ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ມີຜູ້ຕິດເຊື້ອໂຄວິດ19 ສະສົມທັງໝົດ 22 ຄົນ, ປົວດີແລ້ວ 19 ຄົນ, ພວມປິ່ນປົວຢູ່ໂຮງໝໍມິດຕະພາບ 3 ຄົນ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນເຊົ້າວັນທີ 17 ສິງຫາ 2020 ເຖິງສະພາບການຄວບຄຸມພະຍາດໂຄວິດ 19 ຢູ່ ສປປ ລາວວ່າ: ມາຮອດວັນທີ 17 ສິງຫາ 2020, ທົ່ວໂລກມີການລາຍງານການລະບາດ ທັງໝົດ 213 ປະເທດ; ມີຜູ້ຕິດເຊື້ອພະຍາດ COVID-19 ທັງໝົດ 21,813,235 ຄົນ; ເສຍຊິວິດ 772,624 ຄົນ, ປີ່ນປົວດີ 14,547,372 ຄົນ. ຢູ່ຂົງເຂດອາຊີ ແມ່ນປະເທດອິນເດຍ ທີ່ມີທ່າອ່ຽງ ໃນການຕິດເຊື້ອ COVID-19 ເພິ່ມຂຶ້ນ, ຈຳນວນຜູ້ຕິດເຊື້ອ ມື້ດຽວສູງເຖິງ 58,108 ຄົນ; ໃນບັນດາກຸ່ມປະເທດອາຊຽນ ມາຮອດວັນທີ 17 ສິງຫາ 2020 ມີຜູ້ຕິດເຊື້ອພະຍາດ COVID-19 ຈໍານວນ 370,900 ຄົນ ແລະ ເສຍຊີວິດ 9,058 ຄົນ.
ສໍາລັບວຽກງານການເຝົ້າລະວັງ COVID-19 ຢູ່ ສປປ ລາວ ຮອດ 17 ໂມງ ວັນທີ 16 ສິງຫາ 2020 ທົ່ວປະເທດມີຜູ້ເດີນທາງເຂົ້າມາ ລາວ ທັງໝົດ 2,062 ຄົນ: ໃນນັ້ນຈຸດຜ່ານດ່ານລາວ-ໄທ 1,315 ຄົນ, ມີແຮງງານລາວກັບມາແຕ່ໄທ 71 ຄົນ; ຈຸດຜ່ານດ່ານລາວ – ຈີນ 15 ຄົນ, ມີແຮງງານລາວ 5 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ;
ຈຸດຜ່ານດ່ານລາວ – ຫວຽດນາມ 731 ຄົນ, ໃນນີ້ ມີນັກສຶກສາລາວ 6 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ ;ຈຸດຜ່ານດ່ານ ລາວ-ກຳປູເຈຍ 1 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະ ໄດ້ເກັບຕົວຢ່າງມາກວດ.ແລ້ວນຳສົ່ງໄປຫາສະຖານທີ່ ຈຳກັດບໍລິເວນ ທີ່ທາງການກຳນົດໄວ້ຈົນກວ່າຈະຄົບກຳນົດ 14 ວັນ.
ວຽກງານກວດວິເຄາະຫາຜູ້ຕິດເຊື້ອພະຍາດ: ວັນທີ 16 ສິງຫາ 2020, ໄດ້ເກັບຕົວຢ່າງມາກວດວິເຄາະທັງໝົດ 322 ຄົນ, ໃນນັ້ນ ແຮງງານລາວມາແຕ່ໄທ 215 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 107 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອໃໝ່; ແຕ່ເດືອນມັງກອນ ຮອດ ວັນທີ 16 ສິງຫາ 2020 ໄດ້ເກັບຕົວຢ່າງມາກວດທັງໝົດ 34,386 ຕົວຢ່າງ, ກວດພົບເຊື້ອສະສົມ 22 ຄົນ.
ນອກຈາກເຝົ້າລະວັງ ແລະຄວບຄຸມພະຍາດໂຄວິດ19 ແລ້ວ ກະຊວງສາທາລະນະສຸກ ຍັງໄດ້ເອົາໃຈໃສ່ເຝົ້າລະວັງ ສະພາບການລະບາດຂອງພະຍາດໄຂ້ຍຸງລາຍ ຕື່ມອີກ ; ສະເພາະວັນທີ 16 ສິງຫາ 2020 ສປປ ລາວ ມີຜູ້ຕິດເຊື້ອ ພະຍາດໄຂ້ຍຸງລາຍທັງໝົດ 24 ກໍລະນີ;
ນັບແຕ່ວັນທີ 01/01/2020-16/08/2020 ທົ່ວປະເທດມີລາຍງານຜູ້ຕິດເຊື້ອໄຂ້ຍຸງລານກໍລະນີສະສົມທັງໝົດ 5,025 ຄົນ, ແຂວງທີ່ມີການລາຍງານຫຼາຍກວ່າໝູ່ແມ່ນ ນະຄອນຫຼວງວຽງຈັນ 1,154 ຄົນ, ແຂວງວຽງຈັນ 563 ກໍລະນີ ແລະ ບໍລິຄຳໄຊ 595 ກໍລະນີ. ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີ ທັງໝົດ 9 ຄົນ ໃນນັ້ນນະຄອນຫຼວງວຽງຈັນ 4 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະ ຊຽງຂວາງ 1 ຄົນ.