ສູນກາງຊາວໜຸ່ມ ປະຊາຊົນປະຕິວັດລາວ (ສຊປລ) ຈັດພິທີສະເຫລີມສະຫລອງ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ໃນວັນທີ 30 ພຶດສະພາ 2024 ຢູ່ສູນການຄ້າລາວ-ໄອເຕັກ ໂດຍໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ທ່ານ ມອນໄຊ ລາວມົວຊົ່ງ ເລຄະນະບໍລິຫານງານ ສຊປລ, ມີທູຕານຸທູດ, ອົງການຈັດຕັ້ງສາກົນ ແລະ ເຍົາວະຊົນເຂົ້າຮ່ວມ.
ທ່ານ ມອນໄຊ ລາວມົວຊົ່ງ ໄດ້ໃຫ້ຮູ້ວ່າ: ການຈັດງານໃນຄັ້ງນີ້, ການສະເຫລີມສະຫລອງວັນ ເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ເພື່ອເປັນການເປີດໂອກາດໃຫ້ເຍົາວະຊົນ-ອະນຸຊົນ ໄດ້ມີເວທີເຄື່ອນໄຫວ ແລະ ສ້າງບັນຍາກາດໃຫ້ມີຄວາມເບີກບານມວນຊື່ນ, ທັງເປັນການປູກຈິດສໍານຶກຂອງເຍົາວະຊົນ-ອະນຸຊົນ ໃຫ້ຮູ້ເຖິງຄວາມໝາຍຄວາມສໍາຄັນຂອງວັນດັ່ງກ່າວ ແລະ ປູກຈິດສໍານຶກໃຫ້ເດັກ ໄດ້ຮຽນຮູ້ເຖິງມູນເຊື້ອປະຫວັດສາດຂອງຊາດຂອງພັກ ແລະ ຜົນງານການເຄື່ອນໄຫວຂອງການນໍາຮຸ່ນກ່ອນສ້າງໃຫ້ເດັກມີຄວາມຮູ້ ຄວາມສາມາດ, ຮັກການອອກແຮງງານ, ຮັກໃນການສຶກສາຄົ້ນຄວ້າຮໍ່າຮຽນ, ມີຄຸນສົມບັດ. ພ້ອມນີ້, ຍັງເປັນການສຶກສາອົບຮົມເຍົາວະຊົນ-ອະນຸຊົນ ໄດ້ຮູ້ເຖິງເນື້ອໃນຄວາມໝາຍສໍາຄັນຂອງສອງວາລະແຫ່ງຊາດ ໃຫ້ບັນລຸຜົນເປັນຈິງຕາມເປົ້າໝາຍ ແລະ ເຮັດໃຫ້ເຍົາວະຊົນມີແນວຄິດການເມືອງໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ຮັກເຊື້ອແພງຊາດເປັນແບບຢ່າງນຳໜ້າທຸກຂະບວນການເຄື່ອນໄຫວຂອງວຽກງານເຍົາວະຊົນໃຫ້ຟົດຟື້ນ-ແຂງແຮງ, ເປັນການເປີດໂອກາດໃຫ້ເຍົາວະຊົນ-ອະນຸຊົນ ໄດ້ມີການແລກປ່ຽນບົດຮຽນເຊິ່ງກັນ ແລະ ກັນ ທາງດ້ານການເວົ້າທີ່ມີເນື້ອໃນ, ມີຫລັກການ, ມີບ່ອນອີງ ແລະ ກິດຈະກຳຕ່າງໆ ເພື່ອພັດທະນາຕົນເອງໃຫ້ມີຄວາມຮູ້, ຄວາມສາມາດກາຍເປັນຜູ້ສືບທອດທີ່ມີຄຸນນະພາບຂອງພັກ-ຂອງຊາດ.
ໂອກາດນີ້, ທ່ານ ກິແກ້ວ ໄຂຄຳພິທູນ ກໍໄດ້ມີຄໍາເຫັນວ່າ: ຕະຫລອດໄລຍະຜ່ານມາ ສູນກາງພັກ-ລັດຖະບານເຮົາໄດ້ເອົາໃຈໃສ່ຢ່າງຈົດຈໍ່ ແລະ ສະເໝີຕົ້ນສະເໝີປາຍ ຕໍ່ກັບວຽກງານການສົ່ງເສີມ, ການປົກປ້ອງສິດທິເດັກ, ການຕ້ານສະກັດກັ້ນ ແລະ ແກ້ໄຂການໃຊ້ຄວາມຮຸນແຮງຕໍ່ເດັກນ້ອຍ, ໄດ້ໃຫ້ສັດຕະຍາບັນ ແລະ ເຂົ້າຮ່ວມເປັນພາຄີຂອງ ສົນທິສັນຍາວ່າດ້ວຍສິດທິເດັກນ້ອຍ ໃນໂອກາດວັນຄົບຮອບ 33 ປີ ຂອງສົນທິສັນຍາວ່າດ້ວຍສິດທິເດັກ ແລະ ໄດ້ກຳນົດທິດທາງການພັດທະນາເດັກນ້ອຍລາວບັນດາເຜົ່າ ຮອດປີ 2030; ພັກ, ລັດ ແລະ ທົ່ວສັງຄົມ ໄດ້ໃຫ້ຄວາມສໍາຄັນເອົາໃຈໃສ່ຕໍ່ເດັກນ້ອຍທີ່ເປັນອະນາຄົດຂອງປະເທດຊາດ ເປັນຕົ້ນ ໄດ້ຮັບຮອງເອົາກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ, ກົດໝາຍວ່າດ້ວຍເຍົາວະຊົນລາວ ເພື່ອເບິ່ງແຍງດູແລ ແລະ ປົກປ້ອງເດັກຈາກໄພອັນຕະລາຍຕ່າງໆເຊັ່ນ: ການຖືກທາລຸນ, ການໃຊ້ຄວາມຮຸນແຮງ, ການຖືກຂູດຮີດແຮງງານ, ການຖືກຄຸກຄາມທາງເພດ, ປົກປ້ອງຈາກພະຍາດທີ່ເປັນອັນຕະລາຍຕໍ່ຊີວິດ. ພ້ອມນີ້, ລັດຖະບານ ຍັງໄດ້ສ້າງໂອກາດໃຫ້ແກ່ເດັກໃນທົ່ວປະເທດ ໄດ້ມີສ່ວນຮ່ວມໃນການເຮັດກິດຈະກຳຕ່າງໆ ໃນສັງຄົມທັງພາຍໃນ ແລະ ຕ່າງປະເທດ ໂດຍຈັດໃຫ້ມີການແລກປ່ຽນຄໍາຄິດເຫັນ ເຊິ່ງກັນ ແລະ ກັນກ່ຽວກັບບັນຫາທີ່ພົວພັນກັບເດັກນ້ອຍ, ມີການຈັດຕັ້ງທີ່ເປັນຕົວແທນໃນການເຕົ້າໂຮມຄວາມສາມັກຄີ, ສຶກສາອົບຮົມ ແລະ ນໍາພາ ການເຄື່ອນໄຫວກິດຈະກຳຂອງເດັກນ້ອຍລາວ ໂດຍສະເພາະຜ່ານກິດຈະກຳ ຂອງຄະນະຊາວໜຸ່ມປະຊາຊົນປະຕິວັດລາວ ແລະ ການຈັດຕັ້ງສັງຄົມອື່ນໆ. ທັງໝົດນັ້ນ, ໄດ້ສະແດງເຖິງ ພັກ ແລະ ລັດຖະບານ ຂອງພວກເຮົາໄດ້ມີແນວທາງນະໂຍບາຍອັນຖືກຕ້ອງຕໍ່ສິດຜົນປະໂຫຍດຂອງ ແມ່ ແລະ ເດັກຕະຫລອດມາ.
ຂ່າວ-ພາບ: ບຸນອູ້ມ
