ຄະນະຜູ້ເເທນຈາກ ສປປ ລາວ ນໍາໂດຍ ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ ພ້ອມດ້ວຍຜູ້ຕາງໜ້າຈາກ ກົມສົ່ງເສີມການລົງທຶນ ກະຊວງແຜນການ ແລະ ການລົງທຶນ, ກົມເເຜນການ ເເລະ ການຮ່ວມມື, ກະຊວງກະສິກຳ ແລະ ປ່າໄມ້ ແລະ ສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ເຂົ້າຮ່ວມກອງປະຊຸມທຸລະກິດ ອາຊຽນ-ອົສຕຣາລີ 2024 ໃນລະຫວ່າງ ວັນທີ 29-30 ສິງຫາ 2024 ທີ່ນະຄອນຊິດນີ ປະເທດອົສຕຣາລີ.
ກອງປະຊຸມ ມີບັນດາຜູ້ເຂົ້າຮ່ວມຈາກພາກລັດ ແລະ ພາກທຸລະກິດ ຂອງ 10 ປະເທດສະມາຊິກອາຊຽນ ແລະ ປະເທດ ອົສຕຣາລີ ລວມທັງໝົດຫຼາຍກວ່າ 300 ຄົນ.
ທ່ານ ສະຖາບັນດິດ ອິນສີຊຽງໃໝ່ ໄດ້ຂຶ້ນກ່າວສູນທອນພົດ ພາຍໃຕ້ຫົວຂໍ້: ທິດທາງໃໝ່ ແລະ ກາລະໂອກາດໃໝ່ ໂດຍໄດ້ເນັ້ນວ່າ: ປີ 2024 ເປັນປີແຫ່ງການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 50 ປີ ຂອງອົສຕຣາລີ ແລະ ອາຊຽນ ຊຶ່ງໄດ້ກາຍເປັນຂີດໝາຍອັນສໍາຄັນ ນັບແຕ່ອົສຕຣາລີໄດ້ກາຍເປັນຄູ່ເຈລະຈາ ຄັ້ງທໍາອິດ ຂອງອາຊຽນໃນປີ 1974 ພ້ອມທັງເປັນປີທີ່ ລາວ ແລະ ອົສຕຣາລີ ສະເຫຼີມສະຫຼອງ ສາຍພົວພັນທາງດ້ານການທູດ ຄົບຮອບ 72 ປີ. ສປປ ລາວ ມີຄວາມອາດສາມາດບົ່ມຊ້ອນ ແລະ ມີຄວາມພ້ອມໃນການເປັນສູນກາງການລົງທຶນ ແລະ ການຄ້າຂອງອາຊຽນ ໃນຂະແໜງບຸລິມະສິດເປັນຕົ້ນ: ຂະແໜງກະສິກໍາສະອາດ, ພະລັງງານທົດແທນ, ການພັດທະນາພື້ນຖານໂຄງລ່າງ, ການຂົນສົ່ງ ແລະ ໂລຈີສຕິກ, ນະວັດຕະກໍາດີຈີຕອນ, ສາທາລະນະສຸກ ແລະ ການສຶກສາ ຊຶ່ງສອດຄ່ອງກັບຂະແໜງການບຸລິມະສິດຂອງຍຸດທະສາດດ້ານເສດຖະກິດໃນພາກພື້ອາຊີຕາເວັນອອກສ່ຽງໃຕ້ຂອງອົດສະຕາລີ (Australia’s Southeast Asia Economic Strategy to 2040).
ຈາກນັ້ນ, ທ່ານຮອງລັດຖະມົນຕີ ຍັງໄດ້ຍົກໃຫ້ຮູ້ຕື່ມ ເຖິງແມ່ນວ່າສະພາບການຂອງພາກພື້ນ ແລະ ສາກົນ ມີການຜັນແປຢ່າງສັບສົນ ແລະ ການລົງທຶນຂອງໂລກມີທ່າອ່ຽງຫຼຸດລົງ ແຕ່ການລົງທຶນຂອງຕ່າງປະເທດໃນອາຊຽນ ແລະ ສປປ ລາວ ໃນປີ 2023 ຍັງສືບຕໍ່ເພີ່ມຂຶ້ນ. ສະເພາະ ສປປ ລາວ ມູນຄ່າອະນຸມັດການລົງທຶນຂອງເອກະຊົນໃນປີ 2023 ບັນລຸ 4 ຕື້ໂດລາ ລື່ນຄາດໝາຍຂອງແຜນພັດທະນາເສດຖະກິດ-ສັງຄົມແຫ່ງຊາດ ແລະ ເພີ່ມຂຶ້ນເກືອບ 2 ເທົ່າ ທຽບຈາກປີ 2022. ໝາກຜົນດັ່ງກ່າວແມ່ນຍ້ອນຄວາມເອົາໃສ່ຂອງລັດຖະບານໃນການປັບປຸງພື້ນຖານໂຄງລ່າງໃນການເຊື່ອມໂຍງ-ເຊື່ອມຈອດ ເພື່ອຮອງຮັບການລົງທຶນ, ການສ້າງບັນດາຍຸດທະສາດ ແລະ ນະໂຍບາຍ ເພື່ອຮອງຮັບບັນດາທ່າແຮງໃນການລົງທຶນ ຂອງ ສປປ ລາວ ແລະ ປັບປຸງສະພາບແວດລ້ອມໃນການດຳເນີນທຸລະກິດ ແລະ ການລົງທຶນ ໃຫ້ມີຄວາມສະດວກຂຶ້ນ, ພ້ອມທັງສະທ້ອນເຖິງຄວາມເຊື່ອໝັ້ນ ຂອງນັກລົງທຶນຕໍ່ກັບທ່າແຮງ ແລະ ສະຖຽນລະພາບ ຂອງ ສປປ ລາວ. ຄະນະຜູ້ເເທນຂອງລາວ ໄດ້ນຳສະເໜີທ່າແຮງຂອງ ສປປ ລາວ ຕໍ່ກອງປະຊຸມ ຊຶ່ງໄດ້ອະທິບາຍກ່ຽວກັບ ຂັ້ນຕອນການອະນຸມັດການລົງທຶນ ແລະ ນະໂຍບາຍສົ່ງເສີມການລົງທຶນຂອງລາວ, ກາລະໂອກາດ ເເລະ ທ່າເເຮງ ຂອງບັນດາຂະແໜງການບຸລິມະສິດ ລວມເຖິງຂະແໜງກະສິກຳສະອາດ ແລະ ການຊື້-ຂາຍກາກບອນ (Carbon Credit) ທີ່ມີການຂະຫຍາຍຕົວໄວ ແລະ ສອດຄ່ອງກັບທ່າອ່ຽງການພັດທະນາຂອງໂລກທາງດ້ານຄວາມໝັ້ນຄົງ ທາງດ້ານສະບຽງອາຫານ, ການພັດທະນາຕາມທິດສີຂຽວ ແລະ ຍືນຍົງ. ພິເສດ ສະພາອຸດສາຫະກຳ ແລະ ການຄ້າແຫ່ງຊາດ ລາວ ແລະ ສະພາການຄ້າອົສຕຣາລີ ປະຈຳລາວ ໄດ້ແລກປ່ຽນບົດຮຽນກ່ຽວກັບທ່າແຮງ ແລະ ຜົນສຳເລັດ ຂອງພາກເອກະຊົນ ໃນການດຳເນີນທຸລະກິດ ແລະ ລົງທຶນ ຢູ່ໃນ ສປປ ລາວ.
ຄະນະຜູ້ແທນຂອງລາວ ຍັງໄດ້ພົບປະກັບ ທ່ານ ດອນ ຟາເຣວ ລັດຖະມົນຕີກະຊວງການຄ້າ ປະເທດອົສຕຣາລີ ຊຶ່ງໄດ້ປຶກສາຫາລືກ່ຽວກັບ ທ່າແຮງດ້ານການຄ້າ-ການລົງທຶນ ລະຫວ່າງ ລາວ ແລະ ອົດສະຕຣາລີ ແລະ ຍົກໃຫ້ເຫັນວ່າ ບໍລິສັດຂອງອົສຕຣາລີ ໄດ້ມີຄວາມສົນໃຈຫຼາຍຂຶ້ນ ໃນການລົງທຶນ ຢູ່ໃນ ສປປ ລາວ ໂດຍສະເພາະ ໃນຂະແໜງກະສິກຳສະອາດ, ແຮ່ທາດ ແລະ ພະລັງງານ.
ຂ່າວ-ພາບ: ກະຊວງແຜນການ
