ສະຫງວນລິຂະສິດ © ສະຖານນີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ສປປ ລາວ ພົບຜູ້ຕິດເຊື້ອໂຄວິດ-19 ເພີ່ມອີກ 3 ຄົນ ຈາກຫຼວງພະບາງ 2 ຄົນ ແລະ ນະຄອນຫຼວງວຽງຈັນ 1 ຄົນ

ມື້ນີ້ ວັນທີ 26 ມີນາ 2020 ເວລາ 15:00 ໂມງ, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດ ໂຄວິດ-19 ໄດ້ພິທີຖະແຫຼງຂ່າວຕໍ່ສື່ມວນຊົນ ໂດຍທ່ານຮອງສາດສະດາຈານ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດດັ່ງກ່າວ ໄດ້ກ່າວວ່າ: ມາຮອດວັນທີ 25 ມິນາ 2020, ການກວດວິເຄາະຊອກຫາເຊື້ອ ແມ່ນມີທັງໝົດ 33 ກໍລະນີ ແລະ ພົບຜູ້ຕິດເຊື້ອພະຍາດໂຄວິດ-19 ມີ 3 ຄົນດ້ວຍກັນຄື:

ຜູ້ທີ 1: ເພດຊາຍ ອາຍຸ 42 ປີ, ຢູ່ບ້ານປ່ອງຄຳ, ນະຄອນຫຼວງພະບາງ, ອາຊີບຂັບລົດ ຂັບລົດແຂກທ່ອງທ່ຽວ ຢູ່ແຂວງຫຼວງພະບາງ

ຜູ້ທີ 2: ເພດຊາຍ ອາຍຸ 52 ປີ, ຢູ່ບ້ານ ວິຊຸນ, ນະຄອນຫຼວງພະບາງ, ອາຊີບຂັບລົດ ຂັບລົດແຂກທ່ອງທ່ຽວ ຢູ່ແຂວງຫຼວງພະບາງ,

ແລະ ຜູ້ທີ 3: ເພດຊາຍ 41 ປີ ຢູ່ບ້ານຈຳປາ, ເມືອງສີໂຄດຕະບອງ ນະຄອນຫຼວງວຽງຈັນ, ໄດ້ຕິດເຊື້ອມາຈາກການສຳຜັດຜູ້ຕິດເຊື້ອຄົນທີ 3.

ທ່ານຮອງສາດສະດາຈານ ປອ ພູທອນ ເມືອງປາກ ຍັງໄດ້ກ່າວຕື່ມອີກວ່າ: ມາຮອດປະຈຸບັນ ໄດ້ມີການກວດຄົ້ນຫາເຊື້ອ ຈາກທັງໝົດ 181 ກໍລະນີ, ແລະ ພົບຜູ້ຕິດເຊື້ອພະຍາດ ໂຄວິດ-19 ທັງໝົດ 6 ກໍລະນີ.

ພ້ອມກັນນີ້, ກໍ່ຍັງໄດ້ໄປຕິດຕາມຜູ້ທີ່ໄດ້ສຳພັດ-ຢູ່ໃກ້ຊິດກັບຜູ້ຕິດເຊື້ອພະຍາດ ໂຄວິດ-19, ເພື່ອນຳເຂົ້າມາກວດຫາເຊື້ອທັງໝົດ 189 ຄົນ; ສ່ວນຜູ້ຕິດເຊື້ອ ຢູ່ນະຄອນຫຼວງວຽງຈັນ ປະຈຸບັນແມ່ນໄດ້ນຳສົ່ງໄປຮັບການປິ່ນປົວຢູ່ໂຮງໝໍມິດຕະພາບ 150 ຕຽງ, ໂດຍຜູ້ກ່ຽວມີອາການຊົງຕົວຂັ້ນເບົາບາງ ແລະ ໄດ້ຮັບການປິ່ນປົວຕາມຫຼັກວິຊາການແລ້ວ. ສ່ວນອີກສອງຄົນທີ່ກວດພົບຢູ່ແຂວງຫຼວງພະບາງນັ້ນ ແມ່ນໄດ້ນຳສົ່ງໄປປິ່ນປົວຢູ່ໂຮງໝໍຫຼວງພະບາງ; ໂດຍອາການຂອງທັງສອງຄົນ ແມ່ນຢູ່ຂັ້ນເບົາບາງ ແລະໄດ້ຮັບການປິ່ນປົວຕາມຫຼັກວິຊາການທຸກຢ່າງເຊັ່ນດຽວກັນ.

ທ່ານຮອງສາດສະດາຈານ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ແລະ ຜູ້ປະຈຳການຄະນະສະເພາະກິດດັ່ງກ່າວ ຍັງໄດ້ແນະນຳໃຫ້ຜູ້ທີ່ເຄີຍໄດ້ໃກ້ຊິດ ແລະ ສຳຜັດກັບກໍລະນີຜູ້ຕິດເຊື້ອທັງໝົດເຫລົ່ານີ້ ແມ່ນຕ້ອງໄດ້ຕິດຕາມ ແລະ ແຈ້ງໃຫ້ພາກສ່ວນທີ່ກ່ຽວຂ້ອງ ແລະ ອຳນາດການປົກຄອງບ້ານ ຊ່ວຍຕິດຕາມຢ່າງໃກ້ຊິດ ແລະ ແນະນຳໃຫ້ປະຕິບັດຕາມມາດຕະການຈຳກັດບໍລິເວນຕົນເອງຢ່າງເຂັ້ມງວດ; ຖ້າມີອາການຜິດປົກກະຕິ ຫຼື ຕ້ອງການຂໍ້ມູນ ຫລື ລາຍລະອຽດເພີ່ມຕື່ມກ່ຽວກັບພະຍາດດັ່ງກ່າວ, ສາມາດຕິດຕໍ່ສອບຖາມ ຜ່ານໝາຍເລກໂທລະສັບສາຍດ່ວນ 166 ໄດ້ຕະຫຼອດເວລາ.