປໃຊ້ບໍລິການຢູ່ ໂຮງໝໍມິດຕະພາບ ແລະ ໂຮງໝໍເສດຖາທິຣາດ ເພາະ ພວກເຮົາຈະໄດ້ນຳໃຊ້ພະນັກງານ ເຂົ້າໃນໜ່ວຍເກັບຕົວຢ່າງເຄື່ອນທີ່ ເຊັ່ນ: ຕະຫຼາດສົດ, ໂຮງງານ, ບ້ານ ແລະ ເຂດສ່ຽງອື່ນໆ ຕິດຕາມເຝົ້າລະວັງ ແລະ ຊອກຄົ້ນກໍລະນີແບບທ່າບຸກ ເພື່ອໝັ້ນໃຈວ່າ ນະຄອນຫຼວງວຽງຈັນ ບໍ່ມີການແຜ່ເຊື້ອໃນຊຸມຊົນ ຢ່າງແທ້ຈິງ;
• ປະຈຸບັນ ການລະບາດຮອບໃໝ່ ໂດຍມີສາຍພັນເດວຕ້າ ເປັນສາເຫດຕົ້ນຕໍ ຮຽກຮ້ອງໃຫ້ ພໍ່ແມ່, ປະຊາຊົນ, ທະຫານ, ຕຳຫຼວດ ກໍ່ຄື ກຸ່ມສ່ຽງອື່ນໆ ໃຫ້ຮ້ອນໃຈໄປສັກວັກຊີນ ບໍ່ວ່າ ເຂັມ 1 ຫຼື ເຂັມ 2 ເພາະເປັນວິທີການດຽວ ແລະ ດີທີ່ສຸດ ໃນການຫຼຸດຜ່ອນ, ສະກັດກັ້ນ ການແຜ່ເຊື້ອ ຂອງໂຄວິດ-19 ໄດ້, ຖ້າທຸກຄົນ ໃນປະເທດ ຫຼາຍກວ່າ 50% ຫາກໄດ້ຮັບວັກຊີນ ຈະເຮັດໃຫ້ພວກເຮົາ ຟື້ນຈາກການລະບາດຂອງໂຄວິດ-19 ກໍ່ຄື ການລະບາດຮອບ
ໃໝ່ໃນປະຈຸບັນ ເພື່ອເຮັດໃຫ້ສາມາດດຳເນີນຊີວິດແບບປົກກະຕິກັບຄືນ ໄດ້ໂດຍໄວ. ທ່ານສາມາດໄປຮັບວັກຊີນຕາມຈຸດບໍລິການຕ່າງໆ ທີ່ທາງຄະນະສະເພາະກິດກຳນົດໄວ້ ແລະ ບໍ່ໃຫ້ຄິດວ່າ ຈະບໍ່ມີວັກຊີນພຽງພໍ ໃນການສັກ ແລະ ສຳລັບຜູ້ທີ່ໄດ້ສັກເຂັມທີ 1 ແລ້ວ ໃຫ້ໄປສັກຕາມກຳນົດຢູ່ໃນບັດສັກວັກຊີນຂອງທ່ານ ເພາະໄປກ່ອນກຳນົດ ຈະສ້າງຄວາມແອອັດ, ບໍ່ເປັນລະບຽບ ແລະ ເຮັດໃຫ້ການບໍລິການສັກວັກຊີນຊັກຊ້າ.
Loading...