ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ກວດພົບຜູ້ຕິດເຊື້ອພະຍາດ ໂຄວິດ-19 ເພີ່ມອີກ 1 ຄົນ ຢູ່ນະຄອນຫຼວງວຽງຈັນ

ລາວພົບກໍລະນີຕິດເຊື້ອພະຍາດໂຄວິດ19 ເພີ່ມອີກ 1 ຄົນ ເຮັດໃຫ້ມາຮອດປະຈຸບັນນີ້ລາວມີຈຳນວນຜູ້ຕິດເຊື້ອທັງໝົດ 10 ຄົນ ຊື່ງກໍລະນີທີ 10 ເປັນເພດຍິງ, ອາຍຸ 21 ປີ, ຢູ່ບ້ານໜອງສະໂນຄຳ, ເມືອງສີໂຄດຕະບອງ ນະຄອນຫຼວງວຽງຈັນ, ຜູ້ກ່ຽວເລີ່ມມີອາການເຈັບຄໍແລະຈາມ, ເມື່ອຍ, ຫາຍໃຈຍາກລະຫວ່າງວັນທີ 27 ຫາ 29 ມານີ ແລະ ຊື້ຢາກິນເອງຈົນຮອດ ວັນທີ 30 ຜູ້ກ່ຽວຮູ້ສຶກມີອາການໄຂ້ ເຈັບຫົວ ແລະ ປວດກ້າມຊີ້ນ, ວັນທີ 31 ຈຶ່ງໄປໂຮງໝໍມິດຕະພາບ ຜົນບົ່ງມະຕິວ່າເປັນໂຄວິດ19.

ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງພະຍາດໂຄວິດ 19 ປະຈຳວັນ, ທີ່ກະ ຊວງສາທາລະນະສຸກ ຮອງສາດສະດາຈານ ດຣ ພູທອນ ເມືອງປາກ, ຮອງລັດຖະມົນຕີກະຊວງສາທາ ລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ 19 ແຈ້ງໃຫ້ຮູ້ວ່າ: ຜູ້ຕິດເຊື້ອກໍລະນີຫລ້າສຸດນີ້ມີປະຫວັດສຳຜັດໃກ້ຊິດກັບຜູ້ຕິດເຊື້ອຄົນທີ 8 ເພດຊາຍທີ່ເປັນພະນັກງານ DHL ຢູ່ບ້ານດອນນົກຂຸ້ມ, ເມືອງສີສັດຕະນາກ, ປະຈຸບັນພາກສ່ວນກ່ຽວຂ້ອງໄດ້ລົງເກັບກຳຂໍ້ມູນຜູ້ສຳພັດໃກ້ຊິດຈຳນວນ 8 ຄົນ ແລະໄດ້ແນະນຳໃຫ້ຈຳກັດບໍລິເວນເພື່ອເຝົ້າລະວັງຕິດ ຕາມອາການ, ຮອງລັດຖະມົນຕີກະຊວງສາທາລະນະສຸກ ຍັງເນັ້ນໜັກໃຫ້ທຸກພາກສ່ວນເອົາໃຈໃສ່ຈັດຕັ້ງປະຕິບັດຄຳສັ່ງເລກທີ 06 ຂອງນາຍົກລັດຖະມົນຕີທີ່ເລີ່ມມີຜົນບັງຄັບໃຊ້ນັບແຕ່ວັນທີ 1 ເມສານີ້ເປັນຕົ້ນໄປໃຫ້ມີປະສິດທິຜົນຜົນ  ໂດຍແນະນໍາໃຫ້ພະນັກງານລັດຖະກອນຜູ້ທີ່ພັກວຽກ, ພັກການແລະ ປະຊາຊົນທົ່ວໄປຈຳກັດໂຕເອງຢູ່ເຮືອນດ້ວຍວິທີການທີ່ເໝາະສົມ.

ໃນພິທີຖະແຫລງຂ່າວຄັ້ງນີ້ ດຣ ຄຳພົ້ວ ສຸດທິສົມບັດ, ຫົວໜ້າກົມປີ່ນປົວ ແລະຟື້ນຟູໜ້າທີ່ການ ແລະ ດຣ ຫວັງນະຄອນ ດິດຕະພົງ, ຮອງຜູ້ອຳນວຍການໂຮງໝໍມິດຕະພາບ ຍັງໄດ້ແຈ້ງເຖິງຄວາມພ້ອມດ້ານຕ່າງໆ ເພື່ອຮອງຮັບຄົນເຈັບທີ່ຕິດເຊື້ອພະຍາດໂຄວິດ19 ລວມເຖິງອຸປະກອນດ້ານການແພດກໍ່ຄືຢາປົວພະຍາດທີ່ຈະນໍາໃຊ້ເຂົ້າໃນການປີ່ນປົວທັງໂຮງໝໍຂັ້ນສູນກາງ ແລະທ້ອງຖີ່ນ ແນໃສ່ກຽມຄວາມພ້ອມຖ້າຫາກມີກໍລະນີຕິດເຊື້ອພະຍາດໂຄວິດ19 ເພີ່ມຂື້ນຢູ່ໃນລາວ.

 

 

ຂ່າວ; ຈັນທະສອນ ສີຫານາດ