ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສຕລ ສະຫລຸບການພັດທະນາກິລາບານເຕະທົ່ວປະເທດ ປະຈໍາປີ 2023
ຜູ້ຕາງໜ້າສະຫະພັນບານເຕະຈາກບັນດາແຂວງໃນທົ່ວປະ ເທດ ເຂົ້າຮ່ວມກອງປະຊຸມປະຊຸມພັດທະນາກິລາບານເຕະທົ່ວປະເທດປະຈໍາປີ 2023 ຈັດຂຶ້ນໃນຕອນເຊົ້າວັນທີ 9 ທັນວາ 2023, ທີ່ຫ້ອງການສະຫະພັນບານເຕະແຫ່ງຊາດລາວ (ສຕລ) ພາຍໃຕ້ການເປັນປະທານຂອງ ທ່ານ ວິເພັດ ສີຫາຈັກຣ, ປະທານສະຫະ ພັນບານເຕະແຫ່ງຊາດລາວ.
ກອງປະຊຸມໄດ້ສະຫລຸບຕີລາຄາຄືນບັນດາຜົນງານການເຄື່ອນ ໄຫວວຽກງານພັດທະນາກິລາບານເຕະທົ່ວປະເທດ ຕະຫລອດໄລຍະ ປີ 2023 ເພື່ອຍົກໃຫ້ເຫັນຜົນສໍາເລັດທີ່ປະຕິບັດໄດ້ ແລະ ດ້ານອ່ອນຂໍ້ຄົງຄ້າງ, ລວມເຖີງບົດຮຽນທີ່ຖອດຖອນໄດ້ ເພື່ອພ້ອມກັນປັບປຸງແກ້ໄຂໃຫ້ດີຂຶ້ນໃຫ້ດີຂຶ້ນ, ພ້ອມນີ້ ກອງປະຊຸມໄດ້ຮວ່ມກັນ ປຶກສາຫາລືກຳນົດທິດທາງແຜນການເຄື່ອນໄຫວ ປະຈໍາປີ 2024. ນອກຈາກນີ້ ກອງປະຊຸມນີ້ໄດ້ພ້ອມກັນຄົ້ນຄວ້າພິຈາລະນາເຖິງຄວາມສາມາດສະເພາະໜ້າ ແລະ ຍາວ ນານໃນການພັດທະນາກິລາບານເຕະລາວໃຫ້ມີລະດັບສູງຂຶ້ນໄປເລື້ອຍໆ ໂດຍສຸມໃສ່ການຈັດການແຂ່ງຂັນທັງຢູ່ນະຄອນຫຼວງ ວຽງຈັນ ແລະ ຕ່າງແຂວງທົ່ວປະເທດ.
ທ່ານ ວິເພັດ ສີຫາຈັກຣ ໃຫ້ຮູ້ວ່າ: ປີ 2023 ນີ້, ວຽກງານຈັດການແຂ່ງຂັນ (ສໍາລັບສະຫະພັນບານເຕະແຂວງ/ນະຄອນ ຫຼວງ) ສຕລ ໄດ້ມອບງົບປະມານສະໜັບສະໜູນ ຈຳນວນ 120 ລ້ານກີບ ໃຫ້ແກ່ທຸກໆ ສະຫະພັນບານເຕະແຂວງ ແລະ ນະຄອນ ຫຼວງວຽງຈັນ ເພື່ອນໍາໄປຈັດການແຂ່ງຂັນ 5 ລາຍການ ຄື:
• ການແຂ່ງຂັນ ລາວລີກ 2 (ການແຂ່ງຂັນປະຈຳປີຂອງບັນດາແຂວງ/ນະຄອນຫຼວງ).
• ການແຂ່ງຂັນ ລະດັບມັດທະຍົມ ຕອນຕົ້ນ ປະເພດຊາຍ ພາຍໃນແຂວງ/ນະຄອນຫຼວງ.
• ການແຂ່ງຂັນ ລະດັບມັດທະຍົມ ຕອນປາຍ ປະເພດຊາຍ ພາຍໃນແຂວງ/ນະຄອນຫຼວງ
• ການແຂ່ງຂັນ ລະດັບມັດທະຍົມ ຕອນຕົ້ນ ປະເພດຍິງ ພາຍໃນແຂວງ/ນະຄອນຫຼວງ.
• ການແຂ່ງຂັນ ລະດັບມັດທະຍົມ ຕອນປາຍ ປະເພດຍິງ ພາຍໃນແຂວງ/ນະຄອນຫຼວງ.
ຢ່າງໃດກໍຕາມ, ການແຂ່ງຂັນຢູ່ທ້ອງຖິ່ນໃນໄລຍະຜ່ານມາ ຍັງບໍ່ໄດ້ຕາມເປົ້າໝາຍທີ່ ສຕລ ຕັ້ງໄວ້ ດ້ວຍຫຼາຍປັດໃຈ. ດັ່ງນັ້ນ, ທ່ານໄດ້ຮຽກຮ້ອງໃຫ້ບັນດາສະຫະພັນຄົ້ນຄວ້າ, ປຶກສາຫາລື ເພື່ອໃຫ້ ການແຂ່ງຂັນດັ່ງກ່າວ ສາມາດຈັດຂື້ນໄດ້ໃນປີ 2024 ທີ່ຈະມາເຖີງນີ້.
ສ່ວນແຜນຈັດການແຂ່ງຂັນໃນປີ 2024 ມີຄື:
1.ລາວລີກ 2 ປະຈໍາປີ 2024
2.ການແຂ່ງຂັນບານເຕະເຍົາວະຊົນ ມ.ຕົ້ນ ແລະ ມ.ປາຍ ຊາຍ-ຍິງ .
3.ບານເຕະຊີງຂັນ ພະນະທ່ານນາຍົກລັດຖະມົນຕີແຫ່ງ ສປປ ລາວ ປະຈໍາປີ 2024-2025.
ໃນກອງປະຊຸມບັນດາຜູ້ຕາງຫນ້າສະຫະພັນບານເຕະແຕ່ລະແຂວງ/ນະຄອນຫຼວງວຽງຈັນ ໄດ້ປະກອບຄວາມເຫັນຫລາຍບັນຫາ ແລະ ໄດ້ຕົກລົງເຫັນດີເລືອກ ແຂວງບໍລິຄໍາໄຊ ຈັດກິດຈະ ກຳ AFC WOMEN’S FOOTBALL DAY 2024 ໃນເດືອນມີນາ ແລະ ແຂວງຜົ້ງສາລີ ຈັດກິດຈະກຳ AFC GRASSROOTS FOOTBALL DAY 2024 ໃນເດືອນພຶດສະພາ.
ພາບ: ສົງການ