ສປປ ລາວ ສະແດງຄວາມພາກພູມໃຈໃນການເຂົ້າເປັນສະມາຊິກ ຂອງສະຫະພັນອາຫານໃນໂຮງຮຽນ ຊຶ່ງເປັນສະຫະພັນລະດັບສາກົນ ທີ່ໄດ້ເອົາໃຈໃສ່ຮ່ວມກັນເພື່ອເສີມສ້າງຄວາມເຂັ້ມແຂງ ດ້ານໂພຊະນາການ, ການສຶກສາ ແລະ ສະຫວັດດີການຂອງເດັກໂດຍຜ່ານແຜນງານອາຫານໃນໂຮງຮຽນແບບຄົບວົງຈອນ. ບາດກ້າວອັນສຳຄັນດັ່ງກ່າວສະທ້ອນໃຫ້ເຫັນຄວາມມຸ່ງໝັ້ນຂອງລັດຖະບານລາວ ຢ່າງຕໍ່ເນື່ອງໃນການປັບປຸງດ້ານສຸຂະພາບ ແລະ ການສຶກສາຂອງເດັກນ້ອຍໃນຂອບເຂດທົ່ວປະເທດ.
ພິທີລົງນາມໄດ້ຈັດຂຶ້ນໃນວັນທີ 4 ກັນຍານີ້ ທີ່ໂຮງແຮມຄຣາວພາຊາ ນະຄອນຫຼວງວຽງຈັນ, ຕາງໜ້າລັດຖະບານລາວ ໂດຍທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ນາງ ຊີວແລັງ ຊູອອກ ເອກອັກຄະລັດຖະທູດຝຣັ່ງ ປະຈຳ ສປປ ລາວ, ແຂກຖືກເຊີນ ຈາກພາກລັດ-ອົງການຈັດຕັ້ງສາກົນ. ການເຂົ້າຮ່ວມສະຫະພັນດັ່ງກ່າວ, ສປປລາວ ພ້ອມດຽວກັນກັບອີກເກືອບ100 ປະເທດໃນທົ່ວໂລກແມ່ນມີຈຸດມຸ່ງໝາຍທີ່ສອດຄ່ອງກັນໃນການຂະຫຍາຍ ແລະ ປັບປຸງວຽກງານອາຫານໃນໂຮງຮຽນ ເພື່ອເປັນການລົງທຶນທີ່ມີຄວາມໝາຍສຳຄັນໃຫ້ແກ່ເດັກນ້ອຍໃນອະນາຄົດ. ຈຸດປະສົງຂອງສະຫະພັນ ແມ່ນເພື່ອຮັບປະກັນວ່າເດັກນ້ອຍທຸກຄົນສາມາດເຂົ້າເຖິງອາຫານທີ່ມີໂພຊະນາການ ໃນໂຮງຮຽນພາຍໃນປີ 2030, ໂດຍໃຫ້ການສະໜັບສະໜູນເພື່ອບັນລຸເປົ້າໝາຍການພັດທະນາແບບຍືນຍົງ ຂອງສະຫະປະຊາຊາດ (SDGs), ໂດຍສະເພາະເປົ້າໝາຍທີ 2 (ລຶບລ້າງຄວາມອຶດຫິວ) ແລະເປົ້າໝາຍທີ 4 (ຮັບປະກັນການສຶກສາໃຫ້ມີຄຸນນະພາບ).
ການເຂົ້າຮ່ວມເປັນສະມາຊິກສະຫະພັນອາຫານໃນໂຮງຮຽນ ຂອງ ສປປ ລາວ ຖືເປັນຂີດໝາຍອັນສຳຄັນຂອງປະເທດໃນການປັບປຸງການບັນລຸເປົ້າໝາຍດ້ານການສຶກສາ ໂດຍຜ່ານຜົນການຮຽນທີ່ເພີ່ມຂຶ້ນ, ພ້ອມດຽວກັນກັບການຫຼຸດຜ່ອນຄວາມສ່ຽງຕໍ່ກັບການຂາດສານອາຫານຂອງເດັກນ້ອຍ. ຫຼາຍກວ່າ 33% ຂອງເດັກນ້ອຍໃນ ສປປ ລາວ ຍັງປະສົບກັບບັນຫາການຂາດສານອາຫານແບບຊໍ້າເຮື້ອ ຊຶ່ງສົ່ງຜົນກະທົບຕໍ່ການພັດທະນາທາງດ້ານສະຕິປັນຍາ ແລະ ຜົນການຮຽນຂອງເຂົາເຈົ້າ. ປັດຈຸບັນແຜນງານສົ່ງເສີມອາຫານທ່ຽງໃນໂຮງຮຽນ ກວມເອົາປະມານ 25% ຂອງໂຮງຮຽນປະຖົມທັງໝົດໃນທົ່ວປະເທດ ຊຶ່ງໃນນັ້ນມີເດັກນ້ອຍປະມານ 250.000 ຄົນ ໄດ້ຮັບຜົນປະໂຫຍດຈາກວຽກງານດັ່ງກ່າວ. ໃນຖານະທີ່ເປັນສະມາຊິກໃໝ່ຂອງສະຫະພັນອາຫານໃນໂຮງຮຽນ, ສປປ ລາວ ຈະສຸມໃສ່ການສົ່ງເສີມ ແລະ ການຂະຫຍາຍແຜນງານສົ່ງເສີມອາຫານທ່ຽງໃນໂຮງຮຽນ ດ້ວຍການຮ່ວມມືກັບບັນດາຄູ່ຮ່ວມພັດທະນາທັງພາຍໃນ ແລະ ຕ່າງປະເທດ ເພື່ອປັບປຸງ ແລະ ພັດທະນາແຜນງານໃຫ້ມີຄວາມຍືນຍົງ ແລະ ຕອບສະໜອງຄວາມຕ້ອງການດ້ານສານອາຫານຂອງນັກຮຽນ, ພ້ອມກັນນັ້ນກໍຈະສົ່ງເສີມການສະໜັບສະໜູນການຜະລິດກະສິກຳ ແລະ ເສດຖະກິດທ້ອງຖິ່ນອີກດ້ວຍ.
ໃນການເຂົ້າຮ່ວມສະຫະພັນອາຫານໃນໂຮງຮຽນ, ສປປ ລາວ ມີຈຸດປະສົງເພື່ອເປີດໂອກາດໃນການແລກປ່ຽນປະສົບການ ແລະ ນຳໃຊ້ຄວາມຊຳນິຊຳນານ, ຊັບພະຍາກອນ ແລະ ໝູນໃຊ້ບົດຮຽນທີ່ດີຂອງສາກົນເພື່ອແກ້ໄຂບັນຫາ ແລະ ສິ່ງທ້າທາຍຂອງ ສປປ ລາວ.
ທ່ານ ພຸດ ສິມມາລາວົງ ໄດ້ກ່າວວ່າ: “ການເຂົ້າຮ່ວມເປັນສະມາຊິກຂອງສະຫະພັນອາຫານໃນໂຮງຮຽນແມ່ນບາດກ້າວອັນສຳຄັນຕໍ່ກັບຍຸດທະສາດແຫ່ງຊາດຂອງປະເທດໃນການປັບປຸງສຸຂະພາບ ແລະ ການສຶກສາຂອງເດັກ. ການໃຫ້ອາຫານທີ່ມີໂພຊະນາການໃນໂຮງຮຽນແມ່ນມີຄວາມຈໍາເປັນ ບໍ່ພຽງແຕ່ເພື່ອເຮັດໃຫ້ນັກຮຽນມີສຸຂະພາບແຂງແຮງເທົ່ານັ້ນ, ແຕ່ຍັງເຮັດໃຫ້ເຂົາເຈົ້າບັນລຸຜົນສໍາເລັດດ້ານການຮຽນຮູ້ ແລະ ກາຍເປັນຊັບພະຍາກອນມະນຸດທີ່ມີຄຸນນະພາບ ປະກອບສ່ວນເຂົ້າໃນການພັດທະນາປະເທດຊາດ. ພວກເຮົາຫວັງວ່າຈະເຮັດວຽກຮ່ວມກັບຄູ່ຮ່ວມງານໃນລະດັບສາກົນ ແລະ ພາກພື້ນເພື່ອສ້າງອະນາຄົດທີ່ສົດໃສສໍາລັບເດັກນ້ອຍຂອງພວກເຮົາ.”
ທ່ານ ນາງ ຊີວແລັງ ຊູອອກ ໄດ້ເນັ້ນຢ້ຳວ່າ: “ລັດຖະບານຝຣັ່ງ ມີຄວາມດີໃຈຢ່າງຍິ່ງທີ່ ສປປ ລາວ ເຂົ້າເປັນສະມາຊິກສະຫະພັນອາຫານໃນໂຮງຮຽນ ເພາະວ່າລັດຖະບານຝຣັ່ງໄດ້ມີສ່ວນຮ່ວມໃນການສະໜັບສະໜູນໃນການເຂົ້າເປັນສະມາຊິກ. ສປປ ລາວ ແມ່ນໜຶ່ງໃນບັນດາປະເທດບູລິມະສິດ ຂອງລັດຖະບານຝຣັ່ງໃນການປັບປຸງວຽກງານດ້ານໂພຊະນາການເນື່ອງຈາກລັດຖະບານລາວ ໄດ້ຖືເອົາວຽກອາຫານທ່ຽງໃນໂຮງຮຽນເປັນວຽກບູລິມະສິດອັນໜຶ່ງ ເພື່ອສ້າງເງື່ອນໄຂໃຫ້ແກ່ການພັດທະນາປະເທດ ແລະ ປະຊາຊົນ. ດັ່ງນັ້ນ, ລັດຖະບານຝຣັ່ງ ຈຶ່ງໄດ້ໃຫ້ການສະໜັບສະໜູນໃນການປັບປຸງຕໍ່ກັບບັນຫາຄວາມບໍ່ໝັ້ນຄົງດ້ານສະບຽງອາຫານ ແລະ ການຂາດສານອາຫານໃນ ສປປ ລາວ ໂດຍຜ່ານອົງການອາຫານໂລກນັບແຕ່ປີ 2019 ເປັນຕົ້ນມາ, ດ້ວຍການປະກອບສ່ວນເປັນຈຳນວນງົບປະມານ 3,3 ລ້ານເອີໂຣ.” ພິທີລົງນາມ ໄດ້ມີຂຶ້ນໃນວັນທີ 4 ກັນຍານີ້ ທີ່ໂຮງແຮມ ຄຣາວພາຊາ ນະຄອນຫຼວງວຽງຈັນ.
ສປປ ລາວ ໄດ້ມີແຜນພັດທະນາແຫ່ງຊາດດ້ານໂພຊະນາການໃນໂຮງຮຽນນັບຕັ້ງແຕ່ ປີ 2000, ຮ່ວມກັບຄູ່ຮ່ວມງານເຊັ່ນ: ອົງການອາຫານໂລກ (WFP), ອົງການບັນເທົາທຸກກາໂຕລິກ (CRS) ແລະ ທະນາຄານໂລກ, ຊຶ່ງໄດ້ຮັບການສະໜັບສະໜູນຈາກຜູ້ໃຫ້ທຶນຫຼາຍປະເທດດ້ວຍກັນ. ແຜນງານສົ່ງເສີມວຽກງານອາຫານທ່ຽງໃນໂຮງຮຽນ ໄດ້ດຳເນີນການຈັດຕັ້ງປະຕິບັດຢ່າງເປັນທາງການ ໃນປີ 2010 ໃນເຂດພື້ນທີ່ບູລິມະສິດຂອງລັດຖະບານ ໂດຍສະເພາະໃນບັນດາຂົງເຂດທີ່ມີຄວາມສ່ຽງຕໍ່ດ້ານສະບຽງອາຫານ ແລະ ການຂາດສານອາຫານສູງ.ໃນປີ 2020, ລັດຖະບານ ສປປ ລາວ ໄດ້ຈັດສັນງົບປະມານເພື່ອສົ່ງເສີມວຽກງານອາຫານໃນໂຮງຮຽນ ແລະ ໃນປີ 2022 ລັດຖະບານ ແຫ່ງ ສປປ ລາວ ໄດ້ອອກດຳລັດວ່າດ້ວຍການສົ່ງເສີມອາຫານທ່ຽງໃນໂຮງຮຽນ.
ການເຂົ້າຮ່ວມດັ່ງກ່າວ ຍັງໄດ້ສ້າງໂອກາດໃຫ້ ສປປ ລາວ ໃນການເຂົ້າຮ່ວມການສົນທະນາໃນລະດັບສາກົນ, ແລກປ່ຽນປະສົບການ ແລະ ຮຽນຮູ້ຈາກຜົນສຳເລັດຂອງບັນດາປະເທດທີ່ເປັນສະມາຊິກ. ໂດຍລວມແລ້ວ, ແມ່ນຈະຊ່ວຍໃຫ້ ສປປ ລາວ ສາມາດບັນລຸບັນດາເປົ້າໝາຍການພັດທະນາໃນລະດັບຊາດ ແລະ ສາກົນຕາມກຳນົດເວລາທີ່ເໝາະສົມ ແລະ ທ້າຍສຸດແລ້ວກໍປະກອບສ່ວນເຂົ້າໃນການພັດທະນາສັງຄົມ ໃຫ້ມີຄວາມເຂັ້ມແຂງ, ມີການສຶກສາ ແລະ ມີຄວາມຈະເລີນຮຸ່ງເຮືອງຫຼາຍຂຶ້ນ.
ສະຫະພັນອາຫານໃນໂຮງຮຽນແມ່ນການຄຸ້ມຄອງ-ບໍລິຫານຮ່ວມກັນໃນລະດັບສາກົນ ຊຶ່ງປະກອບມີ: ລັດຖະບານ, ຄູ່ຮ່ວມພັດທະນາ, ອົງການຈັດຕັ້ງທີ່ບໍ່ສັງກັດລັດຖະບານ ແລະ ຄູ່ຮ່ວມງານພາກເອກະຊົນ ທີ່ມີຄວາມມຸ່ງໝັ້ນເພື່ອຮັບປະກັນວ່າເດັກນ້ອຍທຸກຄົນສາມາດເຂົ້າເຖິງອາຫານທີ່ມີໂພຊະນາການໃນໂຮງຮຽນ ພາຍໃນປີ 2030. ສະຫະພັນດັ່ງກ່າວແມ່ນສະໜັບສະໜູນບັນດາປະເທດຕ່າງໆ ໃນການອອກແບບ ແລະ ການຈັດຕັ້ງປະຕິບັດວຽກງານອາຫານໃນໂຮງຮຽນ ທີ່ມີປະສິດທິພາບເພື່ອປັບປຸງວຽກງານດ້ານໂພຊະນາການ, ການສຶກສາ, ການປົກປ້ອງທາງສັງຄົມ ແລະ ປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ.
ສະຫະພັນອາຫານໃນໂຮງຮຽນໄດ້ລິເລີ່ມຈັດຕັ້ງປະຕິບັດໃນປີ 2021 ແລະ ປັດຈຸບັນມີຈຳນວນສະມາຊິກ 100 ປະເທດ, 3 ອົງການຈັດຕັ້ງທີ່ກ່ຽວຂ້ອງໃນເຂດພາກພື້ນ ແລະ ຫຼາຍກວ່າ 130 ອົງການຈັດຕັ້ງທີ່ເປັນຄູ່ຮ່ວມງານ. ສະຫະພັນອາຫານໃນໂຮງຮຽນແມ່ນໄດ້ຮັບການຊີ້ນຳ-ນໍາພາໂດຍຄະນະປະຕິບັດງານ ທີ່ປະກອບດ້ວຍສະຫະພາບອາຝຣິກາ, ລັດຖະບານຂອງປະເທດຝຣັ່ງ, ຟິນແລນ, ເບຣຊິນ, ເຄນຢາ, ຣູວັນດາ, ຍີ່ປຸ່ນ, ຊູແອດ, ຮອນດູຣັສ, ເຊເນການ, ກົວເຕມາລາ, ໄອແລນແລະ ສະຫະລັດອາເມຣິກາ. ອົງການອາຫານໂລກແມ່ນເຮັດໜ້າທີ່ເປັນກອງເລຂາຂອງສະຫະພັນດັ່ງກ່າວ.
ຂ່າວ: ອົງການອາຫານໂລກ
