ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ວິທະຍຸກະຈາຍສຽງ ກັບການປັບຕົວໃນທ່າມກາງກະແສຄວາມຕ້ອງການສື່ໃໝ່ຂອງສັງຄົມ ທີ່ນັບມື້ສູງຂຶ້ນ

ອົງການການສຶກສາ, ວິທະຍາສາດ ແລະ ວັດທະນະທຳຂອງສະຫະປະ ຊາຊາດ ຫຼື UNESCO ໄດ້ກໍານົດເອົາວັນທີ 13 ກຸມພາຂອງທຸກປີເປັນວັນວິທະຍຸໂລກ ແລະ ໄດ້ເລີ່ມຈັດກິດຈະກໍາເພື່ອສະເຫລີມສະຫລອງວັນສໍາຄັນນີ້ນັບແຕ່ປີ 2012 ເປັນຕົ້ນມາ ໂດຍກໍານົດຫົວຂໍ້ໃນການສະເຫລີມສະຫລອງທີ່ແຕກຕ່າງກັນໃນແຕ່ລະປີ. ສໍາລັບການສະເຫລີມສະຫລອງວັນວິທະຍຸໂລກປີນີ້ ຊຶ່ງເປັນປີທີ 9 ພາຍໃນຕ້ຫົວຂໍ້ “ ວິທະຍຸກະຈາຍສຽງກະຈາຍສຽງ ແລະ ຄວາມຫລາກຫລາຍ ”. ວິທະຍຸ ຖືເປັນສື່ເກົ່າແກ່ຂອງໂລກທີ່ມີປະຫວັດຄວາມເປັນມາຫລາຍກ່ວາ 15 ທົດສະວັດແລ້ວ. ເວົ້າໄດ້ວ່າ ເມື່ອກ່ອນມີບົດບາດສໍາຄັນ ແລະ ມີຜູ້ຕິດຕາມຮັບຟັງຢ່າງຫລວງຫລາຍ ເພາະເປັນສື່ທີ່ວ່ອງ ໄວ ແລະ ເຂົ້າເຖີງຜູ້ຟັງໄດ້ຢ່າງກ້ວາງຂວາງກ່ວາສື່ອື່ນ. ແຕ່ມາຮອດປັດຈຸບັນ ສັງຄົມໂລກພວມຢູ່ໃນຍຸກໂລກກາພິວັດທີ່ເຕັມໄປດ້ວຍເຕັກໂນໂລຊີການສື່ສານທີ່ທັນສະໄໝ ເຮັດໃຫ້ການສົ່ງຂໍ້ມູນຂ່າວສານມີຄວາມວ່ອງໄວ ແລະ ບໍ່ມີເຂດແດນ ໂດຍມີສື່ສັງຄົມອອນລາຍເປັນຕົວຂັບເຄື່ອນສໍາຄັນທີ່ເຮັດໃຫ້ຂໍ້ມູນຂ່າວສານໄດ້ຮັບການເຜີຍແຜ່ຢ່າງວ່ອງໄວທັນການ ແລະ ກ້ວາງຂວາງໃນທົ່ວໂລກ. ການເຂົ້າມາຂອງສື່ສັງຄົມອອນລາຍ ສົ່ງຜົນກະທົບໂດຍກົງຕໍ່ສື່ວິທະຍຸທີ່ເປັນສື່ດັ່ງເດີມ, ເຮັດໃຫ້ວິທະຍຸກະຈາຍສຽງຫລາຍແຫ່ງທົ່ວໂລກຕ້ອງປັບປ່ຽນຮູບແບບ ແລະ ຊ່ອງທາງເພື່ອນໍາສະເໜີ ລາຍການ ກໍ່ຄື ເນື້ອຫາສາລະເພື່ອຄວາມຢູ່ລອດ, ໃນນີ້ ແມັກຊິກ ເປັນປະເທດທໍາອິດທີ່ໄດ້ປິດວິທະຍຸ FM ແລ້ວຫັນມາເປີດເປັນວິທະຍຸດິຈິຕອລນັບແຕ່ປີ 2017 ເປັນຕົ້ນມາ ເພື່ອປະຢັດຕົ້ນທຶນ ແລະ ຄຸນນະພາບສຽງທີ່ດີກ່ວາ. ນອກຈາກນີ້ ມີຫລາຍສະຖານີວິທະຍຸທັງຢູ່ປະເທດໃກ້ຄຽງຂອງລາວ ແລະ ທົ່ວໂລກຕ້ອງປິດຕົວລົງເນື່ອງຈາກຂາດຕົ້ນທຶນເພື່ອບໍລິຫານສະຖານີ ຍ້ອນການໂຄສະນາສິນຄ້າຜ່ານສະຖານີຫລຸດລົງຢ່າງຕໍ່ເນື່ອງ. ສໍາລັບສື່ວິທະຍຸຢູ່ລາວ ບໍ່ອາດຫລີກຫລ່ຽງໄດ້ກັບຜົນກະທົບທີ່ເກີດຂຶ້ນຈາກການເຂົ້າມາຂອງສື່ສັງຄົມອອນລາຍ ເນື່ອງຈາກຈໍານວນຜູ້ຟັງ ແລະ ການໂຄສະນາສິນຄ້າຜ່ານວິທະຍຸກະຈາຍສຽງມີທ່າອ່ຽງລຸດລົງຢ່າງຕໍ່ເນື່ອງ ຍ້ອນສັງຄົມຫັນໄປໂຄສະນາສິນຄ້າຜ່ານສື່ສັງຄົມອອນລາຍນັບມື້ຫລາຍຂຶ້ນ ເຮັດໃຫ້ສື່ວິທະຍຸຂອງລາວ ໂດຍສະເພາະວິທະຍຸກະຈາຍສຽງແຫ່ງຊາດ ແລະ ອີກຫລາຍສະຖານີວິທະ ຍຸທັງຢູ່ສູນກາງ ແລະ ທ້ອງຖິ່ນຕ້ອງຮີບຮ້ອນປັບຕົວເພື່ອຄວາມຢູ່ລອດ ດ້ວຍການນໍາໃຊ້ຍຸດທະສາດ “ໜາມປັກ ເອົາໜາມບົ່ງ” ໂດຍຫັນປ່ຽນຈາກເມື່ອກ່ອນທີ່ເຜີຍແຜ່ແຕ່ສຽງພຽງຢ່າງດຽວ ມາເປັນການຜະລິດຂ່າວເປັນຕົວໜັງສື ແລະ ຄລິປວີດີໂອເຜີຍແຜ່ຜ່ານເພຈເຟສບຸກ, ເວັບໄຊ, ຢູທູບ ແລະ ແອັບພີ ເຄເຊິ່ນອື່ນຯ ເຮັດໃຫ້ວິທະຍຸກາຍເປັນທັງໜັງສືພິມ ແລະ ໂທລະພາບໄປພ້ອມກັນ ເພື່ອໃຫ້ການເຜີຍ ແຜ່ຂໍ້ມູນຂ່າວສານຕ່າງຯ ສູ່ສັງຄົມວ່ອງໄວ ແລະ ທົ່ວເຖີງກ່ວາເກົ່າ. ທ່ານ ໂພສີ ແກ້ວມະນີວົງ, ຜູ້ອຳນວຍການໃຫຍ່ວິທະຍຸກະຈາຍສຽງແຫ່ງຊາດລາວ ໃຫ້ສໍພາດວ່າ: ວິທະຍຸກະຈາຍສຽງແຫ່ງຊາດ ໄດ້ປັບປຸງຕົວ ເລີ່ມຈາກການປັບປຸງດ້ານເນື້ອໃນ ແລະ ເຕັກນິກການກະຈາຍສຽງ,ຈາກນັ້ນໄດ້ຫັນມາເຜີຍແຜ່ຂໍ້ມູນຂ່າວສານຜ່ານສື່ສັງຄົມອອນລາຍຫລາຍຂຶ້ນ, ພ້ອມນີ້ໄດ້ພົວພັນຮ່ວມມືກັບສາກົນ ເພື່ອພັດ ທະນາດ້ານບຸກຄະລາກອນ ແລະ ດ້ານເຕັກນິກໃຫ້ດີຂຶ້ນ. ປັດຈຸບັນ ຢູ່ລາວມີວິທະຍຸກະຈາຍສຽງ 70 ກ່ວາແຫ່ງ, ໃນນີ້ຢູ່ສູນກາງ 3 ແຫ່ງ ເຫລືອນັ້ນແມ່ນຢູ່ທ້ອງຖິ່ນ.

ແນ່ນອນວ່າວິທະຍຸກະຈາຍສຽງທຸກແຫ່ງ ພວມປະສົບກັບສິ່ງທ້າທາຍບໍ່ໜ້ອຍຈາກການເຂົ້າມາຂອງສື່ສັງຄົມອອນລາຍ. ທ່ານ ປິ່ນ ປາດຖະໜາ ພັນທະມາລີ, ຫົວໜ້າກົມສື່ມວນຊົນ, ກະ ຊວງ ຖວທ ໃຫ້ສໍາພາດວ່າ: ເພື່ອໃຫ້ສື່ວິທະຍຸ ກໍ່ຄື ສື່ດັ້ງເດີມອື່ນຯ ຢູ່ລາວສາມາດແຂ່ງຂັນກັບສື່ສັງຄົມອອນລາຍໄດ້ ທຸກສື່ຕ້ອງປັບປຸງເນື້ອຫາສາລະໃຫ້ເລິກເຊິ່ງ ແລະ ໜ້າສົນໃຈ, ພ້ອມທັງນໍາໃຊ້ເຕັກນິກທີ່ທັນສະໄໝ, ໄປພ້ອມຯ ກັບການຫັນມານໍາໃຊ້ສື່ອອນລາຍເຂົ້າໃນການເຜີຍແຜ່ຂໍ້ມູນຂ່າວສານເພື່ອຄວາມວ່ອງໄວທັນການ ແລະ ກ້ວາງຂວາງກ່ວາເກົ່າ. ປັດຈຸບັນ ທົ່ວໂລກພວມກ້າວເຂົ້າສູ່ຍຸກ 4.0 ຊຶ່ງເປັນຍຸກທີ່ເຕັໂນໂລຊີມາແຮງສຸດໆ. ແນ່ນອນວ່າຍຸກ 4.0 ນີ້ຈະເຮັດໃຫ້ການສົ່ງຂໍ້ມູນຂ່າວສານຂອງບັນດາສື່ສັງຄົມອອນລາຍນັບມື້ທັນສະໄໝ ແລະ ວ່ອງໄວກ່ວາເກົ່າ ແລະ ຈະສົ່ງຜົນກະທົບໂດຍກົງຕໍ່ສື່ວິທະຍຸ ກໍ່ຄື ສື່ດັ້ງເດີມອື່ນຯ ນັບມື້ເພີ່ມຂຶ້ນເໝືອນເງົາຕາມຕົວ. ດັ່ງນັ້ນ ໃນຕໍ່ໜ້າວິທະຍຸກະຈາຍສຽງແຕ່ລະສະຖານີທັງຢູ່ສູນກາງ ແລະ ທ້ອງຖິ່ນ ຕ້ອງເພີ່ມຄວາມເອົາ ໃຈໃສ່ພັດທະນາອົງກອນຂອງຕົນນັບທັງທາງດ້ານເນື້ອໃນ, ເຕັກນິກ ແລະ ອື່ນຯ, ການຂຽນຂ່າວຕ້ອງເຈາະເລິກເຕັມໄປດ້ວຍຄຸນນະພາບ ແລະ ມີຫົວຄິດປະດິດສ້າງກ່ວາເກົ່າ, ສິ່ງສໍາຄັນຕ້ອງຫັນມານໍາໃຊ້ສື່ສັງຄົມອອນລາຍເຂົ້າໃນການນໍາສະເໜີຂໍ້ມູນຂ່າວສານຂອງແຕ່ລະລາຍການຂອງສະຖານີ ເພື່ອຄວາມວ່ອງໄວທັນການ ແລະ ກ້ວາງຂວາງ ແນໃສ່ດຶງດູດໃຈຜູ້ຟັງ, ຜູ້ຊົມ ແລະ ຜູ້ອ່ານໃຫ້ນັບມື້ເພີ່ມຂຶ້ນເລື້ອຍຯ. ຖ້າເຮັດໄດ້ຄືແນວນີ້ ຈະເຮັດໃຫ້ສື່ວິທະຍຸສາມາດແຂ່ງຂັນກັບສື່ສັງຄົມອອນລາຍ ແລະ ສື່ອື່ນຯ ໃນສັງຄົມໄດ້ ແລະ ຈະເປັນການພິສູດໃຫ້ສັງຄົມຮັບຮູ້ວ່າວິທະຍຸກະຈາຍ ສຽງຈະບໍ່ມີວັນຕາຍ ແຕ່ນັບມື້ເຕີບໃຫຍ່ຂະຫຍາຍຕົວ ແລະຄົງຕົວຢູ່ໃນສັງຄົມ, ພ້ອມທັງ ກາຍ ເປັນປາກກະບອກສຽງອັນແຫລມຄົມຂອງພັກ ແລະ ລັດຖະບານຕະຫລອດໄປ.

ໂດຍ: ບຸນຕຽງ ຈັນທະວົງ