ສປປ ລາວ ພະຍາຍາມຊຸກຍູ້ການຜະລິດກະສິກຳແບບຍືນຍົງ ແລະ ເພີ່ມທະວີການສົ່ງອອກຜະລິດຕະພັນກະສິກຳໄປຈີນ ຜ່ານທາງລົດໄຟ ລາວ-ຈີນ, ເປັນຂີດໝາຍບາດກ້າວສຳຄັນໃນຄວາມພະຍາຍາມຊຸກຍູ້ການສົ່ງອອກກະສິກຳ.
ຄວາມພະຍາຍາມດັ່ງກ່າວ ໄດ້ຮັບການຈັດຕັ້ງປະຕິບັດໂດຍກະຊວງກະສິກຳ ແລະ ປ່າໄມ້ ຮ່ວມມືກັບສູນຄົ້ນຄວ້າກະສິກຳສາກົນ ຂອງອົດສະຕຣາລີ (ACIAR) ແລະ ສະຖາບັນການເຕີບໂຕສີຂຽວ (GGGI) ເຊິ່ງເປັນສ່ວນໜຶ່ງຂອງໂຄງການ “ການປະເມີນນະໂຍບາຍ ແລະ ການປັບປຸງຕະຫຼາດ ສຳລັບການກະສິກຳແບບຍືນຍົງ ເຊື່ອມຕໍ່ທາງລົດໄຟ ລາວ-ຈີນ,” ທີ່ໄດ້ຮັບທຶນຈາກ ACIAR.
ກອງປະຊຸມສຳມະນາ ແລະ ປຶກສາຫາລືກ່ຽວກັບຂອບເຂດໂຄງການດັ່ງກ່າວ ໄດ້ຈັດຂຶ້ນເມື່ອບໍ່ດົນມານີ້ ຢູ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ພົມມີ ອິນທິຈັກ, ຮອງຫົວໜ້າກົມແຜນການ ແລະ ການຮ່ວມມື, ແລະ ຜູ້ຕາງໜ້າອົງການ GGGI ປະຈຳລາວ, ທ່ານ Rowan Fraser.
ໂຄງການດັ່ງກ່າວ ແມ່ນເພື່ອແນໃສ່ສ້າງຂໍ້ສະເໜີແນະດ້ານນະໂຍບາຍ ເພື່ອໃຫ້ລັດຖະບານລາວ ສາມາດນຳໃຊ້ທາງລົດໄຟລາວ-ຈີນ ໄດ້ຢ່າງເຕັມສ່ວນ ເພື່ອຊຸກຍູ້ການສົ່ງອອກກະສິກຳໄປຍັງຈີນ, ພ້ອມກັນນັ້ນ ກໍຊຸກຍູ້ການປະຕິບັດກະສິກຳແບບຍືນຍົງຢູ່ລາວ.
ຂໍ້ສະເໜີແນະນຳດ້ານນະໂຍບາຍໃນໂຄງການດັ່ງກ່າວ ຈະອີງໃສ່ການວິເຄາະລວມກ່ຽວກັບນະໂຍບາຍທີ່ມີຢູ່ແລ້ວ, ລະບົບການຜະລິດກະສິກຳຂອງລາວ ແລະ ຄວາມຕ້ອງການຂອງຕະຫຼາດຈີນ.
ຂໍ້ສະເໜີໃນກອງປະຊຸມດັ່ງກ່າວ ໄດ້ກຳນົດພາກສ່ວນສຳຄັນໃນຕ່ອງໂສ້ການສະໜອງເພື່ອການສົ່ງອອກ ແລະ ກວດກາລະບົບການຜະລິດຂອງສິນຄ້າທີ່ສໍາຄັນ. ຜົນການຄົ້ນຄວ້າໄດ້ຊີ້ໃຫ້ເຫັນບັນດາສິນຄ້າຕົ້ນຕໍທີ່ຖືກສົ່ງອອກໄປຍັງຈີນ, ລວມເຖິງຂໍ້ສັງເກດການຜະລິດຕະພັນກະສິກຳ ລາວ ຢູ່ຕະຫຼາດຈີນ ກໍໄດ້ປຶກສາຫາລືໃນກອງປະຊຸມ. ເຊິ່ງຄວາມເຂົ້າໃຈເຫຼົ່ານີ້ໄດ້ຖືກແບ່ງປັນກັບຜູ້ເຂົ້າຮ່ວມກອງປະຊຸມ.
ທ່ານ ພົມມີ ກ່າວວ່າ: “ປະເທດລາວມີຊື່ສຽງໂດ່ງດັງໃນການຜະລິດສິນຄ້າກະສິກຳ ທີ່ມີຄຸນນະພາບສູງທີ່ສາມາດແຂ່ງຂັນໃນຕະຫຼາດສາກົນໄດ້, ແຕ່ດ້ວຍເປັນປະເທດທີ່ບໍ່ມີຊາຍແດນຕິດກັບທະເລ ເຮັດໃຫ້ມີຂໍ້ຈຳກັດດ້ານການຂົນສົ່ງ, ເຊິ່ງທາງລົດໄຟລາວ-ຈີນ ສະໜອງໂອກາດອັນສຳຄັນເພື່ອຜ່ານຜ່າອຸປະສັກເຫຼົ່ານີ້ ແລະ ຊຸກຍູ້ການສົ່ງອອກຜະລິດຕະພັນກະເສດໄປຕະຫຼາດເຊັ່ນ ສປ ຈີນ”.
ອີງຕາມບົດລາຍງານຂອງ GGGI ສິນຄ້າທີ່ສຳຄັນໃນການສົ່ງອອກໄປຈີນລວມມີມັນຕົ້ນ, ຢາງພາລາ, ໝາກກ້ວຍ ແລະ ອ້ອຍ, ໃນຂະນະທີ່ລັດຖະບານທ້ອງຖິ່ນໄດ້ສະແດງຄວາມສົນໃຈຕໍ່ການສົ່ງອອກງົວ. ສ່ວນສິນຄ້າຂອງລາວເຊັ່ນ: ໝາກກ້ວຍ, ໝາກໂມ, ແລະ ຖົ່ວລຽນ ຖືວ່າແມ່ນສິນຄ້າສົ່ງອອກໄປຈີນມີຄຸນນະພາບສູງ ແລະ ເໝາະສົມກັບການສະໜອງຕາມລະດູການ.
ໃນປັດຈຸບັນຢູ່ໃນຂັ້ນຕອນການອອກແບບ, ໂຄງການດັ່ງກ່າວຈະຖືກຈັດຕັ້ງປະຕິບັດໂດຍຜ່ານຄວາມພະຍາຍາມຮ່ວມມືທີ່ປະກອບດ້ວຍ GGGI, ສະຖາບັນຄົ້ນຄ້ວາກະສິກໍາ ແລະ ປ່າໄມ້ແຫ່ງຊາດ, ມະຫາວິທະຍາໄລແຫ່ງຊາດ, ອົງການຄົ້ນຄວ້າວິທະຍາສາດ ແລະ ອຸດສາຫະກໍາ ແລະ ມະຫາວິທະຍາໄລກະສິກໍາ ພາກໃຕ້ຂອງຈີນ.
ທາງລົດໄຟແມ່ນສ່ວນໜຶ່ງຂອງຂໍ້ລິເລີ່ມ “ໜຶ່ງແລວທາງ ໜຶ່ງເສັ້ນທາງ” ຂອງຈີນ ແລະ ໄດ້ຊຸກຍູ້ການພັດທະນາການຂົນສົ່ງ, ການຄ້າ, ການທ່ອງທ່ຽວ ແລະ ອຸດສາຫະກຳອື່ນໆຢ່າງມີປະສິດທິຜົນ. ໃນ 5 ເດືອນຕົ້ນປີນີ້, ທາງລົດໄຟໄດ້ຂົນສົ່ງສິນຄ້າ 2,3 ລ້ານໂຕນ, ເພີ່ມຂຶ້ນ 31% ເມື່ອທຽບໃສ່ໄລຍະດຽວກັນຂອງປີກາຍ.
ຂ່າວ: ວຽງຈັນທາຍ
