ສະຫະພັນ ບານເຕະແຫ່ງຊາດລາວ (ສຕລ) ຈັດພິທີເປີດໂຄງການບານເຕະໃນໂຮງຮຽນ (FIFA Football for Schools) ໃນຕອນ ເຊົ້າວັນທີ 30 ພະຈິກ 2023 ທີ່ສູນຝຶກ ຈໍາປາ-ຈໍາປີ, ສະໜາມກິລາ ຫຼັກ16, ນະຄອນຫລວງວຽງຈັນ ໂດຍມີ ທ່ານ ກິ່ງມະໂນ ພົມມະຫາ ໄຊ ຮອງລັດຖະມົນຕີ ກະຊວງ ສຶກສາທິການ ແລະ ກິລາ, ທ່ານ ນ. ພັດມາ ຊາມູຣາ (Fatma Samoura) ເລຂາທິການ ສະຫະພັນບານເຕະສາກົນ (FIFA). ທ່ານ ວີເພັດ ສີຫາຈັກຣ, ປະທານສະຫະພັນບານເຕະແຫ່ງຊາດລາວ (ສຕລ), ພ້ອມດ້ວຍຄະນະບໍລິຫານງານສະຫະພັນບານເຕະແຫ່ງຊາດລາວ, ກະຊວງ ສຶກສາ ທິການ ແລະ ກິລາ, ຄູ-ອາຈານ ແລະ ນັກກິລາເຂົ້າຮ່ວມ.
ຈຸດປະສົງຂອງໂຄງການນີ້ ເພື່ອສຸມໃສ່ການ “ພັດທະນາກິລາບານເຕະໃນໂຮງຮຽນເປັນຕົ້ນຕໍ ຊຶ່ງຈະເນັ້ນໃຫ້ບັນດາຄູພະລະທີ່ໄດ້ຮັບການຝຶກແອບຢ່າງຖືກວິທີ ແລະ ສົ່ງເສີມນ້ອງນັກຮຽນທີ່ມີຄວາມມັກຮັກໃນກິລາບານເຕະ ສາມາດເຂົ້າເຖິງການຫລິ້ນກິລາບານເຕະໃນໂຮງຮຽນໃຫ້ຫລາຍຂຶ້ນ ແລະ ຮຽນຮູ້ກ່ຽວກັບທັກສະການດໍາລົງຊີວິດ.
ໃນນີ້ ສຕລ ໄດ້ຈັດຝຶກອົບຮົມພາກທິດສະດີ ແລະ ພາກປະ ຕິບັດຕົວຈິງໃຫ້ແກ່ບັນດາຄູພາລະ ຈຳນວນ 80 ທ່ານ ມາຈາກ 80 ໂຮງຮຽນພາຍໃນນະຄອນຫຼວງວຽງຈັນ. ຄູເຫລົ່ານີ້ ຈະເປັນຜູ້ນໍາເອົາຄວາມຮູ້ທີ່ໄດ້ຝຶກອົບຮົມໃນຄັ້ງນີ້ ໄປຂະຫຍາຍສິດສອນຕໍ່ບັນດາຄູພະລະຜູ້ອື່ນໆ ຕື່ມອີກ. ນອກຈາກນີ້ ໂຄງການນີ້ຍັງຈະສືບຕໍ່ຈັດຕັ້ງປະຕິບັດໃຫ້ແກ່ບັນດາໂຮງຮຽນຢູ່ຕ່າງແຂວງທົ່ວປະ ເທດໃນຕໍ່ໜ້າ.
ໃນໂອກາດມີຄໍາເຫັນຕໍ່ພິທີຄັ້ງນີ້, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ສະແດງຄວາມຂອບໃຈມາຍັງ FIFA ທີ່ໄດ້ໃຫ້ການຊ່ວຍເຫຼືອດ້ານງົບປະ ມານແກ່ໂຄງການນີ້ ຊຶ້ງເປັນການປະກອບສ່ວນສໍາຄັນໃນການຊຸກ ຍູ້ສົ່ງເສີມຄູອາຈານ ແລະ ນັກນຽນຂອງລາວຫັນມາຫລີ້ນກິລາເພື່ອສຸຂະພາບກາຍຂຶ້ນກວ່າເກົ່າ ເພື່ອສຸຂະພາບທີ່ດີ ແລະ ຫ່າງ ໄກຈາກສິ່ງຫຍໍ້ທໍ້ຕ່າງໆ ພ້ອມນີ້ ທ່ານສະແດງຄວາມຫວັງວ່າ FIFA ຈະສືບຕໍ່ສະຫນັບສະຫນູນດ້ານງົບປະມານແກ່ລາວຕື່ມອີກໃນຕໍ່ຫນ້າ.
