ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ຍັງມີຜູ້ຕິດເຊື້ອພະຍາດໂຄວິດ19 ພຽງຄົນດຽວ ແຕ່ມີຜູ້ຕິດເຊື້ອໄຂ້ຍຸງລາຍເຖິງ 5,781 ຄົນ

ສະພາບການຕິດເຊື້ອພະຍາດໂຄວິດ19 ມາຮອດ ວັນທີ 2 ກັນຍາ 2020 ທົ່ວໂລກ ມີຜູ້ຕິດເຊື້ອທັງໝົດ 25,862,037 ຄົນ, ເພີ່ມຂຶ້ນ 242.232ຄົນ, ເສຍຊີວິດ 859.282ຄົນ, ໃນນີ້ ອາເມຣິກາມີຜູ້ຕິດເຊື້ອ 6ລ້ານກວ່າຄົນ, ເພີ່ມຂຶ້ນໃນມື້ດຽວເກືອບ 50.000ຄົນ, ເສຍຊີວິດ 187.881ຄົນ. ເບຼຊິນ ມີຜູ້ຕິດເຊື້ອເກືອບ 4ລ້ານຄົນ, ເສຍຊີວິດ 122.681ຄົນ, ອິນເດຍ ມີຜູ້ຕິດເຊື້ອເກືອບ 4ລ້ານຄົນ, ເສຍຊີວິດ 66.460ຄົນ.
ສະເພາະໃນກຸ່ມປະເທດສະມາຊິກອາຊຽນ ຟິລິປິນມີຜູ້ຕິດເຊື້ອຫລາຍເຖິງ 224.264ຄົນ, ຕິດເຊື້ອເພີ່ມຂຶ້ນ 3.445ຄົນ, ເສຍຊີວິດ 3.597ຄົນ. ອິນໂດເນເຊຍມີຜູ້ຕິດເຊື້ອ 177.571ຄົນ, ເພີ່ມຂຶ້ນ2.775ຄົນ ແລະສິງກະໂປ ມີຜູ້ຕິດເຊື້ອ 56.852ຄົນ.
ດຣ. ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນເຊົ້າວັນທີ 2 ກັນຍາ 2020 ທີ່ກະຊວງສາທາລະນະສຸກ ເຖິງສະພາບການຄວບຄຸມໂຄວິດ19 ຢູ່ ສປປ ລາວວ່າ: ຮອດເວລາ 17 ໂມງ ວັນທີ 1 ກັນຍາ 2020 ມີຜູ້ເດີນທາງເຂົ້າມາລາວທັງໝົດ 1,916 ຄົນ: ໃນນັ້ນຈຸດຜ່ານດ່ານ ລາວ-ໄທ 1,110 ຄົນ ມີແຮງງານລາວກັບມາແຕ່ໄທ 77 ຄົນ; ຈຸດຜ່ານດ່ານ ລາວ – ຈີນ 86 ຄົນ, ໃນນີ້ມີ ແຮງງານລາວ 54 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ; ຈຸດຜ່ານດ່ານ ລາວ – ຫວຽດນາມ 713 ຄົນ, ທັງໝົດ ແມ່ນຄົນຂັບລົດສົ່ງສິນຄ້າ.ເດີນທາງຜ່ານດ່ານ ລາວ-ມຽນມ້າ 7 ຄົນ, ທັງໝົດ ແມ່ນຄົນຂັບເຮືອ ແລະ ລູກເຮືອ ຂົນສົ່ງສິນຄ້າຜ່ານດ່ານບ້ານມອມ, ແຂວງບໍ່ແກ້ວ; ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະ ໄດ້ເກັບຕົວຢ່າງມາກວດ ແລ້ວນຳສົ່ງໄປຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ສະເພາະວັນທີ 1 ກັນຍາ 2020, ໄດ້ເກັບຕົວຢ່າງມາກວດວິເຄາະທັງໝົດ 236 ຄົນ, ໃນນັ້ນ ແຮງງານລາວມາແຕ່ໄທ 138 ຕົວຢ່າງ, ແຮງງານຈີນ 2 ຕົວຢ່າງ, ແຮງງານຫວຽດນາມ 86 ຕົວຢ່າງ ແລະ ບຸກຄົນທົ່ວໄປບໍ່ມີອາການ 10 ຕົວຢ່າງ. ຜົນກວດວິເຄາະທັງໝົດແມ່ນ ບໍ່ພົບເຊື້ອເພີ່ມ.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 1 ກັນຍາ 2020 ໄດ້ເກັບຕົວຢ່າງມາກວດທັງໝົດ 39,696 ຕົວຢ່າງ, ກວດພົບເຊື້ອສະສົມ 22 ຄົນ. ສ່ວນຄົນເຈັບຕິດເຊື້ອພະຍາດ COVID-19 ກໍລະນີທີ 22 ແມ່ນຍັງສືບຕໍ່ປີ່ນປົວຢູ່ໂຮງໝໍມິດຕະພາບ.
ໄປຄຽງຄູ່ກັບການຄວບຄຸມພະຍາດ ໂຄວິດ19 ແລ້ວ ກະຊວງສາທາລະນະສຸກຍັງໄດ້ເຝົ້າລະວັງພະຍາດໄຂ້ຍຸງລາຍ ຕື່ມອີກ ສະເພາະວັນທີ 1 ກັນຍາ 2020 ສປປ ລາວ ມີຜູ້ຕິດເຊື້ອເພີ່ມຂຶ້ນ 51 ກໍລະນີ ແລະ ມີຜູ້ເສຍຊີວິດອີກ 1 ຄົນ; ເປັນເພດຍິງ ອາຍຸ 21 ປີ, ຢູ່ບ້ານໂພນໄຊ, ເມືອງມະຫາໄຊ, ແຂວງຄຳມ່ວນ. ໃນວັນທີ 26 ສິງຫາ 2020, ຜູ້ກ່ຽວມາໂຮງໝໍແຂວງຄຳມ່ວນ ຍ້ອນມີອາການໄຂ້, ເຈັບຫົວ, ປວດຕົນໂຕ ແລະ ຮາກ ແພດຈຶ່ງໄດ້ຕິດຕາມອາການຢ່າງໃກ້ຊິດ ແລະ ທຳການຮັກສາເປັນແຕ່ລະໄລຍະ, ແຕ່ອາການຂອງຜູ້ກ່ຽວກໍ່ບໍ່ດີຂຶ້ນ ຄືມີອາການເຈັບທ້ອງແຮງ, ມີເລືອດອອກທາງຊ່ອງຄອດ, ຈືດມ້ານ, ແພດຈຶ່ງໄດ້ນຳສົ່ງຜູ້ກ່ຽວເຂົ້າຫ້ອງມໍລະສຸມ. ແຕ່ບໍ່ສາມາດຊ່ວຍຊີວິດຂອງຜູ້ກ່ຽວໄວ້ໄດ້ ຜົນການກວດທາງຫ້ອງວິເຄາະ ພົບວ່າຕິດເຊື້ອຈາກ ພະຍາດໄຂ້ຍຸງລາຍ.
ນັບແຕ່ວັນທີ 01/01/2020-01/09/2020 ມີຜູ້ຕິດເຊື້ອກໍລະນີສະສົມທັງໝົດ 5,781 ຄົນ ແຂວງທີ່ຫຼາຍກວ່າໝູ່ແມ່ນ ນະຄອນຫຼວງວຽງຈັນ 1,338 ຄົນ, ຖັດລົງມາແມ່ນ ບໍລິຄຳໄຊ 680 ຄົນ, ແຂວງວຽງຈັນ 606 ຄົນ ແລະ ບໍ່ແກ້ວ 571 ຄົນ). ຈຳນວນຜູ້ເສຍຊີວິດ ທັງໝົດ 11 ຄົນ ຄື: ນະຄອນຫຼວງ 4 ຄົນ, ບໍລິຄຳໄຊ 2 ຄົນ, ຄຳມ່ວນ 2 ຄົນ, ໄຊຍະບູລີ 1 ຄົນ, ຊຽງຂວາງ 1 ຄົນ ແລະ ສະຫວັນນະເຂດ 1 ຄົນ