ວຽກງານໂທລະຄົມມະນາຄົມຂອງລາວໄດ້ຮັບການພັດທະນາຢ່າງຕໍ່ເນື່ອງ

ໃນບົດຄໍາເຫັນຂອງ ທ່ານ ບໍ່ວຽງຄໍາ ວົງດາລາ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ ໃນໂອ ກາດວັນໂທລະຄົມມະນາຄົມ ແລະ ຂໍ້ມູນຂ່າວສານ ສາກົນ ຄົບຮອບ 159 ປີ (17 ພຶດສະພາ 1865 – 17 ພຶດສະພາ 2024) ຍົກໃຫ້ເຫັນວ່າ: ໃນຊຸມປີຜ່ານມາ ວຽກ ງານໂທລະຄົມມະນາຄົມ, ອິນເຕີເນັດ, ເຕັກໂນໂລຊີດິຈິຕອນ ແລະ ນະວັດຕະກໍາ ຂອງ ສປປ ລາວ ໄດ້ມີການເຄື່ອນໄຫວ ແລະ ພັດທະນາຂຶ້ນຢ່າງຕັ້ງໜ້າ ຮອດປັດຈຸ ບັນນີ້ ຢູ່ປະເທດເຮົາສາມາດຂະຫຍາຍເຄືອຂ່າຍສາຍສົ່ງດ້ວຍສາຍແກ້ວໃຍແສງ (Optic Fiber) ໃນທົ່ວປະເທດ ໄດ້ 98.524 ກິໂລແມັດ ເຊື່ອມໂຍງທຸກແຂວງທຸກເມືອງ ແລະ ບ້ານຈຳນວນຫຼາຍ.

ມາຮອດທ້າຍປີ 2023 ສປປ ລາວ ມີຈຸດເຊື່ອມຕໍ່ສາຍສົ່ງກັບຕ່າງປະເທດ ຈຳ ນວນ 18 ຈຸດ ໃນນັ້ນເຊື່ອມຕໍ່ກັບ: ໄທ 06 ຈຸດ, ຫວຽດນາມ 05 ຈຸດ, ກຳປູເຈຍ 02 ຈຸດ, ມຽນມາ 02 ຈຸດ ແລະ ສປ ຈີນ 03 ຈຸດ. ສັນຍານໂທລະສັບມືຖືຄວມຄຸມໄດ້ 18 ແຂວງ, 148 ເມືອງ ແລະ 8.245 ບ້ານ ກວມເອົາ 97% ຂອງຈໍານວນບ້ານທັງໝົດ ໃນນີ້ ແຍກເປັນລະບົບ 3G ກວມ 85%,4G ກວມເອົາ 76% ແລະ ໃນຕົ້ນປີ 2024 ໄດ້ເປີດໃຫ້ບໍລິການອິນເຕີເນັດຄວາມໄວສູງດ້ວຍລະບົບ 5G ໃນນະຄອນຫຼວງວຽງ ຈັນ, ແຂວງຫຼວງພະບາງ ແລະ ແຂວງບໍ່ແກ້ວ.

ປັດຈຸບັນມີຜູ້ລົງທະບຽນນໍາໃຊ້ໂທລະສັບມືຖື 6.113.455 ເລກໝາຍ ເທົ່າກັບ 100% ຂອງແຜນການ, ແຜນການ 6,5 ລ້ານເລກໝາຍ ແລະ ລົງທະບຽນນໍາໃຊ້ອິນເຕີເນັດ, ລະບົບມີສາຍ ແລະ ຜ່ານລະບົບມືຖື ທັງໝົດ 4.614.752 ບັນຊີ ເທົ່າກັບ 96% ຂອງແຜນການ, ແຜນການ 4,7 ລ້ານ ບັນຊີ. ປັດຈຸບັນນີ້ ມີຜູ້ໃຫ້ບໍລິການໂທລະຄົມມະນາຄົມ ຈຳນວນ 5 ບໍລິສັດ ແລະ ຜູ້ໃຫ້ບໍລິການອິນເຕີເນັດປະເພດ I ຈໍານວນ 10 ບໍລິສັດປະເພດ II ຈໍານວນ 3 ບໍລິສັດ, ປະເພດ III ຈໍານວນ 13 ບໍລິສັດ. ປີ 2023 ບັນດາຫົວໜ່ວຍທຸລະກິດເຫຼົ່ານັ້ນ ສາມາດສ້າງລາຍຮັບໄດ້ 5.021 ຕື້ກວ່າກີບ, ມອບພັນທະໃຫ້ລັດ 391,63 ຕື້ກວ່າກີບ.

#ຂ່າວອອນລາຍ, #ວສລ