ກົມເຕັກໂນໂລຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ຮ່ວມກັບບໍລິສັດ SettleMint ກຽມສຶກສາຄວາມເປັນໄປໄດ້ ໃນການນຳໃຊ້ເຕັກໂນໂລຊີ Blockchain ເພື່ອສົ່ງເສີມຜະລິດຕະພັນກະສິກໍາ ແນໃສ່ການເພີ່ມມູນຄ່າ ແລະ ການສົ່ງອອກ.
ໂດຍພິທີເຊັນສັນຍາຮ່ວມມືກັນດັ່ງກ່າວ ເກີດຂຶ້ນເມື່ອບໍ່ດົນມານີ້, ລົງນາມໂດຍ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕອນ ແລະ ທ່ານ Mathieu Ploton ຜູ້ອໍານວຍການ ບໍລິສັດ GDMS ພ້ອມທັງເປັນຜູ້ຕາງໜ້າບໍລິສັດ SettleMint, ມີຮອງຫົວໜ້າກົມເຕັກໂນໂລຊີດິຈິຕອນ, ບັນດາຄະນະພະແນກ, ສູນ ແລະ ພະນັກງານທີ່ກ່ຽວຂ້ອງເຂົ້າຮ່ວມ.
ອີງຕາມ ຂໍ້ມູນຈາກ ຂ່າວສານ ເຕັກໂນໂລຊີ ແລະ ການສື່ສານ, ເປົ້າໝາຍຂອງໂຄງການດັ່ງກ່າວແມ່ນ ການພັດທະນາລະບົບການເຂົ້າເຖິງລາຍລະອຽດຜະລິດຕະພັນກະສິກຳ. ເພື່ອໃຫ້ຜູ້ບໍລິໂພກສາມາດເຂົ້າເຖິງຂໍ້ມູນຕ່າງໆ ນັບຕັ້ງແຕ່ຂັ້ນຕອນການຜະລິດໄປຈົນເຖິງຂັ້ນຕອນການແປຮູບເປັນຜະລິດຕະພັນກະສິກໍາ ທີ່ຜູ້ບໍລິໂພກຊົມໃຊ້.
Blockchain ແມ່ນເຕັກໂນໂລຊີການປະມວນຜົນຂໍ້ມູນ ແລະ ການເກັບຮັກສາຂໍ້ມູນແບບກະຈາຍສູນ ຫຼື Distributed Ledger Technology (DLT) ຊຶ່ງເປັນຮູບແບບການບັນທຶກຂໍ້ມູນທີ່ໃຊ້ຫຼັກການ Cryptography ຮ່ວມກັນກັບກົນໄກການເປັນເອກະສັນກັນ (Consensus), ໂດຍຂໍ້ມູນທີ່ບັນທຶກໄວ້ໃນລະບົບ Blockchain ນັ້ນຈະສາມາດແກ້ໄຂໄດ້ຍາກ. ນີ້ຈະຊ່ວຍເພີ່ມຄວາມຖືກຕ້ອງ ແລະ ຄວາມໜ້າເຊື່ອຖືຂອງຂໍ້ມູນ.
ການນຳເອົາລະບົບເຕັກໂນໂລຊີນີ້ເຂົ້າມານຳໃຊ້ ຈະຊ່ວຍສ້າງຄວາມໄວ້ວາງໃຈ, ຄວາມໂປ່ງໃສ, ສາມາດກວດສອບໄດ້ ແລະ ການຢັ້ງຢືນແຫຼ່ງກຳເນີດຂອງຜະລິດຕະພັນ. ສ້າງຄວາມເຊື່ອໝັ້ນໃຫ້ແກ່ຜູ້ບໍລິໂພກໃນການຕັດສິນໃຈຊື້ສິນຄ້າກະສິກຳຂອງລາວ. ເພີ່ມມູນຄ່າໃຫ້ກັບຜະລິດຕະພັນ ແລະ ສະໜັບສະໜູນການສົ່ງອອກສິນຄ້າກະສິກຳຈາກ ສປປ ລາວ ອີກດ້ວຍ.
ເຕັກໂນໂລຊີ Blockchain ໄດ້ຖືກນໍາໃຊ້ເຂົ້າໃນຂະແໜງຕ່າງໆມາດົນແລ້ວ, ບໍ່ພຽງແຕ່ຈໍາກັດໃນຂະແໜງການເງິນເທົ່ານັ້ນ. ແຕ່ເຕັກໂນໂລຊີ blockchain ຍັງຖືກນໍາໃຊ້ໃນການກະສິກໍາ ແລະ ຄວາມປອດໄພດ້ານສະບຽງອາຫານ.
ໂດຍທ່ານ ປະສິດທິເດດ ຫຼວງວິໄລ, ຫົວໜ້າສູນຂໍ້ມູນດິຈິຕອນ, ກົມເຕັກໂນໂລຊີດິຈິຕອນ ກ່າວວ່າ: ໃນປັດຈຸບັນ, ເຕັກໂນໂລຊີກຸ່ມຂໍ້ມູນຜູກພັນ ໄດ້ຖືກນໍາໃຊ້ຢ່າງກວ້າງຂວາງເຂົ້າໃນວຽກງານຕົວຈິງໃນຫຼາຍຂົງເຂດຂະແໜງການ ຊຶ່ງບໍ່ພຽງແຕ່ນໍາໃຊ້ເຂົ້າໃນຂະແໜງການ ການເງິນເທົ່ານັ້ນ, ແຕ່ເຕັກໂນໂລຊີກຸ່ມຂໍ້ມູນຜູກພັນຍັງນໍາໃຊ້ເຂົ້າໃນຂົງເຂດວຽກງານ ກະສິກຳ ແລະ ການຄ້ຳປະກັນສະບຽງອາຫານ (Agriculture and Food Security) ໂດຍສະເພາະການນຳໃຊ້ເຂົ້າໃນການພັດທະນາ ລະບົບການຄຸ້ມຄອງຕ່ອງໂສ້ຂອງການສະໜອງອາຫານ (Food Supply Chain Management System) ທີ່ມີແນວໂນ້ມການນຳໃຊ້ທີ່ສູງຂຶ້ນໃນທົ່ວໂລກ ແລະ ໄດ້ຮັບການສົ່ງເສີມຈາກບັນດາອົງການຈັດຕັ້ງສາກົນ ເຊັ່ນ: ອົງການອາຫານ ແລະ ການກະເສດຂອງສະຫະປະຊາຊາດ (FAO), ອົງການສະຫະປະຊາຊາດ ກ່ຽວກັບການຄ້າ ແລະ ການພັດທະນາ (UNCTAD) ແລະ ສະຫະພາບເອີຣົບ (EU) ຊຶ່ງເປັນຕົວກາງທີ່ຊ່ວຍໃຫ້ຊາວກະສິກອນ ເຂົ້າເຖິງການບໍລິການດ້ານການເງິນທີ່ໂປ່ງໃສ, ຊ່ວຍອຳນວຍຄວາມສະດວກໃນເລື່ອງຂອງການຕິດຕາມ ແລະ ແລກປ່ຽນສິນຄ້າ.
ບໍລິສັດ Belgium SettleMint ມີຜູ້ຊ່ຽວຊານທີ່ມີປະສົບການໃນເຕັກໂນໂລຊີ blockchain ແລະ ໄດ້ຮັບຜົນສຳເລັດໃນການລະດົມທຶນໜູນຊ່ວຍລັດຖະບານຫວຽດນາມ. ບໍລິສັດຈະຊ່ວຍຊອກຫາແຫຼ່ງທຶນ ແລະ ພັດທະນາລະບົບການເຂົ້າເຖິງຂໍ້ມູນລະອຽດກ່ຽວກັບຜະລິດຕະພັນກະເສດໃນ ສປປ ລາວ ໂດຍສະເພາະສິນຄ້າສົ່ງອອກເຊັ່ນ: ກາເຟ ແລະ ຊາ.
ຮູບພາບ ແລະ ຂໍ້ມູນ: ຂ່າວສານ ເຕັກໂນໂລຊີ ແລະ ການສື່ສານ
