ຈາກກໍລະນີທີ່ມີສື່ສັງຄົມອອນລາຍເຜີຍແຜ່ຂ່າວໃນວັນທີ 14 ມີນາ 2024 ນີ້ວ່າມີປະຊາຊົນລາຍງານມີໂຮງງານຜະລິດແປ້ງມັນ ຕົ້ນແຫ່ງໜຶ່ງທີ່ບ້ານນ້ຳຊົ້ງ, ເມືອງປາກລາຍ, ແຂວງໄຊຍະບູລີ ປ່ອຍນໍ້າເປື້ອນອອກຈາກໂຮງງານລົງສູ່ແມ່ນ້ຳຂອງ ເຮັດໃຫ້ມີກິ່ນ ເໝັນ, ນ້ຳຂຸ້ນ ແລະ ນ້ຳຜິດປົກກະຕິຈາກເມື່ອກ່ອນ.
ຕໍ່ຂ່າວດັ່ງກ່າວ, ທ່ານ ບຸນຫລາຍ ວົງດາລາ, ວ່າການເຈົ້າເມືອງປາກລາຍ ໃຫ້ສໍາພາດຕໍ່ນັກຂ່າວວິທະຍຸກະຈາຍສຽງແຫ່ງຊາດລາວ ໃນວັນທີ 15 ມີນານີ້ວ່າ: ພາຍຫລັງຮັບຮູ້ຂ່າວດັ່ງກ່າວ, ໃນວັນທີ 14 ມີນານີ້ ອົງການປົກຄອງເມືອງໄດ້ແຕ່ງຕັ້ັ້ງວິຊາການຈາກຫ້ອງການທີ່ກ່ຽວຂ້ອງໄປເຄື່ອນໄຫວກວດກາທັນທີ. ຜ່ານການ ໄປກວດກາສະຖານທີ່ຕົວຈິງ ໃນເບື້ອງຕົ້ນແມ່ນບໍ່ພົບເຫັນມີການຮົ່ວໄຫລຄືທີ່ສື່ສັງຄົມອອນລາຍລົງຂ່າວ ເພາະຈຸດທີ່ມີລາຍງານວ່າມີການປ່ອຍນໍ້າເປື້ອນນັ້ນແມ່ນຢູ່ໃນສະພາບປົກກະຕິ, ແຕ່ເມື່ອສອບຖາມປະຊາຊົນທີ່ຢູ່ໃກ້ຄຽງໄດ້ຄໍາຕອບວ່າ: ໄດ້ພົບເຫັນມີ ການປ່ອຍນໍ້າເປື້ອນລົງສູ່ແມ່ນໍ້າຂອງແທ້ ແຕ່ເກີດຂຶ້ນໄລຍະສັ້ນປະມານ 20 ນາທີເທົ່ານັ້ນ.
ດັ່ງນັ້ນ, ເຈົ້າໜ້າທີ່ກ່ຽວຂ້ອງທີ່ໄປເຄື່ອນໄຫວກວດກາຕົວຈິງ ສັນນິຖານວ່າ: ອາດຈະມີທໍ່ນໍ້າເປື້ອນ ຫລື ອ່າງນໍ້າເປື້ອນທີ່ບໍ່ທັນໄດ້ບໍາບັດມີການຮົ່ວໄຫລ ຫລື ຖືກປ່ອຍອອກມາ ເນື່ອງຈາກທໍ່ນໍ້າເປື້ອນດັ່ງກ່າວແມ່ນຢູ່ລອດພື້ນດິນ ແລະມີປາກທໍ່ຕິດກັບແມ່ນໍ້າຂອງ ຊຶ່ງປົກກະຕິແລ້ວກ່ອນທາງໂຮງງານຈະປ່ອຍນໍ້າອອກຈາກອ່າງນໍ້າເປື້ອນຕ້ອງໄດ້ບໍາບັດສໍາເລັດ ແລະ ຮັບປະກັນບໍ່ມີສານພິດຈິ່ງສາມາດປ່ອຍລົງສູ່ນໍ້າຂອງໄດ້. ຢ່າງໃດກໍຕາມ, ອົງການປົກ ຄອງເມືອງໄດ້ແຕ່ງຕັ້ງຄະນະກໍາມະການຊຶ່ງປະກອບມີຫລາຍພາກ ສ່ວນທີ່ກ່ຽວຂ້ອງຂອງເມືອງໄປສົມທົບກັບເຈົ້າຂອງໂຮງງານເພື່ອກວດກາຊອກຫາສາເຫດທີ່ແທ້ຈິງວ່າເກີດຈາກຫຍັງແທ້. ເມື່ອຮູ້ສາເຫດຕົວຈິງຈະແກ້ໄຂໃຫ້ຖືກຕ້ອງຕາມຫລັກການເພື່ອບໍ່ໃຫ້ມີເຫດການແບບນີ້ເກີດຂຶ້ນອີກໃນຕໍ່ໜ້າ.
ວ່າການເຈົ້າເມືອງປາກລາຍ ຢືນຢັນວ່າ: ປັດຈຸບັນແມ່ນບໍ່ມີສະ ພາບປາຕາຍເກີດຂຶ້ນ ແລະ ນໍ້າຢູ່ໃນຈຸດທີ່ເກີດເຫດແມ່ນຄືນສູ່ສະ ພາບປົກກະຕິແລ້ວ. ພ້ອມນີ້ ທ່ານຍັງຮຽກຮ້ອງມາຍັງຫົວໜ່ວຍທຸລະກິດ ກໍຄື ບັນດາໂຮງຈັກ-ໂຮງງານທີ່ມີພາຍໃນເມືອງປາກລາຍ ເອົາໃຈໃສ່ຄຸ້ມຄອງສິ່ງແວດລ້ອມ ກໍຄື ປະຕິບັດຕາມກົດໝາຍວາງອອກຢ່າງເຂັ້ມງວດແຕ່ຫົວທີ ເພື່ອບໍ່ໃຫ້ກະທົບຕໍ່ສິ່ງແວດລ້ອມ ແລະ ສັງຄົມ.
Cr: ຂ່າວອອນລາຍ, ວສລ
