ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສື່ຕ່າງປະເທດຫຼາຍສຳນັກມີຄວາມເຫັນວ່າ, ການຂົນສົ່ງຜູ້ໂດຍສານໃນໄລຍະບຸນກຸດຈີນຖືວ່າເປັນ “ການເຄື່ອນຍ້າຍປະຊາກອນປະຈຳປີທີ່ຂະໜາດໃຫຍ່ທີ່ສຸດໃນໂລກ”. ການຂົນສົ່ງໃນໄລຍະບຸນກຸດຈີນປີນີ້ ແມ່ນເລີ່ມຈາກວັນທີ 26 ມັງກອນຮອດວັນທີ 5 ມີນາ, ເຊິ່ງຈະດຳເນີນໄປເປັນເວລາ 40 ວັນ. ພາກສ່ວນຄົມມະນາຄົມຂົນສົ່ງຈີນຄາດຄະເນວ່າ, ໃນໄລຍະນີ້ ໃນທົ່ວປະເທດຈີນຈະມີຜູ້ໂດຍສານ 9 ຕື້ເທື່ອຄົນເດີນທາງຂ້າມເຂດແຄວ້ນເຊິ່ງໄດ້ສ້າງສະຖິຕິສູງສຸດຄັ້ງໃໝ່, ເກືອບເປັນ 2ເທົ່າຂອງປີ 2023. ໃນນັ້ນ, ປະລິມານຂາຍປີ້ລົດໄຟຫຼາຍທີ່ສຸດ ເຊິ່ງບັນລຸເຖິງ 1.500 ປີ້ຕໍ່ວິນາທີ. ຂ່າວສານລອຍເຕີຂອງອັງກິດເຫັນວ່າ, ການຂົນສົ່ງໃນໄລຍະພັກບຸນກຸດຈີນບໍ່ພຽງແຕ່ໄດ້ສະແດງໃຫ້ເຫັນເຖິງປະລິມານຂົນສົ່ງຜູ້ໂດຍສານທີ່ເພີ່ມຂຶ້ນຢ່າງວ່ອງໄວຂອງຈີນເທົ່ານັ້ນ, ແຕ່ໄດ້ສະແດງໃຫ້ເຫັນເຖິງຄວາມໝັ້ນໃຈ ແລະຄວາມມີຊີວິດຊີວາຈາກການຟື້ນຟູຂອງເສດຖະກິດຈີນ.
ຈຳນວນຜູ້ໂດຍສານໃນໄລຍະພັກບຸນກຸດຈີນໄດ້ສ້າງສະຖິຕິສູງສຸດຄັ້ງໃໝ່, ຮູບແບບການເດີນທາງກໍໄດ້ມີການປ່ຽນແປງບໍ່ໜ້ອຍ. ຂໍ້ມູນສະແດງໃຫ້ເຫັນວ່າ, ໃນໄລຍະນີ້ ພົນລະເມືອງຈີນເກືອບ 80% ເລືອກໃຊ້ການເດີນທາງດ້ວຍລົດສ່ວນຕົວ, ການສົ່ງເສີມແນວຄວາມຄິດທີ່ເດີນທາງແບບສີຂຽວ ເຮັດໃຫ້ຫຼາຍຄົນເລືອກການຂັບລົດພະລັງງານໃໝ່. ພາຍໃຕ້ການຍູ້ໜູນຈາກ “ການຜະລິດແບບອັດສະລິຍະຂອງຈີນ”, ເຮືອບິນໂດຍສານຂະໜາດໃຫຍ່ C919 ຈຳນວນ 4 ລຳໄດ້ປະຕິບັດພາລະກິດການຂົນສົ່ງເປັນຄັ້ງທຳອິດໃນການຂົນສົ່ງໄລຍະບຸນກຸດຈີນ, ເຮືອສຳລານຂະໜາດໃຫຍ່ລຳທຳອິດຄື “Adora Magic City” ທີ່ຈີນຜະລິດເອງ ກໍຈະໃຫ້ການບໍລິການໃນໄລຍະນີ້, ເຊິ່ງໄດ້ສະໜອງທາງເລືອກເພີ່ມເຕີມໃຫ້ແກ່ການອອກເດີນທາງຂອງປະຊາຊົນຈີນ.
ຈາກຄວາມນິຍົມດ້ານການທ່ອງທ່ຽວຮອດກະແສການບໍລິໂພກ, ຈາກຊຸມເສັ້ນທາງຄົມມະນາຄົມທີ່ຟົດຟື້ນຮອດຕະຫຼາດທີ່ມີຄົນທຽວໄປມາຢ່າງບໍ່ຂາດສາຍ, , ຄວາມຈະເລີນຮຸ່ງເຮືອງໃນການຂົນສົ່ງຜູ້ໂດຍສານໃນໄລຍະບຸນກຸດຈີນ ໄດ້ສະແດງໃຫ້ເຫັນວ່າການພົວພັນດ້ານເສດຖະກິດລະຫວ່າງຕົວເມືອງກັບຊົນນະບົດ ກໍຄືລະຫວ່າງທ້ອງຖິ່ນຕ່າງໆຂອງຈີນນັບມື້ນັບແໜ້ນແຟ້ນຍິ່ງຂຶ້ນ,ເຊິ່ງໄດ້ສ່ອງແສງໃຫ້ເຫັນເຖິງຄວາມປາຖະໜາຂອງປະຊາຊົນຈີນທີ່ໃຝ່ຝັນຫາຊີວິດການເປັນຢູ່ອັນດີງາມ.