ການແຂ່ງຂັນເຕະບານ ຄູ່ຊີງຊະນະເລີດ ລະຫວ່າງ ວິທະຍາຄານກອງທັບ ຫຼື ວຄທ ພົບ ມະຫາວິທະຍາໄລ ສຸພານຸວົງ ເປັນຄູ່ປິດການແຂ່ງຂັນງານມະຫະກຳກິລາ ມະຫາວິທະຍາໄລລາວ ຄັ້ງທີ II ຫຼື ກມລ 2 ຢ່າງເປັນທາງການ ຈັດຂຶ້ນ ໃນວັນທີ 13 ພຶດສະພາ 2024 ໃຫ້ກຽດເຂົ້າຮ່ວມ ແລະ ມອບຫຼຽນຄຳ, ຫຼຽນເງິນ ແລະ ຫຼຽນທອງ ໂດຍທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ທັງເປັນປະທານຄະນະກຳມະການໂອແລມປິກແຫ່ງຊາດລາວ ແລະ ທ່ານ ອຸດົມ ພອນຄຳເພັງ ປະທານສະຫະພັນກິລາມະຫາວິທະຍາໄລລາວ ພ້ອມດ້ວຍບັນດາຄະນະນຳ, ຄູຝຶກ ແລະ ນັກກິລາແຕ່ພາກສ່ວນ ຕະຫຼອດຮອດກອງເຊຍເຂົ້າຮ່ວມ.
ຕະຫຼອດໄລຍະເກມ 90 ນາທີ ການແຂ່ງຂັນດຳເນີນໄປດ້ວຍບັນຍາກາດຄຶກຄັກ ຈາກກອງຊົມ-ເຊຍ ຫຼາຍກວ່າ 4 ພັນຄົນ ເປັນພາບບັນຍາກາດທີ່ມີສີສັນຟົດຟື້ນຫຼາຍ.
ຈາກກຳລັງໃຈເຮັດໃຫ້ນັກເຕະທັງສອງທີມ ກໍໄດ້ເປີດເກມບຸກ-ເກມຮັບໃສ່ກັນຢ່າງດຸເດືອດ ແລະ ສູສີ ຜັດປ່ຽນກັນບຸກ ແລະ ຮັບ ຫຼິ້ນເອົາກອງເຊຍນັ່ງກົ້ນບໍ່ຕິດຕັ່ງ ,ໃນໄລຍະທ້າຍເກມ ຝ່າຍ ວຄທ ໄດ້ປະຕູອອກນຳໄປກ່ອນ ຈາກ ຕີ ສີຫາລາດ ໃນນາທີ 70 ແຕ່ດີໃຈບໍ່ພໍເທົ່າໃດນາທີ ກໍເປັນ ທັກສິນ ມະນີຄຳ ຍິງພາໃຫ້ ມສ ໄລ່ຕີສະເໝີ ໃນນາທີ 72 ແລະ ຕໍ່ເວລາພິເສດອອກໄປ 3 ນາທີ ທ. ອິນທະວົງ ສົມສະລາດ ກອງຫຼັງທີ່ຂຶ້ນມາໂໝ່ງບານເຂົ້າປະຕູຢ່າງສວຍງາມ ໃນນາທີ 90+1 ຊ່ວຍທີມນັກສຶກສາ ວຄທ ສາມາເອົາຊະນະທີມ ມສ 2-1 ປະຕູ ໄດ້ຫຼຽນຄຳມາຄອງ, ຫຼຽນທອງ ມະຫາວິທະຍາໄລ ສຸພານຸວົງ ແລະ ຫຼຽນທອງ ສະຖາບັນລາວ-ອາເມລິກາ.
(ຂ່າວ: ສົງການ ພັນແພງດີ-ພາບ: ລູກນໍ້າເຊ)
