ໃນລະຫວ່າງວັນທີ 14-15 ພະຈິກ 2020 ທ່ານ ວັນໄຊ ຫຼວງໄຊ ແລະ ທ່ານ ນິຄົມ ພົມມະຈັນ ນຳພາທີມວຽງ ຈັນ ທີມງານ ວຽງຈັນ ເອັນດູໂລ ພ້ອມດ້ວຍທີມງານລວມເພື່ອນໄຊຍະບູລີ ລະດົມນໍ້າໃຈນຳເອົາບັນດາອຸປະກອນການສຶກສາຈຳນວນຫຼາຍລາຍການ ພ້ອມດ້ວຍເຄື່ອງອຸປະ ໂພກ-ບໍລິໂພກ, ເຄື່ອງກັນໜາວ ແລະ ອື່ນໆ ລວມມູນຄ່າ 16 ລ້ານກວ່າກີບ ນຳໄປຊ່ວຍເຫຼືອໃຫ້ປະຊາຊົນຊາວບ້ານສະເຂດ ແລະ ໂຮງຮຽນປະຖົມສຶກສາສົມບູນ ບ້ານສະເຂດ ເມືອງໄຊສະຖານ ແຂວງໄຊຍະບູລີ ໃຫ້ກຽດຕ້ອນຮັບຢ່າງອົບອຸ່ນຂອງທ່ານ ສີສະໝອນ ນາມວົງ ເລຂາພັກເມືອງ, ເຈົ້າເມືອງໄຊສະຖານ ແລະ ທ່ານ ບຸນ ວົງຫຼວງ ຜູ້ອຳນວຍ ການໂຮງຮຽນປະຖົມສຶກສາ ບ້ານສະເຂດ ພ້ອມດ້ວຍບັນດາອຳນາດການປົກຄອງເມືອງ ແລະ ບ້ານ ພະນັກງານ, ຄູອາຈານ ແລະ ນ້ອງນັກຮຽນ ຕະຫຼອດຮອດພໍ່ແມ່ປະຊາ ຊົນເຂດບ້ານດັ່ງກ່າວເຂົ້າຮ່ວມເປັນສັກຂີພິຍານຢ່າງຫຼວງ ຫຼາຍ.

ທ່ານ ນິຄົມ ພົມມະຈັນ ລາຍງານໃຫ້ຮູ້ວ່າ: ການປະກອບສ່ວນຊ່ວຍເຫຼືອໂຮງຮຽນປະຖົມສຶກສາບ້ານສະເຂດ ໃນຄັ້ງນີ້ ເປັນຄວາມຕ້ອງການຂອງ 2 ທີມງານພວກເຮົາ ກໍຄື ທີມງານວຽງຈັນ ເອັນດູໂລ ແລະ ທີມງານລວມເພື່ອນໄຊຍະບູລີ ພ້ອມທີ່ຈະປະກອບສ່ວນຊ່ວຍເຫຼືອດ້ວຍຄວາມສະໝັກໃຈ ເພື່ອສົ່ງເສີມການສຶກສາ ແລະ ຊຸກຍູ້ທາງດ້ານວັດຖຸອຸປະກອນການສຶກສາ ແລະ ເຄື່ອງນຸ່ງຮົ່ມຈຳນວນໜຶ່ງ ເພື່ອສູ້ກັບໄພໜາວ ໃຫ້ແກ່ນ້ອງນັກຮຽນ ແລະ ຄອບ ຄົວປະຊາຊົນທີ່ຂາດເຂີນສາມາດນຳໃຊ້ເຄື່ອງທີ່ດີເຂົ້າໃນຊີວິດປະຈຳວັນຢ່າງມີຄວາມສະດວກສະບາຍ ເວົ້າລວມ, ເວົ້າສະເພາະແມ່ນສ້າງໂອກາດໃຫ້ນ້ອງນັກຮຽນ ໄດ້ມີອຸປະກອນການຮຽນທີ້ດີ ຄືກັບເດັກນ້ອຍໃນເມືອງຫຼວງໄດ້ນຳໃຊ້ກັນ ເພື່ອກາຍເປັນຜູ້ໃຫຍ່ໃນມື້ໜ້າ. ພວກເຮົາໃຫ້ຄຳໝັ້ນສັນວ່າ ຈະສືບຕໍ່ນຳເອົາເຄື່ອງຕ່າງໆໄປຊ່ວຍເຫຼືອພໍ່ແມ່ປະຊາຊົນທີ່ຫ່າງໄກສອກຫຼີກຕື່ມອີກ ເໝືອນດັ່ງທີ່ພວກເຮົາໄດ້ປະຕິບັດໃນແຕ່ລະປີຜ່ານໆມາ.

Cr: ສົງການ

Loading...