ຕອນເຊົ້າວັນທີ 23 ມິຖຸນາ 2021, ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ
ຕາງໜ້າກອງເລຂາ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ໄດ້ຖະແຫຼງຂ່າວ:
ສະພາບການລະບາດ ຜູ້ຕິດເຊື້ອໂຄວິດ-19 ຢູ່ສປປລາວ.
ໄດ້ກວດວິເຄາະທັງໝົດ 1,294 ຄົນ, ໃນນັ້ນ ກວດພົບຜູ້ຕິດເຊື້ອທັງໝົດ 9 ຄົນ, ຈາກນະຄອນຫຼວງ 6 ຄົນ, ຈຳປາສັກ 2 ຄົນ ແລະ ສະຫວັນນະເຂດ 1 ຄົນ.
ສຳລັບນະຄອນຫຼວງວຽງຈັນ 6 ຄົນ ແມ່ນກໍລະນີຕິດເຊື້ອໃນຊຸມຊົນ ຈາກການສຳຜັດໃກ້ຊິດກັບຜູ້ຕິດເຊື້ອເກົ່າ.
ສ່ວນ ແຂວງສະຫວັນນະເຂດ 1 ຄົນ ແລະ ຈຳປາສັກ 2 ຄົນ ແມ່ນກວດພົບຈາກແຮງງານລາວ ທີ່ກັບມາຈາກປະເທດໄທ ໂດຍຖືກຕ້ອງຕາມກົດໝາຍ ເຊິ່ງຖືວ່າ ເປັນກໍລະນີນຳເຂົ້າ.
 ດັ່ງນັ້ນ, ມື້ນີ້ມີການຕິດເຊື້ອໃໝ່ 9 ກໍລະນີ, ບໍ່ມີການເສຍຊີວິດໃໝ່ 0 ຄົນ, ກຳລັງປິ່ນປົວ 112 ຄົນ.
ລາຍລະອຽດ ກ່ຽວກັບ 6 ຄົນ ທີ່ຕິດເຊື້ອໃໝ່ ໃນນະຄອນຫຼວງວຽງຈັນ, ດັ່ງຕໍ່ໄປນີ້:
– ຄົນທີ 1:
ເພດຍິງ, ອາຍຸ 24 ປີ, ສັນຊາດລາວ, ບ້ານໂນນແກ້ວ, ເມືອງສີໂຄດຕະບອງ, ນະຄອນຫຼວງວຽງຈັນ, ຜູ້ກ່ຽວມີໄຂ້, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ (ຄົນໃນຄອບຄົວຜູ້ຕິດເຊື້ອ), ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ບ້ານໂນນແກ້ວ ແລະ ຜົນກວດພົບເຊື້ອ.
– ຄົນທີ 2:
ເພດຊາຍ, ອາຍຸ: 24 ປີ, ສັນຊາດລາວ, ບ້ານໂພນຕ້ອງສະຫວ່າງ, ເມືອງຈັນທະບູລີ, ນະຄອນຫຼວງວຽງຈັນ, ຜູ້ກ່ຽວບໍ່ມີອາການຫຍັງ, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ, ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ໂຮງໝໍເສດຖາທິຣາດ ແລະ ຜົນກວດພົບເຊື້ອ.
– ຄົນທີ 3:
ເພດຊາຍ, ອາຍຸ: 25 ປີ, ສັນຊາດລາວ, ບ້ານໂພນຕ້ອງ, ເມືອງຈັນທະບູລີ, ນະຄອນຫຼວງວຽງຈັນ, ຜູ້ກ່ຽວບໍ່ມີອາການຫຍັງ, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ, ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ໂຮງໝໍເສດຖາທິຣາດ ແລະ ຜົນກວດພົບເຊື້ອ.
– ຄົນທີ 4:
ເພດຍິງ, ອາຍຸ: 48 ປີ, ສັນຊາດລາວ, ບ້ານດອນດູ່, ເມືອງຫາດຊາຍຟອງ, ນະຄອນຫຼວງວຽງຈັນ, ຜູ້ກ່ຽວມີອາການໄຂ້, ໄອ, ຫາຍໃຈຝືດ, ເຈັບຄໍ, ຂີ້ມູນກຍ້ອຍ ແລະ ເມື່ອຍ, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ, ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ໂຮງໝໍເສດຖາທິຣາດ ແລະ ຜົນກວດພົບເຊື້ອ.
– ຄົນທີ 5:
ເພດຊາຍ, ອາຍຸ 4 ປີ, ສັນຊາດລາວ, ບ້ານເກົ້າລ້ຽວ, ເມືອງສີໂຄດຕະບອງ, ນະຄອນຫຼວງວຽງຈັນ, ຜູ້ກ່ຽວບໍ່ມີອາການຫຍັງ, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ (ຄົນໃນຄອບຄົວຜູ້ຕິດເຊື້ອ), ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ ມສ ສີໂຄດ ແລະ ຜົນກວດພົບເຊື້ອ.
– ຄົນທີ 6:
ເພດຊາຍ, ອາຍຸ: 26 ປີ, ສັນຊາດລາວ, ບ້ານວາທ່າ, ເມືອງສີໂຄດຕະບອງ, ນະຄອນຫຼວງວຽງຈັນ, ຜູ້ກ່ຽວບໍ່ມີອາການຫຍັງ, ມີປະຫວັດສໍາຜັດໃກ້ຊິດກັບຜູ້ຕິດເຊື້ອ, ໄປເກັບຕົວຢ່າງ ໃນວັນທີ 22 ມີຖຸນາ 2021 ຢູ່ ມສ ສີໂຄດ ແລະ ຜົນກວດພົບເຊື້ອ.
 ການເຝົ້າລະວັງຢູ່ຕາມຈຸດຜ່ານແດນໃນຂອບເຂດທົ່ວປະເທດ
• ປັດຈຸບັນ ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 43 ສູນ ແລະ ມີຜູ້ຈຳກັດບໍລິເວນ 4,141 ຄົນ.
 ສຳລັບສະຖານທີ່ ເກັບຕົວຢ່າງ ເພື່ອກວດຫາເຊື້ອ ພະຍາດໂຄວີດ-19 ມີດັ່ງນີ້:
– ສຳລັບນະຄອນຫຼວງວຽງຈັນ ມີ 5 ໂຮງໝໍສູນກາງ ແລະ ໂຮງໝໍ 103 ສູນກາງກອງທັບ
– ຈຸດກວດນອກສະຖານທີ່ ຢູ່ ໂຮງຮຽນ ສີໂຄດ ໃຫ້ບໍລິການ ເກັບຕົວຢ່າງ 9-12 ໂມງ ທຸກມື້ (ວັນຈັນ ເຖີງ ວັນອາທິດ)
– ແລະ ຖ້າມີກໍລະນີບວກ (+) ໃໝ່ ຢູ່ບ້ານໃດ ຈະມີທີມງານເຄື່ອນທີ່ໄປເກັບຕົວຢ່າງຜູ້ສຳພັດໃກ້ຊິດ ໃນຈຸດ ທີ່ມີກໍລະນີຜູ້ຕິດເຊື້ອໃໝ່
• ປະຈຸບັນ ຈຳນວນບ້ານແດງ ໃນນະຄອນຫຼວງວຽງຈັນ ແມ່ນມີ 13 ບ້ານ ໃນ 05 ເມືອງ.
– ບ້ານໃໝ່ທີ່ຖືກກຳນົດເປັນເຂດແດງ ມີ 0 ບ້ານ.
• ສະພາບການລະບາດຂອງພະຍາດໂຄວິດ-19 ຢູ່ໃນທ່ົວໂລກ ຍັງຕ້ອງເຝົ້າລະວັງຢ່າງໃກ້ຊິດ ພາຍຫຼັງພົບຜູ້ຕິດເຊື້ອໃໝ່ ແລະ ຜູ້ເສຍຊິວິດເພິ່ມຂ້ຶ້ນຢ່າງຕໍ່ເນື່ອງ, ມີລາຍງານການເກີດລະບາດຮອບໃໝ່ ໃນຫຼາຍປະເທດ ໃນຍູໂຣບ ເຊິ່ງມີສາເຫດຂອງການຈໍລະຈອນຂອງສາຍພັນໃໝ່ ເຮັດໃຫ້ມີການຕິດເຊື້ອໄດ້ໄວກວ່າເກ່ົາ ແລະ ແຜ່ອອກສູ່ຊຸມຊົນໄດ້ໄວ;
• ສປປ ລາວ ເຮົາປະສົບກັບການນຳເຂົ້າຂອງສາຍພັນ ອານຟ້າ ໃນໄລຍະປີໃໝ່ລາວ ຈຶ່ງເຮັດໃຫ້ມີການຕິດເຊື້ອເປັນຈຳນວນຫຼວງຫຼາຍ ແລະ ປະຈຸບັນ ກໍ່ຍັງໃຊ້ຄວາມພະຍາຍາມຈາກທຸກພາກສ່ວນ ເພື່ອຢຸດຕິການຕິດເຊື້ອໂດຍໄວ. ມີການລາຍງານ ການພົບສາຍພັນເດວຕ້າ (ສາຍພັນອິນເດຍ), ສາຍພັນເບຕ້າ (ສາຍພັນອາຟຣິກາໃຕ້) ໃນປະເທດເພື່ອນບ້ານ ແລະ ສາຍພັນປະສົມ ອານຟ້າ, ເດວຕ້າ (ອິນເດຍ-ອັງກິດ) ເຊິ່ງຮຽກຮ້ອງໃຫ້ພວກເຮົາ ຈະຕ້ອງໄດ້ເຂັ້ມງວດໃນການກວດຂັນ ຜູ້ທີ່ເດີນທາງເຂົ້າມາ ສປປ ລາວ ຕາມຈຸດຜ່ານແດນຕ່າງໆ ໂດຍສະເພາະແມ່ນ ການລັກລອບເຂົ້າມາບໍ່ຖືກຕາມລະບຽບຫຼັກການ. ສະນັ້ນ, ຈຶ່ງຮຽກຮ້ອງໃຫ້ເຈົ້າໜ້າທີ່ ທັງ ປກສ ແລະ ປກຊ ກໍ່ຄື ອຳນາດການປົກຄອງທ້ອງຖິ່ນ ຈົ່ງເອົາໃຈໃສ່ລາດຕະເວນ ເພື່ອສະກັດກັ້ນ ການນຳເອົາເຊື້ອເຂົ້າມາ ແລະ ຖ້າພົບເຫັນ ບຸກຄົນທີ່ກັບມາຈາກປະເທດເພື່ອນບ້ານ ແມ່ນໃຫ້ຮີບຮ້ອນລາຍງານໃຫ້ແກ່ອຳນາດປົກຄອງບ້ານທັນທີ ເພື່ອຈະນຳເອົາຜູ້ກ່ຽວ ເຂົ້າໄປສູນຈຳກັດບໍລິເວນ ແລະ ເກັບຕົວຢ່າງກວດຊອກຫາເຊື້ອ;
• ປະຈຸບັນນີ້ ໄດ້ມີການເປີດບໍລິການສັກວັກຊີນ ໃນຫຼາຍຈຸດຂອງນະຄອນຫຼວງ ກໍ່ຄື ບັນດາແຂວງຕ່າງໆ ຈຶ່ງຂໍເຊີນຊວນ ປະຊາຊົນບັນດາເຜົ່າ, ພະນັກງານ, ທະຫານ, ຕຳຫຼວດ ໄປສັກວັກຊີນ ເພື່ອເຮັດໃຫ້ເມືອງ/ແຂວງ ແລະ ປະເທດຂອງພວກເຮົາ ປອດໄພ ຈາກພະຍາດໂຄວິດ-19 ໂດຍໄວ ເມື່ອອັດຕາການສັກຢາຂອງວັກຊີນທົ່ວປະເທດ ຫາສູງກວ່າ 70% ຂຶ້ນໄປ ຕາມທີ່ທາງກະຊວງສາທາລະນະສຸກໄດ້ວາງອອກ ເນື່ອງຈາກ ຄວາມສຳຄັນຂອງການສັກວັກຊີນ ແມ່ນ ສາມາດຫຼຸດຜ່ອນຄວາມຮຸນແຮງຂອງພະຍາດໄດ້ ແລະ ນຳໄປສູ່ການເກີດພູມຄຸ້ມກັນໝູ່;
• ເຖິງແມ່ນວ່າ ສະພາບການລະບາດຂອງພວກເຮົາ ມີທ່າອ່ຽງຫຼຸດລົງ ແຕ່ພວກເຮົາກໍ່ບໍ່ຄວນປະໝາດ ຂໍຮຽກຮ້ອງ ມາຍັງ ພໍ່ແມ່, ພີ່ນ້ອງ, ປະຊາຊົນ ແລະ ທຸກພາກສ່ວນໃນສັງຄົມ ເອົາໃຈໃສ່ປະຕິບັດມາດຕະການ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 671/ຫສນຍ, ລົງວັນທີ 19 ມີຖຸນາ 2021 ການສືບຕໍ່ປະຕິບັດມາດຕະການຜ່ອນຜັນ ຢ່າງເຂັ້ມງວດ ແລະ ຄຳແນະນຳຂອງຂະແໜງການກ່ຽວຂ້ອງ;
• ການຮັກສາໄລຍະຫ່າງທາງສັງຄົມ, ສວມໃສ່ຜ້າປິດ-ດັງ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວເຫຼົ້າ 70 % ຂຶ້ນໄປ ຍັງຈະຕ້ອງໄດ້ສືບຕໍ່ປະຕິບັດ ເພື່ອປ້ອງກັນ ການແຜ່ລະບາດຂອງພະຍາດໂຄວິດ-19 ບໍ່ໃຫ້ຂະຫຍາຍເປັນວົງກວ້າງ;
• ອີກເທື່ອໜຶ່ງ ຮຽກຮ້ອງໃຫ້ບັນດາ ທ່ານຈົ່ງຕິດຕາມຂໍ້ມູນຂ່າວສານທີ່ຖືກຕ້ອງ ແລະ ເປັນທາງການ,
o ວິທະຍຸກະຈາຍສຽງ, ໂທລະພາບ, ໜັງສືພິມ ແລະສື່ຕ່າງໆ ຂອງລັດຖະບານ
o ນອກຈາກນີ້ຍັງມີເວັບໄຊ້ຂອງຄະນະສະເພາະກິດເພື່ອປ້ອງກັນ, ຄວບຄຸມ ແລະແກ້ໄຂ ການລະບາດ ພະຍາດໂຄວິດ-19 ກໍ່ຄື covid19.gov.la ແລະ
o ເວັບໄຊ້ຂອງກົມຄວບຄຸມພະຍາດຕິດຕໍ່, ກະຊວງສາທາລະນະສຸກcdc.gov.la
o ເຟດບຸກຂອງສູນຂ່າວສານການແພດແລະສຸຂະສຶກສາ, ກະຊວງສາທາລະນະສຸກ
o ແລະສາມາດໂທສອບຖາມ ສາຍດ່ວນ 165 ຫຼື 166 ສຳລັບສູນກາງ ແລະ ສາຍດ່ວນແຂວງ (ລະຫັດແຂວງ ຕາມດ້ວຍ 165 ຫຼື 166).
Loading...