ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ງານວາງສະແດງຜະລິດຕະພັນ-ສິນຄ້າ ສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບ ຮອບ 75 ປີ ໄຂຂຶ້ນໃນວັນທີ 12 ມັງກອນ ນີ້ ທີ່ເດີ່ນພະທາດຫຼວງ ໂດຍການເຂົ້າຮ່ວມຂອງທ່ານ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງ ປ້ອງກັນປະເທດ ພ້ອມດ້ວຍແຂກຖືກເຊີນ, ນາຍ ແລະ ພົນ ທະຫານ ເຂົ້າຮ່ວມ.
ທ່ານ ພົນຕີ ວົງຄໍາ ພິມມະກອນ ໃຫ້ຮູ້ວ່າ: ການຈັດງານວາງສະແດງສິນຄ້າຄັ້ງນີ້ມີບັນດາຫົວໜ່ວຍການຜະລິດ ທຸລະກິດຂອງລັດ, ວິສາຫະກິດກອງທັບ, ເອກະຊົນ, ພາຍໃນ ແລະ ຫົວ ໜ່ວຍທຸລະກິດຮ່ວມມືກັບຕ່າງປະເທດເຂົ້າຮ່ວມຢ່າງຄຶກຄື້ນ, ກວ້າງຂວງ, ມີສີສັນ ແລະ ມີຫລາຍສິນຄ້າ, ຊຶ່ງເປັນການສະແດງໃຫ້ເຫັນເຖີງຄວາມສາມັກຄີ, ທາດແທ້ມູນເຊື້ອປະຕິວັດ, ຄວາມ ດຸໝັ່ນຂະຫຍັນພຽນ, ຄວາມອົດທົນ,ເປັນເຈົ້າການ ແລະ ຫົວຄິດປະດິດສ້າງຂອງກອງ ທັບ.
ນອກຈາກນີ້, ຍັງສ່ອງແສງໃຫ້ເຫັນການປະກອບສ່ວນ ຂອງກອງທັບ ເຂົ້າໃນການຈັດຕັ້ງປະຕິ ບັດສອງໜ້າທີ່ຍຸດທະ ສາດ ໃນການປົກປັກຮັກສາ ແລະ ຍັບປຸງ ສອງກອງທັບປະຊາຊົນໃຫ້ມີຄວາມເຂັ້ມແຂງ ແລະ ທັນສະໄໝ, ພ້ອມທັງໂຄສະນາສຶກສາອົບຮົມໃຫ້ ພະນັກງານ-ນັກຮົບ ແລະ ປະຊາຊົນບັນດາເຜົ່າ ເຫັນໄດ້ຜົນງານ, ມູນເຊື້ອອັນອົງອາດກ້າແກ່ນ ແລະ ວິລະກຳທັນຕົ້ນລິດຂອງກອງທັບປະຊາຊົນລາວ ພາຍໃຕ້ຮົ່ມທຸງຂອງພັກ, ບັນຕາຫຼັກຖານແຫ່ງຜົນງານ, ມູນເຊື້ອປະຕິວັດຝານມາຂອງກອງທັບ ຍັງໄດ້ສະແດງໃຫ້ເຫັນການເຕີບໃຫຍ່ເຂັ້ມແຂງຂອງກອງທັບ ປະ ຊາຊົນລາວ ໃນຕະຫຼອດໄລຍະ 75 ປີ ເຊິ່ງໄດ້ຮັບການພັດທະນາກ້າວຂຶ້ນ ເປັນກອງທັບປະຕິວັດທີ່ ເຂັ້ມແຂງ ແລະ ມີລະບຽບແບບແຜນ.
ງານວາງສະແດງໃນຄັ້ງນີ້, ມີຫົວໜ່ວຍທຸລະກິດເຂົ້າຮ່ວມ 50 ຫົວໜ່ວຍ, ແບ່ງອອກເປັນ 95 ຮ້ານ, ໃນນັ້ນມີຫົວໜ່ວຍການຜະລິດ, ໂຮງຈັກ, ໂຮງງານ, ບໍລິສັດ, ວິສາຫະກິດພາຍໃນກອງທັບ 34 ຫົວໜ່ວຍ ຈັດວາງເປັນ 36 ຮ້ານມີ: ປະເພດເຄື່ອງນຸ່ງຫົ່ມ, ເຄື່ອງຫັດຖະກຳ, ຢາປົວພະຍາດ-ບໍາລຸງສຸຂະພາບ, ຜະລິດຕະພັນກະສິກຳປະເພດພືດຜັກ, ຊີ້ນ, ປາ, ໄຂ່, ເບ້ຍໄມ້, ເຄື່ອງປະດັບຍົດ, ເຄື່ອງໃຊ້ຄົວເຮືອນ, ເຟີນີເຈີ, ໂທລະຄົມ, ການບິນ, ການກໍ່ສ້າງ, ສິ່ງປະດິດ ແລະ ອື່ນໆ ທັງເປັນວັດຖຸພັນ, ຮູບພາບ, ວິດີໂອ ແລະ ສິ່ງພິມຕ່າງໆທີ່ສ່ອງແສງໃຫ້ເຫັນຜົນງານ, ການເຄື່ອນໄຫວຂອງບັນດາຫົວໜ່ວຍ, ກົມກອງຕ່າງໆທີ່ເຄີຍມີມູນເຊື້ອຮັບໃຊ້ກອງ ທັບໃນໄລຍະປົກປັກຮັກສາ ແລະ ສ້າງສາປະເທດຊາດໃນປັດຈຸບັນ. ນອກຈາກນີ້, ຍັງມີກຸ່ມຜະລິດຕົວແບບຂອງອົງການ ຈັດຕັ້ງຕ່າງໆ 13 ຫົວໜ່ວຍ, ຫົວໜ່ວຍຂອງຄົນຕ່າງປະເທດທີ່ດຳເນີນທຸລະກິດຢູ່ລາວ 3 ຫົວໜ່ວຍ ໂດຍຈະດໍາເນີນໄປຮອດ
ວັນທີ18 ມັງກອນນີ້.