ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສປປ ລາວ – ສປ ຈີນ ເພິ່ມທະວີການຮ່ວມມືສອງຝ່າຍ

ຕອນເຊົ້າຂອງວັນທີ 24 ມີນາ 2019, ທີ່ ນະຄອນຫຼວງພະບາງ.  ທ່ານ ນາງ ຄໍາເພົາ ເອີນທະວັນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະສອງຝ່າຍກັບ ທ່ານ ຄົ້ງ ສວນໂຢ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ ພ້ອມດ້ວຍຄະນະ, ທີ່ເດີນທາງມາຢ້ຽມຢາມເຮັດວຽກຢູ່ ສປປ ລາວ ໃນລະຫວ່າງວັນທີ 23-25 ມີນາ 2019, ເພື່ອຜັນຂະຫຍາຍຜົນການ ພົບປະລະຫວ່າງ ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ຫວັງ ອີ, ທີ່ປຶກສາ ແຫ່ງລັດ ແລະ ລັດຖະມົນຕີກະຊວງການຕ່າງປະເທດ ແຫ່ງ ສປ ຈີນ, ທີ່ນະຄອນຫຼວງວຽງຈັນ ໃນເດືອນທັນວາ 2018 ທີ່ຜ່ານມາ.

ໃນການພົບປະຄັ້ງນີ້, ສອງຝ່າຍ ໄດ້ຕີລາຄາສູງຕໍ່ການພົວພັນແບບຄູ່ຮ່ວມມືຍຸດທະສາດຮອບດ້ານ ໝັ້ນຄົງຍາວນານ ລະຫວ່າງ ລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍຢ່າງຕໍ່ເນື່ອງ ດ້ວຍຄຸນນະພາບອັນໃໝ່ທັງທາງກ້ວາງ ແລະ ທາງເລິກ, ກໍຄືການພົວພັນຮ່ວມມືລະຫວ່າງ ສອງພັກ, ສອງລັດ ແລະ ສອງກະຊວງການຕ່າງປະເທດໃນໄລຍະຜ່ານມາ, ຊຶ່ງສະແດງອອກໃນການແລກປ່ຽນການຢ້ຽມຢາມເຊິ່ງກັນ ແລະ ກັນ ຂອງຄະນະຜູ້ແທນຂັ້ນສູງສອງປະເທດຢ່າງເປັນປົກກະຕິ, ການຮ່ວມມືຂອບພາກພື້ນ ແລະ ອະນຸພາກພື້ນ; ເປັນຕົ້ນ ແມ່ນການຮ່ວມມື ຂອບອາຊຽນ-ຈີນ ແລະ ການຮ່ວມມືຂອບແມ່ນໍ້າຂອງ-ແມ່ນໍ້າລ້ານຊ້າງ ທີ່ຝ່າຍຈີນໃຫ້ບູລິມະສິດ 17 ໂຄງການແກ່ ສປປ ລາວໃນປີ 2017 ຈໍານວນ 13 ໂຄງການ ລວມມູນຄ່າຫຼາຍກວ່າ 3,4 ລ້ານ ໂດລາ ສະຫະລັດ ແລະ ປີ 2018 ຈໍານວນ 21 ໂຄງການ ລວມມູນຄ່າ 5 ລ້ານກວ່າ ໂດລາສະຫະລັດ. ສອງຝ່າຍ ໄດ້ປຶກສາຫາລື ກ່ຽວກັບ ການກະກຽມ ເຂົ້າຮ່ວມກອງປະຊຸມເວທີປຶກສາຫາລືລະດັບສູງໜຶ່ງແລວ ໜຶ່ງເສັ້ນທາງ ຄັ້ງທີ 2  ຕາມການເຊື້ອເຊີນ ແລະ ສືບຕໍ່ການຢ້ຽມຢາມພາຍໃນຂອງ ສະຫາຍ ບຸນຍັງ ວໍລະຈິດ, ເລຂາທິການໃຫຍ່,  ປະທານປະເທດ ແຫ່ງ ສປປ ລາວ ຊື່ງຈະມີຂຶ້ນໃນທ້າຍເດືອນເມສາ 2019, ທີ່ ນະຄອນຫຼວງປັກກິ່ງ. ການກະກຽມເຂົ້າຮ່ວມກອງປະຊຸມໂປອາວ ຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໃນທ້າຍເດືອນມີນາ ນີ້.

ສອງຝ່າຍ ຍັງໄດ້ປືກສາຫາຫລື ແລະ ແຈ້ງໃຫ້ກັນຊາບ ໃນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງສອງສະຫາຍການນຳສອງປະເທດຢ່າງຕັ້ງໜ້າ ແລະ ເຫັນວ່າມີຫຼາຍອັນມີຄວາມຄືບໜ້າ; ເປັນຕົ້ນ: ໂຄງການກໍ່ສ້າງເສັ້ນທາງລົດໄຟລາວ-ຈີນ, ໂຄງການກໍ່ສ້າງໂຮງຮຽນເຕັກນິກທາງລົດໄຟ, ການຈັດຕັ້ງຜັນຂະຫຍາຍທຶນຊ່ວຍເຫຼືອມູນຄ່າ 4 ຕື້ຢວນ, ການຈັດລຽງໂຄງການບູລິມະສິດ 8 ໂຄງການໃຫຍ່ ໃນໄລຍະ 3 ປີຕໍ່ໜ້າ (2018-2020).  ສອງຝ່າຍ ຍັງໄດ້ຕີລາຄາສູງຕໍ່ການຮ່ວມມື, ການປະສານສົມທົບ ແລະ ການສະໜັບສະໜູນເຊິ່ງກັນ ແລະ ກັນ ລະຫວ່າງ ສອງກະຊວງການຕ່າງປະເທດ ລາວ-ຈີນ; ໂດຍສະເພາະການຈັດຕັ້ງຜັນຂະຫຍາຍສັນຍາ ວ່າດ້ວຍ ການເພີ່ມທະວີການຮ່ວມມືໃນສະພາບການໃໝ່ ລະຫວ່າງ ສອງກະຊວງການຕ່າງປະເທດ ແຫ່ງ ສປປ ລາວ ແລະ ກະຊວງການຕ່າງປະເທດ ແຫ່ງ ສປ ຈີນ ທີ່ ໄດ້ລົງນາມໃນປີ 2017, ການແລກປ່ຽນຄຳຄິດຄຳເຫັນຕໍ່ບັນຫາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ.

ໃນໂອກາດນີ້, ອີກຄັ້ງໜຶ່ງ, ທ່ານ ຮອງລັດຖະມົນຕີ ຄຳເພົາ ເອີນທະວັນ ໄດ້ສະແດງຄວາມຍິນດີຕ້ອນຮັບ ທ່ານ ຮອງລັດຖະມົນຕີ ຄົ້ງ ສວນໂຢ ທີ່ເດີນທາງມາຢ້ຽມຢາມເຮັດວຽກ, ຊຶ່ງເປັນກົນໄກແລກປ່ຽນການຢ້ຽມຢາມເຮັດວຽກໃນລະດັບຮອງລັດຖະມົນຕີ ຂອງກະຊວງການຕ່າງປະເທດ ລາວ-ຈີນ ທີ່ໄດ້ປະຕິບັດມາຢ່າງເປັນປົກກະຕິທຸກໆປີ.

ໃນໂອກາດຢ້ຽມຢາມ ສປປ ລາວ ຄັ້ງນີ້, ທ່ານ ຄົ້ງ ສວນໂຢ ຍັງໄດ້ເຂົ້າຢ້ຽມຂໍານັບ ທ່ານ ຄໍາຂັນ ຈັນທະວີສຸກ, ເຈົ້າແຂວງຫຼວງພະບາງ, ຢ້ຽມຢາມໂຄງການທາງລົດໄຟ ລາວ-ຈີນ ແລະ ທ່ຽວຊົມສະຖານທີ່ສໍາຄັນທາງປະຫວັດສາດໃນນະຄອນຫຼວງພະບາງອີກຈໍານວນໜຶ່ງ.

ພິທະພອນ ໝື່ນຫຼວງ

ກົມການຂ່າວ, ກະຊວງການຕ່າງປະເທດ