ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ຍັງເຫລືອຄົນຕິດພະຍາດໂຄວິດ19 ພຽງຄົນດຽວ

ຄົນເຈັບທີ່ຕິດເຊື້ອພະຍາດໂຄວິດ19 ຈໍານວນ19ຄົນ ປົວດີແລ້ວ 18ຄົນ ຍັງເຫລືອພຽງ 1ຄົນ ທິ່ພວມສືບຕໍ່ປິ່ປົວຢູ່ໂຮງໝໍມິດຕະພາບ. ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 3 ມິຖຸນານີ້ ທີ່ສູນປະຕິບັດງານ ຄະນະສະເພາະກິດວ່າ:  ວັນທີ 2 ມິຖຸນາ ມີຜູ້ເດີນທາງເຂົ້າມາລາວ ມີທັງໝົດ 1,930 ຄົນ, ໃນນັ້ນຜ່ານດ່ານລາວໄທ 1,253 ຄົນ, ຜ່ານດ່ານລາວຈີນ 20 ຄົນ, ຜ່ານດ່ານລາວຫວຽດນາມ  657 ຄົນ, ທຸກຄົນໄດ້ແທກອຸນຫະພູມຮ່າງກາຍ ແລະ ກວດຫາອາການຜິດປົກກະຕິ, ບໍ່ພົບຜູ້ມີອາການເປັນໄຂ້, ພ້ອມທັງໄດ້ເກັບຕົວຢ່າງມາກວດແລ້ວນຳສົ່ງໄປຈຳກັດບໍລິເວນຢູ່ສະຖານທີ່ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ. ວຽກງານວິເຄາະ ວັນທີ 2 ມິຖຸນາ 2020, ໄດ້ເກັບຕົວຢ່າງມາກວດວິເຄາະທັງໝົດ 242 ຄົນ, ໃນນັ້ນ ມີແຮງງານລາວທີ່ກັບມາແຕ່ໄທ 237 ຄົນ, ກໍລະນີສົງໃສ 2 ຄົນ ແລະ ຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 3 ຄົນ ມາກວດຄືນເປັນຄັ້ງທີ 2 ຄືກໍລະນີທີ  7, 10 ແລະ 17 ຜົນກວດ ແຮງງານລາວ ແລະ ກໍລະນີສົງໃສທັງໝົດ ທີ່ກວດມື້ວານນີ້ ບໍ່ພົບເຊື້ອ. ສໍາລັບຄົນເຈັບນອນປິ່ນປົວຢູ່ໂຮງໝໍມິດຕະພາບ 3 ຄົນ ມາກວດຄັ້ງທີສອງ ແມ່ນໃຫ້ຜົນລົບ 2 ຄົນ ແລະ ບວກ 1 ຄົນ. ທ່ານພູທອນ ເມືອງປາກ ໄດ້ຕີລາຄາສະພາບການລະບາດຢູ່ປະເທດເຮົາ ແລະ ປະເທດທີ່ມີຊາຍແດນຕິດຈອດກັບປະເທດເຮົາ ແມ່ນຜ່ອນຄາຍລົງຫຼາຍແລ້ວ. ສະເພາະຢູ່ ສປປ ລາວ 52 ມື້ແລ້ວ ບໍ່ມີຜູ້ຕິດເຊື້ອໃໝ່, ຜູ້ຕິດເຊື້ອສະສົມ 19 ຄົນ ກໍ່ປິ່ນປົວດີ 18 ຄົນແລ້ວ ຍັງເຫຼືອ 1 ຄົນ ທີ່ຍັງຕິດຕາມຢູ່ໂຮງໝໍ. ໝາກຜົນອັນສຳຄັນເບື້ອງຕົ້ນນີ້ ຍ້ອນມີການນຳພາຊີ້ນຳທີດີຂອງການນຳຂັ້ນສູງພັກ-ລັດ ກໍ່ຄືອຳນາດການປົກຄອງທຸກຂັ້ນ, ຍ້ອນມີການຮ່ວມແຮງຮ່ວມໃຈຈາກພໍ່ແມ່ປະຊາຊົນບັນດາເຜົ່າ, ມີການສະໜັບສະໜູນຈາກປະເທດເພື່ອນມິດ, ອົງການຈັດຕັ້ງສາກົນ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງທາງສັງຄົມທຸກພາກສ່ວນ, ຊຶ່ງຈະເປັນບົດຮຽນອັນສຳຄັນໃຫ້ແກ່ພວກເຮົາໃນການກຳນົດນະໂຍບາຍ, ແຜນປະຕິບັດງານ ໃນຕໍ່ໜ້າ ເພື່ອສະກັດກັ້ນ ແລະ ແກ້ໄຂການລະບາດຂອງພະຍາດCOVID-19 ກໍ່ຄືພະຍາດຕິດຕໍ່ອື່ນໆ. ທ່ານພູທອນ ເມືອງປາກ ຕາງໜ້າຄະນະສະເພາະກິດ, ກອງເລຂາຄະນະສະເພາະກິດ ໄດ້ສະແດງຄວາມເຄົາລົບນັບຖຶ ຮູ້ບຸນຄຸນຢ່າງສູງ ຕໍ່ການນຳພັກລັດທີ່ໄດ້ເອົາໃຈໃສ່ຢ່າງໃກ້ສິດ ໃນການນຳພາຊີ້ນຳຢ່າງຕໍ່ເນື່ອງ;  ພ້ອມກັນນີ້ ທ່ານຍັງໄດ້ສະແດງຄວາມຂອບໃຈຢ່າງຈິງໃຈ ຕໍ່ທຸກພາກສ່ວນທີ່ໃຫ້ການຊ່ວຍເຫຼືອ ສະໜັບສະໜູນດ້ານງົບປະມານ ແລະ ວັດຖຸອຸປະກອນຮັບໃຊ້ໃຫ້ແກ່ວຽກງານປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19;  ແລະ ສະແດງຄວາມຍ້ອງຍໍຊົມເຊີຍ ຕໍ່ພໍ່ແມ່ປະຊາຊົນບັນດາເຜົ່າ, ທຸກພາກສ່ວນໃນສັງຄົມທີ່ໄດ້ເປັນເຈົ້າການປະກອບສ່ວນປະຕິບັດມາດຕະການ, ຄຳແນະນຳຕ່າງໆ ທີ່ຄະນະສະເພາະກິດວາງອອກ; ພ້ອມທັງສະແດງຄວາມຂອບໃຈຕໍ່ແພດໝໍ, ພະຍາບານ ທີ່ໄດ້ມີນໍ້າໃຈ, ມີຄວາມຮັບຜິດຊອບໃນການປິ່ນປົວ ຄົນເຈັບໃຫ້ຫາຍດີ.