ໃນໄລຍະ 64 ປີຜ່ານມາ ຮອດປັດຈຸບັນ ວິທະຍຸກະຈາຍສຽງແຫ່ງຊາດລາວ ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ, ມີບົດບາດອັນສໍາຄັນ ໃນການເປັນກະບອກສຽງ ອັນແຫລມຄົມ ແກ່ພັກ ແລະ ລັດຖະບານ ໃນການໂຄສະນາເຜີຍແຜ່ ແນວທາງນະໂຍບາຍ ແລະ ຜົນສໍາເລັດ ໃນການນໍາພາ-ຊີ້ນໍາ ຂອງພັກ-ລັດ ໃນແຕ່ລະໄລຍະ, ປຸກລະດົມປະຊາຊົນທຸກຊັ້ນຄົນ ໃຫ້ມີຄວາມສາມັກຄີຮັກແພງ, ມີນໍ້າໃຈຮັກຊາດ, ຮັກບ້ານເກີດເມືອງນອນ ພ້ອມທັງເຂົ້າຮ່ວມ ແລະ ສະໜັບສະໜູນ ການຈັດຕັ້ງຜັນຂະຫຍາຍ ແນວທາງນະໂຍບາຍຂອງພັກ ແລະ ແຜນພັດທະນາ ເສດຖະກິດ-ສັງຄົມຂອງລັດ.
ທ່ານ ສຸວັນ ວິໄລແສງ ຜູ້ອໍານວຍການໃຫຍ່ ວິທະຍຸກະຈາຍສຽງແຫ່ງຊາດລາວ ໃຫ້ສຳພາດຕໍ່ສື່ມວນຊົນວ່າ : ເນື່ອງໃນໂອກາດວັນສື່ມວນຊົນ ແລະ ການພິມຈໍາໜ່າຍ ຄົບຮອບ 74 ປີ (13/8/1950-13/8/2024) ວ່າ: ວິທະຍຸກະຈາຍສຽງແຫ່ງຊາດລາວ ໄດ້ສ້າງຕັ້ງຂຶ້ນໃນວັນທີ 13 ສິງຫາ 1960, ເປັນວັນດຽວກັນກັບວັນສ້າງຕັ້ງສື່ມວນຊົນ ແລະ ການພິມຈໍາໜ່າຍ ເຊິ່ງ ໃນປີນີ້ ມີອາຍຸຄົບຮອບ 64 ປີ, ການເຕີບໃຫຍ່ຂະຫຍາຍຕົວ ຂອງວິທະຍຸກະຈາຍສຽງແຫ່ງຊາດລາວ ໄດ້ຕິດພັນກັບປະຫວັດສາດຂອງຊາດ, ຂອງພັກ, ຂອງການປະຕິວັດ ແລະ ປະຊາຊົນລາວບັນດາເຜົ່າ ບໍ່ວ່າໃນສະໄໝຕໍ່ສູ້ປົດປ່ອຍຊາດ ກໍຄືໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ວິທະຍຸກະຈາຍສຽງແຫ່ງຊາດ ຍັງຮັກສາໄດ້ບົດບາດອັນສໍາຄັນ ໃນການເປັນກະບອກສຽງອັນແຫລມຄົມຂອງພັກ ແລະ ລັດ ໃນການໂຄສະນາເຜີຍແຜ່ແນວທາງນະໂຍບາຍ ຂອງພັກ-ລັດຖະບານ ວາງອອກ ໃນແຕ່ລະໄລຍະ ພ້ອມທັງເຮັດໜ້າທີ່ໃນການອະທິບາຍ, ຊີ້ແຈງ ແລະ ຕອບໂຕ້ ຕາມກໍລະນີ ຕໍ່ກຸ່ມຄົນບໍ່ດີ ທີ່ຫວັງມ້າງເພທໍາລາຍລະບອບໃໝ່ຂອງພວກເຮົາ.
ປັດຈຸບັນ, ວິທະຍຸກະຈາຍສຽງແຫ່ງຊາດລາວ ໄດ້ມີການເຕີບໃຫຍ່ຂະຫຍາຍຕົວ ທັງປະລິມານ ແລະ ຄຸນນະພາບ ໄດ້ເປັນກະບອກສຽງອັນສຳຄັນ ໃນການໂຄສະນາເຜີຍແຜ່ ຂໍ້ມູນຂ່າວສານຕ່າງໆ ທັງຢູ່ ພາຍໃນ ແລະ ຕ່າງປະເທດ ໃຫ້ສັງຄົມໄດ້ຮັບຮູ້ຢ່າງທົ່ວເຖິງ ຜ່ານການອອກອາກາດຜ່ານ 4 ລະບົບ ຄື: AM, SW, FM ແລະ Radio Internet ຊຶ່ງແຕ່ລະວັນອອກອາກາດ 52 ຊົ່ວໂມງ, ມີ 98 ລາຍການ, ມີລາຍການຢູ່ໃນຄວາມຮັບຜິດຊອບທັງໝົດ 148 ລາຍການ ໃນນີ້, ວິທະຍຸກະຈາຍສຽງແຫ່ງຊາດລາວ ຜະລິດເອງ 107 ລາຍການ, ຄູ່ຮ່ວມສັນຍາຜະລິດ 4 ລາຍການ, ຜູ້ເຊົ່າເວລາຜະລິດ 19 ລາຍການ ແລະ ພາກສ່ວນກະຊວງ, ອົງການຈັດຕັ້ງອື່ນໆຜະລິດ 18 ລາຍການ. ໃນຊຸມປີຜ່ານມາ, ວິທະຍຸກະຈາຍສຽງແຫ່ງຊາດ ໄດ້ຮັບການປັບປຸງ, ປ່ຽນຖ່າຍ ອຸປະກອນເຕັກນິກໃໝ່ ຈໍານວນໜຶ່ງ ເພື່ອຕອບສະໜອງ ແກ່ການຜະລິດຂ່າວ, ຜະລິດລາຍການ, ລະບົບສະຕູດີໂອ ແລະ ລະບົບຄວບຄຸມການອອກອາກາດ ຈາກລະບົບອານາລອກ ເປັນດິຈີຕອນ ຕາມທ່າອ່ຽງລວມຂອງພາກພື້ນ ແລະ ສາກົນ, ໄດ້ປັບປຸງເນື້ອໃນ ແລະ ຮູບແບບລາຍການ ໃຫ້ມີເນື້ອຫາສາລະ, ມີຄວາມຫລາກຫລາຍ ເພື່ອດຶງດູດຜູ້ຟັງໃຫ້ມາຕິດຕາມ ແລະ ຊົມລາຍການທາງວິທະຍຸໃຫ້ຫລາຍຂຶ້ນ, ໄດ້ເປີດໂອກາດໃຫ້ພາກເອກະຊົນ, ນິຕິບຸກຄົນ ເຂົ້າມາມີສ່ວນຮ່ວມ ໃນການຜະລິດ ແລະ ສ້າງສັນລາຍການ ນໍາວິທະຍຸ ນັບມື້ຫລາຍຂຶ້ນ. ພ້ອມນີ້, ຍັງໄດ້ຊຸກຍູ້ສົ່ງເສີມ ໃຫ້ນັກຈັດລາຍການ ຈັດລາຍການສົດ ແລະ ອອກອາກາດ ຄຽງຄູ່ກັນ ທັງແບບໄດ້ຍິນແຕ່ສຽງ (ຮູບແບບເກົ່າ) ແລະ ມີທັງພາບ ແລະ ສຽງ (ຮູບແບບໃໝ່) ຜ່ານລະບົບອອນລາຍ ຜ່ານທາງເວັບໄຊ ຂອງວິທະຍຸກະຈາຍສຽງແຫ່ງຊາດລາວ ແລະ ເຟສບຸກ.
ໂອກາດນີ້, ທ່ານ ສຸວັນ ວິໄລແສງ ຍັງໄດ້ຮຽກຮ້ອງ ໃຫ້ສື່ມວນຊົນລາວ ທຸກຂະແໜງການ ພ້ອມກັນ ສືບຕໍ່ເຮັດໜ້າທີ່ ເປັນກະບອກສຽງທີ່ສໍາຄັນໃຫ້ພັກ-ລັດ ແລະ ປະຊາຊົນລາວບັນດາເຜົ່າ ເພື່ອໂຄສະນາແນວທາງນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ລະບຽບກົດໝາຍ ຂອງລັດວາງອອກ ໃຫ້ດີຂຶ້ນກວ່າເກົ່າ, ພ້ອມທັງເປັນເວທີໃຫ້ຂໍ້ມູນຂ່າວສານ, ສາລະໜ້າຮູ້ ແລະ ສາລະບັນເທິງ, ສ້າງຄວາມສາມັກຄີປອງດອງ, ກະຕຸກຊຸກຍູ້ ໃຫ້ທຸກຊັ້ນຄົນໃນສັງຄົມ ປະຕິບັດລະບຽບກົດໝາຍ ປະກອບສ່ວນເປັນກໍາລັງແຮງ ສ້າງສາພັດທະນາປະເທດຊາດ. ພ້ອມກັນນີ້, ທັງເນື້ອໃນ ແລະ ຮູບແບບການໂຄສະນາຂອງສື່ມວນຊົນ ຕ້ອງໄດ້ປັບປຸງໃຫ້ມີຄວາມຫລາກຫລາຍ ແລະ ດຶງດູດໃຈຜູ້ຟັງ, ຜູ້ຊົມ ແລະ ຜູ້ອ່ານ ຂຶ້ນກວ່າເກົ່າ ໄປພ້ອມໆກັບການປັບປຸງ ແລະ ພັດທະນາລະບົບເຕັກໂນໂລຊີແບບໃໝ່, ຫັນເປັນທັນສະໄໝ ແລະ ຍົກລະດັບບຸກຄະລາກອນສື່ ໃຫ້ມີຄຸນນະພາບສູງຂຶ້ນ ທັງສາມາດວິເຄາະ-ວິໄຈ, ຕອບໂຕ້ ແລະ ວິຈານບັນຫາຕ່າງໆ ໃຫ້ສັງຄົມໄດ້ຮັບຮູ້ ຕາມ 4 ລັກສະນະຂອງສື່ມວນຊົນລາວ ຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນໍາ ແລະ ລັກສະນະຕໍ່ສູ້.
