ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ມີຄໍາເຫັນຕໍ່ ກອງປະຊຸມວັດທະນະທຳອາຊຽນ-ຈີນຄັ້ງທີ 18 ທີ່ຈັດຂຶ້ນຢູ່, ໜານໜິງ, ເຂດປົກຄອງກວາງຊີ, ສປ ຈີນ ໃນວັນທີ 19 ມິຖຸນາ 2023 ໂດຍມີທ່ານ ທ່ານ ໝຽວ ຊິ່ງຫວັງ (Mr. Miao Qingwang), ຮອງເຈົ້າແຂວງກວາງຊີ, ທ່ານ ຣາວ ຄວນ (Mr. Rao Quan), ຮອງລັດຖະມົນຕີກະຊວງວັດທະນະທໍາ ແລະ ທ່ອງທ່ຽວ ແຫ່ງ ສປ ຈີນ, ທ່ານ ຊົງ ຢວນ ໝິງ, ຜູ້ອໍານວຍການໃຫຍ່ຫໍສະໝຸດແຫ່ງຊາດ ສປ ຈີນ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວກ່າວວ່າ: ໃນນາມກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ, ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ເຂົ້າຮ່ວມກອງປະຊຸມວັດທະນະທຳອາຊຽນ-ຈີນ ຄັ້ງທີ 18 ນີ້ ໂດຍຈັດຂຶ້ນພາຍໃຕ້ຫົວຂໍ້ “ການສ້າງຫໍສະໝຸດທັນສະໄໝ ແລະ ສົ່ງເສີມການອ່ານ” ທີ່ເມືອງໜານຫນິງ, ເຂດປົກຄອງກວາງຊີ ຈ້ວງ, ສປ ຈີນ.
ຂ້າພະເຈົ້າຂໍຖືໂອກາດນີ້ສະແດງຄວາມຂອບໃຈເປັນຢ່າງສູງ ມາຍັງ ອຳນາດການປົກຄອງເຂດປົກຄອງກວາງຊີ ຈ້ວງ ແລະ ກະຊວງວັດທະນະທຳ ແລະ ທ່ອງທ່ຽວສປ ຈີນ ໃນການຕ້ອນຮັບອັນອົບອຸ່ນໃຫ້ແກ່ຄະນະຂອງພວກຂ້າພະເຈົ້າແລະ ຂໍຊົມເຊີຍຕໍ່ການກະກຽມກອງປະຊຸມຄັ້ງນີ້ໄດ້ເປັນຢ່າງດີ.
ດັ່ງທີ່ຮັບຊາບແລ້ວວ່າ,ວັດທະນະທຳເປັນພາຫະນະຫຼັກທີ່ສຳຄັນໃນການຂັບເຄື່ອນການຂະຫຍາຍຕົວຂອງເສດຖະກິດ, ການພັດທະນາແບບຍືນຍົງ ແລະຊຸກຍູ້ການພົວພັນຮ່ວມມືທີ່ແໜ້ນແຟ້ນ ຊຶ່ງບໍ່ໄດ້ມີການຮ່ວມມືສະເພາະແຕ່ບັນດາປະເທດສະມາຊິກອາຊຽນເທົ່ານັ້ນ, ແຕ່ກໍຍັງມີການຮ່ວມມືກັບຫຼາຍປະເທດອີກດ້ວຍ. ຂ້າພະເຈົ້າຂໍແຈ້ງຕໍ່ກອງປະຊຸມວ່າ ໃນທ້າຍເດືອນຕຸລາ 2022, ສປປ ລາວ ໄດ້ຈັດກອງປະຊຸມລັດຖະມົນຕີວັດທະນະທຳ ແລະ ສິລະປະອາຊຽນ-ຈີນ ຄັ້ງທີ 6 ໃນຮູບແບບທາງໄກ ທີ່ນະຄອນຫຼວງວຽງຈັນ ພາຍໃຕ້ຫົວຂໍ້ “ການສົ່ງເສີມບົດບາດວັດທະນະທຳ ແລະ ສິລະປະອາຊຽນ ຫຼັງການແຜ່ລະບາດພະຍາດໂຄວິດ-19 ເພື່ອການພັດທະນາແບບຍືນຍົງ”.
ກອງປະຊຸມໄດ້ສະແດງຄວາມຊົມເຊີຍ ຕໍ່ກັບຄວາມຄືບໜ້າຂອງການຮ່ວມມືອາຊຽນ-ຈີນ ດ້ານວັດທະນະທຳ, ເປັນຕົ້ນແມ່ນການປະຕິບັດໂຄງການຕ່າງໆ, ລວມທັງຜົນກອງປະຊຸມວັດທະນະທຳອາຊຽນ-ຈີນ ຄັ້ງທີ 17 ທີ່ຜ່ານມາຊຶ່ງຜົນຂອງກອງປະຊຸມດັ່ງກ່າວ ເປັນການສະໜັບສະໜູນ ໃຫ້ແກ່ບັນດາຂໍ້ລິເລີ່ມຂອງ ນະໂຍບາຍໜຶ່ງແລວໜຶ່ງເສັ້ນທາງ,ແລະ ການຈັດຕັ້ງປະຕິບັດແຜນງານການຮ່ວມມືດ້ານວັດທະນະທຳແລະສິລະປະອາຊຽນ-ຈີນ 2022-2025 ທີ່ໄດ້ມີຄວາມພະຍາຍາມສູງເພື່ອຊຸກຍູ້ສົ່ງເສີມ ຄວາມຮັບຮູ້ ແລະ ເຂົ້າໃຈວັດທະນະທຳເຊິ່ງກັນແລະກັນໃນການແລກປ່ຽນການໄປມາຫາສູ່ ຂອງປະຊາຊົນອາຊຽນ ແລະ ສປ ຈີນອີກດ້ວຍ.
ສປປ ລາວ ຕີລາຄາສູງຕໍ່ການສະໜັບສະໜູນການຮ່ວມມືຂອງ ສປ ຈີນ ຕະຫຼອດມາແລະຫວັງຢ່າງຍິ່ງວ່າການຮ່ວມມືດັ່ງກ່າວຈະເພີ່ມທະວີຂຶ້ນເລື້ອຍໆ ໂດຍຜ່ານຂອບການຮ່ວມມືສອງຝ່າຍ, ຫຼາຍຝ່າຍແລະອາຊຽນ-ຈີນ ໃນອະນາຄົດອັນໃກ້ນີ້.
ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ກ່າວເນັ້ນວ່າ: ສປປ ລາວ ໃນນາມປະທານກອງປະຊຸມລັດຖະມົນຕີວັດທະນະທຳ ແລະ ສິລະປະອາຊຽນ 2022-2024, ພວກຂ້າພະເຈົ້າໄດ້ຮັບຊາບວ່າ ອາຊຽນໄດ້ປະກອບສ່ວນອັນສຳຄັນເຂົ້າໃນການຈັດຕັ້ງຜັນຂະຫຍາຍແຜນຍຸດທະສາດວັດທະນະທຳ ແລະ ສິລະປະອາຊຽນ 2016-2025 ແລະ ແຜນແມ່ບົດປະຊາຄົມວັດທະນະທຳ-ສັງຄົມອາຊຽນ 2025 ໃຫ້ປະກົດຜົນເປັນຈິງ,ໂດຍຜ່ານການຈັດກິດຈະກໍາຕ່າງໆທັງໃນລະດັບຊາດ ແລະ ພາກພື້ນ ເພື່ອສົ່ງເສີມ ວັດທະນະທຳການອ່ານຂອງປະຊາຊົນໃຫ້ຫຼາຍຂຶ້ນ, ພ້ອມທັງ ຍົກສູງລະດັບການຮູ້ຫນັງສືຂອງເດັກນ້ອຍ ແລະ ຊາວຫນຸ່ມໃນອາຊຽນ.
ສປປ ລາວ ໄດ້ເອົາໃຈໃສ່ ພັດທະນາລະບົບຫໍສະໝຸດໃຫ້ກາຍເປັນທັນສະໄໝ, ໂດຍໄດ້ຈັດກິດຈະກຳການສົ່ງເສີມການອ່ານຫຼາຍຮູບແບບ ໃນຂອບເຂດທົ່ວປະເທດ ເພື່ອປູກຝັງຈິດສຳນຶກ ໃຫ້ເດັກນ້ອຍ ແລະ ຊາວໜຸ່ມ ເຫັນໄດ້ຄວາມສຳຄັນ, ມີຄວາມຜູກພັນ ໃນການອ່ານ ແລະ ສາມາດເຂົ້າເຖິງຫໍສະໝຸດໄດ້ທັງຢູ່ສູນກາງ ແລະ ທ້ອງຖິ່ນ.
ເຖິງແມ່ນວ່າວຽກງານຫໍສະໝຸດໄດ້ຮັບການສະໜັບສະໜູນທີ່ສຳຄັນຈາກພັກລັດ, ເອກະຊົນ ແລະ ພາກສ່ວນທີ່ກ່ຽວຂ້ອງ ລວມທັງ ອົງການຈັດຕັ້ງສາກົນ. ສປປ ລາວ ກໍຍັງປະເຊີນກັບຄວາມຫຍຸ້ງຍາກ ເປັນຕົ້ນດ້ານເຕັກນິກວິຊາການ, ບຸກຄະລາກອນ ແລະ ອື່ນໆ, ເຊິ່ງເປັນສິ່ງທ້າທາຍອັນຕົ້ນຕໍ ທີ່ຈະຕ້ອງໄດ້ສຸມໃສ່ປັບປຸງໃຫ້ເໝາະສົມກັບການຫັນປ່ຽນເປັນຫໍສະໝຸດທັນສະໄໝໃນຊຸມປີຕໍ່ໜ້າ.
ຂ້າພະເຈົ້າຂໍແລກປ່ຽນຕໍ່ກອງປະຊຸມກ່ຽວກັບການສ້າງຫໍສະໝຸດທັນສະໄໝ ຢູ່ ສປປ ລາວ, ເຊິ່ງປະຈຸບັນແມ່ນພວມຢູ່ໃນຂັ້ນຕອນເລີ່ມຕົ້ນ ຂອງການສ້າງຖານຂໍ້ມູນ ແລະ ການພັດທະນາລະບົບ, ໃນຂະນະດຽວກັນນັ້ນ ການຄົ້ນຫາຂໍ້ມູນ ແລະ ບໍລິການການອ່ານ ໄດ້ໃຫ້ບໍລິການຢູ່ກັບສະຖານທີ່ເທົ່ານັ້ນ ເນື່ອງຈາກວ່າລະບົບອອນລາຍແມ່ນບໍ່ສາມາດເຂົ້າເຖິງຖານຂໍ້ມູນຕາມທີ່ຕ້ອງການໄດ້ເທື່ອ.
ເຖິງຢ່າງໃດກໍຕາມ, ສປປ ລາວ ໄດ້ເອົາໃຈໃສ່ພັດທະນາ ແລະ ປັບປຸງວຽກງານດັ່ງກ່າວ ດ້ວຍການຮ່ວມມືກັບບັນດາປະເທດເພື່ອນມິດຍຸດທະສາດໃນພາກພື້ນ, ເພື່ອຈັດຕັ້ງປະຕິບັດໂຄງການຕ່າງໆ ເຊັ່ນ: ໂຄງການສ້າງຖານຂໍ້ມູນໃບລານລາວ, ໂຄງການສົ່ງເສີມການອ່ານແບບດີຈີຕອນ, ໂຄງການສ້າງຖານຂໍ້ມູນຄຸ້ມຄອງຊັບສິນທາງດ້ານວັດທະນະທຳ ໃນ ສປປ ລາວແລະ ໂຄງການອື່ນໆ ຊຶ່ງຈະນຳໄປສູ່ ການຄຸ້ມຄອງ ແລະ ການບໍລິການທີ່ທັນສະໄໝ.
ສປປ ລາວ ພ້ອມແລ້ວທີ່ຈະເຮັດວຽກຮ່ວມກັບບັນດາປະເທດສະມາຊິກອາຊຽນ ແລະ ບັນດາປະເທດຄູ່ເຈລະຈາອາຊຽນ ໂດຍສະເພາະ ສປ ຈີນ ທີ່ເປັນຄູ່ຮ່ວມມືຍຸດທະສາດຮອບດ້ານ ທີ່ມີຄວາມກ້າວໜ້າທາງດ້ານເຕັກໂນໂລຊີ ແລະ ຊ່ຽວຊານດ້ານເຕັກນິກວິຊາການ.
ທ່ານ ນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວກ່າວໃນຄອນທ້າຍວ່າ: ເນື່ອງໃນໂອກາດອັນພິເສດນີ້, ຂ້າພະເຈົ້າຂໍແຈ້ງໃຫ້ຊາບວ່າ, ສປປ ລາວ ຈະເປີດປີທ່ອງທ່ຽວລາວ 2024 ດ້ວຍຫຼາຍກິດຈະກຳທ່ອງທ່ຽວທີ່ໜ້າສົນໃຈ, ຂ້າພະເຈົ້າເຊື່ອວ່າ ການບໍລິການລົດໄຟຄວາມໄວສູງລາວ-ຈີນຈະສາມາດອຳນວຍຄວາມສະດວກໃຫ້ແກ່ການຊຸກຍູ້ການແລກປ່ຽນການທ່ອງທ່ຽວໃນພາກພື້ນອາຊຽນ ແລະ ສາກົນ.
ຄ່ຽງຄູ່ກັບກິດຈະກຳປີທ່ອງທ່ຽວລາວ 2024 ສປປ ລາວ ຍັງຈະເປັນປະທານອາຊຽນ 2024, ດັ່ງນັ້ນ ຂ້າພະເຈົ້າ ສະເໜີມາຍັງທ່ານເພື່ອໃຫ້ການຮ່ວມມື ແລະ ການສະໜັບສະໜູນຈາກບັນດາປະເທດສະມາຊິກອາຊຽນ ແລະ ບັນດາປະເທດຄູ່ເຈລະຈາອາຊຽນ ໂດຍສະເພາະ ສປ ຈີນ ຕໍ່ການເປັນປະທານດັ່ງກ່າວ. ຂ້າພະເຈົ້າຫວັງວ່າຈະໄດ້ຕ້ອນຮັບບັນດາທ່ານ ທີ່ ສປປ ລາວ ໃນປີໜ້າ.
