ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສປປ ລາວ ສະເຫລີມສະຫລອງ ວັນຄົບຮອບ 50 ປີ ແຫ່ງການສ້າງຕັ້ງອາຊຽນ

ພິທີຊັກທຸງຂຶ້ນເສົາ ເນື່ອງໃນໂອກາດ ສະເຫລີມສະຫລອງ ວັນຄົບຮອບ 50 ປີແຫ່ງການສ້າງຕັ້ງອາຊຽນ ​ແລະ ວັນຄົບຮອບ 20 ປີ ທີ່ ສປປ ລາວ ​ເຂົ້າເປັນສະມາຊິກອາຊຽນ ​ໄດ້ຈັດຂຶ້ນໃນວັນທີ 11 ສິງຫານີ້ ຢູ່ນະຄອນຫລວງວຽງຈັນ, ​ໂດຍການເປັນປະທານຂອງ ທ່ານ ສະເຫລີໄຊ ກົມມະສິດລັດຖະມົນຕີ ກະຊວງການຕ່າງປະເທດມີບັນດາລັດຖະມົນຕີ ຮັບຜິດຊອບ 3 ​ເສົາຄ້ຳປະຊາຄົມອາຊຽນຄືລັດຖະມົນຕີ ກະຊວງການຕ່າງປະເທດ,ລັດຖະມົນຕີ ກະຊວງອຸດສາຫະກຳ ​ແລະ ການຄ້າລັດຖະມົນຕີ ກະຊວງຖະແຫລງຂ່າວ, ວັດທະນະທຳ ​ແລະ ທ່ອງທ່ຽວ ​ເຂົ້າຮ່ວມ.

ທ່ານ ສະເຫລີໄຊ ກົມມະສິດ ​ກ່າວວ່າພິທີຊັກທຸງຊາດລາວ ​ແລະ ທຸງອາຊຽນ ​ໃນຄັ້ງນີ້ ​ແມ່ນໜຶ່ງໃນບັນດາກິດຈະກຳ ​ເພື່ອລະນຶກເຖິງວັນທີ່ມີ ຄວາມໝາຍຄວາມສຳຄັນ ທາງດ້ານປະຫວັດສາດ ຂອງການສ້າງຕັ້ງອາຊຽນ ​ໃນປີ 1967 ​ແລະ ວັນເຂົ້າເປັນສະມາຊິກອາຊຽນ ຂອງ ສປປ ລາວ ​ໃນປີ 1997, ​ໃນໄລຍະ 50 ປີ ຜ່ານມາ ອາຊຽນ ​ໄດ້ເຕີບໃຫຍ່ຂະຫຍາຍຕົວຂຶ້ນ ເທື່ອລະກ້າວ ກາຍເປັນອົງການຈັດຕັ້ງພາກພື້ນ ລະຫວ່າງ ລັດຖະບານທີ່ມີຜົນສຳເລັດ, ​ເປັນທີ່ຮັບຮູ້ ​ແລະ ຍອມຮັບ ຂອງວົງຄະນະຍາດສາກົນສຳຄັນອາຊຽນ ​ໄດ້ກາຍເປັນປະຊາຄົມອາຊຽນ ​ໃນທ້າຍປີ 2015 ​ເຊິ່ງສປປ ລາວ ກໍໄດ້ປະກອບສ່ວນຢ່າງຫ້າວຫັນ ​ໃນຂະບວນການ ສ້າງປະຊາຄົມອາຊຽນດັ່ງກ່າວ ​ໃນໄລຍະ 2 ທົດສະຫວັດຜ່ານມາ ອັນໄດ້ນຳຜົນປະໂຫຍດມາສູ່ ສປປ ລາວແລະ ອາຊຽນ.

ພິທີ​ຊັກທຸງດັ່ງກ່າວ, ​ໄດ້ມີການບັນເລງ ເພງຊາດລາວ ​ແລະ ​ເພງອາຊຽນ ( ASEAN Way) ​ໂດຍກອງດຸລິຍາງ ກອງທັບປະຊາຊົນລາວ ​ແລະ ຖືເປັນໜຶ່ງກິດຈະກຳ ສະເຫລີມສະຫລອງ 2 ວັນສຳຄັນ ທີ່ ສປປ ລາວ ຈະໄດ້ຈັດຂຶ້ນຕະຫລອດປີ 2017.

ຂ່າວຈາກ: ຂປລ