ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສປປ ລາວ ມີຜູ້ເສຍຊີວິດຍ້ອນພະຍາດໄຂ້ຍຸງລາຍ 7ຄົນ

ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນເຊົ້າວັນທີ 30 ມິຖຸນານີ້ວ່າ: ມາຮອດວັນທີ 30 ມິຖຸນາ 2020, ທົ່ວໂລກມີການລາຍງານການລະບາດ ທັງໝົດ 213 ປະເທດ ມີຜູ້ຕິດເຊື້ອພະຍາດ COVID-19 ທັງໝົດ  10,389,779 ຄົນ,   ເສຍຊິວິດ 507,370 ຄົນ, ປີ່ນປົວດີ 5,645,775 ຄົນ, ໃນນັ້ນ ສຫະລັດອາເມຣິກາ ຜູ້ຕິດເຊື້ອ 2.640.389 ຄົນ, ເສຍຊີວິດ 128.235 ຄົນ, ເບຼຊິນ ຜູ້ຕິດເຊື້ອ 1.368.195 ຄົນ, ເສຍຊີວິດ 58.314ຄົນ, ຣັດເຊຍ ຜູ້ຕິດເຊື້ອ 641.156ຄົນ,  ເສຍຊີວິດ 9.166ຄົນ, ອິນເດຍ ຜູ້ຕິດເຊື້ອ 567.536ຄົນ.

ການເຝົ້າລະວັງ COVID-19 ຢູ່ ສປປ ລາວ ຮອດ 17 ໂມງ ວັນທີ 29 ມິຖຸນາ 2020 ທົ່ວປະເທດມີຜູ້ເດີນທາງເຂົ້າ ສປປ ລາວ ທັງໝົດ 1,800 ຄົນ, ໃນນັ້ນຜ່ານດ່ານລາວ-ໄທ 1,145 ຄົນ ມີແຮງງານລາວກັບມາແຕ່ໄທ 178 ຄົນ, ຜ່ານດ່ານລາວ – ຈີນ 5 ຄົນ ທັງໝົດ ແມ່ນຄົນຂັບລົດສົ່ງສິນຄ້າ ,ຜ່ານດ່ານລາວ – ຫວຽດນາມ 465 ຄົນ ໃນນັ້ນມີນັກສືກສາລາວ 22 ຄົນ, ເຫຼືອນັ້ນແມ່ນຄົນຂັບລົດສົ່ງສິນຄ້າ, ເດີນທາງຜ່ານສະໜາມບິນສາກົນວັດໄຕ 185 ຄົນ, ທັງໝົດ ແມ່ນເດີນທາງມາຈາກ ສປ ຈີນ ຄົນຈີນ 155 ຄົນ, ຄົນລາວ 4 ຄົນ ແລະ ຄົນຕ່າງປະເທດ 26 ຄົນ, ທຸກຄົນໄດ້ແທກອຸນຫະພູມຮ່າງກາຍ, ແລະເກັບຕົວຢ່າງມາກວດ ວິເຄາະຫາເຊື້ອ ແລ້ວສົ່ງໄປ​ຫາສະຖານທີ່ ຈຳກັດບໍລິເວນຈົນກວ່າຈະຄົບກຳນົດ 14 ວັນ.

ການວິເຄາະ ແລະກວດຫາເຊື້ອ ມື້ຜ່ານມາ ໄດ້ເກັບຕົວຢ່າງມາກວດວິເຄາະທັງໝົດ 457 ຄົນ, ໃນນັ້ນ ມີ ແຮງງານລາວກັບມາແຕ່ໄທ 240 ຄົນ, ແຮງງານຈີນ 170 ຄົນ ແລະ ບຸກຄົນທົ່ວໄປ 47 ຄົນ , ຜົນກວດທັງໝົດແມ່ນ ບໍ່ພົບເຊື້ອ (79 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ດຣ. ສີສະຫວາດ ສຸດທານີລະໄຊ ໃຫ້ຮູ້ເຖິງວຽກງານຄວບຄຸມການລະບາດຂອງພະຍາດໄຂ້ຍຸງລາຍວ່າ: ວັນທີ 29 ມີຖຸນາ 2020  ສປປ ລາວ ມີຜູ້ຕິດເຊື້ອເພີ່ມຂຶ້ນ  30 ກໍລະນີ ແລະ ມີຜູ້ເສຍຊີວິດອີກ 1 ຄົນ. ນັບແຕ່ວັນທີ 1 ມັງກອນ ເປັນຕົ້ນມາ ມີຜູ້ຕິດເຊື້ອກໍລະນີສະສົມທັງໝົດ 2,253 ຄົນ ໃນນັ້ນນະຄອນຫຼວງວຽງຈັນ ມີ 514 ຄົນ, ແຂວງ ວຽງຈັນ 305 ກໍລະນີ, ບໍລິຄຳໄຊ 263 ກໍລະນີ  ແລະ ແຂວງອັດຕະປື 230 ກໍລະນີ.

ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີ ທັງໝົດ 7 ຄົນ (ນະຄອນຫຼວງວຽງຈັນ 3 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ ແລະ ໄຊຍະບູລີ 1 ຄົນ).