ສປປ ລາວ ສະແດງຄວາມຍິນດີສະໜັບສະໜູນບັນດາປະເທດສະມາຊິກສັນຍາຄູ່ຮ່ວມມືເສດຖະກິດຮອບດ້ານໃນພາກພື້ນ ຫລື RCEP.

ໃນໂອກາດ ເຂົ້າຮ່ວມກອງປະຊຸມເວທີປຶກສາຫາລືການຮ່ວມມືນະຄອນມິດຕະພາບແລະອົງການປົກຄອງທອ້ງຖິ່ນຂອງບັນດາປະເທດສະມາຊິກ RCEP ທີ່ຈັດຂຶ້ນໃນວັນທີ 21 ມິຖຸນານີ້ ທີ່ນະຄອນ ຫວງຊ່ານ ແຂວງ ອ່ານຮຸ່ຍ ສປ ຈີນ ທ່ານ ສົມມາດ ພົລເສນາ ຮອງປະທານສະພາແຫ່ງຊາດລາວ ໄດ້ກ່າວບາງຕອນສຳຄັນວ່າ:ພວກຂ້າພະເຈົ້າມີ ຄວາມພາກພູມໃຈເປັນຍ່າງຍິ່ງທີ່ເຫັນວ່າ ການຮ່ວມມືລະຫວ່າງ ສປ. ຈີນ ແລະ ບັນດາປະເທດ ໃນພາກພື້ນ ໄດ້ຮັບການພັດທະນາຢ່າງແຂງແຮງ ແລະ ໄດ້ຮັບການຂະຫຍາຍຕົວເປັນກ້າວໆມາ ໂດຍສະເພາະໃນຂົງເຂດການຄ້າ, ການລົງທຶນ, ການສຶກສາ, ວັດທະນະທໍາ-ສັງຄົມ ແລະ ການທ່ອງທ່ຽວ. ສິ່ງເຫລ່ານີ້ ົ້ ໄດ້ກາຍເປັນພື້ນຖານໃຫ້ແກ່ການເພີ່ມທະວີ ການຮ່ວມມື, ຄວາມເຂົ້າອົກເຂົ້າໃຈເຊິ່ງກັນ ແລະ ກັນ ບົນພື້ນຖານການເປັນເພື່ອນບ້ານທີ່ດີເຊິ່ງໄດ້ນໍາຜົນປະໂຫຍດມາສູ່ ບັນດາປະເທດປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະ ພາບ ແລະ ການຮ່ວມມືເພື່ອການພັດທະນາ ພາກພື້ນ ແລະ ສາກົນອີກດ້ວຍສປປ ລາວ ຍາມໃດກໍສະໜັບສະໜູນນະໂຍບາຍຈີນດຽວ, ພວກຂ້າພະເຈົ້າສະໜັບສະໜູນແລະ ຕັ້ງໜ້າເຂົ້າຮ່ວມ ຂໍ້ລິເລີ່ມ ຂອງສະຫາຍ ສີ ຈິ້ນຜິງ ປະທານປະເທດ ແຫ່ງ ສປ ຈີນ ກ່ຽວກັບຂໍ້ລິເລີ່ມ “ໜື່ງແລວທາງໜື່ງເສັ້ນທາງ”, ຂໍ້ລິເລີ່ມ “ການພັດທະນາໂລກ”, ຂໍ້ລິເລີ່ມ “ຄວາມໝັ້ນຄົງໂລກ” ແລະ ຂໍ້ລິເລີ່ມ “ອະລິຍະທໍາໂລກ”;

ພວກຂ້າພະເຈົ້າຕີລາຄາສູງ ຕໍ່ຜົນສໍາເລັດ ໃນການພົວພັນຮ່ວມມືລະຫວ່າງສອງປະເທດລາວ-ຈີນ ຕະຫຼອດໄລຍະຜ່ານມາ ໄດ້ຂະຫຍາຍຕົວຢ່າງບໍ່ຢຸດຢັ້ງ ມີການພົວພັນກັນນັບມື້ນັບເລິກເຊິ່ງ ຕາມທິດ 4 ດີ , ເພື່ອນທີ່ດີ , ສະຫາຍທີ່ດີ , ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີ່ດີ ; ການຮ່ວມມືທາງ ດ້ານການເມືອງ, ສອງປະ ເທດລາວ-ຈີນ ມີຄວາມໄວ້ເນື້ອເຊື່ອໃຈ

ແລະ ສະໜັບສະໜູນ ເຊິ່ງກັນ ແລະ ກັນ ໃນລະດັບສູງ, ມີການແລກປ່ຽນ ການຢ້ຽມຢາມລະຫວ່າງການນໍາຂັ້ນສູງ ແລະ ຂັ້ນຕ່າງໆຈາກສູນກາງ ແລະ ທ້ອງຖິ່ນເປັນປົກະຕິ. ໂດຍສະເພາະ ໃນເດືອນຕຸລາ 2023 ຜ່ານມາ ສະຫາຍ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ເດີນທາງເຂົ້າຮ່ວມ ເວທີປຶກສາຫາລືລະດັບສູງ ໜື່ງແລວທາງ ໜື່ງເສັ້ນທາງ ຄັ້ງທີ III ທີ່ນະຄອນ ຫຼວງປັກກິ່ງ ແລະ ໄດ້ຮ່ວມກັບ ສະຫາຍ ສີ ຈິ້ນ ຜິງ ປະທານປະເທດແຫ່ງ ສປ ຈີນລົງນາມໃນແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ – ຈີນ, ສະບັບໃໝ່ ໄລຍະປີ 2024-2028;

ການຮ່ວມມືທາງດ້ານເສດຖະກິດ ລະຫວ່າງ ລາວ-ຈີນ ໄດ້ມີຜົນສໍາເລັດອັນໃໝ່, ເປັນຕົ້ນແມ່ນ ສປ ຈີນ ເປັນປະເທດລົງທຶນຢູ່ ສປປ ລາວ ຫຼາຍທີ່ສຸດ ແລະ ສປ ຈີນ ກໍເປັນຄູ່ຄ້າໃຫຍ່

ອັນດັບສອງຂອງລາວ, ເຊີ່ງປັດຈຸບັນ ສປ ຈີນ ມີ 900 ກວ່າໂຄງການທີ່ລົງທຶນຢູ່ ສປປ ລາວ ໃນທຸກຂົງເຂດ ອັນພົ້ນເດັ່ນແມ່ນ ວຽກງານສຶກສາ, ສາທາລະນະສຸກ, ພະລັງງານ, ບໍ່ແຮ່, ອຸດສາຫາກໍາ, ເຕັກໂນໂລຊີ , ສິ່ງແວດລ້ອມ ກະສິກໍາ ແລະ ອື່ນໆ. ລວມມູນຄ່າ 13 ຕື້ໂດລາສະຫະລັດ. ພ້ອມນັ້ນ, ມູນຄ່າການ ຄ້າລາວ-ຈີນ ແຕ່ເດືອນມັງກອນ ຫາ ຕຸລາ 2023 ບັນລຸໄດ້ 5,56 ຕື້ ໂດລາ, ທຽບໃສ່ໄລຍະດຽວກັນ ຂອງປີຜ່ານມາ ເພີ່ມຂື້ນ 24,5% ຂະນະດຽວກັນ, ນັກທ່ອງທ່ຽວຈີນ ກໍ່ຈັດຢູ່ໃນອັນດັບ 2 ຂອງນັກທ່ອງທ່ຽວຕ່າງປະເທດ ທີ່ມາທ່ອງທ່ຽວ ລາວ ໃນປີ 2024, ມີ 6ແສນກວ່າຄົນ; ການພົວພັນຮ່ວມມື ລະຫວ່າງ ບັນດາທ້ອງຖິ່ນ ຂອງລາວ ແລະ ຈີນ ໃນໄລຍະຜ່ານມາ ມີຈໍານວນຫຼາຍ, ມີ ທັງທ້ອງຖິ່ນທີ່ມີ ຊາຍແດນຕິດຈອດກັນ ແລະ ບໍ່ຕິດຈອດກັນ, ຕິດຕາມຄະນະ

ພວກຂ້າພະເຈົ້າມາຮ່ວມກອງປະຊຸມໃນມື້ນີ້ ມີຜູ້ແທນທີ່ມາຈາກ ແຂວງໄຊສົມບູນ ແລະ ແຂວງສາລະວັນ ເຊິ່ງເປັນແຂວງ ທີ່ໄດ້ມີການພົວພັນຮ່ວມມືທີ່ດີ ກັບທ້ອງຖິ່ນຂອງຈີນ. ສະເພາະແຂວງ ອ່ານຮຸຍ ກໍ່ໄດ້ເຊັນບົດບັນທຶກການພົວພັນກັບ ແຂວງ ອັດຕະປື ຂອງ ສປປ ລາວ, ພ້ອມກັນນັ້ນ,ບໍລິສັດ ຊື້ຊ່ວງ ຈາກແຂວງ ອ່ານ ຮຸຍ ຍັງໄດ້ຊ່ວຍເຫຼືອ ການສ້າງ ແລະ ສະໜອງອຸປະກອນ ສໍາລັບສະຖານ ອຸຕຸນິຍົມອຸທົກກະສາດ ໃຫ້ກັບສູນຊັບພະຍາກອນນຳ້ແຫ່ງຊາດລາວ; ພວກຂ້າພະເຈົ້າ ມີຄວາມ ຍິນດີຕ້ອນຮັບບັນດາບໍລິສັດ ຂອງ ສປ ຈີນ ທີ່ມີຄວາມສາມາດ ແລະ ມີຄວາມສົນໃຈ ເຂົ້າມາລົງທຶນ ຢູ່ ສປປ ລາວ ໂດຍສະເພາະຈາກແຂວງ ອານ ຮຸ້ຍ;

ພວກຂ້າພະເຈົ້າຕີລາຄາສູງຕໍ່ ລັດຖະບານຂອງສອງປະເທດ ທີ່ໄດ້ເອົາໃຈໃສ່ຈັດຕັ້ງປະຕິບັດບັນດາໂຄງການ ຮ່ວມມື ແລະ ຊ່ວຍເຫຼືອ ຂອງ ສປຈີນ ຢູ່ ສປປ ລາວ ເປັນຕົ້ນແມ່ນໂຄງການເສັ້ນທາງລົດໄຟ ລາວ-ຈີນ, ໂຄງການເສັ້ນທາງດ່ວນວຽງຈັນ-ວັງວຽງ, ເຂດພັດທະນາກວມລວມໄຊເສດຖາ, ໂຄງການປັບປຸງໂຮງໝໍມະໂຫສົດ, ໂຄງການຊ່ວຍເຫຼືອແກ້ໄຂຄວາມທຸກຍາກຢູ່ທ້ອງຖິ່ນ ຂອງ ສປປ ລາວ ເຊິ່ງພວມນໍາເອົາຜົນສໍາເລັດ ແລະ ຜົນປະໂຫຍດມາສູ່ປະຊາຊົນລາວ, ພິເສດເປັນການປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ.

ຂ່າວ: ເພັດສະໝອນ ພົງພະໂຍສິດ