ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນໂອກາດສະເຫລີມສະຫລອງວັນສັບປະດາໜັງສືໂລກ 23 ເມສາ ຄັ້ງທີ 29 ນີ້, ບໍລິສັດຕາຂ່າຍໄຟຟ້າພາກໃຕ້ຂອງຈີນ ໄດ້ຈັດກິດຈະກໍາການກຸສົນ ພາຍໃຕ້ຫົວຂໍ້: “ແສງສະຫວ່າງແຫ່ງຄວາມຫວັງ” ຢູ່ປະເທດລາວ, ໂດຍຮ່ວມກັບທີມອາສາສະໝັກທ້ອງຖິ່ນໃນປະເທດລາວ ແລະ ລັດວິສາຫະກິດໄຟຟ້າລາວ ມອບປື້ມ ແລະ ອຸປະກອນແຕ້ມຮູບສໍາລັບເດັກນ້ອຍ ໃຫ້ແກ່ນັກຮຽນຢູ່ໂຮງຮຽນຜູ້ພິການທາງການໄດ້ຍິນ 2 ແຫ່ງໃນປະເທດລາວ. ນອກນີ້, ຍັງໄດ້ດຳເນີນກິດຈະກໍາຮ່ວມ ເປັນຕົ້ນ ການເປີດຫ້ອງຮຽນສົ່ງເສີມການອ່ານ, ຫ້ອງຮຽນແຕ້ມຮູບຕາມຮູບ ແລະ ອື່ນໆ.
ໜັງສືທີ່ນໍາມາບໍລິຈາກໃນຄັ້ງນີ້, ແມ່ນກວມຢູ່ໃນຂົງເຂດວິທະຍາສາດ, ວັນນະຄະດີ, ສິລະປະ ແລະ ອື່ນໆ ເຊິ່ງກິດຈະກໍາຄັ້ງນີ້ແມ່ນນໍາໃຊ້ປື້ມ ແລະ ອຸປະກອນສິລະປະເປັນສື່ກາງ ເພື່ອການຮຽນຮູ້ ແລະ ການເຕີບໃຫຍ່ຂອງເດັກນ້ອຍ ແລະ ກະຕຸ້ນໃຫ້ພວກເຂົາມີຄວາມຮັບຮູ້ກ່ຽວກັບໂລກ ແລະ ຂະຫຍາຍມຸມມອງໃນການເບິ່ງໂລກ ພາຍໃຕ້ມະຫາສະໝຸດແຫ່ງຄວາມຮູ້ ແລະ ສິລະປະ.
ຜູ້ຮັບຜິດຊອບຂອງ ບໍລິສັດຕາຂ່າຍໄຟຟ້າພາກໃຕ້ຂອງຈີນ ໄດ້ໃຫ້ຮູ້ວ່າ: ກິດຈະກຳ ການກຸສົນດ້ວຍຫົວຂໍ້: “ແສງສະຫວ່າງ ແຫ່ງຄວາມຫວັງ” ໄດ້ເລີ່ມຈັດຕັ້ງປະຕິບັດແຕ່ປີ 2023 ເປັນຕົ້ນມາ ໂດຍຈັດຢູ່ໃນປະເທດລາວແລ້ວ 5 ຄັ້ງ ແລະ ຈັດຢູ່ກໍາປູເຈຍ 1 ຄັ້ງ. ໃນນັ້ນ, ໄດ້ມີການຮ່ວມມືຢ່າງສະໜິດແໜ້ນກັບສູນການສຶກສາ “ມືແຫ່ງຄວາມຫວັງ” ເພື່ອໃຫ້ເດັກນ້ອຍຂອງສູນການສຶກສາ ມີສິດທິເຂົ້າເຖິງຄວາມຮູ້, ກ້າສະແດງອອກ ແລະ ຮັບຮູ້ເຖິງຄວາມງົດງາມໄດ້ຢ່າງເທົ່າທຽມ. ບໍລິສັດຕາຂ່າຍໄຟຟ້າພາກໃຕ້ຂອງຈີນ ຮ່ວມກັບຄູ່ຮ່ວມມືໃນປະເທດລາວ ໄດ້ຄັດເລືອກ ແລະ ບໍລິຈາກໜັງສື ແລະ ອຸປະກອນສິລະປະຢ່າງຫລາກຫລາຍທີ່ເໝາະສົມສໍາລັບເດັກນ້ອຍ ທີ່ມີຄວາມບົກພ່ອງທາງການໄດ້ຍິນ ເຊິ່ງປະກອບມີ: ປື້ມຮູບພາບສໍາລັບເດັກສະບັບພາສາລາວ, ອຸປະກອນການແຕ້ມຮູບ ແລະ ອື່ນໆ ທີ່ເນັ້ນໃສ່ຕອບສະໜອງຄວາມຕ້ອງການດ້ານການອ່ານ, ການຮຽນຮູ້, ການສ້າງສັນ ແລະ ດ້ານອື່ນໆ.
ທ່ານ ໂສພາພອນ ເຮືອງລິດ ອໍານວຍການສູນການສຶກສາ ມືແຫ່ງຄວາມຫວັງ ໄດ້ກ່າວວ່າ: ເດັກນ້ອຍທຸກຄົນ, ບໍ່ວ່າຈະມີຄວາມບົກພ່ອງທາງການໄດ້ຍິນ ຫລື ບໍ່ ກໍລ້ວນແລ້ວແຕ່ມີສິດທີ່ຈະໄດ້ຮັບຄວາມເພີດເພີນກັບການອ່ານ, ສໍາພັດໄດ້ການຫລໍ່ຫລອມດ້ານສິລະປະ. ວຽກງານການກຸສົນທັງໝົດ ພາຍໃຕ້ຫົວຂໍ້ ແສງສະຫວ່າງແຫ່ງຄວາມຫວັງ ຂອງບໍລິສັດຕາຂ່າຍໄຟຟ້າພາກໃຕ້ ຂອງຈີນ ໄດ້ສ້າງຄວາມເປັນໄປໄດ້ຫລາຍຂຶ້ນໃຫ້ກັບເດັກນ້ອຍໃນໂຮງຮຽນ ແລະ ຍັງເປັນຂົວທີ່ເຊື່ອມຕໍ່ລະຫວ່າງຄວາມຮູ້ ແລະ ສິລະປະ, ເຊິ່ງຊ່ວຍໃຫ້ພວກເຂົາໄດ້ຊຶມຊັບພະລັງຄວາມຮູ້ໃນເວລາທີ່ໄດ້ອ່ານ, ມີຄວາມຄິດສ້າງສັນໃນເວລາທີ່ໄດ້ແຕ້ມຮູບ ແລະ ຊ່ວຍສ້າງຄວາມໝັ້ນໃຈໃນຕົນເອງ ເພື່ອປັບຕົວເຂົ້າກັບສັງຄົມໄດ້ດີຍິ່ງຂຶ້ນ.
ໂດຍຜ່ານການດໍາເນີນກິດຈະກໍາການກຸສົນ, ບໍລິສັດຕາຂ່າຍໄຟຟ້າພາກໃຕ້ຂອງຈີນ ກໍໄດ້ຮັດແໜ້ນ​ການພົວພັນຮ່ວມມືກັບຝ່າຍຕ່າງໆຂອງລາວຢ່າງເລິກເຊິ່ງ. ໃນຕໍ່ໜ້າ, ບໍລິສັດຕາຂ່າຍໄຟຟ້າພາກໃຕ້ຂອງຈີນ ​ຈະສືບຕໍ່ດຳເນີນວຽກງານການກຸສົນ “ແສງສະຫວ່າງແຫ່ງຄວາມຫວັງ” ​ເພື່ອຮັບໃຊ້ຊີວິດການເປັນຢູ່ຂອງ​ປະຊາຊົນຢູ່ໃນສັງຄົມລາວ, ຊຸກຍູ້ການພັດທະນາການສຶກສາ, ເປັນກໍາລັງແຮງໜຶ່ງປະກອບສ່ວນໃຫ້ແກ່​ວຽກງານສະຫວັດດີການສັງຄົມ, ຊ່ວຍເຫລືອການພັດທະນາແບບປະສົມປະສານ ຂອງເດັກນ້ອຍທີ່ມີຄວາມບົກພ່ອງທາງການໄດ້ຍິນ​ ແລະ​ ປະກອບສ່ວນສ້າງພື້ນຖານໃໝ່ໃນ​ການແລກປ່ຽນຂອງສັງຄົມມະນຸດລະຫວ່າງ ຈີນ-ລາວ.
ທີ່ມາ: ຂປລ.