ສູນກາງສະຫະພັນກຳມະບານລາວ (ສກລ) ໄດ້ຈັດກອງປະຊຸມສົນທະນາວຽກງານຂະຫຍາຍການຈັດຕັ້ງ ແລະ ສະມາຊິກກຳມະບານໃຫ້ຫົວໜ່ວຍແຮງງານພາກເອກະຊົນ ຂຶ້ນໃນວັນທີ 20 ມິຖຸນານີ້ ທີ່ ສກລ ໂດຍມີທ່ານນາງ ອາລິຍາວັນ ອັກຄະວົງ ຮອງປະທານ ສກລ, ມີຜູ້ຕາງໜ້າຈາກບັນດາກະຊວງ, ຫົວໜ້າກົມ, ຮອງກົມ, ສະຫະພັນກຳມະບານນະຄອນຫຼວງວຽງຈັນ, ກຳມະບານ 9 ຕົວເມືອງ ແລະ ຕົວແທນຫົວໜ່ວຍແຮງງານເຂົ້າຮ່ວມ.
ກອງປະຊຸມຄັ້ງນີ້ຈັດຂຶ້ນເພື່ອຍົກສູງບົດບາດຂອງສະຫະພັນກຳມະບານ ລົງສູ່ຫົວໜ່ວຍແຮງງານພາກວິສາຫະກິດ ໂດຍສະເພາະຂົງເຂດເອກະຊົນ ທັງພາຍໃນ ແລະ ຕ່າງປະເທດ ໃຫ້ຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ວຽກງານກຳມະບານ, ເພື່ອໃຫ້ຜູ້ໃຊ້ແຮງງານ ແລະ ຜູ້ອອກແຮງງານເຫັນໄດ້ຄວາມສໍາຄັນຕໍ່ກັບວຽກງານສຸຂະພາບ ແລະ ຄວາມປອດໄພໃນການອອກແຮງງານຢູ່ໃນສະຖານທີ່ເຮັດວຽກ, ເພື່ອເປັນການສ້າງຂະບວນການສະເຫຼີມສະຫຼອງວັນກຳມະກອນສາກົນ ຄົບຮອບ 138 ປີ ພາຍໃຕ້ຄໍາຂວັນ “ຄວາມຍຸຕິທໍາໃນສັງຄົມ ແລະ ວຽກທີ່ຄຸ້ມຄ່າ ແລະ ເປັນທໍາສໍາລັບທຸກຄົນ” ໃຫ້ມີຄວາມໝາຍ ແລະ ເຕັມໄປດ້ວຍເນື້ອໃນອັນເລິກເຊິ່ງ.
ກອງປະຊຸມໄດ້ມີການສົນທະນາໃນຫົວຂໍ້ “ວຽກງານຂະຫຍາຍການຈັດຕັ້ງ ແລະ ສະມາຊິກກຳມະບານຢູ່ຫົວໜ່ວຍແຮງງານພາກເອກະຊົນ”; “ວຽກງານສຸຂະພາບ ແລະ ຄວາມປອດໄພໃນການອອກແຮງງານໃນສະຖານທີ່ເຮັດວຽກ”.
ຂ່າວ-ພາບ: ພູວັນ
