ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວພົບຜູ້ຕິດເຊື້ອພະຍາດ ໂຄວິດ-19 ເພີ່ມໃໝ່ອີກ 1 ກໍລະນີ ເປັນເພດຍິງ ອາຍຸ 22 ປີ ຢູ່ບ້ານໂພນພະເນົາ ເມືອງໄຊເສດຖາ ນະຄອນຫລວງວຽງຈັນ

ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງເຊື້ອພະຍາດໂຄວິດ-19 ບ່າຍມື້ນີ້ ວັນທີ 30 ມີນາ 2020, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານຮອງສາດສະດາຈານ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ-19 ແຈ້ງໃຫ້ຊາບວ່າ: ມາຮອດປະຈຸບັນນີ້, ສປປ ລາວ ໄດ້ກວດວິເຄາະກໍລະນີສົງໃສທັງໝົດ 364 ກໍລະນີ, ໂດຍໃນນີ້ພົບກໍລະນີຢັ້ງຢືນຕິດເຊື້ອ ລວມທັງໝົດມີ 9 ຄົນ, ເປັນກໍລະນີໃໝ່ 1 ຄົນ.

ສະເພາະວັນທີ 29 ມີນານີ້, ມີກໍລະນີສົງໃສທັງໝົດ 64 ກໍລະນີທີ່ກຳລັງຕິດຕາມອາການຢູ່ໂຮງໝໍໃນແຕ່ລະແຂວງຄື: ນະຄອນຫຼວງວຽງຈັນ 49 ກໍລະນີ, ແຂວງຫຼວງພະບາງ 11 ກໍລະນີ, ແຂວງສາລາວັນ 2 ກໍລະນີ, ແຂວງໄຊຍະບູລີ ແລະ ຜົ້ງສາລີແຂວງລະ 1 ກໍລະນີ. ອີງຕາມຜົນກວດວິເຄາະ ແມ່ນເປັນລົບ ຫລື ຕິດເຊື້ອພະຍາດໂຄວິດ-19 ມີ 1 ກໍລະນີ ເປັນເພດຍິງ ອາຍຸ 22 ປີ, ຢູ່ບ້ານໂພນພະເນົາ ເມືອງໄຊເສດຖາ ນະຄອນຫລວງວຽງຈັນ ຊື່ງຜູ້ກ່ຽວເດີນທາງມາຈາກປະເທດໄທ ແລະ ມີອາການສະແດງຕາມນິຍາມໃນວັນທີ 28 ມີນາຜ່ານມາ; ປະຈຸບັນ ຜູ້ກ່ຽວພວມໄດ້ຮັບການປີ່ນປົວຢູ່ໂຮງໝໍມິດຕະພາບ 150 ຕຽງ, ດ້ວຍອາການເບົາບາງ, ມີໄຂ້, ໄອ, ນ້ຳມູກ, ຍ່າງໄປມາ ແລະ ຊ່ວຍເຫຼືອຕົນເອງໄດ້.

ທ່ານຮອງລັດຖະມົນຕີກະຊວງສາທາລະນະສຸກ ຢັ້ງຢືນວ່າ: ອາການຂອງຄົນເຈັບທີ່ນອນປິ່ນປົວ ແລະ ຕິດຕາມອາການທີ່ໂຮງໝໍ ທັງໝົດ ແມ່ນມີອາການຊົງຕົວຂັ້ນເບົາບາງ ແລະ ໄດ້ຮັບການປິ່ນປົວດ້ວຍຄວາມເອົາໃຈໃສ່ດີທີ່ສຸດຈາກແພດໝໍຕາມຫຼັກວິຊາການ.

ທ່ານຮອງລັດຖະມົນຕີກະຊວງສາທາລະນະສຸກ ໃຫ້ຮູ້ຕື່ມວ່າ: ປະຈຸບັນ, ລັດຖະບານສປປ ລາວ ມີຄວາມເປັນຫ່ວງເປັນ ໄຍທີ່ສຸດໃນການປ້ອງກັນ, ຄວບຄຸມ, ໂຕ້ຕອບ ແລະ ແກ້ໄຂກ່ຽວກັບພະຍາດນີ້, ພ້ອມທັງມີການຕິດຕາມສະພາບການຢ່າງໃກ້ຊິດ, ທັງປະເມີນສະຖານະການຢ່າງສະໝໍ່ສະເໝີ ເພື່ອວາງມາດຕະການໃຫ້ເໝາະສົມ ແລະ ເຂົ້າກັບສະພາບການຢ່າງທັນເວລາ, ແນ່ໃສ່ຫຼຸດຜ່ອນການເຈັບເປັນຂອງປະຊາຊົນ ແລະ ຈຳກັດການແຜ່ລະບາດຂອງພະຍາດໃນຄັ້ງນີ້ໃຫ້ຢູ່ໃນວົງແຄບ.

ມາຮອດປະຈຸບັນ, ທົ່ວໂລກ ມີລາຍງານການຕິດເຊື້ອພະຍາດໂຄວິດ-19 ທັງໝົດ 201 ປະເທດ, ມີ 662.000 ກວ່າກໍລະນີ , ເສຍຊິວິດແລ້ວ 30,845 ກໍລະນີ ແລະ ປີ່ນປົວຫາຍດີ 141.945 ກໍລະນີ.