ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນຕອນເຊົ້າວັນທີ 26 ທັນວາ ປີ 2023, ທີ່ວິທະຍຸກະຈາຍສຽງແຫ່ງຊາດລາວ (ວສລ) ໄດ້ຈັດພິທີມອບ-ຮັບໂຄງການຊ່ວຍເຫຼືອດ້ານເຕັກນິກເພື່ອການປັບປຸງລະບົບຫ້ອງອັດສຽງ-ພາບອອນລາຍ ແລະ ລົດຖ່າຍທອດສຽງ-ພາບຂອງສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງ ແຫ່ງ ສ.ເກົາຫຼີ (RAPA).
ໃຫ້ກຽດເຂົ້າຮ່ວມພິທີໃນຄັ້ງນີ້ມີ ທ່ານ ໂພສີ ແກ້ວມະນີວົງ, ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ວັນໄຊ ຕະວິນຍານ, ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ຫົວໜ້າບັນນາທິ ການໜັງສືພິມປະຊາຊົນ, ທ່ານ ສຸວັນ ວິໄລແສງ, ຜູ້ອໍານວຍການໃຫຍ່ ວສລ, ທ່ານ ດຣ. Dr. Jungsu Song, ຮອງປະທານບໍລິຫານສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງແຫ່ງສາທາລະນະລັດເກົາຫຼີ (RAPA), ບັນດາຫົວໜ້າ-ຮອງຫົວໜ້າກົມອ້ອມຂ້າງກະຊວງ ຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ພ້ອມດ້ວຍແຂກຮັບເຊີນ ແລະ ພະນັກງານພາຍໃນວິທະຍຸກະຈາຍສຽງແຫ່ງຊາດລາວ.
ໃນພິທີ ທ່ານ ວໍລະສັກ ປຣະວົງວຽງຄຳ, ຮອງຜູ້ອຳນວຍການໃຫຍ່ ວສລ ໄດ້ຂຶ້ນລາຍງານຄວາມເປັນມາຂອງໂຄງການດັ່ງກ່າວ ເພື່ອແນ່ໃສ່ຍົກລະດັບທາງດ້ານເຕັກນິກຂອງວິທະຍຸກະຈາຍສຽງແຫ່ງຊາດລາວ ໃຫ້ກາຍເປັນວິທະຍຸລະບົບດີຈີຕອນທີ່ທັນສະໄໝ ສາມາດກະຈາຍຂໍ້ມູນຂ່າວສານໄປສູ່ຜູ້ບໍລິໂພກທົ່ວປະເທດ ແລະ ທົ່ວໂລກຜ່ານຫຼາຍຊ່ອງທາງໄດ້ຢ່າງວ່ອງໄວທັນກັບເຫດການ, ແຫຼມຄົມ, ຖືກຕ້ອງຊັດເຈນ ແລະ ກ້ວາງຂວາງກ່ວາເກົ່າ. ໃນປີ 2020 ວິທະຍຸກະຈາຍສຽງແຫ່ງຊາດລາວ ໄດ້ຂຽນບົດສະເໜີຂໍໂຄງການວ່າດ້ວຍການປັບປຸງລະບົບຫ້ອງອັດສຽງ-ພາບອອນລາຍແລະລົດຖ່າຍທອດສຽງ-ພາບ ພາຍໃຕ້ໂຄງການຊ່ວຍເຫຼືອລ້າ (ODA) ຈາກລັດຖະບານ ແຫ່ງ ສ.ເກົາຫຼີ ໂດຍຜ່ານກະຊວງວິທະຍາສາດ ແລະ ຂໍ້ມູນຂ່າວສານ ແຫ່ງ ສ.ເກົາຫຼີ.
ພາຍຫຼັງໄດ້ຮັບການເຫັນດີອະນຸມັດຈາກ ລັດຖະບານ ສ.ເກົາຫຼີ, ສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງ ແຫ່ງ ສ.ເກົາຫຼີ (RAPA) ໄດ້ຮັບການມອບໝາຍໃຫ້ເປັນຜູ້ຕາງໜ້າລັດຖະບານ ສ.ເກົາຫຼີ ແລະ ຮ່ວມເຊັນບົດບັນທຶກຄວາມເຂົ້າໃຈ (MoU) ວ່າດ້ວຍການຮ່ວມມືກັບ ວສລ ເພື່ອຈັດຕັ້ງປະຕິບັດໂຄງການຊ່ວຍເຫຼືອລ້າດັ່ງກ່າວ, ລວມມູນຄ່າທັງໝົດ 309.076 ໂດລາສະຫະລັດ ພາຍໃຕ້ຊື່ເປັນພາສາອັງກິດ“Support for the Improvement of the Broadcasting Environment”.
ໂຄງການຊ່ວຍເຫລືອດັ່ງກ່າວ ໄດ້ແບ່ງອອກເປັນ 2 ໄລຍະ ຄື:
– ໄລຍະທີ່ 1 ປີ 2022 ປະກອບມີອຸປະກອນເຕັກນິກຄົບຊຸດສໍາລັບຫ້ອງສະຕູດີໂອໃຫ່ຍ,ຊຶ່ງສາມາດບັນທຶກ
ສຽງ-ພາບແບບປົກກະຕິ,ຈັດລາຍການສົດ,ຖ່າຍທອດສົດຜ່ານລະບົບອອນລາຍທີ່ທັນສະໄໝ ມາດຕະຖານສາກົນ ລວມທັງການຝຶກອົບຮົມເຕັກນິກວິທີການນໍາໃຊ້ໃຫ້ແກ່ວິຊາການ ມູນຄ່າ 79.385 ໂດລາສະຫະລັດ.
– ໄລຍະທີ່ 2 ປີ 2023, ລວມມີລົດຖ່າຍທອດສຽງ ແລະ ພາບ OB Van ຈໍານວນ 1 ຄັນ, ຊຶ່ງປະກອບອຸປະກອນເຕັກນິກທີ່ທັນສະໄໝຄົບຊຸດ, ອຸປະກອນເຄື່ອງສົ່ງສັນຍານ,ເຄື່ອງຮັບສັນຍານພາບ ແລະ ສຽງຜ່ານດາວທຽມ ລວມທັງການຝຶກອົບຮົມວິຊາການທາງດ້ານເຕັກນິກໃຫ້ແກ່ວິຊາການລາວເຮົາ, ມູນຄ່າ 230.076 ໂດລາສະລັດ, ຊຶ່ງຖ້າລວມມູນຄ່າທັງໝົດການຊ່ວຍເຫຼືອຂອງ RAPA ໃຫ້ແກ່ວິທະຍຸກະຈາຍສຽງແຫ່ງຊາດລາວ ແມ່ນລວມເປັນ 309.076 ໂດລາ ຫຼື ປະມານ 6,4 ຕື້ກວ່າກີບ.
ຈາກນັ້ນ, ທ່ານ ດຣ. Dr. Jungsu Song, ຮອງປະທານບໍລິຫານ RAPA ໄດ້ມີຄໍາເຫັນວ່າ: ສ. ເກົາຫລີ ແລະລາວ ໄດ້ມີການພົວພັນກັນຄືນໃໝ່ໃນປີ 1995 ເຊິ່ງໄດ້ສຸມໃສ່ການພັດທະນາການຮ່ວມມກັນໃນຫລາຍຂົງເຂດ ເຊັ່ນ: ເສດຖະກິດ, ສັງຄົມ ແລະດ້ານອື່ນໆ ປະເທດລາວ ແມ່ນໜຶ່ງໃນປະເທດຕົ້ນຕໍ ທີ່ຮັບການຊ່ວຍເຫລືອໂຄງການ ODA ຈາກ ສ. ເກົາຫລີ , ໂດຍສະເພາະການຫັນ ໄອທີ ເປັນດີຈີຕອນ ກໍາລັງມີການຂະຫຍາຍຕົວໃນທົ່ວໂລກ ຂ້າພະເຈົ້້າຄິດວ່າການຮ່ວມມືລະຫວ່າງສອງປະເທດເຮົາໃນຂົງເຂດສື່ມວນຊົນ ຕ້ອງເພີ່ມທະວີການຮ່ວມມືດ້ວຍການພັດທະນາເຕັກໂນໂລຊີ ທັນສະໄໝ ແລະການເຊື່ອມໂຍງ ແບບກ້າວກະໂດດ ຂ້າພະເຈົ້າຄິດວ່າພວກເຮົາໄດ້ສໍາເລັດໂຄງການປັບປຸງລະບົບຫ້ອງອັດສຽງ , ພາບອອນລາຍ ແລະລົດຖ່າຍທອດສົ່ງຜ່ານລະບົບດາວທຽມ ແມ່ນມີຄວາມໝາຍຢ່າງໃຫ່ຍຫລວງ ເຊິ່ງເປັນໂຄງການຮ່ວມມືລະຫວ່າງ ວິທະຍຸກະຈາຍສຽງແຫ່ງຊາດລາວ ແລະ ສະມາຄົມເພື່ອການສົ່ງເສີມ ການພັດທະນາວິທະຍຸກະຈາຍສຽງ ແຫ່ງ ສ.ເກົາຫຼີ (RAPA ໃນປີກາຍ ແລະປີນີ້ ເຊິ່ງການຊຸກຍູ້ວິທະຍຸກະຈາຍສຽງແຫ່ງຊາດລາວໃຫ້ພັດທະນາເປັນທັນສະໄໝ ເຮັດໃຫ້ການກະຈາຍສຽງຂອງ ວສລ ມີຄຸນນະພາບດີຂຶ້ນກວ່າເກົ່າ.
ທ່ານ ສຸວັນ ວິໄລແສງ, ຜູ້ອໍານວຍການໃຫຍ່ ວສລ ໄດ້ຕາງໜ້າຄະນະນໍາ ແລະ ພະນັກງານ ວສລ ໄດ້ຂຶ້ນກ່າວຮັບການຊ່ວຍເຫລືອ ແລະ ສະແດງຄວາມຂອບໃຈຢ່າງສູງມາຍັງລັດຖະບານ ແລະ ປະຊາຊົນ ແຫ່ງ ສ.ເກົາຫຼີ ກໍຄື ສະມາຄົມເພຶ່ອການສົ່ງເສີມການພັດທະນາວິທະຍຸກະຈາຍສຽງ ແຫ່ງ ສ.ເກົາຫຼີ ທີ່ໄດ້ໃຫ້ການສະໜັບສະໜູນຊ່ວຍເຫຼືອອັນມີຄຸນຄ່າໃຫ້ແກ່ວິທະຍຸກະຈາຍສຽງແຫ່ງຊາດລາວໃນຄັ້ງນີ້ ຊຶ່ງເປັນການຊ່ວຍເຫລືອສຸດທີ່ມີຄວານໝາຍສໍາຄັນ, ເປັນການປະກອບສ່ວນໃຫ້ແກ່ການປັບປຸງທາງດ້ານວິຊາສະເພາະ, ຍົກລະດັບທາງດ້ານອຸປະກອນເຕັກນິກສູ່ຄຸນນະພາບໃໝ່, ສ້າງຄວາມສາມາດໃໝ່ໃນການຜະລິດລາຍການ, ເຮັດໃຫ້ທຸກກຸ່ມເປົ້າສາມາດເຂົ້າຟັງ ແລະ ເຂົ້າຊົມວິທະຍຸທັງແບບເກົ່າ ແລະ ແບບໃໝ່ໄດ້ ເພາະການໄດ້ນໍາໃຊ້ລົດຖ່າຍທອດສົດ ຫລື OB van ເຂົ້າໃນການລາຍງານຂ່າວກ່ຽວກັບເຫດການຕ່າງໆ ສາມາດເຂົ້າເຖີງຜູ້ຟັງ ແລະ ຜູ້ຊົມໃນທຸກພື້ນທີ່ທົ່ວປະເທດໄດ້ຢ່າງຊັດເຈນ, ວ່ອງໄວ ແລະ ທັນເຫດການກວ່າເກົ່າ.
ພ້ອມນີ້ ທ່ານໄດ້ໃຫ້ຄຳໝັ້ນສັນຍາວ່າ: ວສລ ຈະເອົາໃຈໃສ່ປົກປັກຮັກສາ ແລະ ຄຸ້ມຄອງເຄື່ອງຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນສ.ເກົາຫຼີ ໃນຄັ້ງນີ້ໃຫ້ດີທີ່ສຸດ ແລະ ຈະນຳໃຊ້ໃຫ້ເກີດປະໂຫຍດສູງສຸດ ແລະ ສະ ແດງຄວາມຫວັງວ່າຈະໄດ້ຮັບການສະໜັບສະໜູນຊ່ວຍເຫຼືອຈາກລັດຖະບານ ແຫ່ງ ສ.ເກົາຫລີ ໃນໂອກາດຕໍ່ໄປ.
ໃນພິທີຄັ້ງນີ້ ຍັງໄດ້ມີການມອບໃບຍ້ອງຍໍຂອງກະຊວງຖະແຫລງຂ່າວ, ວັດທະທະນະທໍາ ແລະ ທ່ອງທ່ຽວ ແລະ ຂອງ ວສລ ໃຫ້ແກ່ສະມາຄົມເພື່ອການສົ່ງເສີມການພັດທະນາວິທະຍຸກະຈາຍສຽງ ແຫ່ງ ສ.ເກົາຫຼີ, ພ້ອມນີ້, ຜູ້ເຂົ້າຮ່ວມທັງໝົດໄດ້ຮ່ວມກັນຊົມລົດຖ່າຍທອດ OB van ແລະ ຫ້ອງອັດອອນລາຍ (Online Studio) ທີ່ໄດ້ຮັບການຊ່ວຍເຫລືອຈາກລັດຖະບານ ແຫ່ງ ສ.ເກົາຫລີ ຕື່ມອີກ.
ຂ່າວ: ບຸນຕຽງ
ພາບ: ຄໍາກອງ
May be an image of 11 people, dais and text