ຕອນເຊົ້າມື້ນີ້, ວິທະຍຸກະຈາຍສຽງແຫ່ງຊາດລາວ ຮ່ວມກັບສາມອົງການຈັດຕັ້ງມະຫາຊົນບ້ານຈອມມະນີ ຈັດກິດຈະກຳປູກຕົ້ນໄມ້ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1ມິຖຸນາ ທີ່ເດີນເຄື່ອງສົ່ງຫຼັກ 6 ວິທະຍຸກະຈາຍສຽງແຫ່ງຊາດລາວ ນຳໂດຍທ່ານ ສຸວັນ ວິໄລແສງ ຜູ້ອຳນວຍການໃຫຍ່ວິທະຍຸແຫ່ງຊາດລາວພ້ອມດ້ວຍຄະນະ, ທ່ານ ສົມທອງ ວົງດີ ນາຍບ້ານໆຈອມມະນີ ພ້ອມດ້ວຍຕາງໜ້າສາມອົງການຈັດຕັ້ງມະຫາຊົນແລະປະຊາຊົນບ້ານຈອມມະນີເມືອງໄຊເຊດຖາເຂົ້າຮ່ວມ.
ໂອກາດນີ້ ທ່ານ ສຸວັນ ວິໄລແສງ ຜູ້ອໍານວຍການໃຫຍ່ວິທະຍຸແຫ່ງຊາດລາວໄດ້ກ່າວເຖິງຈຸດປະສົງຂອງການຈັດກິດຈະກຳຄັ້ງນີ້ວ່າ: ເພື່ອປະຕິບັດຕາມທິດຊີ້ນໍາຂອງລັດຖະບານໃນການເພີ່ມພຶ້ນທີ່ສີຂຽວໃຫ້ເນື້ອທີ່ເປົ່າຫວ່າງໃນຂອບເຂດທົ່ວປະເທດເວົ້າລວມ ເວົ້າສະເພາະແມ່ນໃນນະຄອນຫຼວງວຽງຈັນ, ວິທະຍຸກະຈາຍສຽງແຫ່ງຊາດລາວເຫັນໄດ້ເຖິງຄວາມສຳຄັນຂອງການປູກໄມ້ໃຫ້ເປັນປ່າ ເພື່ອທົດແທນຕົ້ນໄມ້ທີ່ຖືກທຳລາຍ ທັງເປັນການປົກປັກຮັກສາສະພາບແວດລ້ອມໃຫ້ມີຄວາມປອດໃສແລະຍືນຍົງ.
ຜູ້ອໍານວຍການໃຫຍ່ວິທະຍຸແຫ່ງຊາດລາວ ໃຫ້ຮູ້ຕື່ມວ່າ: ເບ້ຍໄມ້ທີ່ນຳມາປູກໃນຄັ້ງນີ້ໄດ້ມາຈາກການປະກອບສ່ວນຂອງປະຊາຊົນບ້ານຈອມມະນີ 200 ກວ່າເບ້ຍ ແລະ ຈາກວິທະຍຸກະຈາຍສຽງແຫ່ງຊາດລາວອີກ 50ກວ່າເບ້ຍ. ສ່ວນໃຫຍ່ເປັນໄມ້ໃຫ້ໝາກ ເປັນຕົ້ນ: ຫມາກມ່ວງ, ຫມາກມີ້, ອະໂວກາໂດ້, ໝາກສີດາ ຫມາກລຳໄຍ ແລະອື່ນໆ. ພາຍຫຼັງປູກສຳເລັດແລ້ວຈະໄດ້ມອບໃຫ້ອົງການຈັດຕັ້ງຊາວໜຸ່ມຂອງວິທະຍຸກະຈາຍສຽງແຫ່ງຊາດລາວສືບຕໍ່ບົວລະບັດຮັກສາຕໍ່ໄປ.
ຂ່າວ: ບຸນຖະໜອມ
ພາບ: ຕາລີເຊ້ຍ
